శివరాత్రి-శివుని ప్రత్యేకతలు-శివతత్త్వం

ఈ రోజు ఉదయమే ఒక అర్జెంట్ ఫోన్ కాల్ తో లేచాను.ఎక్కడో ఏదో అయింది అర్జంటుగా పరిగెట్టాలంటే,వెంటనే పది నిముషాలలో తయారై మావాళ్లకి ఫోన్ చేసి వాళ్ళనూ వెంటనే బయల్దేరమని చెప్పి ఉదయం ఆరింటికే బయల్దేరాము. ఊరిలో పరవాలేదు గాని ఊరు బయటకు వెళ్లేసరికి,ఇంకా సూర్యోదయం బాగా అవలేదేమో మంచుమంచుగా ఉండి ఇది గుంటూరేనా లేక సిమ్లానా అన్నట్లు దారే కనిపించడం లేదు.మొత్తానికి ఆ మంచులో పడి అలాగే డ్రైవ్ చేసుకుంటూ వెళ్ళి అక్కడ చూడవలసిన పనిని పూర్తిచేసేసరికి ఉదయం పదిన్నరైంది.

మాటల్లో మా కొలీగ్ ఒకాయన ఇలా అన్నాడు.

'పొద్దున్నే లేచి స్నానం చేసి శివునికి పూజ చేసుకుందామని కూచున్నాను. ఈలోపల ఫోన్ కాల్ వచ్చింది.పరిగెత్తుకుంటూ వచ్చేశాను.శివరాత్రిరోజున కూడా ఇదేమిటి ప్రశాంతంగా లేకుండా?ఏమిటో మన ఉద్యోగాలు?' అన్నాడు.

'ఉద్యోగం ఏం చేసింది?ప్రశాంతత బయట ఉందా లోపలుందా?' అడిగాను.

అతను వింతగా చూచాడు.

'అదికాదు సార్.ప్రశాంతంగా పూజ చేసుకోనివ్వకుండా ఇదెంటో ఈ రోజున కూడా మనకు ఈ ఎమర్జెంసీస్?' అన్నాడు.

'ఎమెర్జెన్సీ అంటేనే చెప్పకుండా ముంచుకొచ్చేది.చెప్పివస్తే అది అదెందుకౌతుంది?' అన్నాను.

మళ్ళీ అలాగే చూస్తున్నాడు.

'ముందు ప్రశాంతంగా పని చేసుకుంటే ఆ తర్వాత ఇంటికెళ్ళి ప్రశాంతంగా పూజ చేసుకోవచ్చు' అన్నాను నవ్వుతూ.

నేనేమంటున్నానో ఆయనకర్ధం కాలేదు.

'మీరు కూడా నాలాగే పూజలోనుంచి లేచి వచ్చారా?' అడిగాడు.

'పూజా?నేనింకా స్నానమే చెయ్యలేదు' అని జవాబు చెప్పాను.

అతను అదోరకంగా చూచాడు.

ఇక నేను ఏమీ జవాబు ఇవ్వదలుచుకోలేదు.మౌనంగా ఉండిపోయాను.

చాలామంది ఇంతే.లౌకికం వేరు ఆధ్యాత్మికం వేరు అనుకుంటూ ఆ భ్రమలోనే జీవితమంతా వెళ్ళబుచ్చుతూ ఉంటారు.అందుకే చాలామంది సొ కాల్డ్ భక్తులూ ఆధ్యాత్మికులలో కూడా స్ప్లిట్ పర్సనాలిటీలూ స్కిజోఫ్రేనిక్లూ ఉంటారు. మనం అనుకున్నది అనుకున్నట్లు జరిగితే అదే ఆధ్యాత్మికమనీ దేవుని దయ మనమీద ఉన్నదనీ చాలామంది భ్రమపడుతూ ఉంటారు.మనం కోరిన కోరికలు తీరకపోతే దేవుని దయ మనమీద లేదనుకుంటారు.కోరికలు తీరడం ఆధ్యాత్మికత ఎలా అవుతుందో నాకైతే అర్ధం కాదు.అసలు కోరికలు అంటూ ఎప్పటికైనా పూర్తిగా తీరతాయా?వాటికి అంతూపొంతూ ఉంటుందా అనేది కూడా నాకేమీ పాలుపోదు.ఇలాంటి వాళ్ళని చూస్తే నాకు జాలి కలుగుతూ ఉంటుంది.నిజమైన దేవుని దయ ఎలా ఉంటుందో,అసలదేమిటో,కోటిమందిలో ఒకరికైనా అర్ధమౌతుందో లేదో నాకైతే అనుమానమే.

కోరికలు తీరడమూ దయే,తీరకపోవడమూ దయే.అసలు కోరికలంటూ కోరని స్థితే అసలైన దయ అన్నవిషయం చాలామందికి అర్ధం కాదు.

పని పూర్తయింది.ఇంతలో ఇంకో కొలీగ్ వచ్చి'సార్.అందరం పొద్దున్నే బయల్దేరి వచ్చాంకదా.ఇప్పటిదాకా ఏమీ తిని ఉండరు.ఉప్మా చేయించాను. రండి తిందాం' అన్నాడు.

మొదటి కొలీగ్ ' నేను ఇంటికెళ్ళి మళ్ళీ స్నానంచేసి పూజ చేసుకుంటే గాని ఏమీ తినను తాగను.అందులో ఇవాళ శివరాత్రి కూడా కదా' అన్నాడు.

అతని వైపు జాలిగా చూచాను.అతను బయల్దేరి వెళ్ళిపోయాడు.

'సరే పదండి' అని ఆ ఉప్మా తిని టీ తాగి ఇక ఇంటికి బయలుదేరదామని అనుకుంటూ ఉండగా మావాళ్ళు 'సార్ దారిలోనే కాకాని శివాలయం ఉన్నది.దర్శనం చేసుకుని వెళదాం రండి' అన్నారు.

'సరే పదండి.అయితే ఒకటి.మన పరపతి ఏమీ ఉపయోగించవద్దు.హడావుడి చెయ్యవద్దు.మామూలుగా వెళ్ళి దర్శనం చేసుకుని వచ్చేద్దాం.ఒకవేళ దర్శనం కాకపోయినా మీరు బాధపడకండి' అన్నాను.

సరే అని అందరం తిరుగు ప్రయాణంలో బయలుదేరాము.

కాకాని శివాలయం దగ్గర కనీసం ఒక నాలుగు వేలమంది జనం ఉన్నట్లు కనిపించింది.గుడిచుట్టూ క్యూ నాలుగు రౌండ్లు తిరిగి ఉన్నది.ఆ క్యూలో నిలబడితే దర్శనం అయ్యేసరికి సాయంత్రం అయ్యేలా ఉన్నది.అందుకని గుడి చుట్టూ ఒక ప్రదక్షిణం చేసి ధ్వజస్తంభం దగ్గర నిలబడి ఒక నమస్కారం చేసుకుని బయటకు వచ్చేసాం.అక్కణ్ణించి కూడా ఆ జనం తలలు తప్ప లోపలున్న శివలింగం అసలేమీ కనబడటం లేదు.

మైకులో ఎవరో శివమహిమను గురించి వివరిస్తున్నాడు.ఏమిటా అని ఒక చెవి అటు వేశాను.'శివునికి చాలా ప్రత్యేకతలున్నాయి.ఆయన లయకారకుడు. భోలా శంకరుడు' అంటూ ఏమేమో చెబుతున్నాడు.

నాకు నవ్వొచ్చింది.మౌనంగా బయటకొచ్చి మా బైకులు తీసుకుని కొద్దిసేపట్లో గుంటూరు చేరుకున్నాము.

ఎక్కడైనా మంచి టీ తాగుదాం అని ఒక టీ స్టాల్ దగ్గర ఆగాము.

టీ తాగుతుండగా 'శివరాత్రి రోజున అనుకోకుండా శివదర్శనం అయింది.చాలా పుణ్యం కదా సార్.' అని మా ఇన్స్పెక్టర్ ఒకాయన అన్నాడు.

'అదేమీ లేదు.' అన్నాను.

ఆయనకూడా వింతగా చూచాడు.

'ఈరోజున శివదర్శనం అయితే ఎక్కువపుణ్యం అనీ ఇంకొకరోజున తక్కువపుణ్యం అనీ ఉండదు.ఏరోజున శివదర్శనం అవుతుందో అదే శుభదినం.అయితే మీరనుకుంటున్న శివదర్శనం గురించి నేను చెప్పడం లేదు.' అన్నాను.

మళ్ళీ అదే చూపు.

'ఇందాక మీరు గుడిలో మైకులో విన్నారో లేదో?శివుని ప్రత్యేకతల గురించి చెబుతున్నాడు ఒకాయన.నిజమేమిటో చెప్పనా?శివునికి ఏ ప్రత్యేకతలూ లేవు.ఏ ప్రత్యేకతలూ లేని సహజతత్త్వమే శివతత్త్వం.ఆయన నిర్వికారుడు. అంటే ఏ వికారమూ ఆయనలో ఉండదు.ఆయన నిశ్చలుడు. అంటే ఏ విధమైన చలనమూ ఆయనలో ఉండదు.ఆయన నిర్గుణుడు.అంటే మూడు గుణాలకూ అతీతుడు.ఆయన నిష్కళంకుడు.అంటే ఏ విధమైన కళంకమూ ఆయనలో ఉండదు.ఆయన నిరవద్యుడు,అంటే ఏ విధమైన చెడూ లేనివాడు.ఆయన నిరంజనుడు.అంటే ఏ విధమైన మాలిన్యమూ లేనివాడు.

ఏదీ తానుకాడు గనుక అన్నీ తానే.ఏదీ తనకు అంటదు కాని అన్నీ తనలో ఉన్నాయి.అన్నిట్లో ఉన్నాడు కనుక దేనికీ లోబడడు.ఇంద్రియములకు అతీతమై నిశ్చలమై అఖండ సచ్చిదానందమై నిత్యమూ వెలుగుతున్నదే శివతత్త్వం.దానిలో ఏ ప్రత్యేకతలూ లేవు.'

"తెలిసీ తెలియనివారు ఇలా మైకుల్లో టీవీలలో ఏవేవో చెబుతూ ఉంటారు. జనం వింటుంటారు.నిజమని భ్రమిస్తుంటారు.కోరికలు తీరితే దేవుని దయ ఉందనుకుంటారు.తీరకపోతే లేదనుకుంటారు.మతాలు మారిపోతుంటారు. దేవుళ్ళని మారుస్తూ ఉంటారు.ఇదంతా మామూలే.మాయాప్రభావం ఇలాగే ఉంటుంది.' అన్నాను.

టీ త్రాగటం అయింది.

'ఇక పదండి ఇళ్లకు పోదాం.'అన్నాను.

'ఇంటికెళ్ళి ప్రత్యెకపూజ ఏమైనా చేస్తారా ఈరోజు?' అడిగాడు.

'ఇప్పుడు చేస్తున్నది పూజ కాకపోతేగా?'అన్నాను.

ఎవరి ఇంటికి వారు బయలుదేరాం.

read more " శివరాత్రి-శివుని ప్రత్యేకతలు-శివతత్త్వం "

జాన్ హిగ్గిన్స్ భాగవతార్ జాతకం

మనలో చాలామందికి మన శాస్త్రీయ సంగీతం అంటే ఏమిటో తెలియదు. అదంటే చాలామందికి ఏమిటో తెలియని ఏవగింపు ఉంటుండటం కూడా నేను గమనించాను.మనవాడే అయిన సద్గురుత్యాగరాజు ఎన్ని కీర్తనలు వ్రాసినాడో మనకు తెలియదు.ఎన్ని రాగాలను ఆయన స్పృశించాడో మనకు అర్ధం కాదు. వాటిలో కనీసం ఒకటి రెండు కీర్తనలన్నా నేర్చుకుందామని మనకు తోచదు.నారాయణ తీర్ధులంటే ఎవరో క్షేత్రయ్య అంటే ఎవరో ఈ తరంలో వారికి చాలామందికి తెలియదు.

తమ సంస్కృతిని నిర్లక్ష్యం చెయ్యడంలో తెలుగువారిని మించిన వారు ఎవరూ లేరు అనేది నా నిశ్చితాభిప్రాయం.పంచెకట్టు తప్ప అసలు మనకంటూ ఒక సంస్కృతి ఉన్నదా అనేది కూడా నాకు అనుమానమే.అదే తమిళనాడుగాని కేరళగాని కర్నాటకగాని చూస్తే వారికంటూ ప్రత్యెక సంస్కృతులు ఉన్నాయి. భాషాభిమానం మనకంటే కొన్ని వేలరెట్లు వారికి ఉన్నది.మనంత దిగజారుడుతనమూ విలువలులేనితనమూ వారికి లేవు.

అసలు మన తెలుగువాళ్లంత దరిద్రపు జాతి ఎక్కడా ఉండదేమో అని నానాటికీ నాకు అభిప్రాయం బలపడుతున్నది.మన భాష మనకు పట్టదు.మన సంస్కృతి మనకు పట్టదు.మన కళలు మనకు పట్టవు.మన ఆధ్యాత్మికత మనకు పట్టదు.చివరికి మన రాష్ట్రం కూడా మనకు పట్టదు.అది ఎన్ని ముక్కలైనా మనకు అనవసరం.ఎవడికి చేతనైనది వాడు దోచుకుంటే చాలు. రాష్ట్రం ఏమైపోయినా మనకు అనవసరం.డబ్బు ఒక్కటి ఉంటే మనకు చాలు.సంస్కృతీ సంప్రదాయమూ మతమూ ఏవీ మనకు అక్కర్లేదు.దొంగల గుంపు తప్ప ఇక్కడ ఏమీ లేదని నాకనిపిస్తున్నది.

ఈ మధ్యలో నాకొక ఆలోచన బలంగా కలుగుతున్నది.ఆంధ్రాను వదిలిపెట్టి ఏదైనా వేరే రాష్ట్రంలో పోయి స్థిరపడదామా అన్నంత అసహ్యం ఇక్కడి మనుషులను చూస్తే నాకు కలుగుతున్నది.ఎక్కడ చూచినా ఇంతమంది దొంగలున్న రాష్ట్రం ఇండియా మొత్తం మీద బహుశా ఇదేనేమో?బహుశా ఇందుకేనేమో నారాయణతీర్ధులు,త్యాగరాజువంటి ఎందఱో మహనీయులు అందరూ ఆంధ్రాను వదిలిపెట్టి ఇతర రాష్ట్రాలలో పోయి స్థిరపడ్డారు.

ఈ మాటన్నందుకు చాలా మందికి కోపం రావచ్చు.అలాంటి ఆషాఢభూతులకు ఒకమాట చెబుతాను.పక్కనే ఉన్న తమిళనాడుని గాని కేరళనుగాని కర్ణాటకనుగాని విభజించాలని ప్రయత్నించి చూడండి.ఏమౌతుందో చూద్దాం. చస్తే కుదరదు.వారికి ఉన్న భాషాభిమానం గాని ఆత్మాభిమానం గాని రాష్ట్రాభిమానం గాని మనకేవి?కనుక నేనన్నమాట వాస్తవమే.ఊరకే కోపాలు వస్తే ఉపయోగం లేదు.వాస్తవాలు కళ్ళెదుట కనిపించాలి.

తెలుగుజాతి అంత దరిద్రపుజాతి ఎక్కడా ఉండదు అనేది వాస్తవం.ఇంతకు ముందు ఎవరైనా ఈమాట అంటే నేనూ ఒప్పుకునేవాడిని కాదు.కాని ఈ మధ్య జరిగిన జరుగుతున్న పరిణామాలు చూచి నా అభిప్రాయం మార్చుకున్నాను.ఎవడు ఒప్పుకున్నా ఒప్పుకోకపోయినా,మనలో ప్రతివాడికీ వ్యక్తిగత స్వార్ధమేగాని ఒక విశాలమైన రాష్ట్రచింతనగాని,రాష్ట్ర భావనగాని  లేవు అనేది పచ్చినిజం.

మాలిక్ కాఫర్ కు ఉప్పందించి మన కోటల దారులూ గుట్లూ అన్నీ చెప్పి కాకతీయ సామ్రాజ్యం పతనం కావడానికి కారకులయినది మన తెలుగువారే.ఇక అక్కడనుంచి తమిళనాడు వరకూ అతను ఊచకోత కోసుకుంటూ పోవడానికి దారులు ఏర్పరచినది కూడా మన తెలుగువారే అన్నది చారిత్రికవాస్తవం.డిల్లీ సుల్తానుల పరిపాలన డెక్కన్ లో వ్యాపించడానికి రాజమార్గాలు తెరిచింది మన తెలుగువారే.

కనుక మొదటినుంచీ కూడా కుట్రలతో మనల్ని మనం నాశనం చేసుకోవడంలో మనకు చాలా ప్రజ్ఞ ఉన్నది అనేమాట పచ్చినిజం.మనకు ఎటువంటి విలువలూ ఆదర్శాలూ లేవు. పచ్చిస్వార్ధమూ, దొంగబుద్ధీ, దోచుకోవడమూ, పక్కవాడిని చెడగొట్టి చివరకు మనంకూడా సర్వనాశనం కావడమూ తప్ప మనకు ఇంకేమీ తెలియదు.

తెలుగుజాతికి విశ్వామిత్రమహర్షి శాపం ఉన్నదని,వీరు తమ పద్ధతులు చాలా త్వరగా మార్చుకోకపోతే ముందుముందు చాలా ఘోరాలు జరుగుతాయనీ నేను రెండుమూడేళ్ళ క్రితం అన్నప్పుడు ఇదే బ్లాగులలో ఎందఱో నన్ను ఎగతాళి చేసి విమర్శించారు.ఇప్పుడెం జరిగిందో చూడండి మరి.

సరే ఆ సోదిని అలా ఉంచి,ప్రస్తుతంలోకి వస్తే,మనల్ని మనం మరచిపోయినా, మన కళలను అక్కున జేర్చుకుని,నేర్చుకుని,జీవితాన్ని వాటికి అంకితం చేసి చరితార్దులైనవారు ఎందఱో ఉన్నారు.వారిలో తమిళుల వంటి పొరుగురాష్ట్రాలవారే గాక విదేశీయులు కూడా ఉన్నారు.వారిలో ఒకడే జాన్ హిగ్గిన్స్ భాగవతార్.

ఈయన 18-9-1939 న మసాచుసెట్స్ లోని యాండోవర్ లో జన్మించాడు.నేను సరిదిద్దిన జనన సమయం ఉదయం 8-51 నిముషాలు.జాతకాన్ని పైన చూడవచ్చు.

ఎంతో ఘర్షణనూ చీధరింపులనూ ఎదుర్కొని,నోరు తిరగని పరాయిభాషను నేర్చుకుని, పరమ చాందసులైన తమిళబ్రాహ్మణుల వద్ద శిష్యరికం చేసి, కర్నాటక శాస్త్రీయసంగీతంలో అనన్యమైన ప్రతిభను సాధించి,వాళ్ళ ఎదుటనే కచేరీలు చేసి,వాళ్ళచేతనే శెభాష్ అనిపించుకున్న ఒక అమెరికన్ పేరు నేడు చాలామందికి తెలీక పోవచ్చు.అతనే జాన్ హిగ్గిన్స్ భాగవతార్.ఆయన జీవితం వికీపీడియాలోనో ఇంకా ఇతర సైట్స్ లోనో చూడవచ్చు.జాతకం వరకూ మనం పరిశీలిద్దాం.

ఆత్మకారకుడు బుధుడు.కారకాంశ ధనుస్సు.అక్కడ నుంచి వాక్స్థానంలో ఉచ్ఛకుజుని వల్ల మంచి గాయకుడయ్యాడు.శని కేతువుతో కలసి పంచమంలో ఉండటం వల్ల ఆధ్యాత్మిక కీర్తనలతో నిండిఉన్న కర్నాటక సంగీతాన్నినేర్చుకుని మంచి ప్రజ్ఞ సాధించాడు.

చంద్రుని నుంచి చూచినా తృతీయంలోని ఉచ్ఛకుజుని వల్ల మంచి సంగీతప్రజ్ఞ కలిగింది.మకరం భారతదేశానికి సూచిక గనుకా,కుజుడు దక్షిణానికి సూచకుడు గనుకా దక్షిణ భారతదేశానికి చెందిన శాస్త్రీయ సంగీత ప్రజ్ఞను ఇచ్చినాడు.

ఆత్మకారకుడైన బుధునితో యురేనస్ పంచమ శుభదృష్టిని కలిగి ఉన్నాడు. కనుక అతీతమైన అనుభవాలను ఇవ్వగల భక్తి సంగీతాన్ని సాధన చేసినాడు. అదే యురేనస్ శని కేతువులతో కలిసి ఉండటం వల్ల అకస్మాత్తుగా అసహజమైన మరణాన్ని ఇచ్చినాడు.

శని గురుల వక్రస్తితి వల్ల ఈయనకు ధార్మికమైన తీరని కర్మశేషం ఉన్నదని తెలుస్తున్నది.అది తీరిన మరుక్షణం ఇతను ఈలోకాన్ని వదలవలసి ఉంటుందని కూడా తెలుస్తున్నది.అలాగే జరిగింది కూడా.

నా ఉద్దేశ్యం ప్రకారం ఈయన లగ్నం కన్య అయి ఉండాలి.అప్పుడే అష్టమం లోని నీచశని కేతువుల వల్ల అసహజమైన మరణం(యాక్సిడెంటల్ డెత్) ఉంటుంది.7-12-1984 న ఎవడో త్రాగుబోతు రాష్ గా మోటార్ సైకిల్ డ్రైవ్ చేస్తూవచ్చి కుక్కను షికారుకు తిప్పుతున్న జాన్ హిగ్గిన్స్ ను గుద్దేసి పారిపోయాడు.గాయాలతో జాన్ హిగ్గిన్స్ మరణించాడు.అప్పటికి ఆయనకు 45 ఏళ్ళు మాత్రమే.కేతువు ఇక్కడ కుజుని ప్రతినిధి అయ్యాడు.అంటే కుజ శనుల కలయిక అష్టమంలో జరిగింది.ఇక యాక్సిడెంట్ జరగక ఏమౌతుంది?కుజ శనుల కలయికతో ఏమి జరుగుతుందో నేను ఎన్నో వ్యాసాలలో వ్రాసినాను.ఈయన జాతకం కూడా ఈ సూత్రానికి మరొక్క ఉదాహరణ.

లగ్న యురేనస్ ల మధ్యన ఖచ్చితమైన షష్టాష్టక దృష్టి గమనార్హం.ఇది కూడా హఠాత్తుగా జరిగే అసహజ మరణాన్నే(sudden accidental death) సూచిస్తున్నది. 

మరణ సమయంలో శుక్ర/గురు/కేతు దశ నడిచింది.శుక్రుడు లగ్నంలో వ్యయాదిపతి అయిన రవివల్ల అస్తంగతుడు.గురువు ఈ లగ్నానికి కేంద్రాదిపత్య దోషి.అంతేగాక మారకుడు.శని నక్షత్రంలో వక్రిగా ఉండి చాలా దోషంతో కూడుకుని ఉన్నాడు.కేతువు అష్టమంలో నీచ శనితో కలసి ఉన్నాడు.కనుక మారకం జరిగింది.కేతువు శునకాలకు కారకుడన్న విషయం జ్యోతిర్వేత్తలకు సుపరిచితమే.ఇతని చావు సమయంలో కేతు విదశ జరుగుతూ ఉండటమూ ఆ చావుకు ఒక కుక్క కారణం అవడమూ ఎంత విచిత్రమో?పైగా అష్టమం చరరాశి కావడం వల్ల రోడ్డుమీద జరిగిన వాహనప్రమాదం ఈయన ప్రాణాలు తీసింది.ఇది కూడా జ్యోతిష్య సూత్రాల ప్రకారమే తూచా తప్పకుండా జరిగింది.

ఆత్మకారకుడైన బుధుని నుంచి నవమంలో శనికేతువు(కుజు)ల వల్ల ధార్మికమూ మోక్షకారక సంగీతమైన భారతీయ కర్నాటక సంగీత సాంప్రదాయాన్ని నిష్టగా అభ్యసించాడు.

ఈయన వేస్లీయన్ విశ్వవిద్యాలయంలో చదివినాడు.1962 లో సంగీతంలో డిగ్రీ చేశాడు.అప్పుడు బుధ/గురు/బుధ దశ జరిగింది.బుధుడు సంగీతాన్ని ఇస్తాడు.పైగా లగ్నాధిపతి.వ్యయంలో సూర్యుని నక్షత్రంలో ఉంటూ శాస్త్రీయ సంగీతంలో ప్రజ్ఞను ఇచ్చినాడు.ఈయన పాశ్చాత్య సంగీతంలో కూడా శాస్త్రీయ సంగీతాన్నే అభ్యసించాడు.1964 లో ఎమ్మే చేశాడు.అప్పుడు బుధ/శని/బుధ దశ జరిగింది.పంచమాదిపతిగా శని ఉన్నత విద్యను ఇచ్చాడు.1973 లో పీ హెచ్ డీ చేసాడు.ఆ సమయంలో కేతు/బుధ దశ జరిగింది.

ఈయనకు సంగీతం తల్లివైపు నుంచి వచ్చింది.ఆమె ఒక సంగీత బోధకురాలు.లగ్నాత్ చంద్రుడు తృతీయంలో ఉండటమూ చంద్రుని నుంచి కుజుడు తృతీయంలో బలంగా ఉండటమూ గమనిస్తే విషయం బోధపడుతుంది.నీచ చంద్రుని వల్ల పరాయి భాషలో సంగీతాన్ని అభ్యసించినా బలంగా ఉన్న కుజుడు లౌకిక సంగీతాన్ని గాక భగవన్మార్గంలో ఔన్నత్యాన్ని ఇవ్వగల శక్తి ఉన్న భారతీయ శాస్త్రీయ సంగీతాన్ని ఇచ్చినాడు. 

త్యాగరాజ కృతులను ఆయన పాడిన తీరు అద్భుతంగా ఉంటుంది.తెలుగు వచ్చిన మనకే అలా పాడటం కష్టం అనుకుంటే,ఒక అమెరికన్ పరాయి భాషను నేర్చుకుని ఆ గమకాలనూ సరిగమలనూ భావయుక్తంగా పాడి మన దేశస్తులను మెప్పించడం ఎంత కష్టమో ఊహించవచ్చు.ఆ!! ఒక విదేశీయుడు త్యాగరాజ కృతులను ఏమి పాడగలడులే? అని చప్పరించిన వారి ఎదుటనే కచేరి ఇచ్చి వారి చేతనే బిరుదులను పొందిన జాన్ హిగ్గిన్స్ భాగవతార్ నిజంగా చరితార్ధుడు.

1960,70లలో ఆల్ ఇండియా రేడియోలో ఆయన కచ్చేరీలు వచ్చేవి.త్యాగరాజ ఆరాధనోత్సవాలలో దిగ్గజాల వంటి గాయకుల ముందు త్యాగరాజ కృతులను పాడి వారిని మెప్పించిన గాయకుడు జాన్ హిగ్గిన్స్.ఆయన గాన పాటవానికి మెచ్చి 'భాగవతార్' అన్న బిరుదును ఆయనకు ఇవ్వడం ఎంతో సమంజసంగా ఉన్నది.

ఎవరో భారతీయ సంగీతజ్ఞుడు ప్రారబ్ధం వల్ల అలా అమెరికాలో పుట్టి కొంతకాలం జీవించి కర్మ తీరాక దేహం చాలించాడని నా అభిప్రాయం.ఇది ఉత్త అభిప్రాయమేకాదు నిజంకూడా.పంచమంలోని ఉచ్ఛకుజుడిని చూస్తే ఈ విషయం స్పష్టంగా అర్ధమౌతుంది.ఇతనికి మనదేశం అంటే ఉన్న ప్రేమవల్లా మన సంగీతం అంటే ఉన్న ప్రేమవల్లా తర్వాత జన్మలో మన దేశంలోనే ఒక సాంప్రదాయ కుటుంబంలో పుట్టినాడు.ప్రస్తుతం మన దేశంలో జీవించే ఉన్నాడు.అయితే ఆ వివరాలు యోగరహస్యాలు కాబట్టి ఎక్కువగా వివరించడం కుదరదు.

జాన్ హిగ్గిన్స్ భాగవతార్ పాడిన కొన్ని కీర్తనలని ఇక్కడ వినవచ్చు.

ఎందఱో మహానుభావులు

కృష్ణా నీ బేగనే బారో

గోవర్ధనగిరిధర గోవిందా

అమ్మా రావమ్మా

ఇదే పరంపరలో భాగంగా కొందరు విదేశీయులు పాడిన 'కమలాంబా సంరక్షతు మాం' కృతిని కూడా వినండి.

read more " జాన్ హిగ్గిన్స్ భాగవతార్ జాతకం "

మోపిదేవి-హంసలదీవి

మొన్నొక రోజున అనుకోకుండా మోపిదేవి,హంసలదీవి పోయివచ్చే అవకాశం కలిగింది.రేపల్లె దగ్గర కృష్ణానదిమీద పులిగడ్డ వారధి వచ్చిన తర్వాత,కృష్ణా జిల్లాలో ఉన్న లంకలు అన్నీ రేపల్లెకు బాగా దగ్గరయ్యాయి.

రేపల్లె పొలిమేరలో ఉన్న పెనుమూడి-పులిగడ్డ వారధిమీదుగా కృష్ణానదిని దాటి కొంతదూరం వెళ్ళగానే మోపిదేవి వస్తుంది.చల్లపల్లి,అవనిగడ్డ అన్నీ అక్కడ దగ్గర దగ్గరగానే ఉంటాయి.మచిలీపట్నం కూడా ఈ దారిలో దగ్గరే.

మోపిదేవి సుబ్రహ్మణ్యక్షేత్రం.నాగదోషాలు ఉన్నవారు ఇక్కడ పూజలు చేయించుకుంటారు.నాగదోషం అనేది చాలామంది జాతకాలలో ఏదో ఒక రకంగా ఉంటూనే ఉంటుంది.ఇది ఒక్కొక్కరిని ఒక్కొక్క రకంగా బాధ పెడుతుంది.అమ్మాయిల జాతకాలలో వివాహపరమైన చిక్కులను ఇది కలిగిస్తుంది.అబ్బాయిల జాతకాలలో కూడా చాలామందికి ఇది ఏదో ఒక రూపంలో ఉంటుంది.

ఇష్టంలేని పెళ్ళి చేసుకోవలసి రావడం,పెళ్ళి కాకపోవడం,ఆలస్యం కావడం, పెళ్ళి అయిన తర్వాత విడాకులు తీసుకోవడం,గొడవలు జరిగి విడిపోవడం, లేదా ఇద్దరిలో ఒకరు మరణించడం మొదలైన అనేక పరిణామాలను కుజదోషం కలిగిస్తుంది.

సంతానపరమైన దోషాలకు కూడా ఇదే సర్పదోషం కారణం అవుతుంది.ఈ దోషాలు రకరకాలుగా ఉంటాయి.కొంతమందికి తరతరాలుగా మగపిల్లలు పుట్టరు.ఇంకొందరికి అసలు సంతానమే కలుగదు.కొందరికి సంతానం బాగా ఆలస్యమౌతుంది.కొందరికేమో పుట్టిన పిల్లలు చనిపోతుంటారు.ఇంకొందరికి బాగా పెద్దవారైన తర్వాత తల్లిదండ్రుల కళ్ళెదుట పిల్లలు పోతుంటారు.లేదా సంతానం మొండిగా తయారై పెద్దవాళ్ళ మాట వినకపోవడమూ ఎదురు తిరగడమూ వద్దన్న పనులు చెయ్యడమూ వద్దన్న పెళ్ళిళ్ళు చేసుకోవడమూ ఇలాంటి చర్యలవల్ల పెద్దలు మానసికబాధతో కుంగిపోయి ముసలితనంలో వ్యధతో చనిపోవడమూ ఇలాంటి దోషాలు అసంఖ్యాకమైన రూపాలలో మనుష్యుల జీవితాలలో పీడిస్తూ ఉంటాయి.

స్పెర్మ్ కౌంట్ తక్కువ ఉన్నవాళ్ళ జాతకాల్లో సర్పదోషం ఖచ్చితంగా ఉంటుంది. ఆ విషయం వాళ్ళ జాతకం చూడకుండానే చెప్పవచ్చు.మైక్రోస్కోప్ క్రింద పరిశీలిస్తే హ్యూమన్ స్పెర్మ్ లో చిన్నచిన్న పాముల వంటి స్పెర్మటోజోవా అసంఖ్యాకంగా కనిపిస్తాయి.నాగదోషం అనేది పాముపగలాగా తరతరాలు వెంటాడుతుంది అనేది ఖచ్చితమైన నిజం.ఆ దోషం ఉన్న జాతకాలు మూడు నాలుగు తరాలవి వరుసగా పరిశీలిస్తే ఈ సత్యం తేటతెల్లంగా కనిపిస్తుంది.

ఏతావాతా సర్పదోషం అనేది చాలా భయంకరమైన దోషం అనే చెప్పాలి.

అసలు మానవజాతికీ సర్పాలకూ అవినాభావ సంబంధం ఎప్పటినుంచో ఉన్నది.ఎన్నో జంతువులు మానవ జీవితంతో కలిసిమెలసి ఉన్నప్పటికీ సర్పాలకు ఒక ప్రత్యెక స్థానం ఉన్నది.ప్రతి మనిషిలోనూ వెన్నుపామూ మెదడూ కలిసిన వ్యవస్థ,పడగ విప్పిన పాము ఆకారంలోనే ఉంటుంది. సూర్యారాధన ఎంత ప్రాచీనమైనదో సర్పారాధన కూడా అంతే ప్రాచీనమైనది.

యోగసాధనకూ సర్పారాధనకూ కూడా అవినాభావ సంబంధం ఉన్నది. యోగుల జీవితాలలో సర్పాల పాత్ర ఖచ్చితంగా ఉంటుంది.చాలామంది యోగులను సర్పాలు వచ్చి దర్శిస్తూ ఉంటాయి.అవి చూచి పోవడానికి వచ్చాయన్న విషయం తెలియక పక్కన ఉన్నవారు వాటిని చంపేస్తూ ఉంటారు.ఆ దోషం ఆ చంపినవారికే కాక ఆ యోగులకు కూడా పట్టుకుంటుంది.

నాగదోషం ఉన్నవారి జీవితాలలో సూక్ష్మంగా గమనిస్తే ఎన్నో మార్మిక సంఘటనలు నిత్యమూ జరుగుతూ ఉంటాయి.అయితే వాటిని గ్రహించే సూక్ష్మదృష్టి చాలామందికి ఉండదు.అహంకారంతోనూ లెక్కలేనితనంతోనూ మనిషి ఎన్నో విలువైన విషయాలను ఈరకంగా చేజార్చుకుంటూ ఉంటాడు.

ఇంతలో మోపిదేవి ఆలయం రానే వచ్చింది.

ఆరోజున షష్టి కావడంతో గుడినిండా బాగా జనం ఉన్నారు.అయితే ఒక్కరిలోనూ క్రమశిక్షణ లేదు.చేపల మార్కెట్ కంటే అధ్వాన్నంగా అరుచుకుంటూ గోలగోలగా ఉన్నారు.ఒక దేవాలయానికి వచ్చాము మౌనంగా ఉండాలి అన్న భావమే ఒక్కరిలోనూ ఉండదు.మన హిందువులకు పట్టిన అనేక దౌర్భాగ్యాలలో ఇదొకటి.ఈ విషయంలో క్రైస్తవుల నుంచీ ముస్లిముల నుంచీ మనం నేర్చుకోవలసినది ఎంతో ఉన్నది.వారి ప్రార్ధనాలయాలు ప్రశాంతంగా మౌనంగా ఉంటాయి.దానికి భిన్నంగా,మన దేవాలయాలు సంతకంటే అధ్వాన్నంగా ఉంటాయి.మన దేవాలయాలలో దైవత్వం తప్ప మిగిలిన అన్నీ కనిపిస్తాయి.

హిందువులు ముందుగా సివిక్ సెన్స్ నేర్చుకోవాలి.దేవాలయాలలో మౌనంగా ఉండటం నేర్చుకోవాలి.అతివాగుడూ లోకాభిరామాయణమూ కట్టిపెట్టి కనీసం ఆ కాసేపైనా మౌనప్రార్ధనలో ఉండటం అభ్యాసం చెయ్యాలి.అలా చెయ్యమని నేటి గురువులు బోధించాలి.అప్పుడే కొంతలో కొంత మన దేవాలయాలలో ఉన్న దివ్యత్వాన్ని ఫీల్ అవడం వీలవుతుంది.

క్యూలో నిలబడి గర్భగుడి లోనికి వెళ్ళాము.అక్కడ కూడా ఎవరికి వారు అక్కడున్న లింగాన్ని చూడాలన్న ఆత్రుతలో మెడలు నిక్కించి పక్కవాడిని వెనక్కు తోసేసి మరీ తొంగితొంగి చూస్తున్నారు.ఇలాంటి ప్రవర్తన అంటే నాకు పరమ అసహ్యం.అందుకని నా అంతట నేనే ఒక మూలకు జరిగి కళ్ళు మూసుకుని నిలబడి మిగతావారికి ఒకరినొకరు తోసుకునే అవకాశం చక్కగా కల్పించాను.ఎవరి గోలలో వాళ్ళున్నారు.నా ధ్యానంలో నేనున్నాను.

ఇలాంటి సర్పక్షేత్రాలకు వచ్చినపుడు చెయ్యవలసిన కొన్ని అంతరిక క్రియలు ఉంటాయి.వాటిని చెయ్యడంవల్ల కొన్ని ఫలితాలు వెంటనే కనిపిస్తాయి. దానివల్ల ఆయా కర్మక్షాళణాలు జరిగాయా లేదా వెంటనే తెలిసిపోతుంది. చుట్టూ రణగొణధ్వనిగా ఉన్న కాకిగోలతో సంబంధం లేకుండా మౌనంగా గర్భగుడిలో ఒక మూలకు నిలబడి నా పనిని ముగించాను.

మంత్రపుష్పం చదివేటప్పుడు కూడా ఆ పూలకోసం ఒకరి కాళ్ళు ఒకరు తొక్కుకుంటూ ఎగబడుతూ ఉన్నారు.నేనసలు ఆ పూలే తీసుకోలేదు.గుడిలో లోపలికి ఒక మూలకు నిలబడి ఉండటంతో జనం వెనుకగా ఉన్న నేను పూజారికి కనిపించే అవకాశమే లేదు.నాకు విగ్రహం కనిపించే అవకాశమూ లేదు.అయినా నా పనిలో నేనున్నాను గనుక ఇబ్బంది లేదు.పూజ అయిన తర్వాత బయటకు వచ్చాము.

అక్కడనుంచి వెనక్కు రేపల్లె వెళతామని అనుకున్నాను.ఇంతలో 'ఇక్కడ దాకా వచ్చాం కదా హంసలదీవి కూడా చూచి పోదాం' అని మా బృందంలోని ఒకాయన అనడమూ వెంటనే కార్లు హంసలదీవి వైపు తిరిగడమూ వెంటనే జరిగిపోయాయి.లోలోపల నవ్వుకున్నాను.దైవసంకల్పం ఇలాగే సంభవిస్తూ ఉంటుంది.దానికి ఎవరో ఒక వ్యక్తి కారకుడౌతూ ఉంటాడు.ఇలాంటి సంఘటనల వెనుక ఉన్న సూక్షమైన కారణాలూ లింకులూ అంత తేలికగా అర్ధం కావు.కానీ తరచి చూస్తె వాటిని గ్రహించడం కష్టం కాదు.

కృష్ణాజిల్లా లంకలన్నీ అంతా చెట్లూ నీళ్ళతో ఉంటాయి.వాతావరణం బాగుంటుంది.అడవి మధ్యలో ఇళ్ళున్నట్లుగా ఉంటాయి.కేరళ వాతావరణం లాగా ఉంటుంది.కొద్ది దూరం వెళ్ళగానే ఆ చెట్లమధ్యలో ఒక నిదర్శనం నాకు కనిపించింది.దానిని చూడటంతోనే నేను మోపిదేవి గుడిలో చేసిన రెమెడీ పనిచేసిందని,సుబ్రహ్మణ్యస్వామి సమాధానమిచ్చాడనీ వెంటనే నాకు అర్ధమై పోయింది.

దేవుడిని చూడటం కోసం మనం ఎగబడటం కాదు.మనల్ని దేవుడు చూచేలా మనం ఉండాలి.అదే నిజమైన ఆధ్యాత్మికత.అలా మనం ఉండగలిగితే మనం ఎక్కడున్నా దైవం మనల్ని చూస్తూనే ఉంటుంది.మనకు సమాధానం ఇస్తూనే ఉంటుంది.ఆ బంధం ఎప్పుడూ తెగిపోదు.అవసరం తీరాక మరచిపోయేది స్వార్ధపూరిత మానవసంబంధం.ఎన్నడూ మరచిపోనిదీ ఎప్పుడూ తెగిపోనిదీ దైవసంబంధం.మన దృష్టి దైవం మీద పడితే ఉపయోగం లేదు.దైవం దృష్టి మనమీద పడాలి.అట్లా పడే విధంగా మనం ఉండాలి.దైవం ఒక్క విగ్రహంలోనే ఉన్నదా?

మాటల్లోనే హంసలదీవి చేరుకున్నాము.కృష్ణానది సముద్రంలో కలిసే ప్రదేశం అక్కడకు చాలా దగ్గరలో అంటే నాలుగు కి.మీ దూరంలోనే ఉన్నది.దానిని సాగరసంగమం అనికూడా అంటారు.

మా బృందంలో  ఉన్న శ్రీకాంత్ గారి మామగారే హంసలదీవిలో ఉన్న శృంగేరి సత్రాన్ని చూచుకుంటూ ఉంటారని ఆయన చెప్పినారు.ఆయన మంచి వేదపండితుడు.ఆయనకు దాదాపు అరవైఐదు ఏళ్ల పైనే ఉంటాయి.మేము వెళ్ళగానే ఆయన గబగబా ఎదురొచ్చారు.

ఆయనను చూడగానే శుద్ధ శ్రోత్రియుడని కల్లాకపటం లేని వ్యక్తి అనీ తెలిసి పోతున్నది.వారి సతీమణి కూడా పాతకాలం మడిచీరలో ఉన్నారు.మూడు గదుల చిన్నఇల్లు అతి నిరాడంబరంగా ఉన్నది.ఆ ఇంటిలో మాకు కనిపించినవి కొన్ని వేదాంత గ్రంధాలూ,ఒక వ్యాసపీఠం,శృంగేరి స్వాముల ఫోటోలూ,చాపలూ మాత్రమే.సోఫాలూ కుర్చీలూ టీవీలూ ఏమీ లేవు.

వారు భోజనం చెయ్యమని బలవంతం చేసినారుగాని,మా బృందానికి వంట చేసేపని పెట్టి ఆ కుగ్రామంలో ఆ సాధ్వీమతల్లిని వేళగాని వేళలో ఎందుకు ఇబ్బంది పెట్టాలనిపించి భోజనం వద్దన్నాము.కాఫీ ఇమ్మని చెప్పినాము.భోజనం చెయ్యాల్సిందే అంటూ వారు ఎంతో బ్రతిమిలాడి,మేము వినకపోతే,చివరకు కాఫీ ఇచ్చినారు.

హంసలదీవిలో ఒక మూడొందల ఇళ్ళు ఉంటాయేమో.చాలా చిన్న ఊరు.ఏం కావాలన్నా అయిదారు కి.,మీ దూరంలో ఉన్న కోడూరు అనే ఊరినుంచి తెచ్చుకోవాల్సిందే.చీకటిపడితే ఆదారిలో వీధిదీపాలు కూడా లేవు.అంత కుగ్రామం అది.

'ఈ ఊరికి హంసలదీవి అని పేరెందుకు వచ్చిందో?'అని ఒకాయన కాఫీ తాగుతూ అడిగారు.

'ఇక్కడ హంసల్లాంటి అమ్మాయిలు ఉంటారేమో?' అని మా బృందంలోని ఒకాయన జోక్ గా అన్నారు.

నేను మౌనంగా గమనిస్తున్నాను.

అక్కడే ఉన్న గ్రామవాసి ఒకాయన ఇలా అన్నాడు.

'అనేకవందల సంవత్సరాల క్రితం ఇక్కడ ఒక కాకి సముద్రస్నానం చేసి హంసగా మారిందని చెబుతారు.అందుకని ఆ పేరొచ్చింది.'

ఇంతలో మాకు కాఫీ గ్లాసులు అందిస్తున్న శ్రీకాంత్ గారి మామగారు ఇలా అన్నారు.

'హంస అంటే ఏముంది నాయనా?మనమందరమూ హంసలమే. 'హంసస్సోహం'-అని వేదాంతం అంటుంది.మనకు తెలీక కాకుల్లా బ్రతుకుతున్నాం.కాని నిజానికి మనమందరమూ హంసలమే.'తత్త్వమసి' అనే మహావాక్యాన్ని విన్నావా?' అడిగాడు.

ఆ వ్యక్తి అడ్డంగా తలాడించాడు.

'ఈ ప్రదేశంలో కొన్ని వందల ఏళ్లక్రితం పరమహంసలు ఉండేవారు.అంటే మహర్షులన్న మాట.అందుకే దీనికి హంసలదీవి అని పేరొచ్చింది.మా అల్లుడు గారైన శ్రీకాంత్ గారికి దాదాపు రెండుమూడువందల ఏళ్ల క్రితపు పూర్వీకులలో విష్ణ్వానందేంద్రసరస్వతి గారని ఒక స్వామి ఉండేవారు.ఆయన ఇక్కడ చాలాకాలం తపస్సు చేసినారు.అంతటి గొప్పవంశంలోని వాడు గాబట్టే ఈయనకు మా అమ్మాయిని ఇచ్చాను.'అన్నాడు పెద్దాయన.

'లేకపోతే మా శ్రీకాంత్ కి పిల్లనివ్వరా?' అని మా బృందంలోని ఒకాయన చనువుగా ప్రశ్నించాడు.

'మరి అంత మహర్షుల వంశంలోని వాడికి మా అమ్మాయిని ఇస్తే అంతకంటే గొప్ప ఏముంది నాయనా?' అని ఆయన జవాబిచ్చాడు.

ఎంతసేపూ డబ్బూ ఆస్తీ హోదా వగైరాలు చూచి సంబంధాలు కలుపుకునే నికృష్టులు ఉన్న నేటిలోకంలో అలాంటి మాట చెప్పిన వ్యక్తిని ఒక్కరినైనా చూచినందుకు నాకు చాలా ఆనందం కలిగింది.

ఒకే ప్రశ్నకు మూడు జవాబులు!!!

ఎవరి సంస్కారాన్ని బట్టి వారు ఇచ్చిన మూడు జవాబులు నాకు ఎంతో ముచ్చట గొలిపాయి.

మొదటి వ్యక్తి మామూలు సరదా మాటల్లో జవాబు చెప్పాడు.రెండో ఆయన ఆ ప్రాంతంలో ప్రచారంలో ఉన్న కధను చెప్పాడు.మూడో ఆయన అద్భుతమైన శుద్ధ వేదాంతభావనను చెప్పాడు.ఎవరెవరి సంస్కారాన్ని బట్టి వారి మాటలు వచ్చాయి.

ఏదేమైనా సరే,పద్ధతిగా జీవించే నిజమైన బ్రాహ్మణుల జీన్స్ లో ఏదో తెలీని ప్రత్యేకత ఉన్నదని నాకు ఎప్పుడూ అనిపిస్తుంది.ఋషిరక్తం వారిలో ఇప్పటికీ ప్రవహిస్తూనే ఉన్నదనేది వాస్తవం.వారి ఆలోచనలు మామూలు మనుషుల ఆలోచనల కంటె ఎప్పుడూ భిన్నంగానే ఉంటాయి.

ఆ శ్రోత్రియ దంపతులకు నమస్కరించి సెలవు తీసుకుని బయలుదేరాము.

దారిలో ఇలా అన్నాను.'శ్రీకాంత్ గారు! మీ మామగారు సత్పురుషుడు.మన ఆర్షధర్మాన్ని ఇలాంటి వారే ఇంకా నిలబెడుతూ ఉన్నారు.'

'నిజమేనండి.ఇప్పటికీ ఆయనకు సొంత ఇల్లు లేదు.ఆస్తి లేదు.అసలు వాటిమీద ఆయనకు ధ్యాసే లేదు.అయినా మనిషికి చీకూ చింతా లేదు.ఎంత ఆనందంగా నిబ్బరంగా ఉన్నాడో చూడండి.' అన్నారు శ్రీకాంత్.

'మరి ఆయన ఎక్కడ ఉంటారు?' అడిగాను.

'ఒకచోట అంటూ ఏమీ లేదు.కొడుకుల దగ్గర కొంతకాలం చొప్పున అలా ఉంటూ ఉంటాడు.కొన్ని నెలలు ఇక్కడే ఈ సత్రంలో ఉంటాడు.ఆయన లక్ష్యం ఒకటే.ఈ హంసలదీవిలో వేణుగోపాలస్వామి ఆలయాన్ని వృద్ధిలోకి తీసుకురావాలి.అంతే.అందుకోసం ఆయన తపన పడుతూ ఉంటాడు.ఇప్పుడు మనం చూస్తున్న ఈ ఆలయం ఆ కృషి ఫలితమే. ఒక ఏభై ఏళ్లక్రితం ఇంత గుడి ఇక్కడ లేదు.ఆలయానికి ఒక ఇరవై ఎకరాలు ఉన్నది.ఈయన ఇంకొక ఇరవై ఎకరాలు కౌలుకు తీసుకుని వ్యవసాయం చేస్తూ ఆవచ్చిన డబ్బుతో ఈ దేవాలయాన్ని వృద్ధిచేస్తూ వస్తున్నాడు.ఈ వయస్సులో కూడా ఇంత కష్టపడతాడు.వద్దంటే వినిపించుకోడు.'అని శ్రీకాంత్ అన్నారు.

కార్లు వేగంగా రేపల్లె వైపు దూసుకు పోతున్నాయి.దారిపక్కనే రాజకీయ భూబకాసురుల ఫ్లెక్సీలు కనిపించాయి.

'శ్రీకాంత్ గారు.మీ బ్రాహ్మణులు ఇక్కడే వెనుకబడి పోతున్నారు.ఎంతసేపూ ఆధ్యాత్మికం,దేవుడు,నీతి,నియమం,నిష్ఠా అంటూ డబ్బునూ ఆస్తిపాస్తులను పోగేసుకోవడం మర్చిపోతున్నారు.ఆ ఫ్లెక్సీ చూడండి.అందులోని వారికి ఎన్ని వేల ఎకరాలూ చాలడంలేదు.ఇంకా ఎక్కడైనా దొరికితే స్వాహా చేద్దామనే చూస్తున్నారు.ఇలాంటివారిని చూచి మీ మామగారు ఎంతో నేర్చుకోవాలి' అని నేను హాస్యంగా అన్నాను.

'వద్దులెండి శర్మగారు.ఇప్పుడు ఆ బుద్ధులన్నీ మనకెక్కడ వస్తాయి?అది రక్తంలో ఉండాలి.రక్తంలో లేనిది ఎలా వస్తుంది?మనం అలాంటి పనులు చెయ్యలేము.ఆస్తిపాస్తుల చింతే మా మామగారి వంటి వారికి ఉండదు.ఇలాంటి మాటలు చెబితే వాళ్ళు నవ్వుతారు' అన్నారు శ్రీకాంత్.

పాతకాలంలో ప్రతి బ్రాహ్మణకుటుంబంలోనూ ఇలాంటి ఋషితుల్యులైన మనుష్యులు ఉండేవారు.ఎదుటివ్యక్తిని మోసం చెయ్యాలనీ,ఆస్తులు కూడబెట్టాలనీ,అవసరమైతే దానికోసం నానా అబద్దాలు చెప్పాలనీ,నీతీ గీతీ గాలికొదిలేయ్యాలనీ,జీవితంలో డబ్బే సర్వస్వమనీ ఇలాంటి ఆలోచనలే వారికి ఉండేవికావు.అటువంటి బ్రతుకులను వారు అసహ్యించుకునేవారు. శాశ్వతంగా నిలిచి ఉండే విలువలే వారికి ప్రధానంగాని ఆస్తులూ డబ్బూ విలాసాలూ వారికి ముఖ్యంకాదు.ఆ శాశ్వతప్రయోజనం కోసం వాళ్ళు దేనినైనా త్యాగంచేసేవారు.నిరాడంబరంగా బ్రతికేవారు.చివరికి అలాగే పోయేవారు. అందుకే వారు ఒకమాట అంటే అది జరిగి తీరేది.అంతటి శక్తి వారిలో ఉండేది.

ఈనాటికీ ఇంతగా కుళ్ళిపోయిన సమాజంలో కూడా అక్కడక్కడా ఇలాంటి మనుషులు ఉండబట్టే వానలు పడుతున్నాయి.పీల్చడానికి గాలి దొరుకు తున్నది.ధర్మం ఏ కొద్దిగా అన్నా నిలబడి ఉన్నదంటే ఇలాంటి వ్యక్తులే కారణం.అంతేగాని ఎక్కడబడితే అక్కడ ఏ రంగంలో బడితే ఆ రంగంలో చెదలా వ్యాపించిన నీతిరహితులూ దొంగలూ కారణం కాదు.

'మన దేశపు నిజమైన బలం ఆధ్యాత్మికత మాత్రమే' అని వివేకానందస్వామి ఎన్నోసార్లు అనేవారు.అది జీవించి ఉన్నంతవరకూ మన దేశానికి నాశనం లేదు.ఈ దేశాన్ని నిలబెడుతున్నది ఆర్షధర్మమే గాని రాజకీయ నాయకులు కాదు.కానీ ఈసంగతి ఎవరికీ అంత త్వరగా అర్ధంకాదు.అర్ధం అయ్యేసరికి సమయం మించిపోతుంది.ఆపుడు అర్ధమయ్యీ ఉపయోగం ఉండదు.అదే విచిత్రం.

ఆలోచనలో ఉండగానే రేపల్లె వచ్చింది.అక్కడ పని ముగించుకుని అందరం గుంటూరు బయలుదేరాము.

read more " మోపిదేవి-హంసలదీవి "

ఫిబ్రవరిలో ముఖ్యమైన సంఘటనలు జరుగబోతున్న తేదీలు

ఫిబ్రవరి 15

రాజకీయ సమీకరణాలు మారతాయి.కళాకారులకు ప్రమాదాలుంటాయి. నాయకుల కుట్రలు ఎక్కువౌతాయి.ఎవరి స్క్రిప్ట్ వారు తయారు చేసుకుని చదువుతూ జనాన్ని వెధవాయిలను చెయ్యాలని చూస్తుంటారు.జనం ఇప్పటికే వెధవలయ్యారన్న సంగతి వారు గ్రహించలేరు.గ్రహించినా ఓట్లకోసం నాటకాలు ఆడుతుంటారు.

వ్యక్తిగత జీవితాలలో -- సమన్వయ లోపం వల్లా,ఒకరినొకరు అర్ధం చేసుకోలేక పోవడం వల్లా,మూడో వ్యక్తుల ప్రమేయం వల్లా ఈగో సమస్యలు తలెత్తి గొడవలు అయ్యే సూచన ఈ రోజున ఉన్నది.

ఫిబ్రవరి 19,ఫిబ్రవరి 20

ఫిబ్రవరిలో ఈ తేదీలు చాలా ముఖ్యమైనవి.కొందరికి అధికారం పోతుంది.కొందరికి వస్తుంది.కొందరికి పండుగ అయితే ఇంకొందరికి ఏడుపు మిగుల్తుంది.అధికార పదవులలో ఉన్నవారికి ఈ రెండు రోజులు చాలా టెన్షన్ కలిగిస్తాయి.ఇది రాజకీయ పార్టీలకు మాత్రమే కాదు.ఉద్యోగులకూ అధికారులకూ ఏ రంగంలోనైనా ప్రముఖులకూ కూడా ఇది తప్పదు.

వ్యక్తిగత జీవితాలలో -- ప్రమాదాలు,మోసపోవడాలు,వంచనకు గురికావడం, కొందరికైతే యాక్సిడెంట్ లో ప్రాణాలే పోవడం జరుగుతుంది.

ఫిబ్రవరి 25

మహిళల మీద దాడులు జరుగుతాయి.కొందరు ప్రముఖ స్త్రీలకు ఆరోగ్యం బాగుండక ఆస్పత్రి దర్శనం కలుగుతుంది.పెట్రోల్ తదితర ద్రవపదార్ధాలకు చెందిన అగ్నిప్రమాదాలూ,జలయాన ప్రమాదాలూ,వాహన ప్రమాదాలూ జరుగుతాయి.

ఈ ఫలితాలు ఒక్క మన దేశానికే కాదు.భూమి మొత్తానికీ వర్తిస్తాయి అని గుర్తించాలి.

read more " ఫిబ్రవరిలో ముఖ్యమైన సంఘటనలు జరుగబోతున్న తేదీలు "

దేశజాతకం -సూర్య/బుధ/గురుదశ

జ్యోతిష్యపరంగా ఊహించిన విధంగానే దేశపరిస్థితులు నడుస్తూ భూమ్మీదా మానవులమీదా ఉన్న గ్రహప్రభావాన్ని నిరూపిస్తున్నాయి.ఈ నేపధ్యంలో అసలు మన దేశజాతకం ఎలా ఉందొ ఏమంటున్నదో ఒకసారి పరిశీలిద్దాం.

ప్రస్తుతం మన దేశ జాతకంలో సెప్టెంబర్ 2009 నుంచి సెప్టెంబర్ 2015 వరకూ సూర్యదశ నడుస్తున్నది.ఇందులో మళ్ళీ ప్రస్తుతం జూన్ 2013 నుంచి ఏప్రిల్ 2014 వరకూ సూర్య/బుధ దశ జరుగుతున్నది.ఇందులో మళ్ళీ జనవరి చివరి వారం నుంచి మార్చి మొదటివారం వరకూ సూర్య/బుధ/గురు దశ నడుస్తున్నది.ప్రస్తుత దశ ఎలా ఉండబోతున్నదో చూద్దాం.

రవిబుధులు తృతీయంలో ఇంకా మూడు గ్రహముల మధ్యన ఇరుక్కొని ఉన్నారు.వీరిద్దరి నేతృత్వంలో ఏప్రియల్ వరకూ ఉన్న అంతర్దశ ప్రజాజీవితంలో మేధాపరమైన గొప్ప మార్పును సూచిస్తున్నది.ప్రజలు కొత్త వెలుగు కోసం కొత్త మార్పుకోసం ఆత్రుతగా ఎదురు చూస్తున్నారని ఈ గ్రహములు సూచిస్తున్నాయి.

అధికార మార్పు కూడా సూచితం అవుతున్నది.అయితే ఈ మార్పు సుఖంగా శాంతిగా రాకుండా కల్లోలం తర్వాతా,కుట్రలూ కుతంత్రాల తర్వాతా వస్తుందని పంచగ్రహ కూటమి సూచిస్తున్నది.

మార్చి మొదటివారం వరకూ నడుస్తున్న గురు విదశ ఏమంటున్నది?గురువు ఈ లగ్నానికి మంచివాడు కాడు.శత్రుస్థానంలో ఉండటం వల్ల మంచి చెయ్యడు.కనుక అధికారంలో ఉన్న వారికి ఎటుచూచినా శత్రుత్వమూ చిక్కులూ ఎదురవుతాయి.అధికారం చేతులు మారుతుంది.అయితే విపరీత రాజయోగం వల్ల ప్రజలపరంగా చూస్తె కల్లోలాల తర్వాత కధ సుఖాంతం అవుతుందని సూచన ఉన్నది.

ఈ లోపల మాత్రం ఎన్నో గొడవలూ,కల్లోలాలూ,మేధోమధనాలూ,నష్టాలూ ప్రజాజీవితంలో తప్పవు.లగ్నాత్ శత్రుస్థానంలోనూ చంద్రలగ్నాత్ సుఖస్థానం లోనూ ప్రస్తుతం సంచరిస్తున్న శని రాహు కుజులవల్ల సొసైటీలో అనేక ప్రమాదాలూ గొడవలూ గందరగోళాలూ తప్పక జరుగుతాయి.

గురు విదశ తర్వాత రాబోయే శని విదశలోనూ ఆ తర్వాత రాబోయే రవి/కేతు దశలోనూ దేశంలో అసలైన మార్పులు వస్తాయి.అవేమిటో ఆ దశలు మొదలు కాబోయే కొద్దిగా ముందు చూద్దాం.

read more " దేశజాతకం -సూర్య/బుధ/గురుదశ "

ఫిబ్రవరి 2014-దేశఫలితాలు

13-2-2014 న 2.15 కి న్యూడిల్లీలో సూర్యుని కుంభసంక్రమణం జరుగుతుంది.ఆ ఫలితాలు ఎలా ఉండబోతున్నాయో చూద్దాం.

ఎన్నికలు దగ్గర పడుతున్నందువల్ల ప్రజలను నానారకాలుగా మభ్య పెట్టాలని అధికారంలో ఉన్న నాయకుల ప్రయత్నాలూ కుయుక్తులూ మొదలౌతాయి.

ప్రజలమధ్యన చిచ్చు పెట్టాలని దుష్టశక్తులు ప్రయత్నిస్తాయి.అందుకు అవసరమైతే హింసను సృష్టించడానికి కూడా వెనుకాడవు.లోపల్లోపల ఇందుకోసం వ్యూహరచనలు జరుగుతాయి.ముఖ్య సమస్యలనుంచి ప్రజల దృష్టిని మళ్ళించడానికి విధ్వంసరచనను వాడుకోవాలని కొన్ని వర్గాలు ప్రయత్నిస్తాయి.

ఫిబ్రవరి 15 న రాబోతున్న పౌర్ణమికి అటూ ఇటూగా నాయకుల మీద కుట్రపూరిత ఎటాక్ జరిగే అవకాశం ఉన్నది.లేదా ఎవరైనా నాయకులకు, అధికారులకు ప్రమాదం పొంచి ఉన్నది.వారి ఆరోగ్యాలు దెబ్బతినవచ్చు.

సింపతీ కోసం తమమీద తామే దాడులు ప్లాన్ చేయించి ఓట్లు కొట్టేయాలనే క్షుద్రరాజకీయం జరిగినా ఆశ్చర్యం లేదు.

కొన్ని ప్రాంతాలలో కల్లోలమూ విధ్వంసమూ జరిగే సూచనలున్నాయి. వాహనప్రమాదాలూ అగ్నిప్రమాదాలూ కూడా జరుగవచ్చు.ప్రజలకు జాగ్రత్త అవసరం.

read more " ఫిబ్రవరి 2014-దేశఫలితాలు "

సాధనా సమ్మేళనం - కోటప్పకొండ -4

విష్ణుశిఖరంనుంచి దిగి మళ్ళీ బ్రహ్మశిఖరం వైపు కొండనెక్కేసరికి ఆలస్యమైంది.భోజనం కానిచ్చామనిపించి కొద్దిసేపు విశ్రాంతి తీసుకున్నాము. సాయంత్రం లేచి బయటకొచ్చి పార్కింగ్ ప్లేస్ లో ఉన్న బెంచీమీద విశ్రాంతిగా కూచున్నాము.

ఎదురుగా అస్తమిస్తున్న సూర్యుడు దర్శనమిస్తున్నాడు.చలికాలం కావడంతో సాయంకాలపు నీరెండ తాకుతుంటే హాయిగా ఉన్నది.మౌనంగా కూచుని సూర్యుణ్ణి చూస్తున్నాము.

సంభాషణ గాయత్రీ ఉపాసన మీదకు మళ్ళింది.

'అమెరికాలో మాకు సూర్యదర్శనం కావడమే కష్టం.ఇలాంటి ఎండను చూస్తుంటే నాకు చాలా ఆనందంగా ఉన్నది' అని రామన్నగారన్నారు.

'మనకు ప్రాణప్రదాత సూర్యుడే.సూర్యుడు కనిపించని దినం దుర్దినం అనే అర్ధాన్నిచ్చే మంత్రాలు వేదంలో చాలా ఉన్నాయి.నిజానికి గాయత్రీ ఉపాసన అంటే సూర్యునిలో ఉన్న శక్తిని ఉపాసించడమే.అది ప్రత్యేకశక్తి కాదు.దైవశక్తియే సూర్యరూపంలో మన సూర్యమండలంలోని గ్రహాలనూ,ముఖ్యంగా భూమినీ పోషిస్తున్నది.

ఇతర మతాలకూ మనకూ ఉన్న భేదం ఇదే.వారు ఇదంతా దేవుని సృష్టి అని భావిస్తూ సృష్టిలోని వస్తువులను పూజించరాదు దేవుణ్ణి మాత్రమే పూజించాలి అంటారు.సృష్టికంటే దేవుడు భిన్నంగా లేడు అని మనం అంటాము.కనుక సృష్టిలోని ప్రకాశవంతమైనవాటిని ఆయన ప్రతీకలుగా మనం పూజిస్తాము. నిజానికి వాటిద్వారా మనం పూజించేది సృష్టికర్త అయిన ఆ దైవాన్నే.ఈ విషయం అర్ధం చేసుకోలేని ఇతరమతాల వాళ్ళు మనల్ని విగ్రహారాధకులు అనుకుంటారు. అది నిజం కాదు.తాను పూజిస్తున్నది రాళ్ళనూ రప్పలనూ కాదని ప్రతి హిందువుకూ తెలుసు.భగవద్భావంతో ఆపనిని చేస్తున్నాననీ,తన ఆరాధన ఆ సర్వేశ్వరునికే చెందుతున్నదనీ,విగ్రహం ఒక సింబల్ మాత్రమే అనీ ప్రతి భారతీయునికీ తెలుసు.

మన సోలార్ సిస్టంలో ఉన్న అందరికీ సూర్యుడే దైవం.పుట్టినదగ్గర్నుంచీ పోయేవరకూ సూర్యశక్తి ఆధారంతోనే మనం బ్రతుకుతున్నాం.అందుకే మన ఆర్షధర్మంలో సూర్యదేవుడిని ప్రత్యక్షనారాయణుడని అంటాము.ఆయన నిత్యం కనిపించే దైవం.కనిపించే దైవాన్ని వదిలిపెట్టి ఊహామాత్రమైన వారివారి గ్రంధాలలోని దైవాలను కొలుస్తారు ఇతర మతస్తులు.నిజానికి వారే జీవంలేని విగ్రహారాధకులు.ఎందుకంటే వారు ఆరాధించేది వారి ఊహలోని నిర్జీవభావనా మాత్రమైన దైవాన్ని.ఇది వారు గ్రహించలేరు.ఎదురుగా కనిపిస్తూ నిత్యం మనల్ని పోషిస్తున్న సూర్యుడిని వదిలి ఇతరదేవతలను పూజించడం తప్పు.ఇది విశ్వాసరాహిత్యం అని నేనంటాను.

నిత్యమూ మనల్ని రక్షిస్తూ మనకు ఆహారం ఇస్తున్న సూర్యుని వదలిపెట్టి ఊహామాత్రమైన ఇతర దేవుళ్ళను పూజించడమే అసలైన పెద్ద తప్పు.ఇదే మానవజాతి చేస్తున్న అతిపెద్ద దైవద్రోహం అని నేనంటాను.

గాయత్రికి ఇప్పుడు మనం చూస్తున్న స్త్రీరూపం పురాణకాలంలో వచ్చింది. వేదకాలంలో ఈ పంచముఖీస్త్రీరూపం గాయత్రికి లేదు.శక్తి గనుక స్త్రీరూపంతో ఆరాధించడం మొదలుపెట్టాం.అంతే.నిజానికి గాయత్రి అంటే సూర్యశక్తి మాత్రమే.సవిత అని వేదం దానిని పిలిచింది.

అగ్ని కూడా సూర్యుని ప్రతిరూపమే.అందుకే బ్రాహ్మణులు అగ్నిని ఆరాధిస్తారు.పార్శీలు కూడా అగ్ని ఆరాధకులే.ఇస్లాం రాకముందు ఇరాన్ లో అగ్ని ఆరాధనే ఉండేది.వేదంలోని పదములకూ అవెస్తా లోని పదములకూ అనేక పోలికలున్నాయి.'మిత్రా','వరుణా' మొదలైన పదములు అవెస్తా లోకూడా మనకు దర్శనమిస్తాయి.

వేదంలో సూర్యుని అనేక పేర్లతో పిలిచారు.ఉదయంపూట 'మిత్ర' అనే నామంతోనూ,మధ్యాహ్నం 'ఇంద్ర' అనే నామం తోనూ,సాయంత్రంపూట 'వరుణ' అనే నామంతోనూ సూర్యుని వేదం స్తుతించింది.నిజానికి ఇంద్రుడు అంటే సూర్యుడే.అంతేకాదు గణపతి అన్నా,బ్రహ్మ అన్నా,విష్ణువు అన్నా,రుద్రుడన్నా కూడా నిజానికి సూర్యుడే.సూర్యునికి ఇవన్నీ పర్యాయ పదములు.'అసావాదిత్యో బ్రహ్మేతి...'మొదలైన వేదమంత్రములు దీనినే చెబుతున్నాయి. 

సూర్యుడిని ఉదయంపూట బ్రహ్మదేవునిగానూ,మధ్యాహ్నపు మండించే ఎండలో రుద్రునిగానూ,సాయంత్రపు చల్లని ఎండలో విష్ణువుగానూ పూజించే భావనలు మన గ్రంధాలలో ఉన్నాయి.వీటికి మూలాలు వేదంలోనే ఉన్నాయి.'ఓ దేవా.నీవు ఆకాశంలో సూర్యునిగా ప్రకాశిస్తున్నావు.అంతరిక్షంలో వాయువుగా వీస్తున్నావు.నీవే బ్రాహ్మణుల ఇళ్ళలో అగ్నిగా వెలుగుతున్నావు'అన్న అర్దాన్నిచ్చే మంత్రాలు వేదంలో చాలా ఉన్నాయి. కనుక సూర్యుని రూపంలోనూ అగ్నిరూపంలోనూ మనం ఆరాధిస్తున్నది సృష్టికర్తయైన ఏకైక దైవాన్నే.ఈ విషయం ఇతర మతస్తులకు అర్ధంకాదు. 

'సంధ్యావందనం లోని సూర్యోపస్థాన మంత్రములను అర్ధం చేసుకుంటే ఈ విషయాలు తెలుస్తాయి.'అన్నాను.

'ఏకం సద్విప్రా బహుధా వదంతి..' అనే మంత్రం కూడా దీనినే చెబుతున్నది కదా' అన్నారు రామన్నగారు.

'అవును.అది మహాసౌరంలోని మంత్రం.' అన్నాను.

'అరుణం'కూడా మంచిదే కదా?'అడిగారు రామన్న గారు.

'అవును.అది అద్భుతములైన మంత్రముల సమాహారం.మహాసౌర మంత్రపాఠం కూడా మంచిదే.ప్రముఖములైన సూర్యోపాసనా మంత్రములు అందులోనివే.ఉదాహరణకు 'ఉదుత్యం జాతవేదసం..'అనే మంత్రంగానీ, సంధ్యావందనంలో జపించే 'హగుం సశ్శుచిషద్వసురంతరిక్ష ...'అనే మంత్రంగానీ,'ఆ సత్యేన రజసా..' అనే మంత్రంగానీ ఇంకా అనేక ప్రముఖ సూర్యమంత్రములు 'అరుణం'లోనివే.'అన్నాను.

సరిగ్గా అర్ధం చేసుకుంటే అన్ని సాధనలూ సూర్యోపాసనలో ఇమిడి ఉన్నాయి.భారతీయులమైన మనం ప్రాధమికంగా సూర్యోపాసకులమే.అంటే సూర్యునిద్వారా కనిపిస్తున్న దైవశక్తిని ఆరాదించేవారం అన్నమాట.

సంభాషణ బ్రహ్మచర్యం మీదకు మళ్ళింది.

'అసలు బ్రహ్మచర్యానికీ సాధనకూ సంబంధం ఏమిటి సార్?" అప్పటివరకూ మౌనంగా వింటున్న రాజు అడిగాడు.

'రాజు.నీ దగ్గర ఒక నూరు రూపాయలున్నాయనుకో.నీవు వెయ్యిరూపాయల విలువగల వస్తువును కొనాలి.నీవు ఏం చేస్తావు?నీ దగ్గర ఉన్న నూరు రూపాయలను పెంచి వెయ్యిచేసి అప్పుడు ఆ ధర చెల్లించి ఆ వస్తువును కొనుక్కుంటావు.కాని నీదగ్గర ఉన్న నూర్రూపాయలలో తొంభైతొమ్మిది రూపాయలను ఖర్చు చేసేస్తే నీ దగ్గర ఒక రూపాయి మిగులుతుంది.దానితో వెయ్యి రూపాయల వస్తువును నీవెలా కొనగలవు?ఇదీ అంతే.

నా చేతిలో ఒక రూపాయి లేకుంటేనేమి?నేను మిలియనీర్నే అనుకుంటే ఎలా ఉంటుందో బ్రహ్మచర్యం లేకపోతేనేమి నేను ధ్యానం చెయ్యగలను. చేస్తాను.అనుకోవడమూ అంతే.

యోగసిద్ధిని పొందాలంటే నీశరీరంలో గొప్పదైన శక్తి పోగుపడి ఉండాలి. దానికోసం నీవు బ్రహ్మచర్యాన్ని పాటించి అంతరిక శక్తిని పెంచుకోవాలి. యోగసాధనకు బ్రహ్మచర్యం రెడ్ ఇంకు తో అండర్ లైన్ చేసుకోవాల్సిన నిష్ఠ. అది లేకుండా అంతరిక సాధన చేస్తే పిచ్చెక్కుతుంది.' అన్నాను.

'నేనలా అనుకోవడం లేదు సార్.కోరిక కలిగినప్పుడు తీర్చుకుంటే ఆ తర్వాత ప్రశాంతంగా ధ్యానం చేసుకోవచ్చు కదా? అనేది నా భావన.' అన్నాడు రాజు.

నాకు నవ్వొచ్చింది.

'మన భావనలు అక్కడ పనిచెయ్యవు రాజు.యోగసాధనకూ బ్రహ్మచర్యానికీ అవినాభావ సంబంధం ఉన్నది.అదొక సైన్స్.ఎన్నోవేల ఏండ్ల నుంచి ఇది నిగ్గుదేలిన సత్యం.కోరిక తీర్చుకున్న తర్వాత ఇంక నీవు చేసేదేముంది?నిద్రపోవడం తప్ప.ధ్యానం చెయ్యడానికి నీకు శక్తి ఎక్కడ మిగిలిఉంటుంది?ధ్యానం అంటే నీరసంతో పడుకొని నిద్రపోవడం కాదు.తొట్టిలో నీరు నిండుగా ఉన్నపుడు నీవు అందులో ఒక చిన్నపడవను నడపగలవు.పంపు తిప్పేసి నీరు మొత్తం ఖాళీ చేసేస్తే ఖాళీ తొట్టిలో ఏం నడుపుతావు? కోరిక తీరాక ఉండేది నువ్వనుకుంటున్నట్లు ప్రశాంతత కాదు.నీరసం.

జంతువుల లాగా విచ్చలవిడి లైంగికజీవితం గడిపేవారికి ఆ నష్టం ఎలా ఉంటుందో అర్ధంకాదు.కాని యోగులకు అదెంతటి ఘోరమైన నష్టమో బాగా తెలుసు.జంతువులకు సీజన్ లోనే కోరిక కలుగుతుంది.అది ప్రకృతి ధర్మం.మనిషి జంతువు కంటే హీనుడిగా తయారవ్వడం వల్ల అతనికి సీజనూ గీజనూ ఏమీ లేదు.

వీర్యనష్టంవల్ల ప్రాణమయకోశంలో కలిగే కుంగుబాటు నుంచి కోలుకోవడానికి చాలామంది యోగులకు పదిహేనురోజులనుంచి నెలరోజులు పడుతుంది.ఇది ఇంద్రియపరాయణుల ఊహకు కూడా అందని విషయం.ఎందుకంటే, ప్రాణమయకోశం అంటే ఏమిటో,అదెక్కడ ఉంటుందో,ఎలా ఉంటుందో వారు కలలో కూడా ఊహించలేరు.వారు ఆ పదాలను విని ఉండవచ్చు.కాని వారికి అనుభవం ఉండదు.

చెరకులో రసం నిండుగా ఉంటే అది అమ్మవారి చేతిలో విల్లుగా మారుతుంది. రసం అంతా పోగా మిగిలిన పిప్పి ఎందుకు పనికొస్తుంది? తగలబెట్టడానికి తప్ప ఇంకెందుకూ పనికి రాదు.ఇదీ అంతే.బ్రహ్మచర్యశక్తి లేని దేహం చితిలో కాలడానికి తప్ప ఇంకెందుకూ పనికిరాదు.'-అన్నాను.

'పైగా ఎంతకాలం అలా ధ్యానం చేసుకోగలవు?మళ్ళీ కోరిక కలిగేదాకా. అంతేకదా?ఈ లోపల నీ మనస్సు ధ్యానంలో ఉండదు.కోరికవైపే లాగుతూ ఉంటుంది.దానిని ధ్యానం అని ఎలా అనగలం?చివరకు అదొక విషవలయం అవుతుంది.శక్తి లేనప్పుడు స్తబ్దుగా పడిఉండటం.శక్తి కలిగితే కోరిక తీర్చుకోవడం.మళ్ళీ పిప్పి అయిపోవడం.చివరికి ఈ విషవలయంలో నుంచి నీవు ఎప్పటికీ బయటపడలేవు'- అని అప్పటివరకూ మౌనంగా వింటున్న మదన్ అన్నాడు.

'బాగా చెప్పావు మదన్.యోగసాధనకు బ్రహ్మచర్యం తప్పనిసరి అని గ్రహించు రాజు.ఇందులో మారుమాటకు ఆస్కారం లేదు.'అన్నాను.

బ్రహ్మచర్యం అవసరం లేదు.మామూలుగా సంసార జీవితం గడుపుతూ కూడా సాధన చెయ్యవచ్చు అని ఈ మధ్య కొంతమంది గురువులు చెప్పడం చూస్తున్నాము.వారేమి చెబుతున్నారో వారికే తెలియనంత అజ్ఞానంలో ఉన్నారు వారు.ఇలాంటి కుహనా గురువుల వల్లనే సమాజం సర్వనాశనం అవుతున్నది.'ఇష్టం వచ్చినట్లు లైంగికశక్తిని వృధా చేసుకోండి.ఏమీ పరవాలేదు'.అని ఇప్పటివరకూ కొంతమంది నికృష్టవైద్యులు మాత్రమె చెబుతున్నారు.ఇప్పుడు కొందరు గురువులూ అదే చెబుతున్నారు.

మొన్నీ మధ్యనే ఒక పుస్తకంలో చదివాను.ఒక గురువుగారు బుద్ధుని ధ్యానమార్గాన్ని ప్రజలకు బోధిస్తున్నారు.బాగానే ఉంది.ఆయనకూడా ఇదే చెబుతున్నాడు.హాయిగా సంసారం చేసుకుంటూ కూడా ధ్యానం చెయ్యవచ్చు అని.అది చదివి నాకు చచ్చేంత నవ్వు వచ్చింది.హాయిగా సంసారం చేసుకునేవాడికి ధ్యానం ఎలా కుదురుతుంది? వాడి ధ్యానం అంతా కోరిక మీదా హాయిమీదా ఉంటుంది.ఇంక యోగం ఎలా సాధ్యమౌతుంది?ఇలాంటి వారినే కుహనా గురువులని నేనంటాను.వీరేం చెబుతున్నారో వీరికీ తెలియదు.వీరిని అనుసరించే శిష్యులకు అసలే తెలియదు.

బుద్ధుని మార్గాన్ని బోధించే ఈ గురువుకు, బుద్ధుడు సంసారాన్ని వదలిపెట్టి ఎందుకు సన్యాసి అయ్యాడో అర్ధం కాలేదు.లేకుంటే ఈయనకున్న తెలివి బుద్ధునికి లేదేమో మరి?హాయిగా సంసారం చేసుకుంటూ రాజభవనంలో సుఖంగా ఉండి సాధన చేసుకోవచ్చని బుద్ధునికి పాపం అర్ధం కాలేదు లాగున్నది.బహుశా ఈ గురువు అప్పుడు బ్రతికి ఉన్నట్లయితే బుద్ధుడిని సన్యాసి కాకుండా ఆపి రాజుగానే ఉంచేసేవాడేమో?కనీసం శుద్దోధనుడు సంతోషించి ఉండేవాడు.యశోధర సంతోషించి ఉండేది.

బుద్ధుని ధ్యానవిధానాన్ని మాత్రం తీసుకుని మిగతా జీవితాన్ని ఆదర్శంగా తీసుకోకపోవడం ఎంతవరకు సమంజసమో ఆ గురువుకే తెలియాలి.ఈ మాత్రం తెలివితేటలు లేకేనేమో బుద్ధుడు తాను సన్యాసి అవడమే గాక తన జీవితకాలంలో కొన్ని వేలమందిని సన్యాసులుగా మార్చాడు?

పిచ్చి గురువులు!పిచ్చిమాటలు!!

యోగానికి పతంజలి ఇచ్చిన నిర్వచనం బౌద్ధపు పోకడలతో కూడుకున్నట్టిది. 'చిత్తవృత్తి నిరోధమే యోగం' అన్నది బౌద్దమతపు ప్రభావం కలిగిన నిర్వచనం. అంతకంటే పాతదైన సిద్ధయోగ సాంప్రదాయంలో ఈ నిర్వచనం వేరుగా ఉన్నది.'జీవాత్మను పరమాత్మతో కలపడమే యోగం' అని అతి ప్రాచీన నిర్వచనం మన యోగసాంప్రదాయంలో ఉన్నది.అలా చెయ్యాలంటే జీవాత్మ అంటే ఏమిటో తెలియాలి,పరమాత్మ అంటే ఏమిటో తెలియాలి.

ఈ పదాలన్నీ ఊరకే వ్యాకరణపరంగానూ బౌద్ధికంగానూ అర్ధమైతే చాలదు. అవేమిటో ఎక్కడున్నాయో అనుభవంలో తెలియాలి.అలా తెలుసుకోవాలంటే ఆషామాషీ వ్యవహారం కాదు.దానికి ఎంతో సాధన కావాలి.సాధనకు బ్రహ్మచర్యం అత్యంత అవసరం.ఇవన్నీ ఒకదానికొకటి అనుసంధానింపబడి ఉన్న ప్రక్రియలు.

'ఒక ఎత్తైన పర్వతం మీద ఒక నిధి ఉన్నది.నీవు దానిని పొందాలి.అంటే కొండ ఎక్కాలి.కొండ ఎక్కాలంటే నీకు ప్రస్తుతం ఉన్న శక్తి చాలదు.కనుక అభ్యాసం ద్వారా,మంచి తిండి తిని,వ్యాయామం చెయ్యడం ద్వారా శక్తిని పెంచుకోవాలి.తగినంత బలం నీలో వచ్చిపుడు నీవు  కొండను ఎక్కగలవు.అలా కాకుండా ఇప్పుడు ఉన్న శక్తినే వృధా చేసుకుంటూ ఇక్కడే కూలబడిపోతే నీవెలా కొండను ఎక్కగలవు? నిధిని ఎలా దక్కించుకోగలవు?నీవల్ల ఎప్పటికీ కాదు.ఇదీ అంతే.'

'మరి తంత్రంలో indulgence వల్ల కూడా సిద్ధి పొందవచ్చు అని అంటారు కదా.మీరు కూడా కొన్నిచోట్ల అలా వ్రాసినారు.అదెలా?' అడిగాడు రాజు.

'అది వేరు.సామాన్యంగా సంసార జీవితం గడపుతూ శక్తిని వృధా చేసుకోవడం వేరు.నేను చెప్పే తంత్రసాధన వేరు.తంత్రసాధనలో indulgence వల్ల సిద్ధి కలగడం సాధ్యమే.అటువంటి మార్గం ఒకటి తంత్రంలో ఉన్నది.అయితే ఆ విధానమూ ప్రక్రియా నీకు తెలియాలి.అది నీవనుకుంటున్న indulgence కాదు.పైగా నీకు భైరవి సహాయం అవసరం అవుతుంది' అన్నాను.

'భైరవి అంటే ఏమిటి?' అన్నట్లు అందరూ ప్రశ్నార్ధకంగా చూచారు.

'భైరవి అంటే దేవత కాదు.నీవంటిదే ఒక సాధకురాలు.తంత్రమార్గంలో సాధన చెయ్యాలని ఇచ్చ ఉండి,దానికి తగిన ధైర్యం ఉండి,తంత్రసాధనలో నీకు సహాయపడటానికి ముందుకు వచ్చే సాధకురాలినే భైరవి అని ఆమార్గంలో పిలుస్తారు.అలాంటి ధీరవనితలు పాతకాలంలో ఉండేవారు.ఇప్పటికీ బెంగాల్లో కొన్ని రహస్య సాంప్రదాయాలలో ఇలాంటి అభ్యాసాలు ఉన్నాయి.నీ అదృష్టం బాగుండి అలాంటి భైరవి నీకు దొరికితే,మీరిద్దరూ ఆ సాధనలో నిలదొక్కుకుని,దారిలో ఎదురయ్యే ఆటంకాలకు భయపడకుండా సాధన చేసి,దానిని సాధించగలిగితే అప్పుడు తంత్రంలో కూడా అద్బుతమైన సిద్ధి సాధ్యమే.' అన్నాను..

'మరి ఆ సాధనలలో సెక్స్ మీద కంట్రోల్ వస్తుందా సార్?' రాజు అడిగాడు.

'ఎందుకు రాదు? అందులోనే అసలైన అద్భుతమైన కంట్రోల్ వస్తుంది.వారి నిగ్రహశక్తిని నీవు ఊహించనుకూడా ఊహించలేవు.అణచిపెట్టుకునే ప్రయాసతో కూడిన సాధనలో అటువంటి కంట్రోల్ రావడం చాలా కష్టం.అయితే తంత్రమనేది ఒక రహస్య సాధనామార్గం.నీవనుకుంటున్నట్లు అది కోరిక కలిగినవెంటనే తీర్చుకునే రకపు indulgence కాదు.అదొక రహస్య సాధనా మార్గం.దానిని గురుముఖతా నేర్చుకొని సాధన చెయ్యవలసి ఉంటుంది.

అయితే దీనిలో కొన్ని చిక్కులున్నాయి.ఇలాంటి అభ్యాసాలను సమాజం హర్షించదు.అంటే,మనచుట్టూ ఉన్న సమాజం అంతా నీతిమంతులతోటి నిండిపోయి ఉన్నదని నేననడం లేదు.మనకు కనిపించే సంఘంలో అంత పతివ్రతలూ నీతిమంతులూ ఎవరూ లేరు.అందరూ రహస్యపాపులే.కాని అలాంటివారే మళ్ళీ ఇలాంటి రహస్యతంత్ర సాధనలను అసహ్యించుకుంటారు.

ఉదాహరణకు,రజనీష్ ను విమర్శించే వాళ్ళంతా ఇలాంటి హిపోక్రిట్లే.ఇటువంటి కపటసమాజంలో నిజమైన తపన ఉన్న భైరవి దొరకడం చాలా కష్టం. ఎందుకంటే ఆమెకూ వివేక వైరాగ్యాలుండాలి. సాధనా సంపత్తి ఉండాలి.సాధన పట్ల తపన ఉండాలి.అన్నింటినీ మించి తెగింపూ ధైర్యమూ ఉండాలి. తంత్రసాధకురాలై ఉండాలి.అలాంటి భైరవి దొరకడమే కష్టం అనుకుంటే, సమర్ధుడైన తంత్రగురువు దొరకడం ఇంకా కష్టం.దాదాపుగా దుర్లభమే అని చెప్పవచ్చు.ఒకవేళ ఇవన్నీ కుదిరితే అప్పుడు ఆ సాధనల ద్వారా నీవడిగిన సిద్ధి సాధ్యమే' అన్నాను.

నా మాటలు విన్న తర్వాత సాధనామార్గం అంటే ఏమిటో,అది ఎలా ఉంటుందో వారికి కొంతైనా అర్ధమైనట్లు నాకనిపించింది.ఎంతో ఎత్తుగా ఉన్న ఆధ్యాత్మికగమ్యంలాగే మా ఎదురుగా ఉన్న కొండశిఖరం కూడా ఎత్తుగా కనిపిస్తున్నది.

క్రమంగా సూర్యుడు పడమటి దిక్కున అస్తమించాడు.చీకటి తెరలు లోకాన్ని కప్పుతున్నాయి.

అందరం లేచి దేవాలయంలోకి వెళ్లి పరమేశ్వరుని దర్శనం చేసుకుని ఒక గంటసేపు అక్కడే ధ్యానంలో కూర్చున్నాము.ఆ తర్వాత బయటకు వచ్చి ఎవరి ఇష్టమైనది వారు తిని,గదులకు వెళ్లి నిద్రకు/ధ్యానానికి ఉపక్రమించాము.

ఉదయం నాలుగుకే లేచి ఆరుగంటలలోపే స్నాన/ధ్యానాదులు ముగించుకుని దేవాలయం వద్దకు చేరుకున్నాము.ఉదయం పూట జరిగే మొదటి అభిషేకంలో పాల్గొని,కొద్దిగా ఉపాహారం సేవించి,గుంటూరుకు తిరుగు ప్రయాణం అయ్యాము.

(సంపూర్ణం)

read more " సాధనా సమ్మేళనం - కోటప్పకొండ -4 "

మకర సంక్రాంతి కుండలి-ఫలితాలు

ఈమధ్య జ్యోతిష్యం వైపు దృష్టి సారించి చాలా రోజులైంది.మకరసంక్రాంతి కుండలి ఏమంటున్నదో ఒకదారి చూద్దాం.

ఈ ఏడాది మకర సంక్రాంతి 14-1-2014 న మధ్యాన్నం 1.05 కి మన దేశరాజధానిలో జరిగింది.ఆ సమయానికి గల గ్రహకుండలిని ఇక్కడ చూడవచ్చు.

ఇందులోని గ్రహస్థితులను బట్టి ఈ మూడునెలలలో మన దేశ పరిస్థితులు ఎలా ఉంటాయో స్థూలంగా పరిశీలిద్దాం.

లగ్నం చరరాశి అయింది.గుళిక లగ్నానికి దగ్గరగా ఉన్నాడు.కనుక దేశం అన్నిరంగాలలో ముందుకు పోవాలని చాలామంది ఆశిస్తున్నా,సామూహిక కర్మ అనేది దేశాన్ని అంత త్వరగా బాగుపడనివ్వదు.ఆలోచన అద్భుతం. ఆచరణ శూన్యం అన్నట్లు దేశపరిస్థితి ఉంటుంది.

లగ్నాధిపతి కుజుని షష్ఠస్థితివల్ల దేశం అంతర్గత శత్రుపీడతో సతమత మౌతుంది.ప్రజలకు దూరదృష్టి కొరవడుతుంది.తమపై తామే యుద్దానికి దిగుతూ ఉంటారు.నాయకుల మాయమాటలకు తేలికగా మోసపోతారు. ప్రతివారూ హిపోక్రసీతో నిండి,అతితెలివితో చివరకు ఊబిలో అడుగేస్తారు.

దశమంలో బలహీన రవివల్ల అధికారంలో ఉన్న ప్రభుత్వం బలహీన పడుతుంది.అక్కడే ఉన్న బుధుని కారణంగా ప్రతిపక్షాలు క్రమేణా తెలివైన అజెండాలతో బలాన్ని సంతరించుకుంటాయి.

మూడింట వక్రగురుచంద్రుల వల్ల,ప్రభుత్వాలు ప్రజలకు ఏవేవో మాయమాటలు చెప్పి మసిబూసి మారేడుకాయ చెయ్యాలని చూచినా ఫలితం ఉండదు.ఏం జరుగుతున్నదో మేధావులూ ప్రజలూ చక్కగా గమనిస్తూ ఉంటారు. అప్పటికప్పుడు ప్రకటించే ఎన్నికల ప్రజాకర్షక పధకాలు ఏమాత్రం ఫలితాలను ఇవ్వవు.

సప్తమంలో ఉచ్ఛశనిరాహువుల వల్ల,ప్రతిపక్షాలు బాగా బలాన్ని పుంజుకోవడం తధ్యం.గత పరిపాలనలతో విసిగిపోయిన ప్రజలు నూతన నాయకత్వం వైపు తప్పకుండా మొగ్గు చూపుతారు.అయితే,విడిపోతున్న రాహుశనులవల్ల ప్రతిపక్షాల మధ్య ఐక్యత కొరవడుతుంది.ఏకాభిప్రాయం లోపిస్తుంది.

తొమ్మిదింట వక్రశుక్రునివల్ల విదేశీ సంబంధాలు దెబ్బతింటాయి.అధికార బలానికి,పురుషాహంకారానికి మహిళలు,అమాయకులు బలైపోతారు. ఆర్ధికరంగం ఏమంత గొప్పగా ఏమీ ఉండదు.

నవాంశలోని చతుర్ధ నీచకుజుని వల్ల,ప్రజలు అమితమైన ఉత్సాహంతో ముందుకు దూకి భంగపడతారు.

ఇందులోని చాలా సూచనలు ఇప్పటికే జరిగాయి.కొన్ని ప్రస్తుతం జరుగుతూ ఉన్నాయి.ఈ పరిస్తితి మార్చి నెలాఖరు వరకూ కొనసాగుతుంది.ఏప్రియల్లో జరుగబోయే మేష సంక్రాంతి చాలా ముఖ్యమైనది.ఎందుకంటె తర్వాతి మూడు నెలలలోనే ఎన్నికలు జరుగబోతున్నాయి.

అప్పటి ఫలితాలను అప్పుడు చూద్దాం.

read more " మకర సంక్రాంతి కుండలి-ఫలితాలు "