ఎవరికి చెప్పాలి?

ఎవరికి చెప్పాలి ?

మెరిసే నా కిరీటం వెనుక

తలలో దిగిన

ముళ్ళున్నాయని

ఎవరికి చెప్పాలి ?

విరిసే నా చిరునవ్వు వెనుక

విషాదభారంతో వర్షించే

కళ్ళున్నాయని

ఎవరికి చెప్పాలి ?

స్వచ్చమైన నా అరచేతులలో

ఆరిన రక్తపు

మరకలున్నాయని

ఎవరికి చెప్పాలి ?

అచ్చంగా కనిపించే నా మనసులో

రచ్చకెక్కని మచ్చలెన్నో

దాగున్నాయని 

ఎవరికి చెప్పాలి ?

ఉత్సాహపు నా చేతల వెనుక

నిశీధపు నైరాశ్యం

ఘూర్ణిస్తోందని

ఎవరికి చెప్పాలి ?

వెలుగుల ఆశయాల మాటున

వెలిసిన వైరాగ్యం

నిద్రిస్తోందని

ఎవరికి చెప్పాలి ?

నేటి పగటి పవిత్రత మాటున

ఒకనాటి చీకటి కోరిక

చిందులున్నాయని

ఎవరికి చెప్పాలి ?

ప్రకాశించే దివ్యత్వం చాటున

అంధకారపు దీనత్వం

దిగాలుగా చూస్తోందని

ఎవరికి చెప్పాలి ?

లోకపు మెప్పుల లోపల

చీకటి తప్పుల చిట్టా

బూజు పట్టిందని

ఎవరికి చెప్పాలి ?

ఈనాటి నీతి సూర్యుడు

ఒకనాటి రాహువు పట్టు నుంచి

బ్రతికి బట్ట కట్టాడని

ఎవరికి చెప్పాలి ?

నేటి ఆనందపు నాట్యం వెనుక

భరింపరాని బాధల

భారం నిండి ఉందని

ఎవరికి చెప్పాలి ?

కారుణ్యపు వెల్లువ వెనుక

కాఠిన్యపు ఎడారి

ఏడుస్తోందని

ఎవరికి చెప్పాలి ?

దయతో మెత్తనైన మదిలో

ఒకనాటి కర్కశత్వపు

మరకలున్నాయని

ఎవరికి చెప్పాలి ?

ఎన్నో జన్మల తప్పులన్నీ

కన్నుమూసినా తెరిచినా

వెన్నులో పాకుతున్నాయని

ఎవరికి చెప్పాలి ?

సన్మానాల హోరుల చాటున

శిక్షల సంకెళ్ళు

సలుపుతున్నాయని

ఎవరికి చెప్పాలి ?

కాలం మొదటి నుంచీ

చేసిన తప్పులు గుర్తొచ్చి
చిత్రవధ చేస్తున్నాయని

ఎవరికి చెప్పాలి ?

అనుబంధాల కోలాహలం మధ్యన

ఒంటరితనపు నిట్టూర్పే

నా ఓదార్పని 

ఎవరికి చెప్పాలి ?

చేతనున్న అమృత భాండం వెనుక

గొంతులోని హాలాహలం

మంటలు రేపుతోందని

ఎవరికి చెప్పాలి ?

అందరూ నాతో నడుస్తున్నా

ఎవరూ నావారు కాని 

ఒంటరిని నేనని

ఎవరికి చెప్పాలి ?

అలుపెరుగని అడుగుల మాటున

నిలువెత్తు నీరసం

నీడలు పరుస్తోందని

ఎవరికి చెప్పాలి ?

వింత వింత దారులలో

అంతులేని ఈ పయనం

అమితంగా విసిగిస్తోందని

ఎవరికి చెప్పాలి ?

రంగురంగుల ఈ లోకం

భంగపడిన నా మనసుకు

మింగుడు పడటం లేదని

ఎవరికి చెప్పాలి ?

విపరీత పోకడల ప్రపంచం

విసిగిన నా మదిలో

విషాదాన్ని వెల్లువెత్తిస్తోందని

ఎవరికి చెప్పాలి ?

బానిసత్వపు గానుగలో

నలిగిన ఈ హృదయం

నాటకాలింక చాలంటోందని

ఎవరికి చెప్పాలి?
బ్రద్దలౌతున్న ఈ హృదయం

భరింపరాని బ్రతుకు భారం
లేకుంటే మేలంటోందని

ఎవరికి చెప్పాలి ?

అలసిపోతున్న నా ప్రాణం

ఎన్నటికీ తిరిగిరాని

విశ్రాంతిని కోరుతోందని...