జెన్ కధలు - నాన్ ఇన్ టీ కప్పు

జెన్ కధలు - 2 : నాన్ ఇన్ టీ కప్పు
----
జపాన్ లో మెయిజి కాలానికి చెందిన నాన్ ఇన్ పేరుగాంచిన జెన్ మాస్టర్.
ఒక యూనివర్సిటి ప్రొఫెసర్, జెన్ గురించి తెలుకోవటానికి నాన్ ఇన్ వద్దకు వచ్చాడు.
నాన్ ఇన్ మర్యాదగా టీ ఇచ్చాడు. టీ కప్పులో టీ పోస్తున్నాడు. అది నిండింది. ఇంకా పోస్తూనే ఉన్నాడు. టీ పొర్లిపోతున్నది.
చూస్తున్న ప్రొఫెసర్ అసహనంతో అరిచాడు. " మహాశయా. టీ కప్పు నిండుగా ఉంది. ఇంకా పోస్తే ఎట్లా పడుతుంది అందులో?"
నాన్ ఇన్ చిరునవ్వు నవ్వాడు. ఇలా అన్నాడు.
మీ మనసు కూడా టీ కప్పు వలెనె ఉంది.

ఇక్కడ రెండు విషయాలు అర్థం చేసుకోవాలి.
1.ఏదైనా కొత్త విషయం మనకు తెలియాలంటే, ముందుగా దాని గురించిన అభిప్రాయములు మనకు ఉండరాదు. అప్పుడే ఆ విషయం గురించిన సరియైన అవగాహన వస్తుంది. ముందు గానే మనం కొన్ని అభిప్రాయములు ( Pre Concieved Ideas or Notions) ఏర్పరచుకొని ఉంటే కొత్త విషయం యథాతథం గా మనము గ్రహించలేము.మనము పెట్టుకొన్న కళ్ళజోడు రంగులోనే మనకు ప్రపంచం కనిపిస్తుంది. అంటే పూర్తిగా Objective Observation ఉంటేనే మనకు సత్యం అవగతమౌతుంది. లేకపోతె కాదు. 2.ఇక జెన్ గురించి. జెన్ అంటే మనసు నుంచి, మనసు లేమికి ప్రయాణం. A journey from mind to no-mind. మనసులోనుండి ఆలోచనలనూ, అభిప్రాయాలను, అనుభూతులను, భావోద్వేగాలను సమస్తాన్ని ఖాళీ చేస్తే మిగిలేది జెన్. అప్పుడే సత్యం ముఖాముఖి దర్శనం ఇస్తుంది. మాస్టర్ నానిన్ పరోక్షం గా ఇదంతా సూచిస్తున్నాడు. ప్రొఫెసరు గారు అర్థం చేసుకున్నాడో లేదో మనకు తెలియదు. జెన్ మాస్టర్ల శైలి ఇలా ఉంటుంది. అతి గంభీర అర్థాలను, మామూలు మాటల్లో, ఒక్కోసారి అసంబద్దంగా ఉండే మాటలలో సూచిస్తారు. చంద్రుని వైపు చూపే వేలులా ఉంటాయి జెన్ బోధనలు. A finger pointing at the moon. అర్థం చేసుకుంటే మన ముందు మరో ప్రపంచం ఆవిష్కృత మౌతుంది. లేకపోతె పిచ్చి మాటల వలె ఉంటాయి.