మీ వ్రాతలు వాళ్ళవిగా చెప్పుకుంటున్నారు

నా పోస్టులను ఇష్టపడే ఒకరినుంచి నిన్నొక మెసేజ్ వచ్చింది.

'ఫలానా "టెలిగ్రాం గ్రూపు" లో చేరండి. ఇందులో మంత్ర, తంత్ర, జ్యోతిష, ఆధ్యాత్మిక, భారతీయ సంస్కృతి వగైరా విషయాల మీద చర్చలుంటాయి. మీకు స్వాగతం' అని అందులో ఉంది.

నేను మర్యాదగా, "నాకు చేరాలని లేదు. సారీ !" అని జవాబిచ్చాను.

'ఈ గ్రూపులో ఒకాయన మీ వ్రాతలను తనవిగా పోస్టు చేసుకుంటున్నాడు. గ్రూపులో అతనికి చాలా appreciation వస్తోంది.' అని రిప్లై వచ్చింది.

నాకు జాలేసింది.

'అది అతని ఖర్మ. చేసుకోనివ్వండి. నేను పాడిన పాటల్ని కూడా తనవిగా చెప్పుకోమనండి ఇంకా బాగుంటుంది. ఇంతకీ అతని పేరేంటి?' అడిగాను.

'గ్రూపులో ఉన్నవాళ్ళ పేర్లు మాకు కనిపించవు. అతని పేరు LK అని మాత్రం వస్తుంది' అని మెసేజ్ వచ్చింది.

'ఈ విషయాలు సాధన చేసి అనుభవంలో తెలుసుకోవలసినవిగాని చర్చలలో పొద్దు పుచ్చేవి కావు. కాబట్టి మీ గ్రూపులో చేరే ఉద్దేశ్యం నాకు లేదు. సారీ. నన్ను ఆహ్వానించినందుకు థాంక్స్' అని మెసేజ్ ఇచ్చాను.

సో కాల్డ్ సూడో ఆధ్యాత్మిక లోకంలో ఒక విచిత్రం ఉంది. 'నాకింత తెలుసు' అని ప్రదర్శించుకుని ఎదుటివారి నుంచి "ఆహా ఓహో" అని పొగడ్తలు వస్తే ఉబ్బిపోతూ అదే ఏదో పెద్ద ఘనతగా చాలామంది భావించుకుంటూ ఉంటారు. ఇలాంటివారిని చూస్తె నాకు నవ్వూ జాలీ రెండూ వస్తూ ఉంటాయి.

ఆధ్యాత్మికత అనేది విజ్ఞాన ప్రదర్శనలో లేదు. అది సాధనలోనూ అనుభవంలోనూ ఉంటుంది. అందులోనూ, ఈ విధంగా ఇతరులనుంచి వచ్చే మెప్పులు, పొగడ్తలు, లోలోపల ఇన్ఫీరియారిటీ కాంప్లెక్స్ తో నిండిపోయి ఉన్నవారికి పనిచేస్తాయి గాని ఇంకెందుకూ కొరగావు.

చర్చలతో ఆధ్యాత్మికత రాదు. అది సాధనతో వస్తుంది. వేరేవాళ్ళ బ్యాంక్ ఎకౌంట్ ను తనదిగా చెప్పుకున్నంత మాత్రాన ఆ ఎకౌంట్లో ఉన్న డబ్బు తనదెలా అవుతుంది?

ఇలాంటి వారిని చూచి జాలిపడటం తప్ప ఇంకేం చెయ్యగలం?

read more " మీ వ్రాతలు వాళ్ళవిగా చెప్పుకుంటున్నారు "

"విజ్ఞాన భైరవ తంత్రము" - Telugu E Book నేడు విడుదలైంది

ఈరోజు గురుపూర్ణిమ.

సమస్త జగత్తులకూ పరమగురువగు పరమేశ్వరుని స్మరిస్తూ ఈ రోజున మా "పంచవటి స్పిరిట్యువల్ ఫౌండేషన్" నుంచి ఆరవ E-Book గా "విజ్ఞాన భైరవతంత్రము" ను విడుదల చేస్తున్నాము. తంత్రాచారములలో ఇది కౌలాచారమునకు చెందినది. ఆగమములలో భైరవాగమమునకు చెందినది. దీనియందు, పరమేశ్వరుడు పార్వతీదేవికి ఉపదేశించినట్లుగా చెప్పబడిన నూట పన్నెండు ధారణా విధానములు ఇవ్వబడినవి. తాంత్రిక ధ్యానాభ్యాసులకు ఇదొక భగవద్గీత వంటిది.

దీనిలోని అన్ని సాధనలను శ్రీరామకృష్ణులు తమ సాధనా కాలమున కొద్ది రోజులలో సాధించగలిగినారు. మనబోటి సామాన్యులకు వీటిలోని ఒక సాధనకు ఒక జన్మ పడుతుంది.

దాదాపు తొమ్మిదేళ్ళ క్రితం నేను బ్లాగు వ్రాయడం ప్రారంభించిన కొత్తల్లో 'విజ్ఞాన భైరవతంత్రం' మీద వరుసగా పోస్టులు వ్రాద్దామని అనుకున్నాను. అది నాకు చాలా ఇష్టమైన పుస్తకం, ఎందుకంటే, చిన్నప్పటి నుంచీ నేను చేసిన సాధనలు దానిలో చాలా ఉన్నాయి. కానీ అవసరం ఉన్నా లేకపోయినా ప్రతిదీ అందరికీ చెప్పడం ఎందుకు? అన్న ఉద్దేశ్యంతో ఆ ప్రయత్నాన్ని విరమించాను. అది "పంచవటి స్పిరిట్యువల్ ఫౌండేషన్" నుంచి పుస్తకంగా విడుదలయ్యే ముహూర్తం ఇప్పటికి వచ్చింది.

దీనికి అనేక వ్యాఖ్యానములు ఎప్పటినుంచో ఉత్తర భారతదేశమున ఉన్నవి. నవీన కాలపు వివాదాస్పద గురువులలో ఓషో రజనీష్ దీనిపైన ఉపన్యాసాలిచ్చాడు. బైటకు చెప్పినా చెప్పకున్నా మోడరన్ గురువులందరూ చాలావరకూ దీనినే అనుసరిస్తున్నారు. ఈ గురువులందరూ వారి వారి అనుభవములను బట్టి జ్ఞానమును బట్టి దీనిని వ్యాఖ్యానించారు. నేను కూడా నా అనుభవములను ఆధారము చేసికొని దీనికి వ్యాఖ్యానమును వ్రాశాను.

ఇదొక ప్రాక్టికల్ గైడ్ బుక్. కానీ దీనిలోని ధారణల లోతుపాతులు అనుభవం ఉన్న గురువు దగ్గర వ్యక్తిగతంగా నేర్చుకున్నప్పుడే అర్ధమౌతాయి. నా శిష్యులలో అర్హులైనవారికి, నమ్మకంగా నన్ను అనుసరించేవారికి ఈ ధారణల లోతుపాతులను ప్రాక్టికల్ గా నేర్పించడం, అసలైన తంత్రసాధన అంటే ఏమిటో వారికి రుచి చూపించడం జరుగుతుంది.

అతి తక్కువకాలంలో (మూడు వారాలలో) ఈ పుస్తకాన్ని వ్రాయడంలో ఎంతో సహకరించిన నా అమెరికా శిష్యులకు కృతజ్ఞతలు ఆశీస్సులు తెలియజేస్తున్నాను.

ఈ E-Book కావలసిన వారు google play books నుంచి డౌన్లోడ్ చేసుకొనవచ్చును.

read more " "విజ్ఞాన భైరవ తంత్రము" - Telugu E Book నేడు విడుదలైంది "

Mujhe Peene Ka Shouk Nahi - Shabbir Kumar, Alka Yagnik

Mujhe Peene Ka Shouk Nahi

Peeta Hu Gham Bhulane Ko

అంటూ షబ్బీర్ కుమార్, ఆల్కా యాజ్ఞిక్ మధురంగా ఆలపించిన ఈ యుగళగీతం 1983 లో వచ్చిన Coolie అనే చిత్రంలోనిది. ఈ పాటను రఫీ పాడాడని చాలామంది అనుకుంటారు గాని రఫీ 1980 లోనే గతించాడు. షబ్బీర్ కుమార్ స్వరం చాలావరకూ రఫీ స్వరంలాగా ఉంటుంది.

రఫీ అంత్యక్రియలలో పాల్గొంటున్నపుడు ఆ గోతిలో షబ్బీర్ చేతి గడియారం పడిపోయిందట. తన తర్వాత తన పరంపరను కొనసాగించమని అదొక దైవసూచనగా షబ్బీర్ స్వీకరించాడు. ఆ తర్వాత అతను దాదాపు 1500 పాటలు పాడాడు. కానీ తర్వాత రోజులలో అతను ప్లే బ్యాక్ సింగింగ్ నుంచి విరమించుకుని స్టేజి షోలకు అంకితమయ్యాడు. బహుశా సినిమా లోకపు కుళ్ళు రాజకీయాలే దీనికి కారణం కావచ్చు.

చిన్నప్పటి స్నేహం చాలా మధురంగా ఉంటుంది. ఎందుకంటే అది చాలా అమాయకమైనది. అందులో స్నేహం తప్ప ఇంకేమీ ఉండదు. అలాంటి చిన్ననాటి స్నేహితులిద్దరూ పెద్దయ్యాక కూడా ఒకర్ని ఒకరు మర్చిపోలేక, ఆ బాధలో త్రాగి, ఒకరిని ఒకరు వెదుక్కుంటూ పాడుకునే పాట ఇది. చాలా మధురమైన భావం !

కొన్ని పాటలు చూస్తే బాగుండవు. వింటేనే బాగుంటాయి. ఈ పాట కూడా అలాంటిదే. మీకు ధైర్యం ఉంటే చూడండి !

ఆ తర్వాత నా స్వరంలో కూడా ఈ మధుర గీతాన్ని వినండి మరి !

Movie:--Coolie (1983)

Lyrics:--Anand Bakshi

Music:--Laxmikant Pyarelal

Singers:--Shabbir Kumar, Alka Yagnik

Karaoke Singer:--Satya Narayana Sarma

Enjoy

------------------------------

Mujhe peene ka shouk nahi – Peeta hu gham bhulane ko – 2

Teri yaade mitane ko -2

Peeta hu gham bhulane ko

Mujhe peene ka shouk nahi – Peeti hu gham bhulane ko – 2

Teri yaade mitane ko -2

Peeti hu gham bhulane ko

Mujhe peene ka shouk nahi – Peeta hu gham bhulane ko

Lakho me hazaaro me – Ek tuna nazar aayi- 2

Tera Koi khat aaya – Na koi khabar aayi

Kya tune bhula dala -2

Ap--ne is diwane ko

Mujhe peene ka shouk nahi – Peeti hu gham bhulane ko

Koi vo kitabe dil – Jis dilka hai ye kissaa-2

Is hisso he paas mere - tere baat hai ek hissa

Mai pura karu kaise - Is dil ke fasane ko

Mujhe peene ka shouk nahi – Peeta hu gham bhulane ko

Mil jate agar ab ham – Aag lag jaati paani me – 2

Bachpan se vahi dosti - hojati javani me

Chahat me badal dete

Chahat me badal dete - Hum is dostani ko

Mujhe peene ka shouk nahi – Peeti hu gham bhulane ko

Mujhe peene ka shouk nahi – Peeta hu gham bhulane ko

Meaning

I am not fond of drinking, I just drink to forget my sadness
I just drink to forget your memories

Among thousand and millions of people
You are not found anywhere
There is no trace or news of you
What? Did you really forget this mad fellow?

My heart was the chapter of a book
and that book was lost
A part of it is with me, another part is with you
How should I complete the story of my heart?

If we meet now, then fire will be created in water

The sweet friendship that we had in our childhood

will become alive again

Then we will convert that friendship

into a passionate love

I am not fond of drinking, I just drink to forget my sadness
I just drink to forget your memories

తెలుగు స్వేచ్చానువాదం

త్రాగడం అంటే నాకేమీ ఇష్టం లేదు

కానీ ఈ బాధను మర్చిపోవడం కోసం త్రాగుతున్నాను

నీ జ్ఞాపకాలను మర్చిపోవడం కోసం త్రాగుతున్నాను

వేలాది లక్షలాది మందిలో నిన్ను వెదుకుతున్నాను

కానీ నీ జాడా లేదు జవాబూ లేదు

ఈ పిచ్చివాడిని నిజంగా మర్చిపోయావా నువ్వు?

నా హృదయమనేది ఒక పుస్తకంలో ఒక అధ్యాయం

ఆ పుస్తకం ఇప్పుడెక్కడో పోయింది

సగం నా దగ్గరుంది సగం నీ దగ్గరుంది

ఈ కధను నేనెలా పూర్తి చేసేది?

ఇప్పుడు మనం కలుసుకుంటే

నీళ్ళలో అగ్ని చెలరేగుతుంది

చిన్నప్పటి మన స్నేహం మళ్ళీ చిగురిస్తుంది

ఆ స్నేహాన్ని ఇప్పుడు మనం

ఒక మధుర ప్రేమగా మార్చుకుందాం

త్రాగడం అంటే నాకేమీ ఇష్టం లేదు

కానీ ఈ బాధను మర్చిపోవడం కోసం త్రాగుతున్నాను

నీ జ్ఞాపకాలను మర్చిపోవడం కోసం త్రాగుతున్నాను

read more " Mujhe Peene Ka Shouk Nahi - Shabbir Kumar, Alka Yagnik "

27-7- 2018 పౌర్ణమి + చంద్ర గ్రహణం ప్రభావాలు

27-7-2018 న పౌర్ణమి + చంద్ర గ్రహణం వస్తున్నాయి. దీని ప్రభావం చాలా ఎక్కువగా మనుషుల మీద ఉండబోతున్నది. నిజానికి నిన్నటి నుంచే దీని ప్రభావం మనుషుల మీద మొదలైంది. మీరు గమనించుకుంటే ఈ క్రింది ప్రభావాలు మీలోనూ మీ చుట్టూ ఉన్నవారిలోనూ కన్పిస్తాయి.

1. నిన్నా ఇవాళా, మనుషులు తేలికగా చిరాకు పడుతూ ఉంటారు. ముఖ్యంగా ఫేస్ బుక్, వాట్స్ అప్ లాంటి యాప్స్ ఎప్పుడూ వాడే వాళ్ళు, ప్రెండ్స్ తో చాటింగ్ చేసేవాళ్ళ మీద ఈ ప్రభావం ఎక్కువగా ఉంటుంది. గమనించండి.

2. చెప్పుడు మాటలు వినడం, ఒకళ్ళను ఒకళ్ళు అపార్ధం చేసుకోవడం, అనవసరంగా ఇతరుల మీద చిరాకు పడటం, మనస్సులు చెడిపోవడం, డిప్రెషన్ కు గురికావడం, ఏడవడం జరుగుతుంది. ముఖ్యంగా ఇది ఆడవాళ్ళలో కనిపిస్తుంది. మొగవాళ్ళు కోపతాపాలకు, ఉక్రోషాలకు, పగలకు గురౌతారు.

3. ఈ చంద్ర గ్రహణ ప్రభావం ముఖ్యంగా మకర, కుంభ రాశుల మీద ఉంటుంది. ఈ రాశులలో చంద్రుడు గాని, సూర్యుడు గాని, లగ్నంగాని ఉన్న జాతకుల మీద ఈ ప్రభావాలు ఎక్కువగా ఉంటాయి. టీవీ జ్యోతిష్కులు, పత్రికా జ్యోతిష్కులు చెప్పే మాటలు నమ్మి, ఇది మకర రాశి వారికేగాని, కుంభరాశి మీద ఏమీ ఉండదని అనుకోకండి. వారి మీద కూడా ప్రభావం ఉంటుంది. ఎందుకంటే, సాయన సిద్ధాంత రీత్యా గ్రహణం కుంభ రాశిలో ఏర్పడుతోంది. అనుభవంలో సాయన, నిరయన సిద్ధాంతాలు రెండూ పని చేస్తాయి. తేదీల పరంగా జనవరి 14 నుంచి మార్చి 15 లోపు పుట్టినవారి మీద ఈ ప్రభావం ఎక్కువగా ఉంటుంది. 

4. ఈ ప్రభావం వల్ల, ఉన్నత స్థానాలలో ఉన్న వ్యక్తులకు ప్రాణగండం ఉన్నది. అది రాజకీయ నాయకులు కావచ్చు, అధికారులు కావచ్చు. వారికి పూర్తి మెడికల్ కేర్ అవసరం.

5. ఈ రోజునుంచీ జూలై 31 వరకూ కోపతాపాలను, అనవసర ఆవేశాలను తగ్గించుకుని కంట్రోల్ లో ఉంటె మంచిది. స్పీడ్ డ్రైవింగులు, ఈతలు, ప్రమాదకర స్థలాలకు విహార యాత్రలు, దూరప్రయాణాలు మొదలైన సాహసాలకు దూరంగా ఉండాలి.

6. తేలికగా మనస్సు బేలన్స్ తప్పే వారికీ, హిస్టీరికల్ గా ప్రవర్తించే వారికీ, ముఖ్యంగా ఆడవారి మీద ఈ ప్రభావాలు ఎక్కువగా ఉంటాయి. ఈ సమయంలో వాళ్ళు తేలికగా అన్ బేలన్స్ అయి పిచ్చిపిచ్చిగా ప్రవర్తిస్తూ ఉంటారు. గమనించండి.

సులువైన ఈ జాగ్రత్తలు పాటించి ఈ గ్రహణ ప్రభావాలనుండి బయట పడండి.

read more " 27-7- 2018 పౌర్ణమి + చంద్ర గ్రహణం ప్రభావాలు "

Tae Kwon Do Grand Master Jhoon Rhee - Astro analysis

"A picture is worth a 1000 words; an action is worth a 1000 pictures;" -- Grand Master Jhoon Rhee, 10th degree black belt, Tae Kwon Do

Tae Kwon Do సర్కిల్స్ లో ఝూన్ రీ పేరు తెలియని వారుండరు. ఈయనా బ్రూస్లీ మంచి ఫ్రెండ్స్. బ్రూస్లీ అందరికీ తెలుసు. కానీ ఈయన టైక్వాన్ డో సర్కిల్స్ లో మాత్రమే తెలుసు. బ్రూస్లీ వాడే హైకిక్స్ అన్నీ ఝూన్ రీ దగ్గర నేర్చుకున్నవేనని, అవి కుంగ్ ఫూ కిక్స్ కావని, టైక్వాన్ డో కిక్స్ అనీ తెలిస్తే మీకు ఆశ్చర్యం కలుగుతుంది.

ఉదాహరణకు, Return of the Dragon సినిమాలో, చక్ నారిస్ కూ బ్రూస్లీకీ జరిగే కోలోజియం ఫైట్ లో, బ్రూస్లీ వాడినవి అన్నీ టైక్వాన్ డో కిక్సే. అతను చేసినది కుంగ్ ఫూ కాదు. తన పర్సనల్ స్టైల్ అయిన Jeet Kune Do మరియు టైక్వాన్ డో కలిపి ఆ సీన్లో బ్రూస్లీ వాడాడు.

ఝూన్ రీ జనవరి 7 - 1932 న సౌత్ కొరియా లోని Asan అనే ఊళ్ళో పుట్టాడు. 30-4-2018 న అమెరికాలోని వర్జీనియా స్టేట్,  ఆర్లింగ్ టన్ లో తన 86 వ ఏట చనిపోయాడు. ఈయనకు Father of American Tae Kwon Do అనే పేరుంది. ఈయన 1960 లలో అమెరికాకు వలస వచ్చాడు. Washinton DC లో తన మొదటి స్కూల్ పెట్టాడు. తర్వాత అదే రాష్రంలో అనేక స్కూల్స్ స్థాపించాడు. క్రమేణా సెలబ్రిటీ అయ్యాడు.

నేను స్వతహాగా టైక్వోన్ డో అభ్యాసిని కాను. కానీ అందులోని "కార్ట్ వీల్ కిక్" లాంటి కొన్ని కిక్స్ అంటే నాకున్న ఇష్టం వల్ల వాటిని నేర్చుకుని నా పర్సనల్ స్టైల్లోకి తీసుకున్నాను. నాకు ప్రత్యేకంగా ఒక మార్షల్ ఆర్ట్ అంటే ఇష్టమూ ఇంకొకటంటే ద్వేషమూ ఏమీ లేవు. Take everything that is useful అనే బ్రూస్లీ సూక్తిని నేను పాటిస్తాను. అందుకని రకరకాల మార్షల్ ఆర్ట్స్ లోనుంచి నేను అనేక టెక్నిక్స్ నేర్చుకుని వాటిని కలగలిపి వాడుతూ ఉంటాను.

టైక్వోన్ డో అనేది కొరియన్ మార్షల్ ఆర్ట్. దీనిలో 80% కిక్స్, 20 % పంచెస్ ఉంటాయి. ప్రధానంగా ఇది హైకిక్స్ ని ఎక్కువగా వాడే ఆర్ట్.

గ్రాండ్ మాస్టర్ ఝూన్ రీ జాతకాన్ని గమనిద్దాం. ఈయన పుట్టిన సమయం తెలియదు. కనుక మన పద్ధతులు ఉపయోగిద్దాం. ఇతని జాతకంలో కుజుడు ఆత్మకారకుడయ్యాడు. కుజుడు ఆత్మకారకుడైతే లేదా జాతకంలో బలంగా ఉంటే, అతనికి వీరవిద్యలు గాని, వ్యాయామాలు గాని చెయ్యడం వస్తుంది. మార్షల్ ఆర్ట్స్ వీరుల జాతకాలలోనూ, బాక్సింగ్ వీరుల జాతకాలలోనూ, కుజుడు బలంగా ఉండటం గమనించవచ్చు. ఎందుకంటే కుజుడు యుద్ధప్రియుడు. Red planet, Planet of War అని ఇతనికి పేర్లున్నాయి.

కారకాంశ ధనుస్సు అయింది. చంద్రలగ్నం కూడా ధనుస్సే అయింది. సూర్యలగ్నం కూడా ధనుస్సే అయింది. కనుక ఇతని జాతకంలో ధనుస్సుకు ప్రాధాన్యత ఎక్కువగా ఉన్నది. ఇతను అమావాస్య రోజున పుట్టాడు.

లగ్నంలో నవమాధిపతి అయిన సూర్యుడు ఉండటంతో ఈయన అమెరికాలో స్థిరపడ్డాడు. అష్టమస్థానం యుద్ధాన్నీ మరణాన్నీ గాయాలనూ సూచిస్తుంది. అష్టమాదిపతి అయిన చంద్రుడు కూడా లగ్నంలో ఉండటమూ, అదికూడా వీరవిద్యలకు అధిపతి అయిన కుజునితో కలసి ఉండటమూ ఈయనను టైక్వాన్ డో గ్రాండ్ మాస్టర్ని చేశాయి. అష్టమంలో గురువు వక్రించి ఉండటమూ, శరీర శ్రమకూ, కష్టాన్ని ఓర్చుకోవడానికీ కారకుడైన శని అష్టమాన్ని చూస్తూ ఉండటమూ, ఆ శని షష్ఠస్థానాధిపతి అయిన శుక్రునితో కలసి ఉండటమూ గమనిస్తే ఈయనకు వీరవిద్యలు ఎందుకు పట్టుబడ్డాయో అర్ధమౌతుంది.

1964 లో California లో జరిగిన Ed Parker's Long Beach Karate Championship Event లో మొదటి సారిగా బ్రూస్లీ, ఝూన్ రీని కలిశాడు. అక్కడ వాళ్ళిద్దరూ మంచి ఫ్రెండ్స్ అయ్యారు. అప్పటి వరకూ బ్రూస్లీ తన Wing Chun Style లో ఉన్న హ్యాండ్ టెక్నిక్స్ ఎక్కువగా వాడేవాడు. కానీ ఆ తర్వాత అతను ఝూన్ రీ దగ్గర Kicks నేర్చుకున్నాడు. తర్వాత తర్వాత బ్రూస్లీ డెవలప్ చేసిన Jeet Kune Do లో బేసిక్ టెక్నిక్ గా ఝూన్ రీ దగ్గర నేర్చుకున్న Side Kick ను తీసుకున్నాడు. ఈ విధంగా బ్రూస్లీ కిక్స్ వెనుక ఝూన్ రీ శిక్షణ ఎంతో ఉంది. ఈ సంగతి చాలా మందికి తెలియదు. ఇక్కడ ఝూన్ రీ, బ్రూస్లీ ఇద్దరూ చేస్తున్న సైడ్ కిక్ ను గమనిస్తే ఈ సంగతి తేలికగా అర్ధమౌతుంది. ఇది టైక్వాన్ డో కిక్ మాత్రమే, కుంగ్ ఫూ లో ఇలాంటి కిక్స్ ఉండవు. అవి వేరుగా ఉంటాయి.

అంతేకాదు. మహమ్మద్ ఆలీకి Accu Punch అనేదాన్ని నేర్పించింది Jhoon Rhee అనే సంగతీ చాలామందికి తెలియదు. బహుశా దీనిని Jhoon Rhee, బ్రూస్లీ దగ్గర నేర్చుకుని ఉండవచ్చు. ఎందుకంటే Tai Kwon Do లో పంచెస్ కి అంత ప్రాధాన్యత ఉండదు. కానీ బ్రూస్లీ నేర్చుకున్న Wing Chun Kung Fu లో ఎక్కువగా పంచెస్ నే వాడతారు. వింగ్ చున్ సిస్టంలో హైకిక్స్ కి ప్రాధాన్యత ఉండదు. ఉంటేగింటే,  లోకిక్స్ ఉంటాయి లేదా బెల్ట్ లెవల్ కిక్స్ ఉంటాయి. అంతే. ఆ విధంగా Accu Punch అనేది బ్రూస్లీ నుంచి, ఝూన్ రీ ద్వారా, మహమ్మద్ అలీకి చేరింది. 1975 లో ఈ పంచ్ ని ఉపయోగించే, UK Heavy Weight Boxing Champion Richard Dunn ని మట్టి కరిపించానని అలీ చెప్పేవాడు.

మార్షల్ ఆర్ట్ అనేది, అది ఏ రకమైన మార్షల్ ఆర్ట్ అయినా సరే, ఊరకే రాదు. ప్రతిరోజూ బద్దకాన్ని వదల్చుకుని కఠోరంగా శ్రమిస్తేనే దానిలో మాస్టరీ వస్తుంది. 86 ఏళ్ళ వయసులో కూడా ఝూన్ రీ ప్రతిరోజూ క్రమం తప్పకుండా మూడు గంటలు ప్రాక్టీస్ చేసేవాడంటే అర్ధం చేసుకోండి మరి అతనికి 10th Degree Black Belt ఎలా వచ్చిందో? అతను అమెరికాలో అంత సెలబ్రిటీ ఎలా అయ్యాడో?

జాతకంలో కుజుడూ శనీ బలంగా ఉన్నప్పుడు కష్టపడే తత్త్వమూ పట్టుదలా అవే వస్తాయి. అలాంటి వాళ్ళకే మార్షల్ ఆర్ట్స్ పట్టుబడతాయి.

read more " Tae Kwon Do Grand Master Jhoon Rhee - Astro analysis "

నర - హరి

మనుషుల మనస్తత్వాలను గమనిస్తూ ఉంటె నాకు భలే నవ్వొస్తూ ఉంటుంది. అదే సమయంలో విపరీతమైన జాలీ కలుగుతూ ఉంటుంది 'వీళ్ళెప్పటికి ఎదుగుతారా?' అని.

మొన్నొకాయన ఫోన్ చేశాడు.

'ఏమండి? నా పేరు నరహరి. మీరు చెప్పిన దక్షిణామూర్తి స్తోత్రం ఆడియో ఫైల్స్ నేను విన్నాను.' అన్నాడు ఎత్తుకుంటూనే, అదేదో నన్ను ఉద్ధరిస్తున్నట్టు !

అతని గొంతు వింటే, ఏదో వాదన పెట్టుకునేలా అనిపించింది.

'సరే ఏంటో చెప్పండి' అన్నాను.

'విషయం బాగానే ఉందిగాని మీరు చెప్పిన తీరు నాకు నచ్చలేదు.' అన్నాడు.

విషయం నాకర్ధమై పోయింది.

'అంటే, దక్షిణామూర్తి స్తోత్రం అంటే మీకు ఇష్టమే గాని, నేను మీకు నచ్చలేదు అంతేకదా?' అన్నాను.

'అవును' అన్నాడు.

'పోనీలెండి ఇంకో సంబంధం వెతుక్కుంటాను. నన్ను మెచ్చే పిల్ల ఎక్కడో పుట్టే ఉంటుంది' అన్నాను నవ్వుతూ.

నేను జోక్ చేస్తున్నానని అతనికి అర్ధమైంది.

'అదే ! ఈ జోకులే మాకు నచ్చంది.' అన్నాడు.

'దానికి నేనేం చేసేది? అది నా స్వభావం. మీరూ నాకు నచ్చలేదు. కొత్తవాళ్ళతో ఇంత రూడ్ గా మాట్లాడుతున్న మీ పద్ధతి కూడా నాకు నచ్చలేదు. ఏం చేద్దాం?' అన్నాను.

'అంత సీరియస్ సబ్జెక్ట్ ని సరదాగా, జోకులేస్తూ చెబుతున్నారు. పైగా, మీ ఉపన్యాసం వింటున్నవాళ్ళు బాగా ఎంజాయ్ చేస్తూ నవ్వుతున్నారు. అది తప్పు కదా?' అడిగాడు సీరియస్ గా.

'నవ్వడం తప్పా? ఇదేంటి కొత్తగా వింటున్నానే? నవ్వమనీ, మనస్ఫూర్తిగా నవ్వితే ఆరోగ్యానికి మంచిదనీ అందరూ చెబుతున్నారు. మీకేంటి నవ్వు నచ్చడం లేదు. మీకేదైనా సీరియస్ మానసిక రోగం ఉందేమో చెక్ చేయించుకోండి' అన్నాను.

'ఆధ్యాత్మిక విషయాలు చెప్పేటప్పుడు సీరియస్ గా చెప్పాలి. మీరేదో కామెడీగా చెబుతున్నారు.' అన్నాడు మళ్ళీ.

'ఏం కొంపలు మునిగాయని అంత సీరియస్ గా ఉండాలి? ఆధ్యాత్మికమంటే సీరియస్ అని మీకెవరు చెప్పారు?' అడిగాను.

'మాకు తెలుసు. మా గురువుగారు చెప్పారు' అన్నాడు.

'మీ గురువుగారికి నవ్వడం అంటే పడదా?' అడిగాను.

'ఆయన నవ్వగా నేనెప్పుడూ చూడలేదు. మేం నవ్వినా కూడా ఆయన ఒప్పుకోడు.' అన్నాడు.

'ఓహో. ఒక పని చెయ్యండి. మీ గురువూ, మీ బృందమూ అందరూ కలసి ఒక సైకియాట్రిస్ట్ ని కలవండి. ఇదొక మానసిక రోగం. ఇతరులు నవ్వితే భరించలేకపోవడం చాలా పెద్ద రోగం. మీకు తెలీడం లేదు. ముందు మంచి ట్రీట్మెంట్ తీసుకోండి. ఆ తర్వాత నాకు ఫోన్ చేద్దురుగాని' అన్నాను ఫోన్ పెట్టెయ్యబోతూ.

'ఆగండి. ఫోన్ పెట్టకండి. ఇంకా మాట్లాడాలి.' అన్నాడు సీరియస్ గా.

'చెప్పండి' అన్నాను.

'సీరియస్ సబ్జెక్ట్ ని సీరియస్ గా చెప్పకపోతే ఎలా? మీకసలు ఆ సబ్జెక్ట్ ఎంత అర్ధమైంది?' అన్నాడు ఇంకా సీరియస్ గా.

విషయం ముదురుతోందని, ఏదో విధంగా నన్ను ఇన్సల్ట్ చెయ్యడమే ఇతని ఉద్దేశమని నాకర్ధమైంది.

'అంతా విన్నానని మీరే చెప్పారు కదా ! అవన్నీ విన్న తర్వాత కూడా నాకెంత అర్ధమైందో మీకర్ధం కాలేదా?' అడిగాను.

'దీన్నే దురహంకారం అంటారు' అన్నాడు ఎగతాళిగా.

'అవునా? మరి ఫ్రీ గా ఒకరు పెట్టిన ఆడియో ఫైల్స్ అన్నీ చక్కగా విని, అతనికి ఫోన్ చేసి, కనీస కృతజ్ఞతలు చెప్పకుండా, డైరెక్ట్ గా 'మీరు చెప్పినది మాకు నచ్చలేదు' అనేవాళ్ళను ఏమంటారు? అది దురహంకారం కాదా?' అన్నాను.

'నా అభిప్రాయం నేను చెప్పాను ' అన్నాడు దురుసుగా.

'సరే. నా అభిప్రాయం కూడా చెప్పమంటారా మరి?' అన్నాను.

'చెప్పండి' అన్నాడు.

'చింపాంజీలకు దక్షిణామూర్తి స్తోత్రం ఎలా అర్ధమౌతుంది?' అన్నాను.

'అదేంటి?' అన్నాడు అయోమయంగా.

'మీరు చింపాంజీ కదా? మీకు వేదాంతం అర్ధం కాదని అంటున్నాను' అన్నాను.

'ఏంటి మీరు మాట్లాడేది?' అన్నాడు కోపంగా.

'కోపం తెచ్చుకోకండి. మీ పేరు నరహరేగా?' అడిగాను.

'అవును' అన్నాడు.

'మీ పేరు అర్ధమే మీకు తెలీదు. ఇక దక్షిణామూర్తి స్తోత్రం ఎలా అర్ధమౌతుంది మీలాంటి మట్టిబుర్రలకు?' అన్నాను.

'ఏం మాట్లాడుతున్నారు మీరు?' అన్నాడు అరుస్తూ.

'తగ్గండి. చెప్తా వినండి. నరహరి అంటే ఏమిటి?' అన్నాను.

'నరసింహస్వామి' అన్నాడు.

'పోనీ అలా అనుకున్నా కూడా, మీలో మృగం లక్షణాలు కొన్ని ఉన్నాయని అర్ధం. మృగాలకు వేదాంతం ఎలా అర్ధమౌతుంది? ఎంతో రిఫైండ్ మైండ్స్ కి కాని అది అర్ధం కాదు. ఇంకో అర్ధం చెబుతా వినండి. నర అంటే మనిషి. హరి అంటే కోతి అని సంస్కృతంలో అర్ధం. అంటే మనిషికి తక్కువ కోతికి ఎక్కువ అనర్ధం. అంటే చింపాంజీ అనే కదా? ఇక మీకు దక్షిణామూర్తి స్తోత్రం ఎలా అర్ధమౌతుంది? దానిని ఎలా చెప్పాలో ఎలా అర్ధం చేసుకోవాలో ఎలా తెలుస్తుంది?

సీరియస్ సబ్జెక్ట్ ని సరదాగా చెప్పడమే అసలైన టాలెంట్. సామాన్యంగా ఇలాంటి ఉపన్యాసాలు వినేవాళ్ళు నిద్రపోతూ ఉంటారు. కానీ ఇక్కడ, వినేవాళ్ళు నవ్వుతున్నారంటే వాళ్ళు సబ్జెక్ట్ ని బాగా ఎంజాయ్ చేస్తున్నారన్నమాట. అంటే, వాళ్లకు బాగా అర్ధమౌతోందన్న మాట. ఇంత సింపుల్ విషయం అర్ధం కాని మీరేమో అదేదో తప్పుగా అనుకుంటూన్నారు. అది చాలక నాకు ఫోన్ చేసి మీ అజ్ఞాన ప్రదర్శన చేస్తున్నారు. పైగా నాది తప్పంటున్నారు. నవ్వడం తప్పంటున్నారు. మీరు అర్జెంటుగా పేరైనా మార్చుకోండి, లేదా మీ అభిప్రాయమైనా మార్చుకోండి. లేదా ఎవడో ఒక పిచ్చి డాక్టరు దగ్గర మంచి ట్రీట్మెంట్ అయినా తీసుకోండి. ఏదో ఒకటి త్వరగా చెయ్యండి. అంతేగాని నాకిలా ఫోన్ చేసి నా టైం వెస్ట్ చెయ్యకండి.' అన్నాను.

'మీరు తెలివైనవారనీ, నా మాటకు ఒప్పుకోరనీ మాకు తెలుసు. ఈ విషయంలో ముఖాముఖీ వాదనకు మీరు సిద్ధమేనా?' అడిగాడు.

'ఇందులో వాదనతో తేలేది ఏముంది?' అడిగాను.

'మీరు చెప్పేది తప్పని రుజువు చేస్తాను. అంతేకాదు. మీ శిష్యులను మీరు తప్పుదారి పట్టిస్తున్నారు. ఇంతకీ మీరు వాదనకు సిద్ధమేనా?' అడిగాడు.

'ముఖాముఖీ వాదనకే కాదు, హాండ్ టు హాండ్ ఫైటింగ్ కైనా నేను సిద్ధమే. డేట్, వెన్యూ మీ ఇష్టం. నిర్ణయించుకుని నాకు చెప్పండి. నా మార్షల్ ఆర్ట్స్ టెక్నిక్స్ గుర్తున్నాయో మర్చిపోయానో ఒకసారి ప్రాక్టికల్ గా టెస్ట్ చేసుకోవాలని నాకు మహా దురదగా ఉంది. ఎప్పుడు ఫోన్ చేస్తారు మరి?' అడిగాను.

అవతల నుంచి నిశ్శబ్దం.

నవ్వుకుంటూ ఫోన్ కట్ చేశాను.

ఆధ్యాత్మిక ప్రపంచంలో కూడా జెలసీ, ఈగోలే ఎక్కువగా ఉంటాయని, ఓపన్ మైండ్ అనేది ఎక్కడో తప్ప ఉండదనీ, ఇలాంటి మనుషులను చూస్తుంటే అర్ధం కావడం లేదూ?

read more " నర - హరి "

NRI+ABCDxH1B=0

సీత కష్టాలు సీతవి, పీత కష్టాలు పీతవి అన్న సామెత మనకు తెలుసు. కాలక్రమంలో కొత్త సామెతలు పుట్టుకోస్తాయనీ తెలుసు. అలా వచ్చిందే ఈ సామెత. అదేంటంటే - "ఇండియా కష్టాలు ఇండియావి అమెరికా కష్టాలు అమెరికావి." పై ఈక్వేషన్ కూడా అలా వచ్చిందే !

అదేంటీ? అమెరికాలో కూడా కష్టాలుంటాయా? - అని అనుమానం వస్తోందా? అయితే చదవండి.

రాజారాం దంపతులు ఇరవై ఐదేళ్ళ క్రితం అమెరికాకు వలస వెళ్ళారు. అప్పటినుంచీ అక్కడే ఉంటున్నారు. బాగా సంపాదించుకున్నారు. అక్కడే స్థిరపడ్డారు. కాలక్రమంలో వాళ్ళకు ఇద్దరు పిల్లలు పుట్టారు. మొదట్లో వాళ్లకు అర్ధం కాలేదు కానీ అప్పటినుంచే వాళ్లకు కష్టాలు మొదలయ్యాయి.

మొదట్లో ప్లాన్ ప్రకారం, ఒక పదేళ్లో ఇరవై ఏళ్ళో అక్కడ పనిచేసి డబ్బులు సంపాదించి ఇండియా వచ్చేద్దామనేది వీళ్ళ ప్లాన్. కానీ ఏళ్ళు గడిచే కొద్దీ అది సాధ్యమయ్యేది కాదని వాళ్లకు అర్ధమైపోయింది.

రాజారాం దంపతులకు ఇండియా పద్ధతులంటే ఇష్టం. మన కుటుంబ వ్యవస్థ అన్నా, విలువలతో కూడిన జీవితమన్నా వాళ్లకు ఇష్టం. కానీ డబ్బుకోసం అమెరికా వెళ్లి అక్కడే ఉండవలసి వచ్చింది. కానీ మన పద్ధతులు సాధ్యమైనంతవరకూ పాటించాలనే చూస్తారు. అక్కడున్నా, మన ముఖ్యమైన పండుగలన్నీ చేసుకుంటారు. ఇండియన్ అసోసియేషన్ లో సభ్యులుగా ఉన్నారు. అందరూ కలసి అక్కడ గుడి ఒకటి కట్టించారు. అందులో కార్యక్రమాలన్నీ చేస్తూ ఉంటారు. మన తెలుగుదనాన్ని మర్చిపోకుండా ఉన్నారు. ప్రతి ఏడాదీ ఒక స్వామీజీని ఆహ్వానించి ఏవో కార్యక్రమాలు చేస్తూ ఉంటారు. అంతా బాగానే ఉంది.

అప్పుడప్పుడూ చిన్నపిల్లల్ని తీసుకుని ఇండియా వెళ్లి వస్తూ ఉండేవారు. ఆ చిన్నపిల్లల ఇంగ్లీషు యాసా అదీ చూచి అమ్మమ్మా తాతయ్యా అందరూ మురిసిపోతూ ఉండేవాళ్ళు. కానీ ఆ నీళ్ళూ అవీ పడక పిల్లలు సిక్ అయ్యేవాళ్ళు. అయినా సరే, మాతృభూమి మీద మమకారం చావక అలా ఏడాది కొకసారి వెళ్లి వస్తూ ఉండేవాళ్ళు.

కానీ, పిల్లలు పెరిగే కొద్దీ సమస్యలు ఎక్కువౌతూ వచ్చాయి. తల్లిదండ్రులేమో NRIలు. పిల్లలేమో ABCD లు, అంటే అందరికీ తెలుసు కదా America born confused desi అన్నమాట. వయసు పెరిగే కొద్దీ పిల్లలు అయోమయంలో పడిపోవడం మొదలైంది.

ఇంట్లోనేమో తెలుగు మాట్లాడాలి. స్కూల్లోనూ, బయటా అమెరికన్ యాసతో ఇంగ్లీషు మాట్లాడాలి. అదొక నరకం. ఇంట్లో మన కట్టూ బొట్టూ పాటించాలి. బయటేమో అమెరికన్ పద్ధతులు పాటించాలి. పండుగలు వచ్చినపుడు అబ్బాయిలేమో పంచెలు కట్టుకుని అమ్మయిలేమో చీరలు కట్టుకుని కనిపించాలి. అన్నమయ్య కీర్తనలూ త్యాగరాజ కీర్తనలూ కష్టపడి బట్టీపట్టి పాటలు పాడాలి. స్కూల్లోనేమో ఇంగ్లీష్ గీతాలు ఆలపించాలి. బయటేమో అమెరికన్ డ్రస్సులు వేసుకుని వాళ్ళలా మాట్లాడుతూ వాళ్ళతో కలసి బ్రతకాలి. ప్రతిక్షణం ఈ సాంస్కృతిక సంఘర్షణ ఇంకో నరకం. ఇది చాలదన్నట్లు అడుగడుగునా సొసైటీలో కనిపించే రేసిజం ని తట్టుకోవాలి. అది ఇంకొక నరకం !

మొదట్లో అందరూ ఏడాదికొకసారి ఇండియా వెళ్ళేవాళ్ళు. అది మెల్లిగా రెండేళ్ళకొకసారిగా మారింది. ఆ తర్వాత అయిదేళ్ళ కొకసారి అయింది. పిల్లలు పెద్దయ్యే కొద్దీ ఇండియా వెళ్ళినా మునుపటి ప్రేమలు ఉండటం లేదు. పిల్లలు కూడా బంధువులతో కలవడం లేదు. దూరదూరంగా రిజర్వుడుగా ఉంటున్నారు. ఇదంతా ఎందుకులే అని మెల్లిగా ఇండియా వెళ్ళడం మానేశారు రాజారాం దంపతులు.

మొదట్లో అమ్మమ్మా తాతయ్యలతో వీడియో కాల్స్ లో బాగానే మాట్లాడిన పిల్లలు పెద్దయ్యేకొద్దీ మాటలు తగ్గించారు. కొన్నేళ్ళ తర్వాత ఇండియా వీడియో కాల్ అంటేనే దగ్గరకు రాకుండా ఎవాయిడ్ చెయ్యడం మొదలు పెట్టారు. ఈ లోపల ఇండియాలోని అమ్మమ్మా తాతయ్యా చనిపోయారు. మిగతా బంధువులతో సంబంధాలు కాలక్రమేణా తగ్గిపోయాయి.

ఇదిలా ఉండగా, పిల్లలకు పెళ్ళీడొచ్చింది. ఈ తల్లిదండ్రులకు అసలైన సమస్యలు అప్పుడర్ధమయ్యాయి.

ఇండియా సంబంధాలు ససేమిరా చేసుకోమని పిల్లలిద్దరూ చెప్పేశారు. ఇంకా గట్టిగా మాట్లాడితే, "అసలు మీరు మాకు సంబంధాలు చూడటం ఏమిటి? Arranged marriages ఏమిటి? నాన్సెన్స్?" అంటూ తల్లిదండ్రులనిద్దరినీ అడివి మనుషులలాగా చూడటం మొదలు పెట్టారు. అంతేగాక, ఇండియా వాళ్ళను అస్సలు చేసుకోమని చెప్పేశారు. ఇక మిగిలింది H1B సంబంధాలేగనుక అవే చూడటం మొదలు పెట్టారు పేరెంట్స్.

ఆ క్రమంలో ఇద్దరూ తమతమ అమెరికన్ ఫ్రెండ్స్ తో డేటింగ్ లో ఉన్నారని వీళ్ళకు తెలిసి బిత్తరపోయారు. అయినా సరే ఆ విషయం బయటకు చెప్పకుండా, మేట్రీమోనీ సైట్లలో రిజిస్టర్ అయ్యి, "మా పిల్లలిద్దరూ ఆణిముత్యాలు. అమెరికాలో పెరిగినా అంతా భారతీయ సంస్కృతిలోనే ఉన్నారు. ఇంట్లో అయితే పూజ చెయ్యందే మంచినీళ్ళు ముట్టరు. పార్టీలూ, త్రాగుడూ ఇలాంటివి అస్సలు పడవు." అని అబద్దాలను దాంట్లో వ్రాసుకుని సంతృప్తి పడుతూ సంబంధాలు చూస్తున్నారు.

వీళ్ళు సంతృప్తి పడినా, మేట్రీమోనీ  చూసేవాళ్ళు ఇదంతా నమ్మరు కదా? పిల్లల ఫేస్ బుక్ పేజీలు  వాళ్ళు చెక్ చేసేవాళ్ళు. మేట్రిమోనీలొ పేరెంట్స్ రాసినదానికీ, పిల్లల ఫేస్ బుక్ పేజీలలో వాళ్ళు పెడుతున్న ఫోటోలకీ, వ్రాసే వ్రాతలకీ ఎక్కడా సంబంధం ఉండటం లేదు. మెట్రిమోనీలో నేమో చక్కగా పట్టుచీరలో ఉండేది అమ్మాయి. ఫేస్ బుక్ పేజీలోనేమో చెడ్డీతో కన్పించేది. అబ్బాయేమో, అటొక తెల్లదాన్నీ ఇటొక నల్లదాన్నీ వేసుకుని ఇకిలిస్తూ ఫోటోలు పెట్టేవాడు. ముగ్గురి చేతుల్లోనూ గ్లాసులుండేవి. ఇలాంటి ఫోటోలు చూస్తే ఎవరు ముందుకొస్తారు? అందుకని ఎంతకూ వీళ్ళకు సంబంధాలు వచ్చేవి కావు.

ఎందుకని ఇలా సంబంధాలు రావడం లేదు? అని అనుమానం వచ్చి, రీసెర్చి చేసి, అసలు విషయం కనిపెట్టిన పేరెంట్స్, తమ స్ట్రాటజీ మార్చి, అమ్మాయి కూచిపూడి డ్రస్సులో డాన్సు చేస్తున్నట్లు, గుళ్ళో భక్తిగా ప్రదక్షిణలు చేస్తున్నట్లు, ఏదో గుళ్ళో కీర్తనలు పాడుతున్నట్లు పొటోలు ఆ సైట్ లొ పెట్టారు. ఆ ట్రిక్ సక్సెస్ అయ్యి ఒకటీ అరా H1B సంబంధాలు వచ్చాయి. అవీ ఇవీ మాట్లాడుకున్నాక, అమ్మాయీ అబ్బాయీ వీడియో కాన్ఫరెన్స్ పెట్టుకున్నారు.

అయిదు నిముషాల కాన్ఫరెన్స్ కే అమ్మాయి పనుందని లాగ్ ఆఫ్ అయిపోయింది.

"ఏంటే? అలా వచ్చేశావ్? మంచి సంబంధం. అబ్బాయి మైక్రోసాఫ్ట్ లొ మంచి పొజిషన్లొ ఉన్నాడు. అలా చేస్తే వాళ్ళు నొచ్చుకోరా?" అని భయం భయంగానే అడిగింది తల్లి.

"ఏంటమ్మా నాన్సెన్స్? డర్టీ ఇండియన్ మెంటాలిటీ నువ్వూనూ? మైక్రో సాఫ్ట్ అయితే ఏంటి? తొక్క? వాడూ వాడి రంగూ చూశావా? కోతిలా ఉన్నాడు. వాడి కంటే మా బ్లాక్ ఫ్రెండ్ ఎడ్వర్డ్ నయం. అలాంటి నల్లటివాడిని చేసుకుంటే మా ఫ్రెండ్స్ అంతా నన్నెలా ఎగతాళి చేస్తారో తెలుసా నీకు? నేను చేసుకోను." అని ఖరాఖండిగా చెప్పేసింది అమ్మాయి.

"మరెవరు కావాలే నీకు? అయినా, ఇండియా వాళ్ళకు తెల్లతోలు ఎలా వస్తుందే?" అడిగింది తల్లి.

"ఎలా వస్తుందో నాకెందుకు? అయినా నాకిప్పుడే పెళ్ళేంటి? నాకెంత వయసు? జస్ట్ ట్వెంటీ నైనే కదా? మా ఫ్రెండ్స్ ఎవరూ థర్టీ ఫోర్ కి ముందు పెళ్ళే చేసుకోలేదు. అసలు ఈ సంబంధాలు చెడగొట్టాలనే నా ఫేస్ బుక్ లో అలాంటి చెడ్డీ ఫోటోలు పెడుతున్నా" అంటూ అసలు రహస్యాన్ని మెల్లిగా చెప్పింది అమ్మాయి.

" అప్పటిదాకా ఏం చేస్తావే?" అడిగింది బిత్తరపోయిన పాత చింతకాయ.

"ఏదో ఒకటి చేస్తాలే. మేం మీ తరం కాదు. మీరంటే బావిలో కప్పల్లా బ్రతికారు. మేమలా కాదు. ప్రపంచం ఎంతో ఉంది. ఎంతో తిరగాలి. ఎన్నో చూడాలి. లైఫ్ ఎంజాయి చెయ్యాలి. అవన్నీ అయ్యాక పెళ్లి. నీలాగా ఇరవైకే పెళ్లి చేసుకుని ముప్పైకే ముసలమ్మనై అఘోరించమంటావా? నాన్సెన్స్. నేనీ డర్టీ ఇండియన్ సంబంధాలు చేసుకోను. చేసుకుంటే గీసుకుంటే ఇక్కడ అమెరికన్స్ నే చేసుకుంటా. అదంతా తర్వాత. ముందు నేను లాస్ వెగాస్ ట్రిప్ వెళ్లి రావాలి. మా ఫ్రెండ్స్ వెకేషన్ కి వెళుతున్నారు. సరదాగా ఎంజాయ్ చేసి వస్తాం." అని ఖచ్చితంగా చెప్పేసింది వెల్లుల్లి ఆవకాయ.

తల్లి నిర్ఘాంతపోయింది.

అప్పటినించీ ఎన్ని సంబంధాలను తెచ్చినా ఏదో ఒక వంక చెప్పి అన్నింటినీ "నో" అనేస్తోంది అమ్మాయి. ఇక అబ్బాయికైతే సంబంధాలే రావడం లేదు. అమెరికాలో పుట్టి పెరిగిన వాడికి, అందులోనూ ఫేస్ బుక్ లొ అలాంటి ఫోటోలు పెట్టేవాడికి, ఇండియానుంచి చూస్తూ చూస్తూ ఎవరు పిల్లనిస్తారు?

చూసీ చూసీ తల్లికి భయం మొదలైంది.

"ఏంటండి మాట్లాడరు? అలా బెల్లం కొట్టిన రాయిలా కూచుంటే ఎలాగండి? పిల్లలు ఇలా తయారౌతుంటే?" అడిగింది ఏడుపు గొంతుతో.

విస్కీ సిప్ చేస్తూ టీవీలో ఏదో ప్రోగ్రాం చూస్తున్న రాజారాం, తాపీ ధర్మారావులా మెల్లిగా తలెత్తి - " ఏంటే నువ్వూ నీ గోలా? వాళ్ళేం చిన్నపిల్లలు కారు. వాళ్ళ లైఫ్ వాళ్లకు తెలుసు. వాళ్లకన్ని జాగ్రత్తలూ తెలుసు. మనమేమీ నేర్పక్కర్లేదు. వాళ్ళకిష్ట మొచ్చిన వాళ్ళను చేసుకుంటార్లే. నువ్వేమీ కంగారు పడకు." అన్నాడు.

"ఏంటండి వాళ్లకు తెలిసేది? వీళ్ళిద్దరూ తెల్లవాళ్ళతో డేటింగ్ చేస్తున్నారు.  తెలుసా మీకు? మొన్నొకరోజు మన సుపుత్రుడు ఒక నల్లమ్మాయిని ఏకంగా ఇంటికే తీసుకొచ్చాడు. అదేంట్రా అంటే ఫ్రెండ్ అంటాడు. అమ్మాయికైతే కొన్ని డ్రగ్స్ కూడా అలవాటయ్యాయని నాకు అనుమానంగా ఉంది. మొన్న దాని హ్యాండ్ బ్యాగ్ లో చూశాను. దాంట్లో కనిపించినవి చూస్తే నా గుండాగి పోయింది." అంది ఏడుస్తూ.

"చూడు కమలా ! మనం వేరు మన పిల్లలు వేరు. మనమైతే హైస్కూలూ కాలేజీ ఇండియాలోనే చదువుకున్నాం. ఆ తర్వాత ఇక్కడకు వచ్చాం. ఇక్కడకు వచ్చినా మనం ఇండియన్స్ మే. ఎందుకంటే, మన చిన్నతనంలో పునాదులు అలా పడ్డాయి. వీళ్ళలా కాదు. వీళ్ళు అమెరికన్స్. అమెరికన్స్ గానే పుట్టారు, అలాగే పెరిగారు. వీళ్ళ పద్ధతులు ఇలాగే ఉంటాయి. ఇంకో తరం తర్వాత వీళ్ళు ఇక్కడ సొసైటీలో కలసిపోతారు. మా పూర్వీకులు ఇండియాలో ఉండేవారట అని చెప్పుకుంటారు. అంతే ! మూడో తరం మారాక, ఎవరు ఎవర్ని చేసుకుంటారో, మన రక్తం ఏ జాతిరక్తంతో కలసి ఎలా మారుతుందో ఎవరికీ తెలీదు. మిక్స్డ్  బ్రీడ్ గా మారిపోతారు. దీనికి సిద్ధమైతేనే మనం ఇక్కడికి రావాలి. ఇది రియాలిటీ" అన్నాడు సీరియస్ గా.

"ఒద్దండి. మనమిక్కడ ఉండొద్దు. ఇండియాకి వెళ్లిపోదాం. పదండి. ఇప్పటిదాకా సంపాదించింది మనకు చాలు. డబ్బుకోసం జీవితాలు నాశనం చేసుకోలేం కదా?" అంది కమల వెక్కుతూ.

"ఇప్పుడు కొత్తగా నాశనం చేసుకునేది ఏమీ లేదు. జరగాల్సిందంతా ఎప్పుడో జరిగిపోయింది. అయినా నువ్వింతగా అడుగుతున్నావ్ గనుక చెప్తా. ఒకసారి ఇదేమాట పిల్లలతో చెప్పి చూడు. ఏమంటారో తెలుస్తుంది" అన్నాడు రాజారాం.

"ఇండియాకు వెళ్లిపోదాం" అన్న తల్లిమాట విని ఒక పిచ్చిదాన్ని చూసినట్లు చూశారిద్దరూ.

'ఏంటి మమ్మీ నీ గోల? ఆ డర్టీ కంట్రీలో ఏం చెయ్యాలి మేము? ఆ రిజర్వేషన్ వ్యవస్థలో, ఆ కరప్ట్ సొసైటీలో, ఆ మురికిలో, ఆ పొల్యూషన్ లో, కల్చర్ లెస్ ఇడియట్స్ మధ్యన,  మేం కూడా మీలా జీవచ్చవాలలా బ్రతకాలా? అదొక బ్రతుకా అసలు? పొద్దున్నే లేచి స్నానం చేసి గుడికెళ్తే సరిపోయిందా? కల్చర్ ఉండొద్దూ? క్లాస్ ఉండొద్దూ? అదెక్కడుంది వాళ్లకు? చిన్న చిన్న ఇళ్ళల్లో, ఆ దుమ్ములో, ఏ ఫెసిలిటీస్ లేకుండా, కుక్కల్లా పందుల్లా బ్రతుకుతున్నారు. నువ్వు పోరుతుంటే నీ గోల పడలేక పోయినేడాది మూన్నెల్లు అమ్మమ్మా వాళ్ళింట్లో ఉండొచ్చా కదా? ఆ మూడు నెలలూ నరకంలా ఉంది నాకు. ఛీ ఛీ ! మేం ఇండియాకు రాము. మీరు పోతే పొండి. మేమిద్దరమూ సిటిజెన్స్ ఇక్కడ. మా బ్రతుకు మేం బ్రతుకుతాంగాని ఆ డర్టీ కంట్రీకి మేం రాము." అని ఖచ్చితంగా చెప్పేసింది అమ్మాయి.

"నువ్వేమంటావురా?" అన్న తల్లివంక అసహ్యంగా చూశాడు కొడుకు.

"చూడు మమ్మీ. చెల్లి చాలా సున్నితంగా చెప్పింది. నేను చెప్తే మీరు తట్టుకోలేరు. ఆ డర్టీ కంట్రీకి రావలసిన ఖర్మ మాకేంటి? చెల్లి మాటే నా మాట కూడా. కాదూ కూడదని నువ్వూ డాడీ ఇండియాకి వెళ్ళిపోతే పొండి. అక్కడ ఏ ఓల్దేజి హోమ్ లో ఉన్నారో చెబితే ఏ రెండేళ్ళకో మూడేళ్ళకో వీలైతే వచ్చి చూస్తాం అంతే." అన్నాడు వాడు.

"మరి నీ పెళ్లి సంగతేంట్రా?" అడిగింది తల్లి.

"మమ్మీ. మీరిక మారరు. మీ ఇండియన్ మూలాలు పోవు. మీరింతే ! జీవితంలో పెళ్ళొక్కటే ముఖ్యం మీకు. కానీ మాకలా కాదు. అసలు పెళ్ళెందుకు? ఏం? పెళ్లి చేసుకోకుండా ఒక ఆడా మగా కలసి బ్రతక్కూడదా? అలా చెయ్యకూడదని ఎక్కడైనా రాసుందా ఏంటి? నాన్సెన్స్ !" అన్నాడు.

"దేవుడా? ఏంటి మాకీ ఖర్మ?" అని తలబాదుకుంది కమల.

"ఛీ ఛీ ! అందుకే ఇంటికి రావాలంటేనే నాకు చీదరగా ఉంది. మీరూ మీ గోలా ?మీ చావు మీరు చావండి. నాకు హోటల్లో పార్టీకి టైమౌతోంది. వస్తా! " అంటూ కారేసుకుని తుర్రుమన్నాడు అబ్బాయి.

అంతలో వచ్చిన ఫోన్లో మాట్లాడుతూ, తల్లివైపు విసుగ్గా చూస్తూ, ఏమీ జరగనట్లుగా తన రూమ్ లోకి వెళ్ళిపోయింది కూతురు. మొగుడి వైపు చూస్తే, ఆయన విస్కీ తాగుతూ టీవీలో లీనమై ప్రపంచం పట్టనట్లుగా ఉన్నాడు.

ఏం చెయ్యాలో తోచక కూలబడిపోయింది కమల !

read more " NRI+ABCDxH1B=0 "

మాకు తెలిసి మేమే తప్పూ చెయ్యలేదు

జాతకం కోసం నా దగ్గరకు వచ్చేవారు గాని, ఫోన్లో మాట్లాడేవాళ్ళు గాని అందరూ ఒకేమాట చెబుతూ ఉంటారు. వాళ్ళ సమస్యలు వేర్వేరు కావచ్చు, వాళ్ళ మిగతా పరిస్థితులు వేర్వేరు కావచ్చుగాని వాళ్ళు చివరకు చెప్పే మాట ఒకటే ఉంటుంది. అదేమంటే - "మాకు తెలిసి మేమే తప్పూ చెయ్యలేదు. మాకే ఇలా ఎందుకు జరుగుతోంది?"

ఏ తప్పూ చెయ్యకపోతే ఏ ఇబ్బందీ జీవితంలో రాదు. మనకు ఇబ్బందులు వస్తున్నాయీ అంటే, మనం తప్పులు చేశామనే అర్ధం. అవి గత జన్మలలో అయి ఉండవచ్చు. లేదా ఈ జన్మలోవే అయి ఉండవచ్చు. గత జన్మలలోవి అయితే మామూలు మనుషులకు గుర్తుండవు. ఆధ్యాత్మిక సాధనలో లోతులు అందుకున్నవారికి మాత్రమే అవి గుర్తొస్తాయి. కానీ ఈ జన్మలో మనం చేసిన తప్పులు మనం గుర్తించలేనంత ఘోరమైన చీకట్లో ఉండటమే మనమందరం చేస్తున్న పెద్ద తప్పని నేనంటాను. దీనికి రెండు కారణాలుంటాయి.

ఒకటి - నేనేంటి? తప్పులు చెయ్యడమేంటి? అనే అహంకార ధోరణి.

రెండు - తప్పులు చేసినా, చేస్తున్నా, అవి తప్పులు కావని గుడ్డిగా నమ్ముతూ ఉండటం.

మనుషులు సాధారణంగా ఈ రెండు కోవలకే చెందుతూ ఉంటారు. అందుకే, నా దగ్గరకు వచ్చేవాళ్ళు ఇలా మాట్లాడితే నాకు నవ్వుతో బాటు, అయ్యోపాపం అని జాలీ కలుగుతూ ఉంటుంది.

సాధారణంగా ఇలా చెప్పేవాళ్ల దృష్టిలో తప్పులంటే మర్డర్ లేదా రేప్ ఈ రెండే ఉంటాయి. మేము ఈ రెండూ చెయ్యడం లేదు కదా కనుక మేమేం తప్పులూ చెయ్యడం లేదని వీళ్ళ లాజిక్ !

సాధారణ దృష్టితో చూస్తె ఈ రెండూ తప్పులే కావచ్చు. కానీ కొన్ని ప్రత్యెక పరిస్థితులలో ఇవి తప్పులు కావు. అలాగే, మామూలుగా నిత్యజీవితంలో మనం చేసేవి తప్పులు కావని మనం అనుకుంటూ ఉంటాం. కానీ అవే తప్పులౌతూ ఉంటాయి.

అసలు మనిషి మనస్తత్వమే ఇంత ! తను చేసేది ఏదీ తప్పు కాదని, ఎదుటివాడు చేసేది మాత్రమే తప్పనీ ప్రతివాడూ అనుకోవడమే అతి పెద్ద తప్పంటాను నేను.

ఆ మధ్యలో ఒకాయన ఇలా ఫోన్ చేశాడు.

"మాది గుంటూరే. మీరు ఇక్కడే ఉన్నారని తెలుసు కానీ మిమ్మల్ని కలవాలంటే కుదరడం లేదు. గత నాలుగేళ్లనుంచీ ప్రయత్నిస్తున్నాను. కానీ వీలు కావడం లేదు."

నేను క్లుప్తంగా "అలాగా" అన్నాను.

ఆ తర్వాత తన సమస్యలన్నీ చెప్పుకుంటూ వచ్చాడు. అన్నీ చెప్పి " కొంచం నా జాతకం చూడండి. మాది ఉమ్మడి కుటుంబం. మాకు తెలిసి మేమేమీ తప్పులు చేయలేదు. కానీ మాకే ఈ కష్టాలు ఎందుకో అర్ధం కావడం లేదు" అని అన్నాడు.

అది అందరూ చెప్పే స్టాక్ డైలాగే కావడంతో నాకేమీ కొత్త అనిపించలేదు.

"చూడు బాబు. తప్పులు అందరూ చేస్తారు. కానీ అవి తప్పులని గ్రహించగలిగే స్థితిలో అందరూ ఉండరు" అన్నాను.

"అలా ఎలా కుదురుతుందండి? మనమేమన్నా చదువుకోని వాళ్ళమా, తెలివితేటలు లేని వాళ్ళమా? అంత అజ్ఞానంగా ఎలా ఉంటాం? పైగా మేము ప్రతి ఏడాదీ తిరుపతి, షిర్డీ వెళ్లి హుండీలో భారీగా ముడుపులు వేసి వస్తుంటాం కూడా" అన్నాడు.

"ఓహో ఇదా నీ వ్యవహారం?" అని, అతనితో ఇలా అడిగాను.

"నువ్వేం చేస్తుంటావు?"

"మా అన్నయ్యకు వ్యాపారంలో సాయం చేస్తూ ఉంటాను" అన్నాడు.

"ఏం వ్యాపారం మీది?" అడిగాను.

"మాకొక హోటలుంది. అదికాక వైన్ బిజినెస్ లో మా అన్నయ్యకు వాటా ఉంది" అన్నాడు.

"అంటే, బారా?" అడిగాను.

"బార్లో వాటా ఉంది. వెజ్ హోటలు వేరేగా ఉంది" అన్నాడు.

"ఏ హోటలు మీది" అడిగాను.

"ఫలానా హోటల్" అని పేరు చెప్పాడు.

నవ్వొచ్చింది.

"మరి ఇంతకంటే ఇంకేం తప్పులు కావాలి?' అన్నాను.

"అదేంటండి? వ్యాపారం చెయ్యడం తప్పెలా అవుతుంది?' అడిగాడు.

"విను నాయనా. వ్యాపారం చెయ్యడం తప్పుకాదు. సరిగా చెయ్యకపోవడం తప్పు. మీ హోటల్లో అన్నంలో సున్నం నీళ్ళు కలుపుతారా లేదా? కూరల్లో కారం ఎక్కువగా వేస్తారా లేదా?" అడిగాను.

నిశ్శబ్దం.

కాసేపయ్యాక " బిజినెస్ అన్నాక అవన్నీ తప్పవండి. అయినా మీకెలా తెలుసు?" అడిగాడు.

"సింపుల్ అబ్జర్వేషన్ ! అంతే ! నేను మీ హోటల్ మీద నుంచే రోజూ పోతూ ఉంటాను. అక్కడ స్టూడెంట్స్ ఫ్లోటింగ్ ఎక్కువగా ఉంటుంది. అవునా?" అడిగాను.

"అవునండి, మా బిజినెస్ అంతా స్టూడెంట్స్ తోనే" అన్నాడు.

"తెలుసు. మీ హోటల్ ఏరియా అంతా కాలేజీలు, కోచింగ్ సెంటర్లు ఉన్నాయి కదూ?" అడిగాను.

"అవునండి. అందుకే ఆ సెంటర్లో మేము హోటల్ పెట్టాము" అన్నాడు.

"మరి అంతమంది స్టూడెంట్స్ వస్తున్నపుడు వాళ్లకు కార్డ్ సిస్టం పెడతారు. కార్డ్ అంటే ఫుల్ మీల్స్ ఉంటుంది. రైస్ కానీ, కూరలు కానీ అన్ లిమిటెడ్ గా వడ్డించాలి. ఈ గుంటూరు వేడికి, ఈ నీళ్ళ కల్తీకీ సూడో ఆకలి పుట్టి అందరూ బాగానే తింటారు. వాళ్ళలా తింటే మీ లాభం గూబల్లోకి వస్తుంది. అందుకని వాళ్ళను ఎక్కువగా తినకుండా చెయ్యాలి. అలా చెయ్యాలంటే అన్నంలో సున్నం నీళ్ళు కలపాలి. కూరల్లో కారం ఎక్కువగా వెయ్యాలి. అప్పుడు తినేవాడు ఎక్కువ తినలేక మంచినీళ్ళు ఎక్కువగా త్రాగి లేచిపోతాడు. అవునా కాదా నిజం చెప్పు?" అడిగాను.

" అంతేననుకోండి. మీరు మరీ అంత డైరెక్ట్ గా అడిగితే ఇంకేం చెప్పగలం?" అన్నాడు అదో రకంగా నవ్వుతూ.

"మరి ఇది తప్పా కాదా?" అడిగాను.

"భలేవారు సార్ ! అన్ని బిజినెస్ లూ ఇలాగే ఉంటాయి. ఇందులో మేము ప్రత్యేకంగా చేస్తున్న తప్పేమీ లేదు" అన్నాడు.

"అన్నీ అలా ఉంటే, ఫలితాలు కూడా అందరికీ అలాగే ఉంటాయి. అందుకే కదా ఇప్పుడు ఏ ఆస్పత్రి చూచినా కళకళలాడుతోంది. ఏ ఇంట్లో చూచినా మనశ్శాంతి ఎవరికీ ఉండటం లేదు. సమస్య లేనివాడు ఎక్కడా లేడు" అన్నాను.

"ఇది తప్పని నేననుకోవడం లేదు" అన్నాడు చివరకు.

"నేను చెబుతున్నది కూడా అదే ! తప్పు చేసేవాడు దానిని తప్పని గ్రహించే స్థితిలోనూ లేడు, ఒప్పుకునే స్థితిలోనూ లేడు. అదే ప్రస్తుత పరిస్థితి. మీరు నలుగురికీ అన్నం పెట్టే వ్యాపారంలో ఉన్నారు. అదెంత మంచి వ్యాపారమో మీకర్ధం కావడం లేదు. అందరికీ ఇలాంటి అవకాశం రాదు. కానీ మీరేం చేస్తున్నారు? నమ్మించి మోసం చేస్తున్నారు. అన్నంలో కారమూ సున్నం నీళ్ళూ కలపడం అంటే, విషం కలిపినట్లే. వాడు నమ్మకంగా మీ హోటలుకి తినడానికి వస్తుంటే మీరు వాడికి విషం కలిపిన అన్నం పెడుతున్నారన్నమాట. ప్రకృతిదృష్టిలో ఇది ఘోరమైన నమ్మక ద్రోహం అవుతుంది. అదలా ఉంచుదాం. వైన్ బిజినెస్ లో మీరు చేస్తున్నదేమిటి? మనుషులకు త్రాగుడు అలవాటు చేస్తున్నారు. ప్రభుత్వమే ప్రోత్సహిస్తోందని మీరనవచ్చు. ప్రజలు త్రాగుతున్నారు గనుక మేం త్రాగిస్తున్నాం అని ప్రభుత్వ పెద్దలంటారు. ఈ రెంటిలో ఏది రైటైనా, అసలా వ్యాపారమే తప్పు. పైగా దానిలో కూడా కల్తీ చెయ్యడం ఎలాగూ ఉంటుంది. లూజ్ బాటిల్లో నీళ్ళు కలపడం మీ బార్లో ఉందా లేదా?" అడిగాను.

"ఇవన్నీ మీకెలా తెలుసు సార్ మీకు అలవాటు లేకపోతే?" ఎదురుదాడి ప్రారంభించాడు మన పతివ్రత గాడు.

"నాకలవాటు లేదని ఎవరన్నారు?" ఎదురు ప్రశ్న వేశాను.

"అదేంటి? మీరు త్రాగుతారా?" అడిగాడు.

"ఏం? ఎందుకు త్రాగకూడదు? మీకు వైన్ షాపు ఉండగా లేనిది, నేను త్రాగితే తప్పేముంది?" అడిగాను.

"అలా కాదు. మీరు నిష్టగా ఉంటారని అనుకున్నాను" అన్నాడు.

"ఓహో. మీరనుకున్నట్లు నేనుండాలా? అయినా, సందుకొక మందుకొట్టు మీరు పెడుతూ ఉంటే మేము నిష్టగా ఎలా ఉండగలం? అయినా నిష్టకూ దీనికీ సంబంధం ఏముంది? ప్రతిరోజూ నాలుగు పెగ్గులు నిష్టగా పుచ్చుకుని ఆ తర్వాత నిష్టగా పూజకు కూచుంటూ ఉంటాను. నిష్టగా త్రాగి జాతకాలు చూస్తాను. నేను అమెరికా వెళ్ళినపుడు కూడా బార్లో తాగి పడిపోతే కార్లో వేసుకుని ఇంటికి మోసుకొచ్చారు నా శిష్యులు. అందుకే మూడోసారి అమెరికా వస్తానంటే "నువ్వు రావద్దు బాబోయ్" అంటున్నారు " అన్నాను.

"మీరు చెప్పేది నిజమేనా?" అడిగాడు అనుమానంగా.

"నువ్వు నీ పాపాన్ని డబ్బుగా మార్చి కొంత వాటాను తిరుపతి, షిర్డీ హుండీలలో వేసినంత నిజం. లేకపోతే మీ బార్లో మందులో నీళ్ళు కలుపుతారని నాకెలా తెలుస్తుంది? నేను అమెరికాలో త్రాగి పడిపోయానో లేదో నీకు నమ్మకం లేకపోతే నా అమెరికా శిష్యుల ఫోన్ నంబర్ ఇస్తా, ఫోన్ చేసి కనుక్కో." అన్నాను.

"ఇంతకుముందు కూడా తెనాలిలో ఒక ప్రముఖ జ్యోతిష్కుడు ఉండేవాడు. ఆయనకూడా మందు పడితే గాని జాతకం చూసేవాడు కాదు. మీరూ అంతేనా?" అన్నాడు.

"నేనంత కాదు. ఆయన నిత్యామృత సేవకుడు. ఆయనతో నాకు పోటీ ఏంటి?" అన్నాను.

"సరే ఇప్పుడు మమ్మల్నేం చెయ్యమంటారు? మా ఇంటిల్లిపాదికీ రోగాలున్నాయి. హాస్పిటల్స్ కు తిరగడం మందులు మింగడమే సరిపోతోంది. మా రెండో అన్నయ్య సంసారం చట్టుబండలై పోయింది. వాడిని ఒదిలేసి మా వదిన పుట్టింటికి వెళ్ళిపోయింది. నాకేమో 38 వచ్చాయి. ఇంకా పెళ్లి కాలేదు. డబ్బుంది కాని సుఖం లేదు. మా ఇంట్లో ఎవరికీ శాంతి లేదు. ఏంటో అర్ధం కావడం లేదు" అన్నాడు.

"నేను చెబుతున్నాగా మీరు చేస్తున్న తప్పులేంటో? ముందవి మానుకోండి. మీ హోటల్లో మంచిగా భోజనం పెట్టడం మొదలు పెట్టండి. సున్నం నీళ్ళు కలపడం కూరల్లో కారం వెయ్యడం మానుకోండి. బారు షాపులో మీ వాటా వెనక్కు తీసుకోండి. ఇంకో వ్యాపారం ఏదైనా చేసుకోండి. అది కూడా శుద్ధంగా చెయ్యండి. అంతేగాని చేసేవన్నీ చేస్తూ -  "మేమేం తప్పులు చెయ్యడం లేదు మాకే ఎందుకిలా జరుగుతోంది?" - అని చెత్తకబుర్లు నా దగ్గర చెప్పకండి. మీలాంటి వాళ్ళ జాతకాలు నేను చూడను. చూసినా రెమెడీలు చెప్పను" అన్నాను.

"అలా అయితే మీరీ లోకంలో ఎవరికీ జాతకం చెప్పలేరు" అన్నాడు తగ్గకుండా.

"అందరికీ జాతకాలు చెప్పాలని నాకేమీ దురద లేదు. అది నా వృత్తీ కాదు. మీలాంటి వారికోసం దొంగ జ్యోతిష్కులు చాలామంది బోర్డులు పెట్టుకుని మరీ రెడీగా కూచుని ఉన్నారు. వారిని కలవండి. మీ పాపంలో వాళ్లకు కూడా వాటా పంచండి" అన్నాను.

ఫోన్ కట్ అయిపోయింది.

కధ కంచికి మనం ఇంటికి.

read more " మాకు తెలిసి మేమే తప్పూ చెయ్యలేదు "

బ్రూస్లీ మరణానికి ఇది కూడా ఒక కారణమా???

బ్రూస్లీ 1940 లో పుట్టి, 1973 లో చనిపోయాడు. ఆ సమయానికి అతనికి 32 ఏళ్ళే. ఆరోగ్య పరంగా అన్ని జాగ్రత్తలు తీసుకుని, అంత చక్కని ఆల్ రౌండ్ ఫిట్నెస్ తో ఉన్న ఒక మార్షల్ ఆర్టిస్ట్ కు ఆ విధమైన అకాల మరణం ఎందుకొచ్చింది?

దీని గురించి ఇంతకు ముందు నేనొక పోస్ట్ వ్రాస్తూ జ్యోతిష్య పరంగా ఈ ప్రశ్నలను విశ్లేషించాను. ఇప్పుడు దీనినే ఇంకొక కోణంలో చూద్దాం.

ఏ మనిషికైనా ఒంట్లో కొవ్వు అనేది కొంత అవసరమే. అది ఎక్కువగానూ ఉండకూడదు. తక్కువగానూ ఉండకూడదు. సైన్సు చెప్పేదాని ప్రకారం ప్రతి మనిషికీ తన బరువులో 9% నుండి 19% మధ్యలో కొవ్వు అతని శరీరంలో ఉండవచ్చు. అది ఆరోగ్యకరమైన రేంజ్ గా చెప్పబడుతుంది.

బ్రూస్లీ బరువు 65 కేజీలు గా ఉండేది. అంటే, అతనిలో దాదాపుగా 6 కేజీల నుంచి 12 కేజీల వరకూ కొవ్వు ఉండవచ్చు. కానీ, మెడికల్ రిపోర్ట్ ల ప్రకారం అతనిలో 1 కేజీ కూడా కొవ్వు లేదు. అర్దకేజీ కంటే తక్కువ ఉంది. అతని ఒంట్లో మొత్తం కండ ఉండేది గాని కొవ్వు ఉండేది కాదు. ఎక్కడ ఏమాత్రం కొవ్వు కన్పించినా దాన్ని కరిగించేవరకూ అతనికి నిద్ర పట్టేది కాదు. అతనొక Fitness freak అని చెప్పవచ్చు. హాలీవుడ్ నటులు కూడా అతని శరీరాన్ని చూచి చాలా ఆశ్చర్యపోతూ ఉండేవారు. అమెరికన్స్ అయిన తమకు కూడా అలాంటి గట్టి శరీరం లేదే అని అసూయపడుతూ ఉండేవారు.

ఇదిలా ఉండగా, Enter the Dragon సినిమా సెట్ల మీద బ్రూస్లీ ఒకరోజున పెద్ద జ్వరంతో కూలబడి పోయాడు. అతనికి ఫిట్స్ కూడా వచ్చాయి. అతన్ని వెంటనే ఆస్పత్రికి తరలించారు. పరీక్ష చేసిన డాక్టర్లు అతని మెదడులో వాపు లాంటిది ఉందని చెప్పి తాత్కాలికంగా ఏవో మందులిచ్చారు. అంతేగాక అతనికి నేపాల్ నుంచి తెప్పించిన ముడి మాదకద్రవ్యం 'హషీష్' తీసుకునే అలవాటుందని కూడా వారికి అప్పుడే తెలిసింది.

అతని శరీరంలో 1% కూడా కొవ్వు లేదని కూడా మెడికల్ రిపోర్ట్స్ లో వచ్చింది. ఒక అథ్లెట్ కు ఇది గర్వకారణమే గాని, ఆరోగ్యరీత్యా ఇది చాలా ప్రమాదకరం. ఎందుకంటే, మత్తుమందులు తీసుకున్నప్పుడు అవి గుండె, లివర్ మొదలైన అవయవాలకు చేరకుండా ఒంట్లో ఉన్న కొవ్వు అడ్డుపడి ఆ మత్తుమందుల్ని తను ఇముడ్చుకుంటుంది. తద్వారా అది శరీరాన్ని రక్షిస్తుంది. ఈ ప్రక్రియ బ్రూస్లీ శరీరంలో జరగడానికి ఆస్కారం లేదు. ఎందుకంటే ఉండవలసిన 9% - 19% మధ్యలో కొవ్వు లేకపోగా, కనీసం 1 % కూడా అతనిలో లేదు. అంతా మజిలే ఉంది. కనుక అతను తీసుకుంటున్న హషీష్ అనేది సరాసరి మెదడుకు చేరుతోంది. ఆ క్రమంలో మెదడు వాపుకు గురౌతోంది.

నీ ఒంట్లో తగినంత కొవ్వు లేదు, కనుక హషీష్ వాడకం మానుకోమని, అది ప్రమాదకరమని వైద్యులు చెప్పినా బ్రూస్లీ వినలేదు. పైగా అతను చేసే వ్యాయామాలు చూస్తే మామూలు మనుషులు భయపడతారు. అలాంటి ఘోరమైన వ్యాయామాలు చేసేవాడు. అలాగే హషీష్ కూడా తీసుకునేవాడు. అతనికి ఆ అలవాటుందని, రిలాక్స్ అవడానికి దానిని తీసుకుంటూ ఉంటాడని అతని భార్య "లిండా లీ" కూడా ఒక ఇంటర్వ్యూ లో చెప్పింది. ఒకవైపు హషీష్, ఒకవైపు మితిమీరిన వ్యాయామాలు, ఒంట్లో కొవ్వు లేకపోవడం వల్ల అతని మెదడులో పొరలు వాచి, ఫిట్స్ కు గురై చనిపోయాడు. గర్ల్ ఫ్రెండ్ బెట్టీ ఇచ్చిన ఆస్ప్రిన్ అతన్ని చంపలేదు. హషీష్ చంపింది. మితిమీరిన వ్యాయామాలు చంపాయి. తగినంత కొవ్వు లేకపోవడం చంపింది. !!

అందుకే అంటారు ! అతి ఎందులోనూ పనికిరాదని ! ఫిట్నెస్ మంచిదే. కానీ అదే ఒక వ్యసనం కాకూడదు. దానికి తోడు డ్రగ్స్ అలవాటైతే ఏమౌతుందో బ్రూస్లీ జీవితమే ఒక ఉదాహరణ !

ఒంట్లో కొంత కొవ్వు కూడా ఉండాలని, అయితే అది తగు మోతాదులో మాత్రమే ఉండాలని వ్యాయామాలు చేసేవారు మర్చిపోకండి !

read more " బ్రూస్లీ మరణానికి ఇది కూడా ఒక కారణమా??? "

బ్రతుకులు చెడగొడుతున్న జ్యోతిష్యం

"బ్రతుకు నిలబెట్టిన జ్యోతిష్యం" - అని కొన్నేళ్ళక్రితం ఒక పోస్టు వ్రాశాను. జ్యోతిష్యం అనేది బ్రతుకులు నిలబెట్టడమే కాదు. చెడగొడుతుంది కూడా. ఎలా అని అనుమానం వస్తోందా? ఈ పోస్టు చదవండి.

రామారావు హైదరాబాద్ లో బ్యాంక్ మేనేజర్. భార్య ప్రైవేటు స్కూల్లో టీచరుగా పనిచేస్తోంది. ఒక అమ్మాయి. ఒక అబ్బాయి. చక్కటి సంసారం. కానీ జ్యోతిష్యం వాళ్ళ సంసారంలో నిప్పులు పోసింది.

అమ్మాయి హైద్రాబాదులోనే ఇంజనీరింగ్ చదివింది. ఆ తరువాత అమెరికాలో ఎమ్మెస్ చెయ్యడానికి వెళ్ళింది. పూర్తిచేసింది. ఉద్యోగం తెచ్చుకుంది. ఈ లోపల H1B వచ్చేసింది. ఇంకేముంది? అమెరికాలో ఇలాగే ఎమ్మెస్ చదివి ఉద్యోగం చేస్తున్న ఒక అబ్బాయిని చూచి పెళ్లి చేస్తే ఒకపని అయిపోతుందని అనుకుని మురిసిపోయారు. పెళ్లి సంబంధాలు చూడటం మొదలుపెట్టారు. అప్పుడే అసలు కష్టాలు మొదలయ్యాయి.

ఖర్మ బాలేనప్పుడు ఎవడో ఒకడు మనకు చెడుగ్రహంలాగా తయారౌతాడు. వీరి విషయంలో అయితే వీళ్ళ కుటుంబ జ్యోతిష్కుడే ఆ చెడుగ్రహం అయి కూచున్నాడు.

ఏ సంబంధం తెచ్చినా ఇది బాలేదు, అది బాలేదు, నక్షత్రం కుదరలేదు, ఇంకోటి కుదరలేదని అన్ని సంబంధాలూ చెడగొట్టేవాడు. వీళ్లేమో గుడ్డి నమ్మకంతో అతడు చెప్పినది వేదంలా భావించి మంచి మంచి సంబంధాలన్నీ చెడగొట్టుకున్నారు. అప్పుడప్పుడూ కొన్ని సంబంధాలను ఆ జ్యోతిష్కుడే తెచ్చేవాడు. కానీ అవి వీళ్ళ అమ్మాయికి నచ్చేవి కావు. అబ్బాయికి అది బాలేదు ఇది బాలేదని ఆ అమ్మాయి వాటిని తిరస్కరించేది. ఇలా ఉండగా, చూస్తూ ఉండగానే అమ్మాయికి 30 ఏళ్ళు దాటాయి. సంబంధాలు రావడం తగ్గిపోయాయి.

ఇంతకు ముందు అబ్బాయిలకు వీళ్ళు కండిషన్స్ పెట్టేవాళ్ళు. ఇప్పుడు అవన్నీ మార్చుకుని డైవర్సీ సంబందాలైన పరవాలేదు అనే స్థితికి వచ్చారు. అయితే, అవి కూడా మంచివి రావడం లేదు. ఏం చెయ్యాలో తోచడం లేదు. అమ్మాయికి 33 ఏళ్ళు వచ్చేశాయి. ఈ లోపల ఒక రోజున వాళ్ళమ్మాయి ఈయనకు ఫోను చేసి ' నాన్నా, నాకు సంబంధాలు చూడొద్దు. ఇంక నేను పెళ్లి చేసుకోను' అని చెప్పేసింది.

ఈ పరిస్థితిలో అమ్మాయి జాతకం చూడమని నన్ను ఫోన్లో అడిగాడు తండ్రి.

ఏడేళ్ళక్రితం ఈ అమ్మాయి జాతకంలో వివాహదశలు నడిచాయి. అదే మాట తండ్రితో అన్నాను.

'నిజమే సార్ ! అప్పట్లో మంచి మంచి సంబంధాలు వచ్చాయి. కానీ మేమే వద్దనుకున్నాం. ఇప్పుడు రావడం లేదు.' అన్నాడు.

'ఇంకా ఎన్నేళ్ళపాటు మీకదే పనిగా సంబంధాలు వస్తాయని మీరనుకుంటున్నారు? మీ పెళ్లప్పుడు మీకెంత వయసు?' అడిగాను.

'ఇరవై అయిదు. మా ఆవిడకు ఇరవై రెండు' అన్నాడు.

'మరి ముప్పై మూడున్న అమ్మాయిని మీరెందుకు చేసుకోలేదు?' అడిగాను.

'అంతవరకూ ఎలా ఆగుతాం?' అన్నాడు.

'మరి ఇప్పటి అబ్బాయిలు కూడా అంతే కదా? మహా అయితే 30 వరకూ చూస్తారు. ఆ తర్వాతంటే అమ్మాయిలకు ఏజి బార్ అయినట్లే.' అన్నాను.

'అదే ఇప్పుడు మా సమస్య' అన్నాడు.

'మంచి సంబంధాలు వచ్చినప్పుడు మీరెందుకు వద్దనుకున్నారు?' అడిగాను.

'అంతా మా జ్యోతిష్కుడు చేశాడు. మాకేమో ఆ జ్యోతిష్యం తెలీదు. అతన్ని నమ్మాము. ఇలా చేశాడు. ఆ తర్వాత మాకు తెలిసినది ఏమంటే - మా ఫేమిలీ విషయాలన్నీ అతనికి తెలుసు. మా భావాలు, మా నమ్మకాలు, మా వీక్నెస్సులు అన్నీ తెలుసు. వాటితో ఆడుకున్నాడు. ఒక ఉదాహరణ చెప్తా వినండి.

జాతకపరంగా నక్షత్రాలు కలుస్తాయా లేదా చూచేటప్పుడు అమ్మాయి నక్షత్రానికి అబ్బాయి నక్షత్రం సరిపోతుందా లేదా అనే చూస్తారట. కానీ ఇతను అబ్బాయి నుంచి కూడా అమ్మాయికి చూచేవాడు. అలా చూస్తే, ఎక్కడో తప్ప ఎవరికీ సంబంధాలు కుదరవు. ఈ విధంగా సంబంధాలన్నీ చెడగొట్టాడు.' అన్నాడు.

'అవును. అమ్మాయి నుంచి అబ్బాయి నక్షత్రానికి చూడాలి. అదే సాంప్రదాయ పరంగా నక్షత్రపొంతనం చూచే విధానం. అతనేంటి ఏదో కొత్తగా ఉందే?' అన్నాను.

'మా ఖర్మకొద్దీ దొరికాడు వీడు. ఇంకా వినండి. కొన్నింటికి నక్షత్రం సరిపోలేదని చెప్పేవాడు. ఇంకొన్నింటికి సర్పదోషం అనేవాడు, ఇంకొన్నింటికి కుజదోషం అనేవాడు. ఇంకొన్నిటికి ఇంకేదో చెప్పేవాడు. ఇలా కావాలని చెడగొట్టేవాడు.' అన్నాడు.

'కావాలనా? అదేంటి?' అడిగాను.

'అవును. మాకు తర్వాత తెలిసింది. మా కుటుంబం గురించి అతనికి బాగా తెలుసు కదా ! అందుకని వేరే వాళ్ళ దగ్గర కమీషన్ తీసుకుని, వాళ్ళ అబ్బాయి జాతకం కొద్దిగా మార్చి మా అమ్మాయికి సరిపెట్టి, 'ఇది మంచి జాతకం. చేసుకోండి' అని చెప్పేవాడు. కుదిరితే మా దగ్గర కూడా డబ్బులు తీసుకుంటాడు కదా ! రెండుపక్కలా నొక్కొచ్చని ప్లానేశాడు. అయితే ఆ సంబంధాలు మా అమ్మాయికి నచ్చేవి కావు.

ఇదంతా మాకు వేరే వాళ్ళ ద్వారా తెలిసింది. వాళ్లకు కూడా ఇలాగే చేసి, జాతకాలు మార్చి, అంతా బాగుందని చెప్పి పెళ్లి చేశాడు. ఏడాది తిరక్కుండా వాళ్లకు విడాకులైపోయాయి. అదేంటని అడిగితే - ' నేను దేవుణ్ణి కాను. జాతకాలు మ్యాచింగ్ చెయ్యగలను గాని వాళ్ళ విధిని నేను మార్చలేను కదా !' అని తప్పించుకున్నాడు. అంతే కాదు ! రెండో పెళ్లి చేద్దామని మళ్ళీ డబ్బులు తీసుకుని సంబంధాలు తేవడం మొదలుపెట్టాడు. ఈ విధంగా చాలామంది జీవితాలు పాడు చేశాడు.' అన్నాడు.

'ఎవరతను?' అడిగాను.

'హైదరాబాద్ లో పేరున్న జ్యోతిష్కుడు' అంటూ అతని పేరు చెప్పాడు రామారావ్.

'మరి పరిహారాలు చెప్పలేదా మీకు?' అడిగాను.

'లేకేం? ఎన్నో చేశాం. వాటికి దాదాపు పదిలక్షలు వదిలింది. అమెరికా నుంచి మా అమ్మాయి పంపింది ఆ డబ్బులు' అన్నాడు ఏడుపు గొంతుతో

'పాపం ! అమెరికాలో తను సంపాదించినది ఈ దొంగ జ్యోతిష్కుడికి పోసిందన్నమాట ఈ అమ్మాయి?' అనుకున్నా.

'మరి మీ అబ్బాయి సంగతేంటి?' అడిగాను.

'వాడూ అమెరికాలోనే ఉన్నాడు. అక్కకు కాలేదని తనూ చేసుకోలేదు. వాడికీ 31 వచ్చాయి. చూస్తున్నాం.' అన్నాడు.

'మరి అదే జ్యోతిష్కుడికి చూపిస్తున్నారా ఇంకా?' అడిగాను.

'లేదండి. మాకు జ్యోతిష్యం అంటేనే నమ్మకం పోయింది. మా అమ్మాయి జీవితం ఇలా అవడానికి కారణం జ్యోతిష్యమే. అందుకే మా వాడికి జాతకం చూడటం లేదు. అమ్మాయి నచ్చితే చేసుకుంటాం. అంతే! ' అన్నాడు.

'వెరీ గుడ్. మంచి పని. ప్రొసీడ్ ! ' అన్నాను.

వీళ్ళమ్మాయి కధ వింటే చాలా బాధేసింది.

'ఇప్పుడు నానుంచి మీకేం కావాలి?' అడిగాను.

'అమ్మాయి భవిష్యత్తు చెప్పండి. రెమెడీలు చెప్పండి' అడిగాడు.

'జాతకమంటే నమ్మకం లేదన్నారుగా? మళ్ళీ ఇదేంటి?' అడిగాను.

'ఏ మూలో ఇంకా కొద్దిగా ఉండండి. మీరు కరెక్ట్ గా చెబుతారనీ, డబ్బులు తీసుకోరనీ మా ఫ్రెండ్స్ చెప్పారు. అందుకే మీకు ఫోన్ చేస్తున్నాను.' అన్నాడు.

'సరేగాని, ఒక్కమాట చెప్పండి. మీ అమ్మాయికి ఏజ్ బార్ అయిపోతున్నా కూడా ఎందుకు అతన్నే నమ్ముకుని కూచున్నారు మీరు?' అడిగాను.

'అంతా మా ఖర్మ సార్ ! అప్పుడర్ధం కాలేదు. అర్ధం అయ్యేసరికి టైం అయిపోయింది' అన్నాడు.

'మీ పెళ్ళప్పుడు ఈ జాతకాలు చూచారా? జాతకాలు చూచే మీ పెళ్లి చేసుకున్నారా?' అడిగాను.

'లేదండి. మా ఆవిడకు అసలు జాతకమే లేదు. మా నాన్నకు వాళ్ళ కుటుంబం నచ్చింది. అమ్మాయి నచ్చింది. చేసుకున్నాం.' అన్నాడు.

ఒకపక్క నవ్వొచ్చింది. ఇంకోపక్క బాధేసింది. జాతకం చూచి అతనికి కావలసిన విషయాలు ఫోన్లోనే చెప్పేశాను.

'చాలా ధ్యాంక్స్ సార్ ! మీరు మాకొక ఇరవై ఏళ్ళ క్రితం పరిచయం అయి ఉంటే మా జీవితాలు ఇంకోలా ఉండేవనిపిస్తోంది' అంటూ ఫోన్ పెట్టేశాడాయన.

ఫోన్ పెట్టేశాక చాలాసేపు ఆలోచిస్తూ ఉండిపోయాను.

జ్యోతిష్యాన్ని అతిగా నమ్మకూడదు. దానినొక గైడెన్స్ గా తీసుకోవాలే గాని, పొద్దున్న లేచి "టాయిలెట్ కు వెళదామా వద్దా? ఇప్పుడు ఏ హోర నడుస్తోంది? ఈరోజు నక్షత్రం ఏమిటి?" అని ఆలోచిస్తూ కూచోకూడదు. అలా కూచుంటే అన్నీ అక్కడే అయిపోతాయి.

ఆ జ్యోతిష్కుడు ఇలా జనాన్ని మోసం చేసి డబ్బు బాగా సంపాదించి ఉండవచ్చు, కానీ దానితో బాటు అతను పోగుచేసుకున్న ఖర్మను తలచుకుంటే నాకు భయం వేసింది. ఇలాంటి తెలిసి తెలియని జోస్యాలు చెప్పి జీవితాలను పాడు చెయ్యడం వల్ల, వచ్చే జన్మలో ఏ రోడ్డు కుక్కగానో, ఏ పందిగానో పుట్టవలసి వస్తుంది.

ఈ విధంగా తెలిసీ తెలియని జోస్యాలు చెప్పి చాలామంది జ్యోతిష్కులు ఎన్నో పెళ్లి సంబంధాలు చెడగొడుతున్నారు. ఇంతా చేస్తే వాళ్ళేమీ బ్రహ్మదేవుళ్ళు కారు. అసలు చెప్పాలంటే - మ్యారేజ్ మ్యాచింగ్ ఇలాగే చెయ్యాలి - అంటూ చెప్పే ఖచ్చితమైన పద్ధతులేవీ జ్యోతిష్యశాస్త్రంలో లేవు. మన దేశంలో ఒక్కొక్క రాష్ట్రంలో ఒక్కొక్క విధంగా ఈ మ్యారేజ్ మ్యాచింగ్ చేస్తూ ఉంటారు. దీంట్లో స్టాండర్డ్ పద్ధతులంటూ ఏవీ లేవు. ఎవడికి తోచిన విధంగా వాడు చేస్తూ ఉంటాడు. నమ్మే గొర్రెలు నమ్ముతూ ఉంటాయి.

నిజం చెప్పాలంటే - జాతకం కలవకపోవడం - అంటూ ఏమీ ఉండదు. ఎంత పర్సెంటేజి కలిసింది? అనేదే ప్రశ్న. ఆదర్శ దంపతుల జాతకాలే 100% కలవవు. అక్కడదాకా ఎందుకు? రాముడు సీతాదేవి జాతకాలే 100% కలవలేదు. ఇక మామూలు మనుషుల జాతకాల గురించి చెప్పాలా? మరి వీళ్ళిద్దరి పెళ్లినీ  బ్రహ్మర్షి అయిన వశిష్టుడు దగ్గరుండి ఎలా చేయించాడు? దీనికి సమాధానం లేదు. ఎవ్వరూ చెప్పలేరు కూడా !

మనుషుల జాతకాలు ఎవరివైనా సరే, చాలావరకూ కలుస్తూనే ఉంటాయి. ఏవో కొన్నికొన్ని జాతకాలలో భయంకరమైన దోషాలుంటాయి. అలాంటివాటిని పరిహారాలతో సరిచెయ్యాలిగాని, ప్రతి జాతకానికీ పరిహారాలు అవసరం ఉండవు. కనుక నా దృష్టిలో - 'జాతకం కలవలేదు' అని చెప్పడమే చాలా తప్పు ! అలా చెప్పే జ్యోతిష్కుడికి అసలు శాస్త్రం తెలీదని నేనంటాను.

ఈ విధంగా "జాతకం కుదరలేదు. ఈ సంబంధం చేసుకోవద్దు" అని చెప్పి పెళ్ళిళ్ళు చెడగొడుతున్న కుహనా జ్యోతిష్కులకు నేనొక ఓపన్ చాలెంజ్ చేస్తున్నా !

మీలో ఎవరైనా సరే, మీ దగ్గరకు వచ్చిన జాతకాలలో, "ఇతనికి గానీ ఈమెకు గానీ, పలానా సంవత్సరంలో, ఫలానా నెలలో, ఫలానా తేదీన, ఫలానా ఊళ్ళో పెళ్లి అవుతుందని ఖచ్చితంగా చెప్పగలరా?" చెప్పలేరు. మరి అలా చెప్పలేనప్పుడు - గణాలు కుదరలేదు, గుణాలు కుదరలేదు, సంబంధం కుదరలేదు, చేసుకోవద్దు - అంటూ, తెలిసీ తెలియని జోస్యాలు చెప్పి, జీవితాలతో ఆడుకోవడం తప్పు కదూ?

జ్యోతిష్కుల్లారా ! సిగ్గు తెచ్చుకోండి ! చేతనైతే మంచి చెయ్యండి. అంతేగాని మనుషుల జీవితాలలో ఆడుకోకండి. చెడుకర్మను పోగు చేసుకోకండి. వచ్చే జన్మలలో కుక్కలుగా నక్కలుగా పుట్టకండి. వచ్చే జన్మదాకా అక్కర్లేదు. ప్రముఖ జ్యోతిష్కుల కుటుంబాలలో తీరని పెద్ద పెద్ద సమస్యలుండటం నాకు తెలుసు. ఎంతో మంది కమర్షియల్ జ్యోతిష్కుల కుటుంబాలలో దీనిని నేను గమనించాను. అవన్నీ ఎందుకొస్తున్నాయి? మీరు సక్రమంగా ఉంటే, మీ కుటుంబాలలో ఆ సమస్యలెందుకున్నాయి? లోకుల సమస్యలు తీర్చే మీరు, మీ సమస్యలు ఎందుకు తీర్చుకోలేకపోతున్నారు? ఆలోచించుకోండి !

జ్యోతిష్యం యొక్క నిజమైన ప్రయోజనం జీవితానికి సరియైన దారిని చూపడం. కానీ కుహనా జ్యోతిష్కుల వల్ల నేడది జీవితాలను తప్పు దారి పట్టించి వాటిని చెడగొట్టే వ్యాపారంగా మారిపోయింది. అందుకే చెబుతున్నాను. 'కళ్ళు పోయేంత కాటుక పెట్టుకోకూడ' దని సామెత ఉంది. అలాగే అతిగా జ్యోతిష్యాన్ని నమ్మి జీవితాలు పాడు చేసుకోకండి. ఎందుకంటే జ్యోతిష్కుడు దేవుడు కాదు. వాడూ మనలాంటి మనిషే. వాడి లిమిట్స్ వాడికి ఉంటాయి. వాడు చెప్పేది వేదం ఏమీ కాదు. పోనీ జ్యోతిష్యశాస్త్రం చూద్దామా అంటే ఇదేమీ ఒక Standardized Science కాదు. ఇందులో ఎవడి పద్దతి వాడిది. కనుక, మీకు దేవుడిచ్చిన తెలివిని వాడండి. ఎవడో చెప్పిన మాయమాటలను కాదు !

ఇలాంటి జ్యోతిష్కుల వల్లే నిజమైన శాస్త్రానికి విలువ లేకుండా పోతోంది. ఇది కూడా కలిమాయేగా మరి !

read more " బ్రతుకులు చెడగొడుతున్న జ్యోతిష్యం "