సత్యసాయిబాబా జాతక సవరణ - విశ్లేషణ

సత్యసాయిబాబా జననతేదీ 23 నవంబరు 1926 అని అన్నిచోట్లా ఒకటే తేదీ లభిస్తున్నది. సమయాలు మాత్రం 6.06 am అనీ, 5.06 am అనీ రెండు కనిపిస్తున్నాయి. మొత్తమ్మీద ఆయన బ్రహ్మముహూర్తంలో పుట్టారని అంటారు. అది ఉదయం 3 గంటలనుండి 6 గంటల మధ్యలో ఎప్పుడైనా కావచ్చు.

ఆ మూడుగంటలలో చంద్రుడు ఆర్ద్రానక్షత్రం 4 వ పాదంలోనే ఉన్నాడు. లగ్నాలు మాత్రం కన్య (3.47 am వరకు), తుల (5.54 am వరకు), వృశ్చికం (ఆ తరువాత) అవుతాయి. 

జననకాలసంస్కరణకు తేదీలతో సహా కొన్ని సంఘటనలు కావాలి. ఆయన చిన్ననాటి సంఘటనలలో కొన్ని ముఖ్యమైనవి (తేలుకుట్టడం, తను షిరిడీసాయిబాబా అవతారాన్నని ప్రకటించడం మొదలైనవి) ఉన్నాయి. 

8 మార్చి 1940 - ఆ రోజున తేలుకుట్టడం లాంటి సంఘటన జరిగింది. ఆ తరువాత పిచ్చిపిచ్చిగా మాట్లాడటం, శ్లోకాలూ గట్రా చదవడం మొదలుపెట్టాడు.

23 మే 1940 - "నేను షిరిడీ సాయిబాబాన"ని కుటుంబసభ్యులతో చెప్పాడు. ఒకవేళ అది నిజమే అయితే, తనకలవాటైన ఖురాన్ సూరాలు వల్లించాలి గాని సంస్కృతశ్లోకాలు చదవడమేంటి? కనుక ఆ తేదీలను, ఆ సంఘటనలను, నిజాలని నమ్మలేం. అటువంటి కట్టుకథలు చాలా ప్రచారంలో ఉన్నాయి. అందుకని వాటినొదిలేసి, ఈ మధ్యకాలంలో జరిగినవాటిని, అందరికీ తెలిసినవాటినీ మాత్రం పరిశీలిద్దాం.

6 జూన్ 1993 న ప్రశాంతినిలయంలో జరిగిన విద్యార్థుల మరణాలు మొదటి సంఘటన. ఆయన చనిపోయినదిగా చెప్పబడుతున్న 24 ఏప్రియల్ 2011 రెండవ సంఘటన. ఈ రెంటినీ  పరిశీలనలో గీటురాళ్ళుగా తీసుకుందాం. అఫ్కోర్స్ రెండవతేదీ కూడా నిజమని పూర్తిగా చెప్పలేం.

లగ్ననిర్ధారణ

తల్లిదండ్రులకు కలిగిన అయిదుమంది సంతానంలో ఈయన నాలుగవవాడు. ఈయన పైన ఒక అన్న, ఇద్దరు అక్కలున్నారు. క్రింద ఒక తమ్ముడున్నాడు.

పెద్దన్న శేషమరాజు. ఈయన కమలాపురం, ఉరవకొండలలో బడిపంతులుగా పనిచేస్తూ, చిన్నతనంలో సత్యసాయిని సాకాడు. రెండు, పెద్దక్క వెంకమ్మ. మూడు, చిన్నక్క పార్వతమ్మ. నాలుగు, సత్యనారాయణ రాజు (బాబా). అయిదు, తమ్ముడు జానకిరామయ్య. ఇదీ వీరి వరస.

సత్యసాయిబాబా ఎత్తు 5 అడుగుల 2 లేదా 3 అంగుళాలు. అంటే, పొట్టికిందే లెక్క.

రాశులలో హ్రస్వరాశులు కుంభ, మీన, మేష, వృషభములు. ఇవి బాబా యొక్క జననలగ్నాలుగా రావడం లేదు. ఉజ్జాయింపు జననసమయాలలో వస్తున్న కన్య, తుల, వృశ్చికం మూడూ దీర్ఘరాశులే. కన్యపైన గురుదృష్టి ఉన్నది. కానీ బాబా జాతకంలో గురువు నీచస్థితిలో ఉన్నాడు. కన్యకు ఎక్కువమంది తమ్ముళ్ళుండాలి, కానీ ఒక్కడే తమ్ముడు. కనుక కన్యాలగ్నం కాదు. కాబట్టి జననసమయం 3.47 am తరువాతనే ఉంటుంది.మిగిలింది తులా వృశ్చికలగ్నాలే.

తులాలగ్నమైతే దానిపైన కుజదృష్టి ఉన్నది. కనుక జాతకుడు పొట్టివాడే అవుతాడు. తులాలగ్నజాతకులకు జనాకర్షణశక్తి ఎక్కువ. పైగా, అప్పుడు తృతీయంలో ఉచ్ఛకేతువువల్ల సమర్ధుడైన ఒక తమ్ముడుంటాడు. సత్యసాయి ఆశ్రమవ్యవహారాలలో జానకిరామయ్య పోషించిన ప్రముఖపాత్ర అందరికీ తెలుసు. కనుక తులాలగ్నమై ఉండాలి. అప్పుడు, జననసమయం 3.48 am - 5.54 am మధ్యలో ఉంటుంది.

ఒకవేళ వృశ్చికలగ్నమైతే, లగ్నంలోని గ్రహయుద్ధం వల్ల ఈయనకు ఇంతటి జనాకర్షణ ఉండకపోగా, గందరగోళం ఏర్పడుతుంది. మూడింట నీచగురువు తమ్మునికి అంతటి అధికారాన్ని ఇవ్వడు. అష్టమంలో ఉచ్ఛరాహువు, చంద్రులవల్ల ఆధ్యాత్మికంగా ప్రఖ్యాతి ఉండదు. అదే తులాలగ్నమైతే, ఉచ్ఛరాహుకేతువులు 9/3 స్థానాలలో ఉండటంవల్ల ఆధ్యాత్మికమైన ప్రపంచఖ్యాతి ఉంటుంది.

ఈయనకున్న ఉపకారబుద్ధీ, ఉదారస్వభావమూ తులాలగ్నాన్ని సూచిస్తున్నాయి గాని, పగా ప్రతీకారాలకు నెలవైన వృశ్చికలగ్నాన్ని కాదు. కనుక, ఈయనది తులాలగ్నమేగాని, కొందరు అనుకుంటున్నట్లు వృశ్చికలగ్నం కాదు.

ఈయనది తులాలగ్నమే అని నేను చెప్పడానికి ఇంకొక కారణంకూడా ఉన్నది. తులాలగ్నమైనపుడు మాత్రమే వీరి తండ్రిగారివైపునుండి పూర్వీకులలో ఆధ్యాత్మిక చింతనాపరులుంటారు. దీనికి కారణం నవమస్థానంలో ఉచ్చరాహువుండటం. అదే వృశ్చికలగ్నమైతే ఈ యోగం రాదు. కనుక ఈయనది తులాలగ్నమే.

తాతల భక్తితత్వం

వంశంలోని పూర్వీకులలో ఆధ్యాత్మికచింతన గట్టిగా ఉన్నవాళ్లు లేకపోతే ఇలాంటివాళ్ళు ఆ వంశంలో పుట్టడం జరుగదు.

బాబా  తాతగారైన కొండమరాజు 110 ఏళ్ళు బ్రతికాడు. ఆయనొక భక్తుడు. సంసారి అయినప్పటికీ ఎక్కువగా దైవధ్యానంలో ఉండేవాడు. పద్యాలు, కీర్తనలు పాడుతూ ఉండేవాడు.  సత్యభామాదేవికి గుడికట్టించమని ఆయనకొక స్వప్నం వచ్చింది. అందుకని, పుట్టపర్తిలో సత్యభామాదేవికి గుడి కట్టించాడు. ఆయనకు "లేపాక్షి రామాయణం" మొత్తం కంఠతా వచ్చు. గ్రామంలోని పిల్లలను చేరదీసి రామాయణసన్నివేశాలను పాడుతూ వారికి వివరిస్తూ ఉండేవాడు. బాబాకు కూడా అదే అలవాటు వచ్చింది. బాబా ప్రసంగాలను మనం వింటే అందులో నీతులు, మంచిమాటలు తప్ప, గొప్పదైన వేదాంతం ఏమీ కనిపించదు. ఈ విషయంలో తాతగారి పోలికే ఈయనకు వచ్చింది. తాతగారు మంచి గాయకుడే కాదు, నాటకరచయితా, నటుడూ కూడా. ఈయన వెంకావధూతను అనుసరించేవాడు.

ఈ వెంకావధూత అనే సాధువు 19 వ శతాబ్దంలో జీవించాడు. ఈయన సమాధి ఆంధ్రా కర్నాటకా సరిహద్దులో తుంకూరు జిల్లాలో ఉన్నది. ఈయన తమకు గురువు గనుక, తన పిల్లలకు పెదవెంకమరాజు, చినవెంకమరాజు అని పేర్లుపెట్టుకున్నాడు కొండమరాజు. వీరిలోని పెదవెంకమరాజే బాబాగారి తండ్రి. వీరు క్షత్రియరాజులు కారు. కవిత్వమూ, గానమూ, లలితకళలూ తమ వంశంలో ఉన్న భట్టురాజులు. ఈ వివరాలన్నీ బాబాగారిది తులాలగ్నమే అని నిర్ధారిస్తున్నాయి.

వెంకావధూత కథలో చాలా అసంబద్ధములైన విషయాలున్నాయి. వాటిపైన నేను వ్యాఖ్యానించదలుచుకోలేదు. వాటిలోకి పోకుండా, ఇంతవరకు మాత్రమే మనం చూద్దాం.

జననకాల సంస్కరణ - అంశచక్రాలు - జీవిత సంఘటనలు

తులాలగ్నంలో, తులనుండి మిధునం వరకూ నవాంశలు నడుస్తాయి. వీటిలో సరియైన జననకాల నవాంశను ముందుగా పట్టుకోవాలి. అప్పుడు జననసమయం 13 నిముషాలకు కుదించబడుతుంది. నవాంశలో కుజదోషం బలంగా ఉన్నది. తత్ఫలితంగా బాబా వివాహం చేసుకోలేదు. కనుక మకర (4.30-4.43), మీన (4.58-5.11) నవాంశలు సరిపోతాయి.

ఎలాగంటే, మకరనవాంశ అయితే, సప్తమంలోని నీచవక్ర కుజునివల్ల వివాహం ఉండదు. మీననవాంశ అయితే, సప్తమంలోని అష్టమాధిపతి నీచశుక్రునివల్లా, షష్ఠాధిపతి సూర్యునివల్లా, ఆధ్యాత్మికయోగాన్నిచ్చే గురువువల్లా  జాతకునికి వివాహం ఉండదు.

అయితే, మధ్యలో ఉన్న కుంభనవాంశ సరిపోదు. ఏమంటే, అదైనపుడు, జాతకుని దౌర్జన్యంవల్లా, అతని జాతకపు దురదృష్టం వల్లా భార్య జీవితం నరకమౌతుంది. ఆమె చాలా బాధపడుతుంది. అటువంటి పరిస్థితి బాబా జాతకంలో లేదుగనుక, కుంభనవాంశ కాదు.

కనుక మీన (4.58-5.11) నవాంశ అనేది రూఢి అవుతున్నది. ఇప్పుడు దశాంశను గమనిద్దాం.

4.51 am - 5.03 am మధ్యలో మీనదశాంశ నడుస్తుంది. గురువు చతుర్దంలో ఉన్నాడు గనుక అప్పుడు మాత్రమే లోకానికి బోధించే ధర్మాచార్యపదవిని అందుకుంటాడు. ఆ తరువాత అయితే, మేషదశాంశ అవుతుంది. ఈ యోగం తప్పుతుంది.సరిపోదు.  దశాంశలోని చంద్ర, శుక్ర, కుజుల నీచస్థితులవల్ల, ప్రస్తుత టాపిక్ కు సంబంధం లేని కొన్ని ఇతరకోణాలు కూడా గోచరిస్తున్నాయి. అయితే, వాటిజోలికి మనమిప్పుడు పోవద్దు.

కనుక, నవాంశ మరియు దశాంశలను పోల్చగా, బాబా యొక్క జననసమయం 4.58 am - 5.03 am మధ్యలో మాత్రమే ఉండాలని తేలుతోంది. ఆధ్యాత్మికతను సూచించే వింశాంశచక్రంలో మాత్రం ఈ అయిదు నిముషాలలోనూ మీనలగ్నమే అవుతున్నది. వింశాంశలో రవిబుధరాహువులు ఉచ్ఛస్థితిలో ఉన్నారు. కేతువు నీచస్థితిలోకి వచ్చాడు. గురువేమో శుక్రస్థానంలో ఉన్నాడు. అయితే, ప్రస్తుతం మనపని అదికాదు గనుక, బాబా ఆధ్యాత్మికస్థాయిని గురించి నేను వ్యాఖ్యానించను.

సంఘటనల గీటురాళ్ళు

ఈ అయిదునిముషాలలో ఏది సరియైన జననసమయమో నిర్ధారించడానికి, మనం పైన అనుకున్న రెండు సంఘటనలను మాత్రం ఈ గీటురాయిమీద పరిశీలిద్దాం.

మొదటి సంఘటన - ప్రశాంతి నిలయంలో విద్యార్థుల మరణాలు - (6 జూన్ 1993) - ఆనాడు బాబా జాతకంలో శుక్ర - చంద్ర - శుక్ర - చంద్ర - చంద్రదశ నడిచింది. 

లగ్నాధిపతి శుక్రుడు రవితో ఒకే డిగ్రీపైన ఉండటంతో తీవ్రంగా అస్తంగతుడైపోయాడు. కుటుంబస్థానంలో గ్రహయుద్ధం ఉన్నది. దారాకారకుడైన శనికూడా తీవ్ర అస్తంగతుడైనాడు. చంద్రుడేమో నవమస్థానంలో ఉచ్ఛరాహువుతో కలసి ఉన్నాడు. కనుక ఆధ్యాత్మికసంస్ధలో బలమైన కుట్రలూ గొడవలూ ఆ రోజున సూచింపబడుతున్నాయి.

రెండవ సంఘటన - బాబా మరణం - (24 ఏప్రియల్ 2011) - ఆనాడు బాబా జాతకంలో రవి - బుధ - బుధ - శుక్ర - బుధదశ నడిచింది. లాభస్థానాధిపతిగా సూర్యుడు దీర్ఘరోగాలను సూచిస్తున్నాడు. బుధశుక్రులు మారకస్థానంలో గ్రహయుద్ధంలో చిక్కుకున్నారు.  చంద్రలగ్నం నుండి ఇది రోగస్థానమైంది. కనుక ఈ దశలో మరణం సహజమే.

సత్యసాయిసంస్థల మొత్తం చరిత్రలో, విద్యార్థుల మరణాల ఘట్టం అంతుబట్టని ఒక చీకటి అధ్యాయంగా నేటికీ మిగిలిపోయి ఉన్నది. ఇది ఒక అరిష్టమే. అరిష్టాలంటే దుర్ఘటనలు, దురదృష్టసంఘటనలు. జాతకం నుండి వీటిని ఎలా తెలుసుకోవాలో పరాశరమహర్షి ఈ శ్లోకంలో వివరించారు. 

శ్లో || విద్యాయా వేదబాహ్వంశే భాంశే చైవ బలాబలం

త్రింశాంశకే రిష్టఫలం ఖవేదాంశే శుభాశుభమ్  ||

( బృహత్పరాశర హోరాశాస్త్రము - 7-5 )

"విద్యను వేదబాహు అంశ (24వ అంశచక్రము) నుండియు, బలాబలములను భాంశ (27వ అంశ, నక్షత్రాంశ) నుండియు,  అరిష్టఫలితములను త్రింశాంశ (30వ అంశ) నుండియు, శుభాశుభములను ఖవేదాంశ (40వ అంశ) నుండియు గ్రహించాలి." అని ఈ శ్లోకం యొక్క అర్ధము.

విద్యార్థుల హత్యలు

కనుక విద్యార్థుల హత్యలను (అరిష్టాన్ని) చూడటానికి త్రింశాంశచక్రాన్ని గమనిద్దాం.

దశాఫలితం ఈ చక్రంలో ఖచ్చితంగా సరిపోతున్నది.

త్రింశాంశలో ధనుర్లగ్నమైంది. అక్కడే గ్రహయుద్ధం ఉన్నది. ఈ లగ్నానికి శుక్రుడు శత్రుస్థానాధిపతి. దశమస్థానంలో నీచస్థితిలో ఉన్నాడు. అక్కడే ఉన్న శనిసూర్యులవల్ల ఇది కుటుంబంలో, అంటే సంస్థలో వచ్చిన అంతర్గతగొడవ అని అర్థమౌతోంది. ఇక చంద్రుడేమో అష్టమాధిపతిగా గ్రహయుద్ధంలో లగ్నంలోనే ఉన్నాడు. నీచరాహువు, ఉచ్ఛకేతువులవల్ల, ఆధ్యాత్మికసంస్థలో కుట్రదారులు మరియు నేరస్థులు చొరబడ్డారని అర్ధమవుతోంది. లగ్నాధిపతి గురువు ద్వాదశంలో మిత్రస్థానంలో ఉన్నందువల్ల సత్యసాయిబాబాకు ఈ గొడవతో సంబంధం లేదని, ఆయన తన గదిలో బందీ అయ్యాడని స్పష్టంగా ఉన్నది. అది వృశ్చికం కావడంతో దాక్కున్నాడని చెప్పడం సరిగ్గా ఉంటుంది. ఆనాటి రాత్రి జరిగింది సరిగ్గా అదే. 

అంశచక్రాలలో భావాధిపత్యాలను చూడకూడదని దివాకరుని వెంకట సుబ్బారావుగారు అనేవారు. కానీ నేను దీనిని ఒప్పుకోను. రాశివంటివే అంశలని ఒక సూత్రం ఉన్నది. కనుక, అంశలలో కూడా భావాలను, అధిపత్యాలను చూడవచ్చని నేనంటాను.

అయితే, జననకాలసంస్కరణ (rectification of birthtime) ను ఖచ్చితమైన నిముషంవరకూ చేసినపుడు మాత్రమే అంశచక్రాలు సరిగ్గా పనిచేస్తాయి. లేదంటే తప్పుతాయి.

మరింత నిర్ధారణకోసం, బహిరంగ శతృత్వాలనూ, గొడవలనూ సూచించే షష్టాంశచక్రాన్ని, హఠాత్ నష్టాలనూ కష్ఠాలనూ సూచించే  అష్టాంశచక్రాన్నీ గమనిద్దాం.

షష్టాంశలో లగ్నాధిపతి చంద్రుడు కర్కాటకంలోనే ఉన్నాడు. కనుక శత్రువులతోనూ, ఆనాడు జరిగిన గొడవతోనూ బాబాకు సంబంధం లేదు. అయిదు, పన్నెండుభావాలలో ఎక్కువగా గ్రహాలున్నాయి గనుక భక్తులు, అనుచరులలోనే కుట్రలు కుతంత్రాలు జరిగాయని కనిపిస్తోంది. షష్ఠంలోని వక్రబుధుడు పంచమంలోకి వచ్చి గ్రహయుద్ధంలో పాలుపంచుకోవడం వల్ల, తన అనుచరులు భక్తులలోనే రెండువర్గాలేర్పడ్డాయని, దీనిలో తమ్మునిపాత్ర స్పష్టంగా ఉందని అర్ధమౌతుంది. బుధుడు తృతీయాధిపతిగా తమ్ముడిని సూచిస్తున్నాడు. ద్వాదశంలోని ఉచ్ఛరాహువు, నీచకేతువు, మరియు వక్రకుజులవల్ల సంస్థాగతమైన రహస్యకుట్రలు, హింసాత్మకసంఘటనలు స్పష్టంగా కనిపిస్తున్నాయి.

అష్టాంశచక్రం ఇంకా స్పష్టంగా ఉన్నది. లగ్నాధిపతి సూర్యుడు ఆరింట శత్రుస్థానంలో శనిశుక్రులతో బందీ అయ్యాడు. శుక్రుడు దశమాధిపతి. శని శత్రుస్థానాధిపతి. కనుక తన సంస్థలోనే తనకు శత్రువులు తయారయ్యారు. శనిశుక్రులు సెక్సువల్ ఆరోపణల కోణాన్ని కూడా చూపిస్తారు. నీచబుధుడు, నీచకుజుల పరస్పర మిత్రదృష్టులవల్ల గ్రూపులు ఏర్పడి, వారిమధ్యలో రహస్యకుట్రలు, హింసాత్మకసంఘటనలు ఈ దశలో జరుగుతాయన్న సూచన స్పష్టంగా ఉన్నది.

బాబా మరణం

24 ఏప్రియల్ 2011 న ఈయన జాతకంలో రవి - బుధ - బుధ - శుక్ర - బుధదశ నడిచిందని పైన ఇచ్చాను. ఈ సంఘటనను దశాపరంగా, అంశచక్రాల పరంగా గమనిద్దాం.

త్రింశాంశచక్రంలో, రవి నీచస్థితికి దగ్గరగా ఉన్నాడు నీచశుక్రునితోను, శనితోను కలసి ఉన్నాడు. బుధుడేమో తనుకూడా నీచస్థితిలోనే ఉన్నాడు. వీరిద్దరితో 4-10 భావాల ఇరుసులో లగ్నం అర్గళానికి గురయ్యింది. ఇది మంచిసూచన కాదు.

షష్టాంశచక్రంలో, రవి బుధ శుక్ర శనులు స్వబుద్ధిని, శిష్యులను సూచించే పంచమభావంలో రహస్యాలకు నెలవైన వృశ్చికంలో ఉన్నారు. కనుక, తన ఆఖరిదశలో, ఎన్నో రహస్యాలను తనలో ఉంచుకుని, గుండె, నరాలు, ఎముకలు మొదలైన అనేకదేహవవస్థల రోగాలతో ఆయన నిష్క్రమించాడని తెలుస్తోంది.

అష్టాంశచక్రంలో, రవిశుక్రశనులు శత్రు, రోగస్థానంలో ఉన్నారు. బుధుడు రహస్యాలకు నెలవైన అష్టమంలో నీచస్థితిలో ఉన్నాడు. ఇదీ మంచి సూచన కాదు. మొత్తమ్మీద ఆయన మరణం అనేక రహస్యాల, వివాదాల మధ్యన, బాధాకరమైన పరిస్థితిలోనే జరిగింది. ఈ విషయాన్ని అంశచక్రాలు స్పష్టంగా చూపిస్తున్నాయి.

సూక్ష్మచక్రాలలో చాలావాటిల్లో రవి-శుక్ర-శనులు ఒకే రాశిలో ఉండటాన్ని చూడవచ్చు. రవిశుక్రులు ఒకేడీగ్రీ గనుక వారిద్దరూ అలాగే ఉంటారు. శని కొంచెం దూరంగా ఉన్నాడు గనుక, కొన్నింటిలో కలిసే ఉంటాడు. కొన్నింటిలో పక్కరాశులలో ఉంటాడు. అయితే, ఈ యోగం అంత మంచిది కాదు.  

నేను సవరించిన సమయానికి పై రెండుసంఘటనలూ అన్ని అంశచక్రాలతోనూ కరెక్టుగా సరిపోతున్నాయి గనుక, సత్యసాయిబాబా జననసమయం ఉదయం 5 గంటలని సవరణ చేస్తున్నాను. ఇది "తపోవనం - శ్రీ సత్యసాయి సచ్చరిత్ర" అనే పుస్తకంలో ఇవ్వబడిన 5.06 నిముషాలకు 6 నిముషాలు మాత్రమే తక్కువగా ఉన్నది. 

ఆ రోజులలో వాచీలు గడియారాలు ఎలా ఉన్నాయో తెలియదు గనుక, ఒకవేళ ఉన్నప్పటికీ నేటిలాగా అంతర్జాతీయ డిజిటల్ టైముతో అనుసంధానమైన తీరులో అన్నీ ఒకేసమయాన్ని చూపిస్తూ లేవు గనుక, జ్యోతిషశాస్త్రరీత్యా నేను సరిచేసిన ఈ సమయాన్ని ఖచ్చితమైనదిగా తీసుకోవచ్చు.

సంశయ నివారణకోసం మరొక్క సంఘటనను కూడా పరిశీలిద్దాం.

1963 లో బాబాకు పక్షవాతమూ, గుండెపోటూ రెండూ వచ్చాయి. అప్పుడాయనకు 36 ఏళ్ళు. ఆ ఏడాది జూన్ 29 నుండి జూలై 6 వరకూ ఆయన Cerebral Thrombosis మరియు Tubercular Meningitis లతో బాధపడ్డారు. ఎడమవైపు ముఖమూ, చేయీ, కాలూ చచ్చుబడ్డాయి. జూలై 6 న గురుపూర్ణిమనాడు వాటంతట అవే బాగయ్యాయని అంటారు. అదెంతవరకూ నిజమో మనకు తెలియదుగాని, ఆ సమయంలో ఆయన జాతకంలో శని - గురు - చంద్ర - గురుదశ నడిచింది. సరిగ్గా ఆ ఎనిమిదిరోజులూ ఆయనకు గురుసూక్ష్మదశ నడిచింది. చతుర్దంలో గురువు నీచస్థితి గనుక ఆ సమయంలో హార్ట్ ఎటాక్ వచ్చింది. చంద్రలగ్నం నుండి శని రోగస్థానంలోనూ, గురువు అష్టమస్థానంలో నీచస్థితిలోనూ ఉన్నారు. రోగం రావడానికి సరిపోయిన గ్రహదశలే ఆ సమయంలో నడిచాయి.

త్రింశాంశచక్రంలో అయితే, చంద్రుడు గ్రహయుద్ధంలో ఉన్నాడు. శని దశమంలో నీచశుక్రునితోనూ, గుండెకు కారకుడైన రవితోనూ కలసి ఉన్నాడు. గురువు ద్వాదశంలో ఉన్నాడు. శనిగురువులిద్దరూ ఎడమవైపునే సూచిస్తున్నారు. కనుక ఆ సమయంలో ఆ రోగం వచ్చిన సూచన స్పష్టంగానే ఉన్నది. 1963 లో గురుసూక్ష్మదశ 28 జూన్ నుండి 9 జూలై వరకు  నడిచింది.

2006 లో ఇంకొక సంఘటన జరిగింది. ఒక ఇనుపస్టూలు (వాడుకభాషలో దీనిని గుర్రం అంటారు) పైన ఎక్కి ఏవో కాగితాలూ అవీ కడుతూ డెకరేషన్ చేస్తున్న ఒక విద్యార్థి తూలి, ఇనుపస్టూలుతో సహా బాబాపైన పడ్డాడు. బాబాకు హిప్ జాయింట్ ఫ్రాక్చర్ అప్పుడే అయింది. ఆ తరువాత ఆయన చక్రాలకుర్చీకి అంకితమయ్యారు.

2006 లో (ఖచ్చితమైన తేదీ లభించలేదు) బాబా జాతకంలో శుక్ర బుధ శని దశగాని, శుక్ర కేతు కేతు దశగాని, శుక్ర కేతు శుక్ర దశగాని జరిగింది. శుక్రశని బుధులైతే మాత్రం, చంద్రలగ్నం నుండి ఆరవభావంలో గ్రహయుద్ధంలోనే ఉన్నారు. అది మంచి దశ కాదు. కనుక ఘోరమైన యాక్సిడెంట్ అయింది. కేతువు కూడా లగ్నంనుంచి గాని, చంద్రలగ్నం నుంచి గాని మంచివాడు కాదు. ఏ విధంగా చూచినా అది మంచిదశ కాదు. ఈ సంఘటన కూడా సరిపోతున్నది.

నేను సవరించిన ఈ సమయానికి బాబా జాతకంలోని ఏ సంఘటన అయినా సరిగ్గా సరిపోతుంది, చూచే విధానం తెలిస్తే ! ఇంకా, నేను దశలకు గోచారాన్ని, ఇతర విశ్లేషణా టెక్నిక్ లను జతచెయ్యలేదు. కేవలం పైపైన మాత్రమే చూచాను. గమనించండి.

స్థూల జీవితదశలు 

బాబా పుట్టినపుడు రాహు రవి బుధ రాహు రాహు దశ నడిచింది. రాహువు బాబా జాతకంలో సహజరాశిచక్రపు 3-9 ఇరుసులో బలమైన స్థితిలో ఉన్నాడు. రాహుదశ 1929 లో అంతమైంది. గురుదశ 1945 వరకూ నడిచింది. ఇందులోనే గురువుగా అవతారం ఎత్తాడు. శనిదశ 1964 వరకూ నడిచింది. కష్టపడి సామాన్యజనంలో ప్రచారంలోకి వచ్చాడు. బుధదశ 1981 వరకూ నడిచింది. ఇందులో మేధావులు, సైంటిష్టులు మొదలైనవాళ్లు ఆకర్షింపబడ్డారు. కేతుదశ 1988 వరకు జరిగింది. కేతువు రహస్యాలకు సూచకుడు గనుక, ఆశ్రమంలో ఏమి జరుగుతోందో ఈ దశలో ఎవరికీ తెలియలేదు. శుక్రదశ 2008 వరకు నడిచింది. ఇందులోనే 1993 సంఘటన జరిగింది. అనేక ఛండాలపు వివాదాలు, గొడవలు, పరువుపోవడం, విదేశీయులు బయటకు వెళ్లిపోవడం అన్నీ అందులోనే జరిగాయి. 2008 తరువాత ఇంటర్నెట్ అందుబాటులోకి రావడం మొదలైంది. వాస్తవాలు లోకానికి తెలియడం మొదలుపెట్టాయి. తరువాత 2011 లో బాబా మరణంవరకూ రవిదశ నడిచింది. అంటే, రాహుదశలో పుట్టిన బాబా రవిదశలో పోయాడు.

షష్ట్యంశ చక్రం

 

సూక్ష్మచక్రాలలో షష్ట్యంశ చాలా ముఖ్యమైనది. దీనిని ఇక్కడ ఇస్తున్నాను. దీని విశ్లేషణను నేను చేయదలుచుకోలేదు. మీరే చూచుకోండి.

బాబాను దైవాంశసంభూతుడని నమ్మేవాళ్ళూ, ఆయన సాక్షాత్తు దైవమే అని నమ్మేవాళ్ళూ నేటికీ వేలల్లో లక్షల్లో ఉన్నారు. అది వాళ్ళిష్టం. నాకా నమ్మకం లేదు. ఈయననేకాదు, షిరిడీసాయిబాబాను కూడా నేను నమ్మను. కనుక ఆ విషయం మీద నేనేమీ కామెంట్ చేయను. 

కానీ ఒక విషయం మాత్రం చెప్తాను. బాబా మహర్జాతకుడే. రాశిచక్రంలో గురువు నీచస్థితిలో ఉన్నట్లు కనిపించినప్పటికీ, సూక్ష్మచక్రమైన షష్ట్యంశలో మాత్రం ఉచ్ఛస్థితిలో ఉన్నాడు. శనిచంద్రులు కూడా ఉచ్ఛస్థితిలో ఉన్నారు. కనుక మహర్జాతకుడయ్యాడు. ప్రపంచవ్యాప్తంగా కోట్లాదిమందిని  కదిలించగలిగాడు.

అయితే, షష్ట్యంశచక్రంలో రాహుకేతువులు మరియు బుధుడు అదేసమయంలో నీచస్థితులలో ఉన్నారు. ఇది మంచిసూచన కాదు. వెలుగుపక్కనే నీడకూడా ఉందని ఈ గ్రహస్థితులు చూపిస్తున్నాయి. 

విషయం అర్ధమైనప్పటికీ, ఇంకా సంశయనివారణకోసం ఇంతకంటే సూక్ష్మచక్రాలను (150 నాడీఅంశ వరకూ) కూడా నేను  పరిశీలించాను. ఈ సూక్ష్మ జాతకపరిశీలన ద్వారా, బయటకు చెప్పలేని, చెప్పకూడని అనేక ఇతర అంశాలను నేను గ్రహించాను. వాటిని మాత్రం ఇక్కడే కాదు, ఎక్కడా బహిర్గతం చేయను. చేసినందువల్ల నేటి కలికాలంలో ఎలాంటి ఉపయోగమూ లేదు.

వివాదాస్పద అంశాలనూ, అసలైన ఆధ్యాత్మికతనూ పక్కన పెడితే, ఆయన పేరుమీద విద్యా, వైద్యరంగాలలోనూ, త్రాగునీరు అందించడంలోను, జరిగిన సేవాకార్యక్రమాలను మాత్రం, ఒక సామాన్యుడైతే ఎప్పటికీ చెయ్యలేడు. ప్రపంచదేశాలనూ, కోట్లాదిమంది ప్రజలనూ ఈ స్థాయిలో కదిలించలేడు. కనుక బాబా జాతకం బలమైనదే.

ఈయన పుట్టిన సమయం మాత్రం ఉదయం 5 గంటలని నేను నిర్ధారిస్తున్నాను.

read more " సత్యసాయిబాబా జాతక సవరణ - విశ్లేషణ "

పూర్ణాయుష్కుడు లాల్ కృష్ణ అద్వానీ

ఒక వ్యక్తి 66 ఏళ్ళనుండి 99 ఏళ్ల లోపు బ్రతికితే  దీర్ఘాయుష్కుడనీ, నూరుదాటి నూట ఇరవైవరకూ బ్రతికితే పూర్ణాయుష్కుడనీ జ్యోతిషశాస్త్రం అంటుంది. ఆ లెక్కన లాల్ కృష్ణ అద్వానీగారు పూర్ణాయుష్కుడే.

ఈయన 8 నవంబరు 1927 న, నాటి లాహోర్ లో పుట్టాడు. సమయం ఉదయం 9.27 గంటలు. తేదీలప్రకారం ఈరోజున 99 ఏళ్లను పూర్తిచేసుకుని 100 లో అడుగుపెట్టాడు. ఈయన జాతకంలోని పూర్ణాయుర్యోగాలను గమనిద్దాం.

కుజరాశిలో శనికేతువులుండటం తపస్వీయోగం. తపస్సనేది హిమాలయాలలోనే చేయనక్కరలేదు. ఒక గమ్యంకోసం తపిస్తూ బ్రతికేది ఏదైనా తపస్సే అవుతుంది. తపించడమే తపస్సని జిల్లెళ్ళమూడి అమ్మగారనేవారు. భారతదేశాన్ని ఉన్నతమైన స్థానంలో చూడాలని తపించిన దేశభక్తుడీయన. కనుక ఈయనయొక్క జాతకంలో ఈ యోగం ఉండటం వింత ఏముంటుంది?

ఈ యోగం క్రమశిక్షణను ఇస్తుంది. ఇది ఉన్నవాడు జీవితాన్ని చాలా క్రమబద్ధమైన విధానంలో జీవిస్తాడు. ఆహారవిహారాలలో జాగ్రత్తగా ఉంటాడు. కనుక ఎక్కువకాలంపాటు బ్రతుకుతాడు. శని లగ్నంలో ఉన్నవాడు క్రమశిక్షణతోనే జీవిస్తాడు. పైగా శనికి తృతీయాధిపత్యం కూడా పట్టింది. తృతీయం ఆయుస్థానాలలో ఒకటని మనకు తెలుసు.

ఆఫ్కోర్స్, ఆయుష్షనేది చాలావరకూ జీన్స్ మీద ఆధారపడి ఉంటుంది. కానీ, క్రమశిక్షణాయుతమైన జీవితంతో జీన్స్ ను కూడా మార్చుకోవచ్చు. ఇది కష్టమేగాని, అసాధ్యమేమీ కాదు.

తపస్వియోగంపైన గురుదృష్టి చాలామంచిది. ఇది మార్గంలోని అడ్డంకులను తొలగిస్తుంది. గురువక్రత్వం వల్ల  ఆయనయొక్క పంచమదృష్టి మిథునంపైన పడుతుంది. ఇది లగ్నం నుండి అష్టమభావమౌతుంది. అష్టమభావం ఆయుస్థానం గనుక, దీర్ఘాయుష్షు లభిస్తుంది.

ఈయనది అశ్వినీనక్షత్రం రెండవపాదం. దేవవైద్యుల నక్షత్రం గనుక, ఏదైనా అనారోగ్యం కలిగినప్పటికీ త్వరగా తేరుకునే శక్తిని ఈ నక్షత్రం ఇస్తుంది.

రవిశుక్రులు నీచస్తితులలో ఉన్నట్లు కనిపిస్తున్నప్పటికీ, లగ్నంలో శనివల్ల రవికి, చంద్రునికి సప్తమంలో బుధునివల్ల శుక్రునికీ నీచత్వంపోయి రాజయోగంగా మారుతుంది.

చంద్రునినుండి తృతీయాధిపతి బుధుడు సప్తమకేంద్రంలో ఉండటంచేత, వక్రతవల్ల ఉచ్ఛస్థితి పట్టడంచేత ఆయుష్షుకు బలం కలిగింది. అష్టమంలోని తపస్వీయోగం ఆయుష్షును పెంచుతుంది. అష్టమశని దీర్గాయుష్షునిస్తాడు.

సూర్యునినుండి తృతీయాధిపతి గురువు స్వస్థానంలో ఉన్నాడు. వక్రత్వం వల్ల కలిగే పంచమస్థితి గురుదృష్టిని సూర్యునిపైన ఉంచుతుంది. దీనివల్ల కూడా ఆయుష్షు  పెరుగుతుంది. నవమాధిపతి బుధుని లగ్నస్థితి మంచిది. వక్రత్వం వల్ల ద్వాదశభావంలో ఉచ్ఛస్థితి లభిస్తుంది. తులాలగ్నానికి ద్వాదశభావం మంచిదే. లగ్న/అష్టమాధిపతి శుక్రునికి ద్వాదశంలో ఉచ్ఛత్వం కూడా మంచిదే. అష్టమంలో రాహువుయొక్క ఉచ్ఛస్థితి ఆయుష్షుకు మంచిది.

ఆరూఢలగ్నం కన్య అవుతుంది. దానినుండి తృతీయంలో తపస్వియోగం ఉన్నది. అష్టమంలో పూర్ణచంద్రుడున్నాడు. కనుక ఇక్కడనుండి కూడా ఈ రెండుభావాలూ బలంగా ఉన్నాయి.

దీనికితోడుగా నవాంశచక్రంలో  సూర్యుడు, చంద్రుడు, గురువు ముగ్గురూ ఉచ్ఛస్థితులలో ఉన్నారు.

ఇన్ని గ్రహస్థితులు ఈయన ఆరోగ్యాన్నీ, ఆయుష్షునూ భద్రంగా చూస్తున్నాయి. కనుక విజయవంతంగా 99 ఏళ్లను పూర్తిచేసుకుని 100 వ ఏడులోకి అడుగుపెట్టాడు.

రాజకీయాలలో ఉంటూ నిండునూరేళ్ళు ఆరోగ్యంగా బ్రతకడం చాలా కష్టం. దానికెంతో క్రమశిక్షణతో కూడిన జీవితమూ, దైవానుగ్రహమూ ఉండాలి. అవి రెండూ ఈయనకున్నాయని ఈ జాతకయోగాలు చెబుతున్నాయి.

మోదీగారు అద్వానీగారి శిష్యుడే. ఆయనతో కలసి పనిచేసిన అనుచరుడే. తమ తరంవారు కలలుగన్న భారతదేశాన్ని, తన శిష్యుని నాయకత్వంలో అన్నిరంగాలలో ముందుకు దూసుకుపోతున్న భారతదేశాన్ని చూచి కనీసం తన జీవితం చివరిదశలోనైనా, తృప్తిపడగలగడం అద్వానీగారి జాతకంలోని అదృష్టం.

మనదేశం ఎన్నో ఒడిదుడుకులను, గాంధీనెహ్రూల కాలంనాటి కుట్రలను, కుతంత్రాలను తట్టుకుంటూ, ఏ విధంగా వాటిని దాటుకుంటూ ఈ స్థితికి వచ్చిందో, ఈ క్రమంలో ఎంతమంది సమిధలై చరిత్రపుటలలో కలసిపోయారో గత ఎనభైఏళ్లుగా చూస్తూ వచ్చిన ఇలాంటి కురువృద్ధులు తమ జ్ఞాపకాలను, అనుభవాలను అక్షరబద్ధం చేయాలి. 

2008 లో విడుదలైన ఈయన ఆత్మకథ My country, My life నేను చదవలేదు. చూడాలి ఏం వ్రాశాడో !

read more " పూర్ణాయుష్కుడు లాల్ కృష్ణ అద్వానీ "

ఉపవాసాలతో చనిపోతే జీసస్ కనిపిస్తాడా? సో వాట్?

వెర్రితలలేసే క్రైస్తవప్రచారాలు  ఎలాంటి దారుణమైన రూపాలు తీసుకుంటాయనేదానికి కెన్యా పాస్టర్ పాల్ మెకంజీ  కేసు ఒక ఉదాహరణ. 

మొన్న 6 వ తేదీన కెన్యా కోర్టు ఇతనికి 200 ఏళ్ల జైలుశిక్ష వేసింది. 28 మంది ఇతని అనుచరులకు కూడా శిక్షలు పడ్డాయి. నేరం? తిండిపెట్టకుండా మాడ్చి, హింసించి, 440 మందిని వీళ్ళు చంపేశారు. వాళ్లంతా ఎవరు? పాపం అమాయక క్రైస్తవభక్తులు. వాళ్లలో 190 మంది చిన్నచిన్న పిల్లలే. 

ఎందుకలా చేశాడు? అలా చనిపోతే స్వర్గానికి పోతారని, జీసస్ ను కలవొచ్చని తన చర్చిలో చేసిన బోధలతో జనాన్ని నమ్మించాడు. పిచ్చిజనం నమ్మారు. చచ్చారు. తవ్వితే ఆ శవాలన్నీ బయటపడ్డాయి. వాళ్లలో కొంతమందిని బ్రతికుండగానే పూడ్చేసినట్లు ఆధారాలు దొరికాయి.

కెన్యాలో పేదరికం ఎక్కువ. ఇతను పెద్దగా చదువుకోలేదు. బాల్యం బాధాకరంగా గడిచింది.  టాక్సీ డ్రైవర్ అయ్యాడు. ఆ కసితో విద్యావ్యవస్థపైనా, వైద్యంపైనా, విదేశీ సంస్కృతిపైనా ద్వేషం పెంచుకున్నాడు. ఒకరకంగా సైకో అయ్యాడు. తన టాక్సీలో ఎక్కిన ప్యాసింజర్లతో మాటలు కలిపి బోధలు చేసేవాడు.

మెల్లిగా ఒక చర్చి పెట్టాడు. దానిపేరు 'గుడ్ న్యూస్ ఇంటర్నేషనల్ చర్చ్'. విదేశీ (బ్రిటిష్, అమెరికా) సంస్కృతిని, వాళ్ళ విద్యా వైద్యవిధానాలను వ్యతిరేకించేవాడు. చదువుకోవద్దని, ఇంగ్లీషు మందులు వాడద్దని ప్రచారం చేసేవాడు. అయితే, విదేశాలలో పుట్టిన క్రైస్తవమతాన్ని మాత్రం స్వీకరించాడు. క్రమేణా వేలాదిమంది అనుచరులు పోగయ్యారు. సొంత టీవీ ఛానల్ పెట్టాడు. 2019 లో ఇతనిపైన ఫిర్యాదులు వెల్లువెత్తాయి. పోలీసులు ఆ చర్చిని మూయించారు.

షకహోలా అనే ఒక అడవిలోకి మకాం మార్చాడు. అందులో 800 ఎకరాలను ఆక్రమించాడు. అక్కడే తన చర్చిని నడిపేవాడు. ప్రయివేట్ ఆర్మీలాంటి దానిని ఏర్పాటు చేసుకున్నాడు.వందలాది గుడిసెలను నిర్మించాడు.

బోధించి, భయపెట్టి, కొట్టి, తన అనుచరులను వారి పిల్లలను వాటిలో బంధించేవాడు. అదొక కాన్సెన్ట్రేషన్ క్యాంప్ లాంటిది. మోడ్రన్ లైఫ్ అంతా సైతాన్ మాయ అనీ, దానినుంచి బయటపడి ఉపవాసప్రార్ధనలు చేస్తూ చనిపోవడం ఒక్కటే జీసస్ ను చేరుకోవడానికి మార్గమని భోధించేవాడు. నెలల తరబడి ఆ ఉపవాసాలు తట్టుకోలేక తన చర్చి ఆవరణలోనుంచి పారిపోవాలని ప్రయత్నించిన పెద్దలను, పిల్లలను, తన అనుచరులతో కొట్టించి, వారిని చంపేసి అక్కడే పూడ్చేసేవాడు. అలాంటి శవాలు 500 పైనే ఉన్నాయని అంటున్నారు. 440 ఇప్పటికి బయటపడ్డాయి.

ఏప్రిల్ 2023 లో విచారణ మొదలైంది. 2026 లో తీర్పు వచ్చింది.

కెన్యాలోనే  కాదు. మనదేశంలో కూడా ఇటువంటి అబద్ధప్రచారాలతో అమాయకులను నమ్మించి మతాలు మారుస్తున్న పాస్టర్లు చాలామంది ఉన్నారు. అయితే, ఈ లెవల్లో ఉపవాసప్రార్ధనలు చేసి చనిపొమ్మని వాళ్ళు చెప్పకపోవచ్చు. కానీ, రకరకాల ఆశలు చూపి, హిందూమతమంటే ద్వేషం ఎక్కించి, మతం మారుస్తున్నారు. ఇదొక పెద్ద లాభసాటి వ్యాపారమై పోయింది. పిచ్చిజనం మోసపోతున్నారు.

ఇతను పుట్టినది 1973 లేదా 1976 అని నెట్ చెబుతోంది. సరియైన జననవివరాలు లేవు.  అది 1973 అని నేనంటాను. కారణం? 1973 లో మాత్రమే అటువంటి నరరూపరాక్షస యోగం ఉంది. చార్టు పైనిచ్చాను చూడండి.

రాహుకేతువులు, గురువు నీచస్థితులలో ఉన్నారు. వక్రగురువుకు గురుఛండాలయోగం పట్టింది. శనికేతుయోగం ఉంది. కుజగురురాశుల సంబంధం ఉన్న కుజునికి, ఉచ్ఛబుధునితో దృష్టి ఉండటం వల్ల మొండితనం, పాస్టర్ వేషం, అతితెలివీ ఏర్పడ్డాయి. ఈ యోగాలు 1976 లో లేవు.  కనుక, ఇతను పుట్టినది 1973 లో మాత్రమే.

14 ఏప్రిల్ 2023 న ఇతను అరెస్టయ్యాడు. సరిగ్గా అది మేషసంక్రాంతి సమయం అయింది. గోచార శనిగురువుల దృష్టి రహస్యాలకు నెలవైన వృశ్చికంపైన ఉంది. అందుకే ఇతని రహస్యాలన్నీ ఆనాడు బయటపడ్డాయి. మూడేళ్ళ విచారణ తర్వాత ఇప్పుడు శిక్ష పడింది.

ఇండియాక్రైస్తవులు, కమ్యూనిస్టులు, కాంగ్రెసువారు ఇలాంటి న్యూసుల గురించి మాట్లాడరు. పేపర్లు కూడా మాట్లాడవు. బ్రాహ్మణులు గుళ్ళలో రేపులు చేస్తున్నారని నేహాబోరా అంటే, పేపర్లన్నీ దాన్ని మొదటిపేజీలో వేస్తాయి. ఇలాంటి వార్తలకు మాత్రం ప్రచారం ఉండదు. ఆమె ఎన్ని రేపులను దగ్గరుండి చూసిందో పాపం ! లేదా బాధితురాలేమో !

ఒకవేళ ఎక్కడైనా ఎవడో ఒక పూజారి అలాంటిపనిని చేస్తే, హిందువులు అతన్నేమీ క్షమించరు. వాళ్లే శిక్షిస్తారు. లేదా, శిక్ష పడాలని నిస్పక్షపాతంగా కోరుకుంటారు. అంతేగానీ, క్రైస్తవులు ముస్లిములు చేసేటట్లుగా అటువంటివాడిని నిస్సిగ్గుగా వెనకేసుకురారు. సమర్ధించరు.

అసలు, క్రైస్తవం, ఇస్లాం బోధించే స్వర్గమూ నరకమూ రెండూ అబద్దాలే. అవి లేవు. వాటి పేరుతో అమాయకులను భయపెట్టి మోసం చేస్తున్నారు. అంతే!

అదేవిధంగా, జీసస్ రెండవరాకడ కూడా అబద్దమే. అది జరగదు. కొన్ని ఇస్లాం శాఖలలో చెప్పేటట్లు 'మెహదీ' మళ్ళీ వస్తాడనే భావన కూడా అబద్దమే. అంతిమతీర్పు అనేది లేనేలేదు. అది అబ్రహామిక్ మతాల మాయ. అదీ అబద్దమే. 

సరే వాళ్ళ అబద్దాలను వాళ్ళు చెప్పుకోనివ్వండి. కానీ ఇతర మతాలపైన, ముఖ్యంగా హిందూమతం పైన, బురదజల్లడం, ద్వేషం రెచ్చగొట్టడం మాత్రం తప్పులే.

స్వర్గనరకాలనేవి పెద్దభ్రమలని  ఉపనిషత్తులలోని వేదాంతభావనలంటాయి. అందుకే నేనంటాను, వేదాంతాన్ని అధ్యయనం చేస్తేనే, అసలైన హిందూమతమేమిటో అర్ధమౌతుందని. పురాణాలను పట్టుకొని కూచుంటే అదెప్పటికీ అర్ధం కాదు. వేదాంతపు కోణం నుండి పురాణాలను చదివినపుడు మాత్రమే అసలైన హిందూమత స్వరూపస్వభావాలు అర్ధమౌతాయి. 

కానీ నేడు ఏ హిందూమత బోధకులూ దీనిని చెప్పడం లేదు. ఉత్తపురాణాలను బోధిస్తున్నారు. వాటిని పట్టుకొని అవే సర్వస్వమైనట్లు జనం  కొట్టుకుంటున్నారు.

సరిగ్గా చెప్పేవారూ లేరు. చెప్పినా వినేవారూ లేరు. అదే మనకు పట్టిన దరిద్రం.

పాల్ మెకంజీ లాంటివాళ్లు చరిత్రలో చాలామందున్నప్పటికీ, అమ్ముడుపోయిన మీడియా, ఇలాంటి న్యూసులకు అంత ప్రాధాన్యతనివ్వదు. ఇస్తే, జార్జి సోరోస్ ఇచ్చే డబ్బులు ఆగిపోతాయి కదా !

క్రైస్తవం నూరిపోస్తున్న ఇలాంటి అబద్ధాలతో ఎంతమంది ఈ విధంగా భ్రమలలో పడిపోతున్నారో మరి? అసలూ, అంతమంది తనను నమ్మిన అమాయకులు అలా దారుణంగా చంపబడుతుంటే, జీసస్ ఏం  చేస్తున్నాడు? మెకంజీకి దర్శనమిచ్చి "ఒరే  అలా  చెయ్యకురా. తప్పురా" అని చెప్పాలి కదా? మరెందుకు చెప్పలేదో?

బైబిలు అబద్ధాలనూ, పాస్టర్ల అబద్ధాలనూ నమ్ముతున్న అమాయక క్రైస్తవులను ఆ జీససే రక్షించాలి. ఆయనంటూ అసలెక్కడైనా ఉంటే !

read more " ఉపవాసాలతో చనిపోతే జీసస్ కనిపిస్తాడా? సో వాట్? "

ఇజ్రాయెల్ కు ఏం కాబోతోంది?

ఇజ్రాయెల్ ఎన్నికలయ్యాయి.  ఈ దేశ భవిష్యత్తు ఎలా ఉందో చూద్దాం.

రాజకీయ విశ్లేషణ

ప్రస్తుతం ఇజ్రాయెల్ లో 38 పార్టీలున్నాయి. అన్నీ ఎన్నికలలో పాల్గొన్నప్పటికీ, 11 పార్టీలు మాత్రమే చట్టసభలో అడుగుపెట్టగలిగే ఓట్లసంఖ్యను పొందాయి. 

చట్టసభలో 120 సీట్లున్నాయి. వాటిలో నెతన్యాహు కూటమికి 53, ప్రతిపక్షానికి 48, అరబ్ పార్టీలకు 19 సీట్లొచ్చాయి. నెతన్యాహు కూటమిలో 5 మిత్రపక్షపార్టీలున్నాయి.

విచిత్రమేంటంటే ప్రతిపక్షం కూడా యూదులదే. నేషనల్, లిబరల్ అని అధికార, ప్రతిపక్ష యూదు పార్టీలను అనుకోవచ్చు. నేషనల్ భావజాలం ఉన్న నెతన్యాహు కూటమేమో, ఇజ్రాయెల్ యూదుల దేశమని, అయితే అరబ్బులు, క్రైస్తవులు మొదలైనవారు శాంతియుతంగా, కొన్ని హద్దులకు లోబడి ఉండవచ్చని అంటుంది. ప్రతిపక్ష యూదులేమో అరబ్బులను ఇతరులను కూడా ఉండనివ్వాలని, అయితే వారికి హద్దులు పెట్టకూడదని అంటారు. 

ఈ రెండువర్గాలుగా విడిపోవడమే యూదులు చేస్తున్న అతిపెద్ద తప్పు. కలిసి ఒకేమాటమీద ఉంటే వీళ్లకు మొత్తం 101 సీట్లొచ్చేవి. చీలడం వల్ల, ప్రభుత్వాన్ని ఏర్పాటుచేసేంత మెజారిటీ (61 సీట్లు) ఎవరికీ రాలేదు. ఈ క్రమంలో  వీరి విపక్షమైన అరబ్బులు బలపడుతున్నారు.

మనదేశంలో హిందువులు చేస్తున్న తప్పునే, ఇజ్రాయెల్ లో యూదులు చేస్తున్నారు. అందుకే ఇండియా, ఇజ్రాయెల్ రెండూ ఒకేబాటలో నడుస్తున్నాయి. రెండింటి భవిష్యత్తూ గందరగోళమే.

ఐకమత్యం లేకపోవడమే యూదులకూ హిందువులకూ గల ప్రధానమైన లోపం. అదే వారి శాపం కూడా.

ఇది రాజకీయ విశ్లేషణ. ఇప్పుడు, జ్యోతిషశాస్త్ర పరంగా గమనిద్దాం.

జ్యోతిష విశ్లేషణ

ఇజ్రాయెల్ కు 14-5-1948 న స్వాతంత్రం వచ్చింది. సమయం సాయంత్రం 3. 50. ఇప్పుడు జాతకాన్ని పరిశీలిద్దాం.

ఈ జాతకంలో పాక్షిక కాలగ్రస్తయోగం, మాలికాయోగం, నిత్యఏడుపు యోగం, ఎండ్రకాయ యోగాలున్నాయి. మొదటి రెండూ సరే, చివరి రెండూ ఏమిటని మీకు సందేహం రావచ్చు. సంస్కృతపదాలైతే మీకు అర్ధంకావడం కష్టమని, తేలికగా ఉండాలని, మీ సౌలభ్యం కోసం  వాటిని నేనే పెట్టాను.

ఎప్పుడూ ఏదో సమస్యతో ఏడుస్తూ ఉండేది నిత్యఏడుపు యోగం. ఒకడు ఎదుగుతుంటే, పదిమంది కలిసి వాడిని క్రిందకు లాగేది ఎండ్రకాయయోగం. బాగున్నాయి కదా ! ఎంతసేపూ గ్రంధాలలో ఉన్న పదాలనే వాడితే ఎలా? మనమూ కొన్ని సృష్టించాలిగా ! 

పోతే, సూర్యుడు బలహీనుడు. గురుబలం లేదు. చంద్రబలం లేదు.

శత్రువులు మిత్రులలాగా నటిస్తూ వెన్నుపోటు  పొడుస్తారు. ఆపదలమధ్యన దారులు వెతుక్కుంటూ బ్రతుకుతారు. 'దినదినగండం నూరేళ్లాయుష్షు' అనే సామెత సరిగ్గా సరిపోతుంది. అంత గొప్ప జాతకమేమీ కాదు.

నవాంశ చక్రాన్ని గమనిద్దాం.

ఇంటిదొంగలతో, వాళ్ళ కుట్రలతో ప్రమాదం ఉంటుంది. ఏది చేయాలన్నా అనేకవర్గాలనుండి ప్రతిఘటన ఉంటుంది. కొన్ని దూరదేశాల పైన ఆధారపడి ఈ దేశం ఎక్కువగా నడుస్తుంది.

ప్రస్తుతం ఇజ్రాయెల్ దేశానికి రాహు మహర్దశ నడుస్తున్నది. ఇది 2022 లో మొదలై, 2040 వరకూ ఉంటుంది. ఇది మంచిదశ కాదు. యుద్ధాలు, కష్టనష్టాలతో కూడి నడుస్తుంది.

ఈ దశలో, 2025-27 మధ్యలో రాహు-గురుదశ నడుస్తుంది. ఇదే సమయంలో, గోచార యురేనస్, 9వ భావంలోని బలహీన సూర్యుడు, బుధులపైన సంచరిస్తున్నాడు. కనుక ఇతరదేశాల జోక్యాలు, కుట్రలు, మన దేశంపైన ఉన్నట్లే, ఈ దేశంపైన కూడా చాలా ఉన్నాయి. ఈ సమయంలో నమ్మకద్రోహాలు, వెన్నుపోట్లు ఉంటాయి. ప్రస్తుతం జరుగుతున్నది అదే. నమ్మకద్రోహాలు, కుట్రలవల్లనే ఈ ఎన్నికలలో అరబ్ పార్టీలు డిసైడింగ్ ఫేక్టర్స్ గా అవతరించాయి.

ఎవరికైతే మనమంటే పడదో,  ఎవరైతే మనల్ని ద్వేషిస్తున్నారో, వాళ్లనే తెచ్చుకుని ఇంట్లో పెట్టుకుంటే ఏమౌతుంది? అదే ప్రస్తుతం అక్కడ  జరుగుతోంది. ముందుముందు ఇక్కడా జరుగుతుంది.

2027-30 మధ్యలో రాహు-శనిదశ నడుస్తుంది. ఈ దశలో ఇజ్రాయెల్ చాలా నష్టపోతుంది. గందరగోళం ఎక్కువౌతుంది. అల్లర్లు, కష్టనష్టాలు, సంక్షోభం ఎదురౌతాయి. 

2030 తర్వాత వచ్చే బుధదశలో, ఇతరదేశాల సహాయంతో మాత్రమే ఈ సంక్షోభం నుండి ఇజ్రాయెల్ గట్టెక్కుతుంది.

ప్రస్తుతానికి మాత్రం ఇజ్రాయెల్ పరిస్థితి ఏమీ బాగాలేదు. భవిష్యత్తుకూడా, 2030 వరకూ అస్సలు బాలేదు.

యహోవానే ఈ దేశాన్ని రక్షించాలి !

read more " ఇజ్రాయెల్ కు ఏం కాబోతోంది? "

నేను చెబుతున్నది నిజమా కాదా?

ఏ రాశికైనా, మొదటి డిగ్రీ మరియు చివరి డిగ్రీ చాలా ప్రమాదకరమైనవి. ఏమంటే, గ్రహాలు రాశులు మారేసమయంలో వాటివాటి ప్రభావాలను హఠాత్తుగా చూపిస్తాయి. దానినే సంధ్యాప్రభావమంటారు. అవి రాశిసంధులైతే (కర్కాటక సింహాలు, వృశ్చిక ధనుస్సులు, మీనమేషాలు) ఆ ప్రభావాలు చాలా తీవ్రంగా ఉంటాయి.

గురువు కర్కాటకాన్ని వదలిన మరుక్షణం ఆయనిస్తున్న రక్షణ మాయమౌతుందని మొన్ననే వ్రాశాను. గురునిష్క్రమణ తరువాత ఏమౌతుంది? నీచకుజుడు తన ప్రభావాన్ని వెంటనే చూపడం మొదలుపెడతాడు. అదే ఇప్పుడు జరిగింది.

నిన్న బెంగుళూరులో ఒక వింత సంఘటన జరిగింది. కాన్రాడ్ అనేది ఒక పెద్ద ఫైవ్ స్టార్ హోటల్. నిన్న సాయంత్రం హోళసూరులో ఉన్న ఆ హోటల్ మూడో అంతస్తులో,  స్విమ్మింగ్ పూల్ లో ఒక జర్మన్, ఒక స్లొవేకియన్ ఈత కొడుతున్నారు. జర్మనేమో లుఫ్తాన్సా  విమానంలో క్రూ ఉద్యోగి. స్లొవేకియనేమో ఇక్కడి IBM కంపెనీలో సీనియర్ ఉద్యోగి. ఏమైందో ఏమోగాని, స్విమ్మింగ్ పూల్లోకి విద్యుత్తు లీకైంది. ఈతకొడుతున్న ఇద్దరూ స్విమ్మింగ్ పూల్లోనే చనిపోయారు. వాళ్ళను రక్షించాలని ఒక అమెరికను, ఒక ఇండియన్ (అదే హోటల్ ఉద్యోగి) ప్రయత్నించి వాళ్ళు కూడా షాకులు తిన్నారు. అయితే, వెంటనే ఆస్పత్రిలో చేర్చడంతో వాళ్ళు బ్రతికి బయటపడ్డారు.

రక్షించాలని చూసినవాళ్లు పూల్  లోకి దూకి ఉండరు. బయటనుంచి ఏదో అందించాలని ప్రయత్నించి ఉండవచ్చు. అందుకే షాకులతో బయటపడ్డారు. లోపలికి దూకి ఉంటే, వీళ్ళు కూడా హరీమనేవారు. 

విద్యుత్తు ప్రమాదాలకు కుజుడు కారకుడని జ్యోతిషవిద్యార్థులకు తెలిసినదే. కర్కాటకరాశి జలతత్త్వరాశి. అది నీటిమడుగులకు, కొలనులకు, సరస్సులకు సూచిక.

ఇప్పుడర్థమైందా మరి !

ఎప్పుడైతే రక్షణకవచంగా ఉన్న గురువుయొక్క శక్తి పక్కకు తప్పుకోవడం మొదలైందో, కుజుని విధ్వంసకశక్తి వెంటనే పనిచేయడం మొదలుపెట్టింది. ఈ సంఘటన వెనుకనున్నదేమిటో స్పష్టంగా కనిపిస్తోందా లేదా?

ఇదే విధంగా మీమీ జీవితాలలో కూడా చూచుకోండి. ఇళ్లలో, ఆఫీసులలో, కరెంటు సమస్యలు రావడం, విద్యుత్తు ఆధారంగా నడిచే హీటర్లు, గీజర్లు, ఏసీలు, టీవీలు, లాప్టాపులు, మొబైళ్ళు పాడవడం, మొరాయించడం ఖచ్చితంగా జరిగి ఉంటాయి.

గురువు ప్రక్కకు తప్పుకున్నాడు. ఇంకా పదిరోజులపాటు కుజుడు కర్కాటకంలోనే ఉంటాడు. ఈ గ్రహస్థితి ఇంకా పదిరోజులపాటు ఉంటూనే  ఉంటుంది. మధ్యలో నవంబరు 8 న దీపావళి అమావాస్య వస్తున్నది. ఖచ్చితంగా 6 నుండి 10 లోపు చాలా జరుగుతాయి. పెద్దవే జరుగుతాయి. 

వేచిచూడండి. మరిన్ని న్యూసులు వినడానికి !

మానవజీవితంపైన గ్రహప్రభావమనేది రేపటి సూర్యోదయమంత నిజం !

read more " నేను చెబుతున్నది నిజమా కాదా? "

గురుగోచారం - నవంబర్ 2026 నుండి జనవరి 2027 వరకు

ఈరోజు మధ్యాహ్నం గురువు సింహరాశిలో ప్రవేశిస్తున్నాడు.

కర్కాటకంలోని ఉచ్ఛస్థితి ఇంకా కొన్ని నెలలున్నప్పటికీ, అతిచారం వల్ల రెండున్నర నెలలపాటు సింహరాశిలోకి పోయి, మళ్ళీ వెనుకకు కర్కాటకంలోకి వస్తాడు. ఆ నడకలు క్రింది విధంగా ఉంటాయి.

నేటినుంచి 12 నవంబర్ వరకు అతిచారం; ఆపైన 19 నవంబర్ వరకు సహజగమనం; 19 నవంబర్ నుండి 26 వరకు మందగమనం; 26 నుండి 31 వరకు అతిమందగమనం; డిసెంబర్ 11 నుండి 13 వరకూ స్థంభన; డిసెంబర్ 13 నుండి వక్రత్వం; జనవరి 12 నుండి వక్రంలో అతిచారం; జనవరి 25 న మళ్ళీ కర్కాటకరాశిలోకి ప్రవేశం.

ఈ విధంగా గురుగోచారం ఉంటుంది.

పైన చెప్పిన ప్రతి పొద్దెడంలోనూ మానవుల జీవితాలలోనూ, దేశరాజకీయాలలోనూ, ప్రకృతిలోనూ చాలా మార్పులుంటాయి. అవన్నీ నేనేకరువు పెట్టను. మానవజీవితానికీ గ్రహచలనానికీ సూటి సంబంధం ఉన్నదని చెప్పడం మాత్రమే నా ఉద్దేశం.

మనదేశంలో గత రెండు మూడు నెలలుగా జరుగుతున్న గందరగోళాలు, యూరోపు మరియు మిడిల్ ఈస్ట్ పరిస్థితులు, అమెరికా, ఆగ్నేయాసియా పరిస్థితులలో ఈ మూడునెలలలో రాబోతున్న విచిత్రమైన మార్పులను గమనించండి. మీకే అర్ధమౌతుంది.

ఒక్క గురువు యొక్క గమనాన్ని మాత్రమే నేనిక్కడ వివరించాను. ఇదేవిధంగా, మిగిలిన పదకొండు గ్రహాల నడకలలోని తేడాలను కూడా అర్ధం చేసుకుంటే, ఒక సాలెగూడులాంటి గ్రిడ్ ఏర్పడుతుంది. అది ప్రతిరోజూ, ఇంకా చెప్పాలంటే ప్రతిక్షణమూ మారిపోతూ ఉంటుంది. దాని తీరుతెన్నులు బాగా అర్ధమైతే, మానవజీవితాలలోని లోతుపాతులు తెలుస్తాయి. కర్మరహస్యాలు అర్ధమౌతాయి. ఎవరి జీవితం ఎందుకిలా నడుస్తున్నదో,  భూమ్మీద ఎందుకేది ఎలా నడుస్తున్నదో తెలుస్తుంది. అప్పుడు మాత్రమే జ్యోతిషానికీ, ఆధ్యాత్మికానికీ ఉన్న అవినాభావ సంబంధం అర్ధమౌతుంది.

ఆ విధంగా అర్ధం చేసుకున్నప్పటికీ, చలించకుండా అన్నింటినీ పరిశీలిస్తూ మౌనంగా ఉండేవాడిని మాత్రమే "దైవజ్ఞుడు" అనాలి. అంతేగాని, డబ్బుకు ఆశపడుతూ, అడిగినవారిని మోసం చేస్తూ, ఉన్నవీ లేనివీ అబద్దపు రెమెడీలను చెప్పేవారిని ఆ పేరుతో పిలవకూడదు. కానీ పిలుస్తున్నారు. నేడు ప్రతి గొందిలోనూ అటువంటి దైవజ్ఞులు పదిమంది  మీకు కనిపిస్తారు. అదే కలియుగలక్షణం !

పై కోణాలలో నేటినుంచి గురుగోచారాన్ని గమనించండి. అద్భుతమైన అనేకవిషయాలు మీకర్ధమౌతాయి.

read more " గురుగోచారం - నవంబర్ 2026 నుండి జనవరి 2027 వరకు "

బెంగుళూరు యూజీ గ్రూపుతో సమావేశం

నిన్న ఇక్కడున్న  యూజీ గ్రూపుతో I.I.W.C (ఇండియన్ ఇన్స్టిట్యూట్ ఆఫ్ వరల్డ్ కల్చర్) అనేచోట సమావేశం కావడం జరిగింది.

యూజీగారికి బెంగుళూరుతో ఉన్న అనుబంధం గురించి ఆయన జీవితాన్ని చదివినవారికి సుపరిచితమే.

దశాబ్దాలుగా ఆయనను అభిమానిస్తున్నవారు చాలామంది ఇక్కడున్నారు. వారిలో ఆయనను చూచినవారు కలిసినవారు దగ్గరగా మసలినవారు చాలామంది ఉన్నారు. ఒకవిధంగా, వాళ్ళందరూ ఆయన స్మృతులలో బ్రతుకుతున్న భగ్నప్రేమికులు. వాళ్ళను యూజీగారి స్మృతులలో ముంచుతున్నదీ, ఉంచుతున్నదీ వాళ్ళ నాయకుడు చంద్రశేఖరబాబు గారు.

ఆయన యొక్క పురాతనమైన స్మృతిభాండాగారాన్ని తెరచి ఎప్పుడో జరిగిపోయిన సంగతులను కళ్ళకు కట్టినట్లుగా ఆయన చెబుతుంటే, ఆ కాలానికి వెళ్ళిపోయి, ఆ సంఘటనలను నేను కూడా దగ్గరుండి చూస్తున్న అనుభూతి కలిగింది. ఆయనను కలుసుకున్న ప్రతిసారీ మహేంద్రనాధగుప్త గారిని కలుసుకోలేకపోయానన్న నా బాధ కొద్దిగానైనా తీరిపోతూ ఉంటుంది. 

యూజీ వంటి ఒక జీవన్ముక్తుడినీ, అమనస్కస్థితిని పొందిన మహనీయుడినీ, లేదా ఆయన మాటలలోనే చెప్పాలంటే, ఒక 'సహజమానవుడి'నీ కలుసుకుని, ఆ రుచిని ఒక్కసారైనా ఆస్వాదించినవాళ్లు, ఆపైన ఆయనను మరచిపోవడం అసాధ్యమౌతుంది - వాళ్ళ హృదయపు యాంటెనాలు సరిగ్గా ఉంటే !

ఆయన గతించిన 20 ఏళ్ల తర్వాత నేటికి కూడా ఆయనను మరచిపోలేక, ఆయన స్మృతులను నెమరువేసుకుంటూ జీవిస్తున్న ఈ గ్రూపును కలుసుకోవడం నాకు సంతోషాన్నిచ్చింది.

రామకృష్ణులు గతించి 140 ఏళ్ళైనా ఇప్పటికీ ఆయన స్మృతులలోనే జీవిస్తున్న పిచ్చివాళ్ళు లేరూ? అలాంటివాళ్లే వీళ్ళు కూడా !

మంచిమనుషులనేవాళ్ళు కనపడడమే అరుదైపోతున్న ఈ రోజులలో కొంతమందినైనా ఒకేచోట కలవడం చాలా బాగా అనిపించింది.

యూజీ గారు పొందిన స్థితీ, చెప్పిన మాటలూ, వీళ్లకు పూర్తిగా అర్ధం కాకపోవచ్చు. ఆయనలో ఎన్నో పరస్పర విరుద్ధమైన విషయాలు వీరికి గోచరిస్తూ ఉండవచ్చు. వాటికీ, మన శాస్త్రాలలో చెప్పబడిన సాంకేతికభాషకూ పొంతన కుదరకపోతూ ఉండవచ్చు, వీళ్లకు తోచినట్లుగా వీళ్ళు అన్వయించుకుని సంతృప్తిపడుతూ ఉండవచ్చు,  కానీ వీళ్ళందరూ నిస్సందేహంగా ఆయనను ప్రేమిస్తున్నారు. అది చాలు. ఒకనాటికి వీళ్ళుకూడా అక్కడకు చేరుకుంటారు.

ఆ చర్చలో నేనేమీ పెద్దగా పాలుపంచుకోలేదు. మధ్యమధ్యలో  ఒకటి రెండు మాటలను మాట్లాడినప్పటికీ, చాలావరకూ మౌనంగానే వాళ్ళ చర్చను విన్నాను. వాళ్ళ వెదుకులాట నాకు ముచ్చటేసింది.

వాళ్లలో చాలామందికి పాపం చాలా సందేహాలున్నాయి. అందరూ బాగా చదువుకున్నవాళ్ళే. చదివినవాళ్ళే. కానీ ఆధ్యాత్మికప్రపంచం వేరైనది కదా ! లౌకికజ్ఞానమూ, పుస్తకపరిజ్ఞానమూ ఇక్కడ పనిచేయవు. 

కుండలినీ జాగృతి అయిన ఒక వ్యక్తిని వారిలో చూచాను. నేడు ప్రతివారూ కుండలిని గురించి మాట్లాడుతున్నారు. కానీ నిజంగా అది జాగృతి అయిన ఒక్కడంటే ఒక్కడిని కూడా నేను ఇంతవరకూ చూడలేదు. ఈ గ్రూపులో చూచాను. విచిత్రమేమిటంటే, అతనేమీ సాధనలు చేయలేదు. ప్రస్తుతం చేయడమూ లేదు. ఆయన పుట్టిన తేదీని అడిగి, అప్పటి గ్రహస్థితులను ఊహించి అది నిజమే అని నిర్ధారించుకున్నాను. అతను చెబుతున్న అనుభవాలూ లక్షణాలూ కూడా కుండలినీజాగృతి గురించి నాకు తెలిసిన లక్షణాలతో సరిపోతున్నాయి. అతని ఆరా కూడా దానికి అనుగుణంగానే ఉంది.

నకిలీలు ఎక్కడ చూచినా ఉంటారు, అసలైనవాళ్ళు మాత్రం ఎక్కడో అజ్ఞాతంగా ఉంటారన్న విషయం మళ్ళీ ఋజువైంది. 'మీ అడ్రసు యూట్యూబు ఛానల్స్ కి లీక్ చేస్తాన'ని అతడిని బెదిరించాను. 'అమ్మో ఆ  పని  మాత్రం చేయకండి' అని అతనన్నాడు.

మధ్యాహ్నభోజనాలయ్యాక పెద్దగా కార్యక్రమమేమీ లేదు. యూజీగారి అరుదైన వీడియోలను ప్లే చేసి కొంతమంది చూచారు. నేనవన్నీ యూట్యూబులో ఇప్పటికే చూచాను గనుక, బయటకొచ్చి చెట్లకింద నడుస్తున్నాను. అక్కడున్న ఇంకా కొంతమందిమి అదీఇదీ మాట్లాడుకుంటూ గడిపాము.

మీటింగు అయిపోయాక, నేను, కుండలిని, ఇంకొక ఇద్దరం కలసి జయనగర్ నుంచి లాల్బాగ్ వరకూ అనేకవిషయాలు ముచ్చటించుకుంటూ నడిచాము. చివరికి అక్కడ మెట్రో రైలెక్కి ఎవరి ఇళ్లకు వారు చేరుకున్నాము.

ఆ విధంగా ఈ గ్రూపుతో నా మొదటి మీటింగు ముగిసింది. బహుశా ఇదే ఆఖరిది కూడా కావచ్చు.

read more " బెంగుళూరు యూజీ గ్రూపుతో సమావేశం "

భక్తులను దేవుడు నిజంగా రక్షిస్తాడా?

చర్చిలో మాస్ ను నిర్వహిస్తున్న కేథలిక్ పాస్టర్ పైన, వెనుకనుండి శిలువా, దానిపైనున్న ఏసుక్రీస్తు విగ్రహమూ పడి, ఆ పాస్టర్  చనిపోయిన సంఘటన ఈక్వడార్ లో నిన్న జరిగింది.

ఆ చర్చి పేరు Our Lady of Perpetual Help Church.

ఈ సంఘటన అనేక చర్చలను రేకెత్తించింది.

జీసస్ నిజంగా ఉంటే, ప్రార్ధనలు చేసేవారిని రక్షిస్తూ ఉంటే,  ఇలా ఎలా జరుగుతుంది? అని  కొందరంటున్నారు. నిజమే !

దీనికి సపోర్టుగా పోప్ లియో కూడా ఈ మధ్యనే ఆపరేషన్ చేయించుకున్నాడు. ఆయనకు కుడి ఊపిరితిత్తిలో గడ్డ ఉందని, ఊపిరితిత్తి కొంతభాగాన్ని తొలగించారు.

ఆయననెందుకు జీసస్ కాపాడలేకపోయాడు? కొబ్బరినూనెలూ, మోకాళ్ళ ప్రార్ధనలూ పోప్ కు చేతకావా? చేసినా పనిచెయ్యలేదా? లేక పోపుకి జీసస్ పైన గట్టి విశ్వాసం లేదా?

సాక్షాత్తు పోపుకే దిక్కులేకపోతే, ఇక సామాన్య క్రైస్తవుడెలా రక్షింపబడతాడు? పోపునే రక్షించని జీసస్ సామాన్యక్రైస్తవుడినెలా రక్షిస్తాడు? అసలు, రక్షణే బూటకమా? మొదలైన ప్రశ్నలు సహజంగానే తలెత్తుతాయి.

ఎందుకంటే, ఇవే నమ్మకాలపైన ఆధారపడి కోట్లాదిమంది క్రైస్తవుల జీవితాలు నడుస్తున్నాయి మరి !

ఇలా ప్రశ్నించినవారిని, "ఏం? మీ గుళ్ళలో ఇలా ఎప్పుడూ జరగలేదా?" అని క్రైస్తవులు ఎదురు ప్రశ్నిస్తున్నారు?

ప్రశ్నకు ప్రశ్న జవాబు కాదు. కాబోదు.

లాజిక్కు లేని మొండిచర్చలవల్ల విషయంలో స్పష్టత ఎప్పటికీ రాదు. ఉత్తనమ్మకం వల్ల ఏదీ తేలదు.

ఏ మతమైనా, ఏ ప్రార్థనామందిరమైనా, అడిగిన అన్నింటినీ ఏ దేవుడూ ఇవ్వడు. మరి అడగటం ఎందుకు? అంటే, మన మనశ్శాంతి కోసం అంటారు. ఆ మనశ్శాంతిని కూడా దేవుడే ఇవ్వచ్చు కదా. మనమెందుకు అడగాలి? అంటే, 'అడగనిదే అమ్మైనా పెట్టదు' అంటారు. అమ్మకీ దేవుడికీ పోలికేంటసలు? మనం అడగకపోతే అమ్మకు తెలియకపోవచ్చు. దేవుడికి కూడా తెలీదా?

జవాబులుండవు.

'ఎన్ని తలచినా ఏది అడిగినా జరిగేది నీ చిత్తమే' అని క్రైస్తవులు పాడుతుంటారు. ఇక అడగటం ఎందుకు, పనిలేకనా?

నువ్వడిగినా అడగకపోయినా జరిగేది జరుగుతుంది. దేవుడు ఇచ్చేదానిని ఇస్తాడు. ఇక ప్రార్థన ఎందుకు? మనిషి మనిషిగా బ్రతికితే పోలా?

అదే అత్యంత కష్టమైన పని. అది చేయలేకనే మనిషి మతాన్ని సృష్టించాడు. కానీ, మతానుయాయులకు కూడా మంచీ చెడూ తప్పవు.

ఆ మాటకొస్తే, అన్ని మతాల ప్రార్ధనామందిరాలలోనూ, అంటే గుడులు, చర్చిలు, మసీదులు, గురుద్వారాలు, బౌద్ధారామాలు మొదలైన అన్నింటిలోనూ ఇలాంటి సంఘటనలు గతంలోనూ జరిగాయి. ఇప్పుడూ జరుగుతున్నాయి.

రోడ్డుపక్కన దర్గాల దగ్గరనుండి, పెద్ద పెద్ద మందిరాల వరకూ అన్నింటిలోనూ మిరకిల్సూ ఉన్నాయి, ఫెయిల్యూర్సూ ఉన్నాయి. వీటిలో ఉత్త నమ్మకాలూ ఉన్నాయి, నిజంగా జరిగినవీ ఉన్నాయి. సంఘటనలు వాటంతట అవే జరిగినపుడు, దేవుడికి ఆపాదించి భక్తులు నమ్ముతున్నవీ ఉన్నాయి.

ఉదాహరణకు, దేవీనవరాత్రుల తొక్కిసలాటలో భక్తులు చనిపోయిన సంఘటన మొన్న 17 వ తేదీన కలకత్తాలో జరిగింది.

18 వ తేదీన గ్వాలియర్ లో శీతలాదేవి ఉత్సవసందర్భంలో అయితే, లోడుతో ఉన్న ఒక ట్రక్కు భక్తులపైకి దూసుకురావడంతో చాలామంది చనిపోయారు.

గతంలో తిరుమలలోనూ, శబరిమలలోనూ, పుష్కరాలలోనూ, ఇతర సందర్భాలలోనూ ఇలాంటి సంఘటనలు చాలా జరిగాయి.

ఇంకొక కోణంలో చూస్తే, ఇజ్రాయెల్ విమానప్రమాదంలో 180 మంది రక్షింపబడ్డారు. పైలట్ మచ్చర్, హనుమాన్ చాలీసా చదువుకుంటూ హనుమంతుని ధ్యానించడం వల్ల ఇది జరిగిందని అంటున్నారు. ఆంజనేయస్వామి వల్ల జరిగిన మహిమలు కోకొల్లలుగా ఉన్నాయి. నేటికీ ఎన్నో జరుగుతున్నాయి.

అదేవిధంగా 11 వ తేదీన ఇల్లినాయ్ రాష్ట్రంలోని అరోరా వెంకటేశ్వరస్వామి ఆలయంలో గుమిగూడిన భక్తులపైన కాల్పులు జరుపుదామని ఒక అమెరికన్ టీనేజర్ అబ్బాయి ప్రయత్నించగా, రైఫిల్ జామ్ అవడం వల్ల ఆ ప్రమాదం తప్పిపోయింది. దీనిని స్వామి మహిమగా ఆయన భక్తులు అంటున్నారు. కావచ్చు !

అయితే, "మా దేవుడొక్కడే ప్రమాదాలనుంచి కాపాడగలడు, మీ దేవుడు కాపాడలేడు" అని ఎవరూ చెప్పలేరు. చెప్పకూడదు కూడా. ఎందుకంటే, ప్రమాదాలూ, రక్షణలూ రెండూ, అన్ని మతాలవారికీ, అందరు దేవుళ్ళ భక్తులకూ జరిగాయి. జరుగుతున్నాయి. 

దేవుడిని నమ్మని నాస్తికులకు కూడా ఇదే విధంగా రెండూ జరుగుతాయి.

అయితే, నమ్మిన ప్రతిసారీ మిరకిల్స్ జరగవు. జరిగినదానిని మిరకిల్ అనుకుంటారంతే !

సైన్సును నమ్మేవారు దీనిని "ఛాన్స్ ఫేక్టర్" అంటారు.

"నమ్మకం" అనే కోణాన్ని ప్రక్కన పెట్టి వీటిని నిస్పాక్షికంగా పరిశీలిస్తే, అసలైన కారణాలు అర్ధమౌతాయి.

తొక్కిసలాట వల్ల  జరిగే ప్రమాదాలకేమో నిర్వాహకుల అజాగ్రత్తా, భక్తుల దురాశా, సివిక్ సెన్సు లేకపోవడాలే కారణాలు.

టెర్రరిస్టు సంఘటనలకేమో, "మన మతమే గొప్ప. మన దేవుడే గొప్ప. వేరేవాళ్లను చంపండి" అని ప్రేరేపించే ఎడారి రాక్షసమతాలు కారణాలు.

దేశదేశాలలో రేగుతున్న అశాంతికీ, అల్లర్లకూ, మతమార్పిడులు కారణాలు.

చంపుతున్నదీ, విధ్వంసం సృష్టిస్తున్నదీ సైతాను, రక్షిస్తున్నది మాత్రం దేవుడు అనే వాదన కూడా శుద్ధతప్పే. ఆ సైతాను దేవుడి సృష్టిలో ఎందుకుంది? దేవుడెందుకు దానిని ఉండనిస్తున్నాడు? అనే ప్రశ్నకు ఒక్క హిందూమతంలో తప్ప ఇతరమతాలలో జవాబులు  లేవు.

ఆఫ్కోర్స్! మన మతం ప్రకారం అసలు సైతానే లేదు. అది అబ్రహామిక్ మతాల సృష్టి మాత్రమే.

ఇంకా చెప్పాలంటే, ఏ దేశంలో చూచినా,  శాంతిమతాలుగా చెప్పుకునే క్రైస్తవమూ ఇస్లాముల వల్ల ద్వేషాలూ, అల్లర్లూ, గొడవలూ, హింసా, రక్తపాతమూ తప్ప ఇంకేం జరుగుతున్నాయి? అవి నిజంగా శాంతిమతాలే  అయితే ప్రపంచవ్యాప్తంగా ఇన్ని యుద్దాలెందుకు?

జవాబులు ఉండవు.

సైతాను, దేవుడు అనే భావనలు నిజాలైతే, చర్చిలో ఇలాంటి సంఘటనలెందుకు జరుగుతున్నాయి? అక్కడకూడా సైతాను ఉంటాడా? లోనికి రాగలడా? అన్న ప్రశ్న తలెత్తుతుంది.

ఇక మసీదులలో అయితే, వాళ్లలో వాళ్లే బాంబులు పెట్టుకుంటారు గనుక బయటనుండి సైతాను కొత్తగా లోపలి రావల్సిన అవసరం ఏమీ ఉండదు. వాళ్లలోనే ఉంటాడు.

'నా సన్నిధి నీకు తోడుగా వచ్చును' అని బైబిలు చెబుతోంది. మరి ఈక్వడార్ చర్చిలో ఆ సన్నిధి ఏమైపోయింది? అంతమంది భక్తులు అంత విశ్వాసంతో ప్రార్థిస్తున్న చోట దేవుని సన్నిధి ఎందుకు లేదు? ప్రార్థనను లీడ్ చేస్తున్న పాస్టరే ఆ విధంగా చనిపోవడమేంటి?

ఆ పాస్టర్ భక్తుల డొనేషన్లను దుర్వినియోగం చేస్తున్నాడనీ, ఖరీదైన కార్లలో తిరుగుతున్నాడనీ, ఇంకా అటువంటి పనులను చేస్తున్నాడని కొంతమంది అంటున్నారు. అందుకని దేవుడు అలా శిక్షించాడట. కానీ ఈ లాజిక్కు నిలబడదు. ఎందుకంటే, శిక్షించేది యహోవా మాత్రమే. జీసస్ ఎన్నటికీ శిక్షించడు. ఎటువంటి పాపాన్నయినా క్షమించడానికే జీసస్ వచ్చాడని క్రైస్తవం చెబుతుంది. అలాంటప్పుడు, ఒకవేళ పాస్టర్ అవినీతిపరుడైనప్పటికీ, శిక్షించడానికి జీసస్ కు పర్మిషన్ లేదు. యహోవానే ఆయనను ప్రశ్నిస్తాడు, " క్షమించమని నేను నిన్ను భూలోకానికి పంపిస్తే నువ్వు శిక్షిస్తున్నావేమిటి?' అని. కనుక ఈ లాజిక్ చెల్లదు.

ఒకవేళ సైతానే శిలువలో దూరి, వెనుకనుండి పాస్టర్ మీద పడి అతన్ని చంపేశాడని అనుకుందామంటే, అంతమంది గుమిగూడి ప్రార్థిస్తున్న చర్చిలోకి సైతాన్ ఎలా రాగలడు?  అది కుదిరేపని  కాదు. అప్పుడు జీసస్ శక్తిలేనివాడైపోతాడు. ఏ విధంగా చూసినా ఈ సంఘటనను సమర్ధించడం వీలుకాదు.

మరి అసలేం జరిగింది? ఎలా దీనిని వివరించాలి? ఎలా అర్ధం చేసుకోవాలి?   

నిజాయితీ ఉన్నవారు ఆలోచించాలి. ఆత్మపరిశీలన చేసుకోవాలి.

కనుక లాజికల్ గా చూస్తే, ఈ సంఘటనలలో ఈ క్రింది కారణాలు మాత్రమే కనిపిస్తాయి.

మన నిర్లక్ష్యమూ, అజాగ్రత్తలవల్ల జరిగేవి కొన్ని. మనలో మానవత్వం మాయమై, రాక్షసత్వం పెరగడం వల్ల జరిగేవి కొన్ని. అంతా మంచిగా ఉన్నప్పటికీ, మన పరిధిని దాటి జరిగేవి మరికొన్ని.

ఇవి తప్ప, ఒకరు రక్షింపబడినా, మరొకరు శిక్షింపబడినా, ఇందులో దేవుడిపాత్ర ఏమీ లేదని నేనంటాను. ఉందని అనుకుంటున్నంతవరకూ మీకు కర్మరహస్యాలు, సృష్టిరహస్యాలు అర్ధం కాలేదని కూడా నేనంటాను.

నేనే కాదు, బుద్ధుడు కూడా ఇదే అన్నాడు.

వీటిని అర్ధం చేసుకోవడమంటే, యూట్యూబు వీడియోలూ, రీల్సూ చూసినంత సులభం కాదు.

హిందూమతంలో వీటికి అసలైన లాజికల్ వివరణలున్నప్పటికీ, అవి వేదాంతంలోకి తొంగిచూస్తే తప్ప, పురాణాలను పట్టుకుని కూచున్నవారికి ఏమాత్రమూ అర్ధంకావు. వేదాంతమంటే వేదంయొక్క జ్ఞానభాగమని వేరే చెప్పనక్కరలేదు కదా !

పురాణాలను దాటి, వేదాంతభాగంలో అడుగుపెట్టినవారికి మాత్రమే కర్మరహస్యాలూ, సృష్టిరహస్యాలూ, కనీసం మేధోపరంగానైనా, అర్ధమౌతాయి.

నిన్న ఈక్వడార్లో చనిపోయిన పాస్టర్ కూడా, స్వర్గానికి డైరెక్ట్ గా పోయాడని కేథలిక్కులంటుంటే, విగ్రహారాధన చేయడం వల్ల ప్రభువు శిక్షించాడని ప్రొటెస్టెంట్లూ, ఇతర డినామినేషన్లూ అంటున్నారు. రెండూ నిజాలు కావు. వీళ్ళ ఊహలు మాత్రమే.

దాడులలో చనిపోయిన టెర్రరిస్టులు కూడా డైరెక్టుగా స్వర్గానికే పోతారని ఇస్లామిక్ టెర్రరిస్టులంటారు. "ఘాజీ" అని వాళ్లకు బిరుదులిస్తారు. అదీ నిజం కాదు. ఊహ మాత్రమే.

మనం ఊహించిన ప్రతిదీ నిజం కావాలని  రూలేమీ ఎక్కడా లేదు.

అసలూ, సృష్టిలో ఎన్ని స్వర్గాలున్నాయి? ఎక్కడున్నాయి? అవి శాశ్వతాలా? అశాశ్వతాలా? కల్పితాలా? నిజాలా? ఎవరైనా చెప్పగలరా?

ఒక్క వేదాంతం తప్ప, వీటికి జవాబులను ఎవరూ చెప్పలేరు.

అసలు విషయమేంటంటే,  

కర్మరహస్యాలు అందరికీ  అర్ధమైపోతే సృష్టి నడిచేదెలా?

అందుకని, భక్షణలూ, శిక్షణలూ, రక్షణలూ అన్నీ జరుగుతూనే ఉండాలి. ఎవరిమటుకు వారు "ఇదంతా మా దేవుడే చేస్తున్నాడు" అనుకుంటూనే ఉండాలి. ఎవరి భ్రమలలో వాళ్ళు బ్రతుకుతూనే ఉండాలి. కొట్టుకుచస్తూనే ఉండాలి.

అప్పుడే ఈ ప్రపంచం నడుస్తూ ఉంటుంది.

ఎవరిష్టానుసారం వాళ్ళు ఇదేవిధంగా అనుకుంటూ  ఉండండి. సృష్టిసూత్రాలను అర్ధం చేసుకునే ప్రయత్నాన్ని, తెలివితో జీవించే ప్రయత్నాన్నీ ఎవరూ చేయకండి. ఇలాగే ఉండండి. ఇలాగే ముందుకెళ్లండి. ఎటువెళ్ళినా చివరకొచ్చేది సముద్రమేగా !

హ్యాపీ విజయదశమి !

read more " భక్తులను దేవుడు నిజంగా రక్షిస్తాడా? "

వాయిదా పడిన మైసూరు ట్రిప్పు

నవరాత్రుల చివరిరోజులు.

బెంగుళూరుకు మైసూరు దగ్గరే కదా, మైసూరెళ్లి చాముండేశ్వరీ అమ్మవారి దర్శనం చేసుకొద్దామని మా బృందంలోని కొందరన్నారు.

'ఇప్పుడొద్దు. కావాలంటే నవరాత్రులయిపోయాక వెళ్ళొద్దాం. అయినా అక్కడకెళ్ళేది దేవుడికోసమా? లేక కొండనీ, గుడినీ, అక్కడి హడావుడినీ, జనాన్నీ చూడటం కోసమా?

మొదటిదానికైతే ఎక్కడికీ పోనక్కరలేదు. రెండోదానికోసమైతే అంతదూరం పోవడం వృధాపని. ఒకవేళ సైట్ సీయింగ్ కోసమే అనుకుంటే, పండుగరోజులలో దానిని కూడా ఆస్వాదించలేం. కనుక ఎలా చూచినప్పటికీ, ఇప్పుడు మైసూరు వెళ్లడం తెలివిలేనిపనే అవుతుంది. అమ్మవారెక్కడికీ పోదు. మైసూరు కూడా ఎక్కడికీ పోదు. నాలుగురోజులాగండి." అన్నాను.

ఏ పుణ్యక్షేత్రానికైనా సరే, పండుగరోజులలో వెళ్లడం మా విధానం కాదు. జనం తక్కువగా ఉన్నపుడు మాత్రమే అలాంటి చోట్లకు వెళ్ళాలి. అప్పుడు మాత్రమే అక్కడి ఆరాను మనం అందుకోగలుగుతాం.

పండుగ రోజులలో వెళితే ఏముంటుంది, చవకబారు గోల తప్ప?

నేలబారు మనుషులూ, వాళ్ళ అసహ్యకరమైన పోకడలూ, తొక్కిసలాటలూ, లంచాలూ, రికమెండేషన్లతో దర్శనాలు చేసుకోవడమూ, ఏదో పుణ్యం సంపాదించేశామని భ్రమపడుతూ, పొంగిపోతూ వెనక్కు రావడమూ, మళ్ళీ మన నకిలీబ్రతుకులు బ్రతకడమూ తప్ప ఎక్కడికెళ్లొచ్చినా వేరే ఏముంటుంది?

మనకు నచ్చనివే ఇవి !

పండుగలను మామూలు మనుషులు జరుపుకునే విధానం ఒకలాగా ఉంటుంది. నిజంగా ఆధ్యాత్మికమార్గంలో నడుస్తున్నవాళ్ళు జరుపుకునే విధానం ఇంకోలా ఉంటుంది. 

మొదటిది అందరికీ తెలిసినదే. అందరి ఎదురుగా కనిపించేదే. రెండోది బజార్లో దొరకదు. బయటకు కనిపించదు. చాలామందికైతే అదొకటుందని తెలియదు కూడా ! 

"మాకు తెలుసు" అనుకునేవాళ్లకు కూడా తెలియదని నేనంటాను.

పాపులర్ మతంగాని, దాని ఆచరణలుగాని, అన్నీ బూటకాలే. ఇవన్నీ "నేను సరిగానే ఉన్నాను" అన్న భ్రమలో మనిషిని ఉంచుతున్నాయంతే.

అన్నీ సరిగానే ఉంటే, మనుషుల జీవితాలెందుకు ఇలా ఉన్నాయి మరి? అన్న ప్రశ్నకు జవాబు ఎక్కడా లేదు.

ఎక్కడైనా సరే, మతాచరణలూ తంతుల భ్రమలనుండి కొద్దిమంది మాత్రమే నిజంగా బయటపడతారు. మిగతావాళ్లంతా, ఆ ఊబిలో ఉంటూ, అదే సత్యమని భ్రమిస్తూ ఉండవలసిందే. వేరే మార్గం లేదు.

"ఈరోజున ఇక్కడికెళ్ళండి. ఇలా మొక్కండి. అలా చెయ్యండి. ఇక మీకు ఎదురుండదు. మీ పాపాలన్నీ పోతాయి. మీరు పట్టిందల్లా బంగారమౌతుంది." మొదలైన అబద్ధాలతో కొందరు జనాన్ని నమ్మిస్తున్నారు. పిచ్చిజనం నమ్మి   మోసపోతున్నారు.

ఇంతా చేస్తే, ఇదంతా బంగారం కోసమా?

ఇవన్నీ రెలిజియస్ టూరిజంను పెంచుకునే బిజినెస్ ట్రిక్స్ తప్ప ఇంకేమీ కావు. ఇదంతా టీవీ ఛానెల్స్, యూట్యూబు చానల్స్ చేస్తున్న మాయ.

అలా ఎప్పటికీ జరగదు. ఊర్లు తిరిగినంత మాత్రాన పాపాలూ పోవు. బ్రతుకులూ మారవు. ఆ మార్గాలు వేరే ఉంటాయి.

ఇవాళా రేపూ పండుగల అంతరార్ధాలన్నీ మరుగునపడ్డాయి. కేవలం సరదాలుగా, వినోదాలుగా, పైపై నాటకాలుగా అవి మారిపోయాయి. వినాయకచవితైనా, దీపావళైనా, దసరా అయినా, శ్రీరామనవమైనా, కృష్ణాష్టమి అయినా, శివరాత్రి అయినా, ఇంకొకటైనా అన్నింటినీ అలా మార్చేశాం  మనం.

హిందూమతానికి ఎంత దురవస్థ పట్టింది ? అవున్లే, అందరూ సత్యాన్వేషకులూ, సత్యద్రష్టలూ అయిపోతే, సృష్టి ఆగిపోదూ మరి ! 

ఈ ప్రపంచం ఇలా ఉండటమే కరెక్టు !

ఏదేమైనా, ప్రస్తుతానికి మా మైసూరు ట్రిప్  మాత్రం కొంతకాలంపాటు వాయిదా పడింది.

read more " వాయిదా పడిన మైసూరు ట్రిప్పు "

2032 లో కల్కి రాబోతున్నాడా?

2032 లో కల్కి రాబోతున్నాడని ఒక ప్రసిద్ధ గురువుగారు చెప్పారని సోషల్ మీడియాలో ముమ్మరంగా ప్రచారం జరుగుతున్నది. దీనిమీద మీ అభిప్రాయం ఏమిటని నా శిష్యులలో ఒకరు ప్రశ్నించారు.

హిమాలయాలలోని శంభలా గ్రామంలో కల్కి ఇప్పటికే పుట్టి ఉన్నాడని, ప్రస్తుతం ఆయనకు పది పదిహేను ఏళ్ళని, ఇంకో ఐదేళ్లలో మంచి వయసులో ఉన్న యువకునిగా ఆయన సమాజంలోకి వస్తాడని ఆయన చెబుతున్నాడట.

 అడ్రసు తెలిస్తే చెప్పచ్చు కదా ! 

"అది మాత్రం అడక్కండి" అని ఆయనంటున్నాడట !  ఏమంటే, "అది దేవరహస్యం" అన్నాడట. 

"అది రహస్యమైనపుడు, ఇది మాత్రం చెప్పడమెందుకు? నాటకాలా?" అని నేనన్నాను.   

చాలామంది ఇలాంటివాళ్ళు "శంభలా ఎక్కడుందో మాకు తెలుసు. మేము అక్కడికి పోయొచ్చాము" అని చెబుతున్నారు. వీడియోలు చేస్తున్నారు.

"అన్నీ అబద్దాలే" అని నేనంటున్నాను. వినేవాడు వెర్రివెంగళప్ప అయితే, చెప్పేవాడు ఏదైనా చెబుతాడు. ఇవన్నీ ఉత్త కాలక్షేపం కబుర్లు మాత్రమే. ఇంకేమీ కాదు.

మరికొంతమంది ఔత్సాహికులు ఇంకొక అడుగు ముందుకేసి, 'శంభలా' అంటే హిమాలయాలలో లేదని, అది ఒరిస్సాలోని 'సంబల్ పూర్' అనే ఊరని చెబుతున్నారు. మరింకేం? ఆ ఊర్లో "విష్ణుయశ్, సుమతి" అనే దంపతులు ఎక్కడున్నారో ఓటర్లలిస్టులో చూసి కనుక్కోండి. కల్కి తల్లిదండ్రుల పేర్లు అవే అని 'కల్కిపురాణం' చెబుతోంది. వాళ్ళ ఇంట్లోనే కల్కి పుట్టి పెరుగుతున్నాడు. సింపుల్ కదా అని నేనన్నాను.

అయినా, అర్ధంపర్థం లేని పిచ్చిపిచ్చి పేర్లు పిల్లలకు పెట్టుకుంటున్న నేటిసమాజంలో అంత మంచిపేర్లు ఎవరు పెట్టుకుంటున్నారో ఆ కల్కికే తెలియాలి !

-----------------------  

ఈ విధంగా కల్కి వస్తున్నాడని ఇప్పటివరకూ చాలామంది చెప్పారు. అలా చెప్పినవాళ్ళందరూ పోయారుగాని కల్కిమాత్రం రాలేదు. 2000 సంవత్సరంలో కలియుగాంతం వస్తున్నదని వేదవ్యాస్ గారు పుస్తకమే వ్రాశారు. కానీ అదేమీ జరగలేదు. ఆయనే పోయారు. ప్రస్తుతం 2026 నడుస్తున్నది. అటువంటిదేమీ మనకు కనిపించడం లేదు. ఒకవేళ కల్కి వచ్చిఉంటే, ఈ సమాజంలోకి రావడానికి భయపడి ఎక్కడైనా దాక్కుని ఉన్నాడేమో నాకైతే తెలీదు.

మొన్నీమధ్యనే కల్కిభగవాన్ కన్నుమూశాడు. ఎవరో మాతో ఈ మాట చెబితే మేము భలే నవ్వుకున్నాం. కలియుగం ఇంకా అయిపోలేదు. అప్పుడే కల్కి రావడం పోవడం కూడా అయిపోయిందా? అదికూడా ఆస్పత్రిలో పోయాడా?  ఎంత పిచ్చిజనంరా దేవుడా ! అనిపించింది.

కొన్నేళ్ల క్రితం రైల్వేలో 'కల్కి అవతార్' అని ఒక ఆఫీసర్ ఉండేవాడు. ఆ అవతారం చేసిన లీలలన్నీ మాకు బాగా తెలుసు. ఎంత కామెడీనో !

కృష్ణభగవాన్ అని పేరు పెట్టుకున్నంత మాత్రాన సదరువ్యక్తి శ్రీకృష్ణుడెలా అవడో, కల్కిభగవాన్ అని పెట్టుకున్నంతమాత్రాన ఆయనా అవ్వడు. ఆజాద్, భగత్ అని పేర్లు పెట్టుకున్నంతమాత్రాన ఎవరూ ఫ్రీడమ్ ఫైటర్సూ అవరు.

ఉత్తపేర్లతో ఎవరూ ఏదీ అయిపోరు. మహాత్మా అని బిరుదులు తగిలించుకున్నవారంతా మహాత్ములౌతారా? ఇదీ అంతే.

అయితే, ఇటువంటి నమ్మకాలు ప్రతితరంలోనూ ఉంటాయి. కాలం మాత్రం ఆగకుండా ముందుకు నడుస్తూనే ఉంటుంది. జనాల నమ్మకాలు ఒకవిధంగా ఉంటే, నిజాలు మాత్రం వేరేగా ఉంటాయి.  ఈ గోల ఎప్పుడూ ఉండేదే.

జీసస్ వస్తున్నాడని రెండువేల ఏళ్ళనుంచీ చెబుతున్నారు. ఇంతవరకూ జాడా జవాబూ లేదు. తాము జీవించి ఉండగానే ఆయన వస్తాడని, ఆయనను చూడకుండా తాము చనిపోమని జీసస్ శిష్యులు నమ్మేవారు. అదేమీ జరగలేదు. ఆయన వస్తున్నాడని ఎదురుచూస్తూనే వారందరూ పోయారుగాని, ఆయనమాత్రం రాలేదు. బహుశా ఎప్పటికీ రాకపోవచ్చు కూడా !

-------------------------

అయితే, 2032 ప్రత్యేకత ఏమిటి? ఏదో ఒకటి ఉండాలి కదా ! అదే సంవత్సరాన్ని ఎందుకు చెబుతున్నారు? అని అనుమానం రావచ్చు.

2032 గ్రహస్థితిని ఒక్కసారి చూద్దాం. అది యురేనస్ రిటర్న్ చార్ట్ అవుతున్నది. అంతేకాదు ప్లూటో అర్ధ రిటర్న్ చార్ట్ కూడా అవుతున్నది.

మనకు 1947 లో స్వాతంత్య్రం వచ్చింది. అప్పుడు యురేనస్ మిధునం 2 వ డిగ్రీపైన ఉన్నాడు. 85 ఏళ్ల తర్వాత 2032 లో మళ్ళీ అదే స్థానానికి రాబోతున్నాడు. దీనిని యురేనస్ రిటర్న్ చార్ట్ అంటారు. ప్రపంచచరిత్రను పరిశీలిస్తే, ఇటువంటి పరిస్థితి వచ్చినపుడు ఆ దేశంలో సమూలమైన మార్పులొస్తాయి. ఉద్యమాలు, విప్లవాలు, తిరుగుబాట్లు వచ్చి దేశవ్యవస్థ అంతా క్రొత్తదారిలో పోవడం మొదలౌతుంది. ఒక మాటలో చెప్పాలంటే దేశపరిస్థితి రీ-సెట్ అవుతుంది. 

గతంలో అమెరికా విషయంలో ప్లూటో పరంగా ఇది ఋజువైంది.

అమెరికా స్వాతంత్య్రం జూలై 4, 1776 న వచ్చింది. ఆనాడు ప్లూటో మకరం 6 వ డిగ్రీపైన ఉన్నాడు. ప్లూటో సైకిల్ 248 ఏళ్ళు. తిరిగి అదే స్థానానికి 2024 న వచ్చాడు. గత రెండేళ్లలో అమెరికా ఎన్ని మార్పులకు లోనౌతోందో గమనించవచ్చు.

2019 ఎలక్షన్ల సమయంలో తన బిజినెస్ రికార్డులను తారుమారుగా చూపించి ప్రభుత్వాన్ని మోసగించాడన్న నేరంపైన అమెరికా అధ్యక్షుడే నేరస్తుడని 2024 లో అమెరికా కోర్టు తీర్పునిచ్చింది. దానిపైన ప్రస్తుతం అపీల్ నడుస్తోంది. గతంలో ఏ అధ్యక్షునికీ ఇలా జరుగలేదు.

అప్పటినుంచీ ప్రపంచవేదికలపైన అమెరికా ఒంటరిదై పోతోంది. మునుపటి దర్పం తగ్గిపోతోంది. ఇతరదేశాల కూటములు అనేకం ఏర్పడుతున్నాయి. అమెరికా నిరంకుశత్వాన్ని ప్రశ్నిస్తున్నాయి. మనదేశమూ, చైనాదేశమూ ప్రపంచరాజకీయాలను శాసించే దిశగా ముందుకు దూసుకొస్తున్నాయి. ఇరాన్ తో పెట్టుకున్న యుద్ధంతో అమెరికా అల్లాడుతోంది. 2024 నుంచీ ఈ మార్పులు చకచకా వస్తున్నాయి. గమనించండి.

మనకు స్వాతంత్య్రం వచ్చినది 1947 లో గనుక మనకు ప్లూటో రిటర్న్ చార్ట్ 2195 లో వస్తుంది. అయితే, అర్ధ రిటర్న్ చార్ట్ మాత్రం 2032 లో వస్తుంది. అంటే, స్వతంత్రం వచ్చినపుడు ప్లూటో కర్కాటకం 20 వ డిగ్రీలో గ్రహయుద్ధంలో ఉన్నాడు. 2032 లో దానికి  సరిగ్గా సప్తమంలోకి అంటే మకరం 20 వ డిగ్రీపైకి వస్తాడు.

మన దేశానికి యురేనస్ రిటర్న్ చార్ట్ 31 మే, 2032 న వస్తున్నది. అంటే, ఆ రోజున యురేనస్ మళ్ళీ మిథునం 2 వ డిగ్రీపైన, అంటే మనకు స్వాతంత్య్రం వచ్చినప్పటి డిగ్రీపైన సంచరిస్తాడు. అదే సమయానికి ప్లూటో మకరం 20 వ డిగ్రీపైన సంచరిస్తున్నాడు. మకరం కూడా మన దేశాన్ని సూచించే రాశియే.

కనుక, యురేనస్, ప్లుటోలు రెండూ 2032 వ సంవత్సరాన్ని స్పష్టంగా సూచిస్తున్నాయి. అయితే, ఇది మంచి సూచనైతే మాత్రం కాదు. ఏమంటే, పాతవ్యవస్థ గతించి క్రొత్త వ్యవస్థ మొదలు కావడానికి ప్లూటో సూచకుడైతే, ఉద్యమాలకు, విప్లవాలకు యురేనస్ సూచకుడు. కనుక సంక్షోభం స్పష్టంగా కన్పిస్తున్నది.

----------------

ఆ రోజున గ్రహస్థితిని చూద్దాం.  

మే 31, 2032 న గ్రహస్థితులు ఇలా ఉన్నాయి. 

గురువు వక్రించి నీచస్థితిలో ఉన్నాడు. శని మిధునంలో ఉన్నాడు. యురేనస్, ప్లుటోల పరిస్థితి పైన వివరించాను.

మన దేశలగ్నమైన వృషభంలో నాలుగు గ్రహాల గ్రహయుద్ధం ఉన్నది. 

వీరిలో సూర్యుడు, శుక్రుడు ఒకే డిగ్రీ (16 వ డిగ్రీ) పైన రోహిణీ నక్షత్రంలో ఉన్నారు. రోహిణి ప్రజానక్షత్రం.

వృషభానికి పాపార్గళం ఉన్నది. కేతువు కుజునికి సూచకుడు. కుజశనుల అర్గళం మనదేశానికి పట్టింది. అంటే యుద్ధం గాని, దానికి సమానమైన సంక్షోభం గాని కనిపిస్తున్నది.

కనుక, ఆ సమయంలో మన దేశవ్యవస్థలో సమూలమైన మార్పులు కనిపిస్తున్నాయి. బహుశా ఆ సమయానికి మన అతుకులబొంత రాజ్యాంగం సమూలంగా మార్చబడవచ్చు. ప్రపంచవ్యాప్తంగా వచ్చే మార్పుల వల్ల పాతరాజ్యాంగం పనికిరాకుండా పోయి, క్రొత్త రాజ్యాంగాన్ని వ్రాసుకునే పరిస్థితి ఏర్పడవచ్చు. ఇలా జరగాలంటే మూడో ప్రపంచయుద్ధం లాంటి మరొక యుద్ధం  జరగాలి. అది జరిగే సూచనలు కూడా బలంగా కనిపిస్తున్నాయి.

ఇటువంటి సంక్షోభపరిస్థితులు ఏర్పడే అవకాశం తప్పకుండా ఉందిగానీ, కల్కి అవతారం వచ్చే సూచన మాత్రం ఎక్కడా లేదు.

-----------------------

ప్రతి పదేళ్లకూ "కల్కిఅవతారం వస్తున్నది" అని కొంతమంది చెప్పడం ఒక ఫ్యాషన్ అయిపోయింది.  "కల్కి ఇప్పటికే పుట్టాడు. అడ్రసు కూడా మాకు తెలుసు" అని కొంతమంది కుహనాగురువులు చెప్పుకుంటూ ఉండటం కూడా ఇలాంటిదే.

కల్కి గుర్రం ఎక్కి వస్తాడు. మహమ్మద్ కూడా గుర్రం మీదే తిరిగేవాడు గనుక, మహమ్మదే కల్కి అని 40 ఏళ్ల క్రితమే సాయిబులలో ఒక వర్గం ప్రచారం చేసేది. అయితే దానినెవరూ నమ్మలేదు. ఇలా చాలామంది చాలా కధలు చెబుతూ ఉంటారు.

ఇదంతా పెద్దబూటకం ! కలియుగాంతం జరగడానికీ, కల్కి రావడానికీ ఇంకా చాలా సమయముంది. మనమెవ్వరమూ ఈ జన్మలో దానిని చూడము. చూడలేము.

2032 ప్రాంతంలో మన దేశ రాజకీయ, సామాజిక, ఆర్ధికవ్యవస్థలలో సమూలమైన మార్పులు వస్తాయి. అంతేగాని, కల్కి అవతారం మాత్రం రాదని నేను చెబుతున్నాను.

నమ్మితే నమ్మండి. నమ్మకపోతే మీ ఇష్టం.

అయినా ఇంకెంత దూరం? 5 ఏళ్ళేగా ! చూద్దాం ఏమి జరుగుతుందో.

read more " 2032 లో కల్కి రాబోతున్నాడా? "