ప్యూర్టో రికోలో హరికేన్ మరియా భీభత్సం - ఇదీ అమావాస్య పరిధిలోనే

అమావాస్య ప్రభావంలోనే ఇంకొక ఉపద్రవం ఇప్పుడు అట్లాంటిక్ ఫసిఫిక్ సముద్రాల మధ్యన ఉన్న దీవులను హడలెత్తిస్తోంది.  దానిపేరే హరికేన్ 'మరియా'. గత రెండు రోజులనుంచీ ఇది కరీబియన్ దీవులను, తుర్క్స్, కైకోస్ దీవులను, డొమినికన్ రిపబ్లిక్ ను వణికించింది. ఇప్పుడు ప్యూర్టో రికో పై తన విధ్వంసాన్ని చూపిస్తోంది. నిన్న ఆ ప్రాంతంలో కురిసిన వర్షాలకు రోడ్లన్నీ జలమయమయ్యాయి. దాదాపు ముప్ఫై లక్షలమంది కరెంట్ లేక చీకటిలో మగ్గుతున్నారు. కరెంట్ మళ్ళీ రావడానికి కొన్ని నెలలు పట్టవచ్చని అంటున్నారు. ఆస్పత్రులలో రోగుల పరిస్థితి పరమ దారుణంగా ఉంది.

ప్రస్తుతం కరెంట్ లేక ప్యూర్టో రికో చీకట్లో ఉంది. కమ్యూనికేషన్ నెట్ వర్క్ లు 15% శాతం మాత్రమే పనిచేస్తున్నాయి. రోడ్లన్నీ జలమయమయ్యాయి. అసలైన ప్రమాదం ఇవన్నీ కావు. ఆ అసలైన ప్రమాదంతో పోలిస్తే ఇవన్నీ చాలా చిన్నవి. అదేంటంటే - గాజతకా నది మీదున్న ఒక డ్యాం ప్రస్తుతం ఈ 'మరియా' తుఫాన్ దెబ్బకు బీటలు వారింది. ఈ డ్యాం గనుక పగిలితే జరిగే జన నష్టం ఊహలకు మించి ఉంటుంది. అందుకే హుటాహుటిన ఇప్పటికి దాదాపు 70,000 మందిని ఆ ప్రాంతమంతా ఖాళీ చేయించి బస్సులలో దూరంగా తరలిస్తున్నారు. 'Total destruction', 'Most dangerous situation' అని అధికారులు దీని గురించి అంటున్నారు.

ఇది కూడా సూర్యగ్రహణ ప్రభావమే. ఇది కూడా అమావాస్య పరిధిలోనే జరగడం గమనార్హం. సూర్య గ్రహణ "ఆస్ట్రో కార్టోగ్రాఫ్" గీతలు ఈ ప్రాంతం మీదనుంచే పోతూ ఉండటం క్లియర్ గా చూడవచ్చు.

read more " ప్యూర్టో రికోలో హరికేన్ మరియా భీభత్సం - ఇదీ అమావాస్య పరిధిలోనే "

మా పుస్తకాలు - Secret of Sri Vidya E Book

పంచవటి మబ్లికేషన్స్ నుంచి ఐదో పుస్తకంగా (మూడో ఈ బుక్) Secret of Sri Vidya E Book విడుదలైంది. ఈ పుస్తకం అమెరికా నుంచి 1-6-2017 న వెలువడింది.

ఇది 'శ్రీవిద్యా రహస్యం' తెలుగు పుస్తకానికి ఇంగ్లీషు అనువాదం. అయితే తెలుగు భాషలోని ఛందోబద్ధమైన పద్యాలను ఇంగ్లీషులోకి తేవడం కష్టం గనుక, భావం ఏ మాత్రం చెడకుండా వచనంలోనే ఇంగ్లీషులోకి మార్చాము.

ఇది కూడా Google play books నుంచి, మరియు amazon.com నుంచి అందుబాటులో ఉంది.

read more " మా పుస్తకాలు - Secret of Sri Vidya E Book "

మా పుస్తకాలు - తారా స్తోత్రం E Book

పంచవటీ పబ్లికేషన్స్ నుంచి వచ్చిన నాలుగో పుస్తకంగా (రెండవ ఈ బుక్ ) -  11-5-2017 న తారా స్తోత్రం E Book రిలీజైంది. దీనిని అమెరికా నుంచి విడుదల చెయ్యడం జరిగింది.

Google play books నుంచి ఈ పుస్తకం అందుబాటులో ఉన్నది.

read more " మా పుస్తకాలు - తారా స్తోత్రం E Book "

మా పుస్తకాలు - శ్రీవిద్యా రహస్యం E Book

పాపులర్ డిమాండ్ ను బట్టి, 26-7-2016 న "శ్రీవిద్యా రహస్యం E Book" విడుదల చెయ్యబడింది. ఇందులో 61 పద్యాలతో కూడిన ఇంకొక అధ్యాయం అదనంగా చేర్చబడింది.

Google play books నుంచి ఇది అందుబాటులో ఉన్నది.

read more " మా పుస్తకాలు - శ్రీవిద్యా రహస్యం E Book "

మా పుస్తకాలు - తారా స్తోత్రం

పంచవటి పబ్లికేషన్స్ నుంచి వెలువడిన రెండవ పుస్తకం - తారా స్తోత్రం. ఈ పుస్తకం 4-6-2015 న విజయవాడలో ఆవిష్కరింపబడింది.

ఇందులో - మొత్తం 108 పాదాలతో కూడిన 27 సంస్కృత శ్లోకములు, వాటికి దాదాపు 400 తెలుగు పద్యములతో కూడిన సరళమైన తెలుగు వివరణ ఇవ్వబడింది.

ఈ పుస్తకం పేరుకు దశమహావిద్యలలో ఒకరైన తారాదేవి యొక్క స్తోత్రం అయినప్పటికీ, ఇందులో సందర్భోచితంగా అనేకములైన తంత్ర సాధనా రహస్యాలు వివరించబడినాయి.

నిజమైన తంత్ర సాధనా రహస్యాలను అర్ధం చేసుకోవాలనుకునే సాధకులకు ఈ పుస్తకం ఒక పెన్నిధి వంటిది.

ఇది కూడా త్వరలో పునర్ముద్రణకు రాబోతున్నది.

ఇది Google play books నుంచి అందుబాటులో ఉన్నది.

read more " మా పుస్తకాలు - తారా స్తోత్రం "

మా పుస్తకాలు - శ్రీవిద్యా రహస్యం

మా పంచవటి పబ్లికేషన్స్ నుంచి మొదటి పుస్తకంగా వచ్చినది -  'శ్రీవిద్యా రహస్యం'. ఈ పుస్తకం 28-12-2014 న రిలీజైంది. ఇండియాలోనూ విదేశాలలోనూ ఈ పుస్తకం ఎంతోమంది జిజ్ఞాసువులను కదిలించింది. ఆలోచింపజేసింది. మన సనాతన ధర్మాన్ని సరియైన విధానంలో గ్రహించడానికి ఈ పుస్తకం వేలాదిమందికి ఉపయోగపడింది.

ఇందులో దాదాపు 1400 తెలుగు పద్యాలు, వాటికి సులభమైన తెలుగుభాషలో వివరణా ఉంటాయి.

నిజమైన ఆధ్యాత్మికత అంటే ఏమిటి? మన ఉపనిషత్తులలో చెప్పబడిన తాత్విక సాధనా రహస్యాలేమిటి? దేవీ ఉపాసనా రహస్యాలేమిటి? వేదము, తంత్రములలో ఉన్న సాధనావిధానాలేమిటి? నిజమైన శ్రీవిద్యోపాసన ఎలా ఉంటుంది? దానిని ఎలా చెయ్యాలి? దానికి కావలసిన అర్హతలేమిటి? దానిని బోధించే గురువులు ఎలా ఉంటారు? ఎలా ఉండాలి? గురుశిష్యులకు ఉండవలసిన అర్హతలేమిటి? మొదలైన అనేక విషయాలపైన సమగ్రమైన సమాచారం ఇందులో పొందు పరచబడింది.

ప్రధమ ముద్రణను దిగ్విజయంగా ముగించుకున్న ఈ పుస్తకం ఇప్పుడు పబ్లిక్ డిమాండ్ వల్ల రెండో ముద్రణకు సిద్ధం అవుతోంది.

ఇది google play books నుంచి అందుబాటులో ఉన్నది.

read more " మా పుస్తకాలు - శ్రీవిద్యా రహస్యం "

కాలగ్రస్త యోగం - 21-8-2017 నుంచి 6-2-2018 వరకూ

కాలసర్పయోగం అనే పదం మీరు విని ఉంటారు. కానీ కాలగ్రస్తయోగం అనే పదం విని ఉండరు. ఎందుకంటే ఇది నేను కాయిన్ చేసిన పదం కాబట్టి.

అన్ని గ్రహాలూ రాహుకేతువుల మధ్యలో ఉంటే దానిని కాలసర్పయోగం అంటామని మనకు తెలుసు. కానీ అవే గ్రహాలు కేతురాహువుల మధ్యన ఉంటే దానిని సాధారణంగా అపసవ్య కాలసర్పయోగం అంటున్నారు. కొన్నేళ్ళ క్రితం నేను కూడా దీనిపైన కొన్ని పోస్టులు వ్రాశాను. కానీ ఈ పదం నాకు సమ్మతం కాదు. అందుకని నేను దీనిని కాలగ్రస్తయోగం అంటున్నాను. కారణం ఎందుకో ఈ పోస్టులో క్లుప్తంగా వివరిస్తాను.

ప్రస్తుతం ఈ యోగం అంతరిక్షంలోని గ్రహాలమధ్యన ఉన్నదని గమనించండి.

కాలసర్పయోగంలో లాగా ఈ యోగంలో, అన్ని గ్రహాలూ రాహువు నోటిలో పడే దిశగా ప్రయాణించవు. రాహుకేతువుల శరీరం మీద ఉన్నట్లుగా అవి ఉంటాయి. లేదా వాటి పొట్టలో ఉన్నట్లుగా అనిపిస్తాయి. అందుకే దీనిని కాలగ్రస్తయోగం అని నేనంటాను.

దీని ఫలితాలు కాలసర్పయోగం కంటే భిన్నమైన రీతిలో ఉంటాయి. ప్రస్తుతం 21-8-2017 నుంచి 6-2-2018 వరకూ 165 రోజులపాటు ఈ యోగం ఖగోళంలో ఉంటున్నది.

కనుక ఈ సమయంలో ప్రపంచ వ్యాప్తంగా మానవ జీవితాలలో అనేక ఊహించని మార్పులు కలుగుతాయి. అనేక కష్టనష్టాలకు ప్రజలంతా గురౌతారు. ఈ కష్టనష్టాలు ఆయా జాతకాలను బట్టి, వారివారి జాతకాలలో జరుగుతున్న దశలను బట్టి ఎవరికి వారికి విభిన్నంగా ఉంటాయి. అయితే మధ్య మధ్యలో చంద్రుడొక్కడే ఈ రాహుకేతువుల పట్టు నుంచి నెలలో పన్నెండు రోజుల పాటు బయటకు వస్తూ ఉంటాడు. అలా వచ్చినపుడు మాత్రం మళ్ళీ మామూలుగా కొంచం రిలీఫ్ గా ఉంటుంది. మళ్ళీ చంద్రుడు ఈ పట్టుయొక్క పరిధిలోకి రావడం తోనే ఈ యోగం పనిచెయ్యడం మొదలు పెడుతుంది. మళ్ళీ జనాలకు ఖర్మ కాలుతుంది.

ఈ 165 రోజుల సమయంలో తమతమ పూర్వపు చెడుకర్మలను ప్రజలందరూ రకరకాలుగా అనుభవించే ముఖ్యమైన సమయాలను (ఈ రోజునుంచి ముందుకు) ఇక్కడ ఇస్తున్నాను. గమనించండి.

25-9-17 to 26-9-17

30-9-17 to 31-9-17

9-10-17 to 10-10-17

13-10-17 to 14-10-17

17-10-17 to 20-10-17

22-10-17 to 28-10-17

26-10-17 to 28-11-17 -- ఈ మొత్తం కాలవ్యవధిలో 33 రోజుల ఈ కాలం చాలా గడ్డుకాలం. మళ్ళీ ఇందులో ముఖ్యమైన సమయాలు. 7-11-17 to 10-11-17 మళ్ళీ 16-11-17 to 26-11-17.

5-12-2017 to 8-12-2017

16-12-17 to 20-12-17

1-1-18 to 4-1-18

12-1-18 to 16-1-18

28-1-18 to 1-2-18

ఈ టైంలో, ఊహించని ఉపద్రవాలను ప్రజలు ఎదుర్కొంటారు. అదంతా వారివారి పూర్వకర్మననుసరించి ఒక్కొక్కరికి ఒక్కొక్క విధంగా జరుగుతుంది. ఈ సమయాలలో నేను చెప్పినవి జరుగుతాయో లేదో మీమీ జీవితాలలో, మీమీ జాతకాలలో మీరే గమనించుకోండి మరి !!

read more " కాలగ్రస్త యోగం - 21-8-2017 నుంచి 6-2-2018 వరకూ "

Mexico Earth Quake - మళ్ళీ రుజువైన అమావాస్య ప్రభావం

ఈరోజు అమావాస్య. నిన్న సెంట్రల్ మెక్సికోలో 7.1 స్థాయిలో భూకంపం వచ్చింది. దాదాపు 250 మంది చనిపోయారని, వందలాది ఇళ్ళు పేకమేడల్లా నేలకూలిపోయాయని అంటున్నారు. ఇంకా చాలామంది శిధిలాల క్రింద చిక్కుకుని ఉండవచ్చని అంచనా. సహాయకార్యక్రమాలు జరుగుతున్నాయి.

ఈ విధంగా అమావాస్య ప్రభావం మళ్ళీ నిజమైంది. 

ఈ ప్రదేశం 21-8-2017 న వచ్చిన సూర్యగ్రహణ సమయంలో  వేసిన 'ఆస్ట్రో కార్టో గ్రాఫ్'  లోని కుజుని రేఖకు దగ్గరలో ఉండటం గమనార్హం. కుజ శనుల ప్రభావం వల్లనే భూకంపాలు వస్తాయని ఇంతకు ముందు చాలాసార్లు చాలా పోస్టులలో ఉదాహరణలతో సహా నిరూపించాను.

సూర్యగ్రహణ ప్రభావం గురించి మేము పోస్ట్ వ్రాసినప్పుడు చాలామంది పెదవి విరిచారు. ఇలాంటి గ్రహణాలు చాలా వచ్చాయి పోయాయి. ఇవన్నీ జరుగుతాయా?పెడతాయా? అని. కానీ ఆ తర్వాత కొద్ది సమయంలోనే హార్వే, ఇర్మా తుఫానులు వచ్చాయి. అమెరికాలో కొన్ని రాష్ట్రాలు అతలాకుతలం అయ్యాయి. మళ్ళీ ఇప్పుడు ఈ భూకంపం వచ్చింది. తీవ్రంగా జననష్టమూ ఆస్తినష్టమూ జరిగాయి. ఇవన్నీ ఖచ్చితంగా సంపూర్ణ సూర్యగ్రహణం ప్రభావమే అనిపించడం లేదా?

అమెరికాలో హరికేన్లు మామూలే. ఇందులో విచిత్రం ఏముంది? అని మీరనవచ్చు. ఇవి మామూలు తుఫానులు కావు. 2005 లో వచ్చిన విల్మా తుఫాన్ తర్వాత హార్వే అంత భీకర తుఫాన్ ఈ పన్నెండేళ్ళలో రాలేదు. గురువుగారు రాశిచక్రాన్ని చుట్టి రావడానికి 12 ఏళ్ళు పడుతుందన్న విషయం గుర్తుంటే దీని వెనుక ఉన్న సైకిల్ అర్ధమౌతుంది.

ఇర్మా తుఫాన్ కూడా 2005 లో వచ్చిన కత్రినా తర్వాత అంతటి ఘోరమైన తుఫాన్. ఇది కూడా దాదాపుగా 12 ఏళ్ళ తేడాతో వచ్చింది మరి.

సెప్టెంబర్ 7 న వచ్చిన భూకంపం తర్వాత రెండు వారాల వ్యవధిలో మెక్సికోలో ఇది రెండో భూకంపం. గమనించండి.

25-4-2017 న నేను అమెరికాలో ఉన్నప్పుడు పోస్ట్ చేసిన "సంపూర్ణ సూర్యగ్రహణం - 2017 ఫలితాలు ఎలా ఉండవచ్చు?" అనే పోస్ట్ లో ఇలా వ్రాశాము.

ఈ రేఖమీద కుజుడు గనుక ఉంటె, అది రాజకీయ యుద్ధాలను సూచిస్తుంది. అంతేగాక అగ్నిప్రమాదాలు, పేలుళ్లు, భూకంపాలు, పెద్ద పెద్ద యాక్సిడెంట్లు, ప్రముఖుల మరణాలు, సైనిక చర్యలు, మాస్ కిల్లింగ్స్ ను సూచిస్తుంది.

సరిగ్గా ఇప్పుడు భూకంపం వచ్చిన ప్రదేశమూ, మొన్నటికి మొన్న రెండు తుఫానులు అమెరికా దక్షిణ రాష్ట్రాలను ఊపిన ప్రదేశమూ, ఈ గ్రాఫ్ లో కుజ, రాహు రేఖలు పోతున్న ప్రాంతంగా ఉన్నది చూడండి.

అంతేగాక - "నెప్ట్యూన్ మరియు చతుర్ధం పసిఫిక్ ప్రాంతంలో పడుతున్నది ఇందువల్ల ఈ ప్రాంతలో భూకంపాలు రావచ్చు. Pacific ring of fire మీద పడుతున్న ఈ గ్రహణపు నీడ వల్ల ఆ ప్రాంతంలో భూకంపాలు రావచ్చని సూచిస్తున్నది. ఈ ప్రాంతం భూకంపాలకు పెట్టింది పేరని గుర్తుంచుకోవాలి" అని అప్పుడు వ్రాసిన విషయాన్నీ గమనించాలి.

ఇంకా గమనించండి.

"సెప్టెంబర్ మొదటి వారంలో కుజుడు ఈ గ్రహణ డిగ్రీని దాటుతాడు. కనుక ఆ సమయంలో అనేక సంఘటనలు జరుగుతాయి" అంటూ వ్రాసినది ఎలా ఖచ్చితంగా జరిగిందో చూడండి. సెప్టెంబర్ మొదటి వారంలోనే 'ఇర్మా ' తుఫాన్ అమెరికా దక్షిణ ప్రాంతాన్ని ఒక ఊపు ఊపింది. ఇదే సమయంలో మెక్సికోలో 8.1 స్థాయిలో భూకంపం వచ్చింది.

ఈ సూర్యగ్రహణ ప్రభావం అప్పుడే అయిపోలేదు. ఇంకా మరికొన్ని మిగిలి ఉన్నాయి. వేచి చూడండి మరి.

read more " Mexico Earth Quake - మళ్ళీ రుజువైన అమావాస్య ప్రభావం "

గురువుగారి తులా రాశి ప్రవేశం - ఫలితాలు

ఏడాది నుంచీ తానుంటున్న కన్యారాశి నుంచి నిన్న రాత్రి గురువుగారు తులా రాశిలోకి ప్రవేశించారు. ఈ రాశిలో కూడా ఏడాది పాటు ఉంటారు. కనుక ఒక వారం నుంచే అందరి జీవితాలలో మార్పులు కనిపిస్తూ ఉంటాయి. గమనించుకోండి. ముఖ్యంగా నిన్నా మొన్నలలో ఖచ్చితమైన మార్పులు కొన్ని మీమీ జీవితాలలో జరిగి ఉంటాయి చూచుకోండి.

ఈ గురుగోచారం వల్ల సామూహికంగా అందరి జీవితాలలో కనిపించే (General ) మార్పులు ఇలా ఉంటాయి.

మానవ సంబంధాలు విస్తృతం అవుతాయి. బాధ్యతలు పెరుగుతాయి. కొత్తవాళ్ళతో మాట్లాడతారు. దూరప్రాంతాలకు వెళతారు. వివాహం వాయిదా పడుతూ వస్తున్నవారికి వివాహం జరుగుతుంది. బేలన్స్ తో కూడిన ఆలోచన పెరుగుతుంది. కొత్త వ్యాపారాలు మొదలు పెడతారు. లేదా కొత్త వెంచర్స్ చేస్తారు.

ఇప్పుడు రాశి ఫలితాలు చూద్దాం.

-----------------------------------

ఈ ఫలితాలను లగ్నం/చంద్రరాశి/సూర్యరాశి మూడింటి నుంచి కలిపి చూచుకోవాలి. అప్పుడు స్పష్టత ఎక్కువగా ఉంటుంది. అంతేకాక, ఇంతకు ముందు వ్రాసిన రాహుకేతు గోచార ఫలితాలు కూడా కలుపుకుంటే కరెక్ట్ గా సరిపోతుంది.

మేషరాశి

సోషల్ రిలేషన్స్ పెరుగుతాయి. పెళ్లి అవుతుంది. బిజినెస్ పెరుగుతుంది లేదా కొత్త పుంతలు తొక్కుతుంది. కమ్యూనికేషన్ పెరుగుతుంది. దూరప్రాంతాలకు వెళ్ళవలసి వస్తుంది.

వృషభరాశి

శత్రువులు పెరుగుతారు. అధికారులతో విరోధాలు వస్తాయి. అనవసరమైన గొడవలు తలెత్తుతాయి. పొత్తికడుపుకు, జీర్ణక్రియకు సంబంధించిన రోగాలు బాధిస్తాయి.

మిథునరాశి

ఆలోచన పెరుగుతుంది. ఆధ్యాత్మిక చింతన ఎక్కువౌతుంది.చదువులో ముందుకెళతారు. ఉన్నత విద్య మొదలౌతుంది. సంతానానికి మంచి జరుగుతుంది. మంచి ఆలోచనలు చేస్తారు. షేర్ మార్కెట్లో లాభాలొస్తాయి.

కర్కాటక రాశి

ఇంట్లో మంచి వాతావరణం అభివృద్ధి అవుతుంది. చదువులో రాణిస్తారు. వృత్తిలో ఉద్యోగంలో వెలుగు కనిపిస్తుంది. వాహనాలు కొంటారు. చికాకులు శాంతిస్తాయి.

సింహరాశి

ఉత్సాహం పెరుగుతుంది. ఏదో చెయ్యాలన్న తపన ఎక్కువౌతుంది. కమ్యూనికేషన్ స్కిల్స్ పెరుగుతాయి. ధైర్యం వస్తుంది. ప్రయాణాలు ఎక్కువౌతాయి.

కన్యారాశి

మాటలో సౌమ్యత వస్తుంది. పలుకుబడి పెరుగుతుంది. ఆదాయం బాగుంటుంది. చదువు రాణిస్తుంది.

తులారాశి

ఆలోచనలలో పరిపక్వత వస్తుంది. బేలన్స్ గా ఉంటారు. మధ్యవర్తులుగా ఉండి తీర్పులు తీరుస్తారు. ధనాదాయం ఉంటుంది.

వృశ్చికరాశి

మానసిక మధనం ఎక్కువౌతుంది. అనుకోని ఖర్చులు పెరుగుతాయి. దూరప్రయాణాలు చేస్తారు. విదేశాలకు వెళతారు. స్త్రీలకు నెలసరి సమస్యలు ఉద్దృతం అవుతాయి. రోగంతో ఆస్పత్రి సందర్శనం జరుగుతుంది. నష్టాలు ఉంటాయి.

ధనూరాశి

అన్నింటా వెలుగు కనిపిస్తుంది. అనుకోని సహాయాలు అందుతాయి. లాభాలు కలుగుతాయి. ఆదాయం పెరుగుతుంది. మిత్రులు పెరుగుతారు. గ్యాస్ ట్రబుల్ మొదలైన జీర్ణాశయ బాధలు పెరుగుతాయి.

మకరరాశి

ఉద్యోగంలో బాధ్యతలు పెరుగుతాయి. కానీ మాట చెల్లుబాటు కాదు. ఇంట్లో పరిస్థితులు మెరుగు అవుతాయి. వస్తువులు మారుస్తారు లేదా రిపేర్ చేయిస్తారు. వాయిదా అవుతున్న పనులు కదులుతాయి. చదువులో రాణింపు ఉంటుంది. స్టాక్ మార్కెట్లో రాణిస్తారు.

కుంభరాశి

ఆధ్యాత్మిక చింతన పెరుగుతుంది. ధార్మిక ఆలోచనలు వృద్ధి అవుతాయి. పుణ్యక్షేత్రాలు గుడులు దర్శిస్తారు. ఆధ్యాత్మిక సాహిత్యం చదువుతారు. పెద్దలంటే గౌరవం పెరుగుతుంది. పెద్దలను జాగ్రత్తగా చూచుకుంటారు.

మీనరాశి

మానసిక చింత ఎక్కువౌతుంది. భయం పెరుగుతుంది. డబ్బు ఖర్చు ఎక్కువౌతుంది. మాటను ఎవరూ వినరు. జీర్ణశక్తి మందగిస్తుంది. జననేంద్రియ రోగాలు తలెత్తుతాయి. అతికి పోకుండా గుట్టుగా ఉంటే మంచిది. ఆటంకాలను ఆధ్యాత్మిక సోపానాలుగా మార్చుకుంటే మంచిది.

read more " గురువుగారి తులా రాశి ప్రవేశం - ఫలితాలు "

సమాజ సేవ

'డబ్బుతో ఆనందం రాదు. ప్రేమతో రాదు. విలాసాలతో రాదు. విహార యాత్రలతో రాదు. సేవ చెయ్యడంతోనే ఆనందం వస్తుంది. అందుకని ఇతరులకు సేవ చెయ్యి.' అని మదర్ తెరెసా అందని మొన్న నాతో ఎవరో అన్నారు. నాకు నవ్వొచ్చింది. 'మాయమాటలూ, అబద్దాలూ చెప్పి మతాలు మారిస్తే వొస్తుందా?' అనిపించింది.

'సేవ చెయ్యాలా? ఎవరికీ? ఎందుకూ? ఎలా?' అన్నాను.

అన్ని నీతులలాగే ఈ మాటలు కూడా పైపైన వినడానికి చాలా బాగున్నట్లు అనిపిస్తాయి. కానీ వీటిలో నిజం లేదు. ఒకప్పుడు, అంటే, వందా రెండు వందల ఏళ్ళ క్రితం ఈ మాటల్లో నిజం ఉందేమో? ఎందుకంటే అప్పటి మనుషులలో నిజాయితీ ఎక్కువ పాపభీతి ఎక్కువ. మంచితనం ఎక్కువ. అప్పటి సమాజంలో దరిద్రమూ ఎక్కువే, బాధలూ ఎక్కువే.కనుక అప్పట్లో 'సేవ' అనే పదానికి ఒక అర్ధమూ పరమార్ధమూ ఉండేవి. కానీ ఇప్పుడు కాదు.

అప్పట్లో తినడానికి తిండి ఉండేది కాదు. రోగాలొస్తే మందులకు డబ్బులుండేవి కావు. ఆడపిల్లలకు పెళ్ళిళ్ళు అయ్యేవి కావు. ఉద్యోగాలు దొరికేవి కావు. బ్రతకడానికి ఇప్పుడున్నన్ని అవకాశాలూ అప్పుడు లేవు. అవీ అప్పటి సమస్యలు. మరి ఇప్పుడో?

సెల్ ఫోన్ చార్జర్ మర్చిపోయా. చార్జ్ అయిపోతోంది. అవతల బాయ్ ఫ్రెండ్ / గరల్ ఫ్రెండ్ తో చాటింగ్ లో ఉన్నా. ఎలా? అనేది ఇప్పటి అతి పెద్ద సమస్య. ఇప్పుడు అమ్మాయిలే అబ్బాయిలను తిరస్కరిస్తున్నారు. ప్రతి బిరియానీ హోటలూ కళకళ లాడుతోంది. ప్రతి బారూ వెలిగిపోతోంది. ప్రతి షాపింగ్ మాలూ జనంతో క్రిక్కిరిసి ఉంటోంది. అవసరం ఉన్నదానికంటే ఎక్కువ మందులే ప్రతివారూ వాడి పారేస్తున్నారు. రోడ్డు పక్కన బజ్జీలు వేసుకునే వాడు కూడా నెలకు లక్ష సంపాదిస్తున్నాడు.

ఇప్పుడు మనుషులలో నిజాయితీ లేదు, స్వచ్చత లేదు, పాపభీతి లేదు, విశ్వాసం లేదు, కృతజ్ఞత లేదు, ఏ మంచి లక్షణమూ లేదు. ఇప్పుడున్నది ఒకటే - అవసరం. ఇంకా చెప్పాలంటే అవసరం కూడా కాదు, దురాశ. ఎవరికి నచ్చినా నచ్చకపోయినా ఇది చేదునిజం.

వాడుకున్నంత కాలం ఎదుటి మనిషిని వాడుకోవడం ఆ తర్వాత ఎంగిలి విస్తరాకులా విసరి అవతల పారెయ్యడం. ఇదే ప్రస్తుతం ఏ రంగంలోనైనా జరుగుతున్న అసలైన కధ. ఈ క్రమంలో ప్రేమా, దోమా, నమ్మకమూ, బొమ్మకమూ, విశ్వాసమూ, బొశ్వాసమూ ఈ పదాలన్నీ అర్ధాలను కోల్పోయాయి.

జిల్లెళ్ళమూడి అమ్మగారు ఇదే మాటను తరచుగా అనేవారు. ఆమెదంతా వాస్తవిక భావనలే గాని ఊహలు కావు. 'ప్రపంచంలో ఉన్నది అవసరం ఒక్కటేరా' అని ఆమె ఎన్నోసార్లు అన్నారు. ఇది అక్షర సత్యం.

అవసరం లేకపోతే ఈ లోకంలో ఎవరూ ఎవరినీ కనీసం పలకరించను కూడా పలకరించరు. ఏదో ఒక పని ఉంటేనే ఎవరైనా ఇంకొకరితో స్నేహంగానీ ప్రేమగానీ ఇంకేదైనా గానీ నటిస్తారు. ఆ అవసరం తీరాక 'నువ్వెవరు?' అన్నట్లు ముఖం పెడతారు. ఇది అనుభవం.

'అవసరం' - అనే బంధం లేకపోతే భార్యాభార్తలు కావచ్చు, ప్రేమికులు కావచ్చు, స్నేహితులు కావచ్చు, బంధువులు కావచ్చు,ఇరుగూ పొరుగూ కావచ్చు - ఎవరూ కనీసం మాట్లాడుకోను కూడా మాట్లాడుకోరు. ఇలాంటి పరిస్థితులలో 'సేవ' అనే పదానికి అర్ధం ఎక్కడుంది? సేవ ఎవరికీ? ఎందుకూ?

విచిత్రమేమంటే - ఆధ్యాత్మిక ప్రపంచంలో కూడా ఇదే జరుగుతూ ఉంటుది. సామాన్యంగా మనం ఏమనుకుంటామంటే, ఆధ్యాత్మికం అంటే ఏదో ఉన్నతంగా, మానవ నీచత్వాలకు అతీతంగా ఉంటుందని, అక్కడంతా చాలా స్వచ్చంగా ఉంటుందని భావిస్తాం. కానీ అది నిజం కాదు. ఇక్కడున్నంత మురికి అక్కడా ఉంటుంది. ఇక్కడున్నన్ని నాటకాలు అక్కడా ఉంటాయి. కాకపోతే దానికి 'దైవత్వం' అని ఒక ముసుగు వేస్తారు అంతే.

'నువ్వే నా గురువ్వి. నువ్వు దైవంతో సమానం. నీ మాట నాకు వేదవాక్కు. నా తల్లీతండ్రీ అన్నీ నీవే. నువ్వేం చెబితే అదే సత్యం. నీ పాదపద్మాలే నాకు శరణ్యం' ఇలాంటి మాయమాటలు ఎవరైనా చెబుతున్నారూ అంటే అతి త్వరలోనే ఆ వ్యక్తి ఆ గురువుకు ఘోరమైన వెన్నుపోటు పొడవబోతున్నాడని అర్ధం. అంతేకాదు - అతని లోపల్లోపల ఆ గురువంటే అమితమైన ద్వేషమూ, అసూయా, కోపమూ నిండి ఉన్నాయన్నది యోగిక్ సైకాలజీ చెప్పే పచ్చి నిజం.

నిజమైన ప్రేమా విశ్వాసమూ నమ్మకమూ ఉన్నవాళ్ళు మాటల్లో చెప్పరు. చెప్పవలసిన అవసరం లేదు. వాళ్ళు ఆ విధంగా ఉంటారు. అంతే. మాటల్లో అతిగా చెబుతున్నారంటే, అదంతా పెద్ద మాయ అని అర్ధం.

ఒకడు తన భార్యతోనో ప్రియురాలితోనో I love you, I love you అని రోజుకు వందసార్లు అంటుంటే అర్ధమేమిటంటే - నిజానికి ఆ ప్రేమ అక్కడ ఏమాత్రమూ లేదని. తనలో ఆ ప్రేమ ఉందో లేదో తెలియని సందిగ్దతలో తన self assurance కోసం, తనకు తాను బూటకపు నమ్మింపు కోసం ఆ మాటలు మాట్లాడుతూ ఉంటారు. ఇది పచ్చి నిజం.

అలాగే - ఇతరులకు 'సేవ' చెయ్యడంలోనే ఆనందం ఉంది అని చెప్పేవాళ్ళూ ఇంతే. వాళ్లకు లోపల్లోపల ఘోరమైన self guilt ఉంటుంది. ఆ guilt ను కప్పి పుచ్చుకోవడం కోసం 'సేవ' అనే నాటకం ఆడుతూ ఉంటారు. మదర్ తెరెసా అభిమానికి కూడా ఇదే మాట చెప్పాను.

అసలైన నిజం ఏమంటే - లోకం నుంచి గతజన్మలలో మనం ఎంతో దోపిడీ చేసి ఉంటే తప్ప ఈ జన్మలో దానికి 'సేవ' చెయ్యాలని మనకు అనిపించదు. నిజం చెప్పాలంటే - ఒక జన్మలో దోచుకున్నవారే ఈ జన్మలో 'సేవ' చేస్తారు. అలా చేసి ఆ ఋణం తీర్చుకుంటారు. వారికా విషయం తెలీక, మేమేదో గొప్ప సేవ చేస్తున్నాం అన్న భ్రమముసుగులో బ్రతుకుతూ self glorify చేసుకుంటూ ఉంటారు.

ఒకసారి ఒక వివేకానందస్వామి భక్తునితో కూడా ఇదే వాదన జరిగింది.

'స్వామి, సేవకు అత్యంత ప్రాధాన్యత ఇచ్చారు. మీరు ఆయన అభిమానియై ఉండి ఇలా మాట్లాడతారేమిటి? అన్నాడు ఒక మిత్రుడు.

'ఏమన్నావ్? నేను ఆయన అభిమానినా? ఏం వాగుతున్నావ్? నాకెందుకా ఖర్మ?' అన్నాను.

అతను బిత్తరపోయాడు.

'అదేంటి అలా అంటున్నావ్?' అన్నాడు.

'అవును. అభిమాని అనే పదం ఏమిటి? ఆయనేమన్నా సినిమా నటుడా నేనాయన అభిమానిని కావడానికి? ఆయన నా దైవం. అభిమానం అనేది చాలా తక్కువ మాట. మాటలు సరిగ్గా వాడు' అన్నాను.

'ఓకే. ఆయన నీ దైవం అయినప్పుడు మరి ఆయన చెప్పిన సేవ అనే కాన్సెప్ట్ ను నువ్వెలా విమర్శిస్తున్నావ్?' అడిగాడు.

'ఒక సీక్రెట్ చెప్తా విను.' గొంతు తగ్గించి చిన్నగా అన్నా.

'ఏంటి?' అన్నాడు తనూ గుసగుసగా.

'నువ్వు నా ఫ్రెండ్ కాబట్టి నీకు ఈ రహస్యం చెబుతున్నా. ఎవరికీ చెప్పకు' అన్నా.

'ప్రామిస్. చెప్పను.' అన్నాడు చేతిలో చెయ్యి వేస్తూ.

'వారానికొకసారి వివేకానందస్వామి నాతో టెలీ కాన్ఫరెన్స్ లోకి వస్తూ ఉంటాడు. ఆయనే ఈ మాట చెప్పాడు.' అన్నాను.

అతని మొఖంలో భావం మారిపోయింది. అయోమయంగా చూశాడు.

'నమ్మలేవా? నీ ఖర్మ. అంటే ఫోన్లో కాదు. కలలో వచ్చి నాతో మాట్లాడి పోతూ ఉంటాడు. మొన్నోకసారి తనే ఇలా చెప్పాడు. "నేను బ్రతికి ఉన్నప్పుడు సేవ అనేది చాలా గొప్పది అనుకునేవాడిని. కానీ నా జీవితం చివరి దశలో నాకా నమ్మకం పోయింది. రెండో సారి అమెరికా యూరప్ అంతా తిరిగి వచ్చాక నా భావాలు చాలా మారిపోయాయి. ప్రపంచమంతా కుళ్ళు తప్ప ఇంకేమీ లేదని నేను నిశ్చయానికి వచ్చాను. ఈ కుళ్ళును ఎంత కడిగినా అది తగ్గదు. పోదు. కనుక మనకనవసరం అని నమ్మాను. ఈ విషయాన్నే నా సోదర శిష్యులతో నా చివరి దశలో చెప్పాను కూడా. వాళ్ళూ అదే మాటను నాతో అన్నారు.' అని నాతో పర్శనల్ గా ఆయనే చెప్పాడు అన్నాను కళ్ళు పెద్దవి చేస్తూ.    

'నేన్నమ్మను' అన్నాడు సీరియస్ గా.

'నువ్వు నమ్మితే ఎంత? నమ్మకపోతే ఎంత? అది నా కల. అది మా మధ్యన నడిచిన సంభాషణ. నేన్నమ్ముతాను. అది చాలు నాకు. పైగా చూశావా? నిజం చెబితే నువ్వే నమ్మటం లేదు. ఇంక లోకం ఎలా నమ్ముతుంది? కనుక ఆయన చెప్పింది నిజమే. లోకానికి అబద్దాలే కావాలి గాని నిజాలు కావు. లోకులంతా అబద్దపు బ్రతుకులే బ్రతుకుతున్నారనీ, వాళ్ళను మార్చడం అసాధ్యమనీ ఆయన చెప్పింది నీ కేసులోనే రుజువైంది. కనుక ఆయన చెప్పింది నిజమే.నా కొచ్చే కలలు కూడా నిజమే.' అన్నాను.

'అయితే లోకానికి సేవ చెయ్యడం అక్కరలేదా?" అన్నాడు.

'అస్సలక్కర్లేదు. మనది మనం కడుక్కుంటే చాలు' అన్నా మోటుగా.

'ఏంటో నీ గోల !! ఒకసారేమో సేవే గొప్పదంటావు. ఇంకోసారి సేవ వేస్ట్ అంటావు. అంతా అయోమయంగా ఉంది నీ తీరు.' అన్నాడు.

'నేను ఎప్పుడేది చెబితే అప్పటికదే నిజం. నా మాటలు వినాలంటే అలా ఉంటేనే వీలౌతుంది. నీ మనసును నువ్వు ఫాలో అవుతూ నన్ను కూడా ఫాలో అవ్వాలంటే కుదరని పని. ఎందుకంటే నా మనసును నేనే నమ్మను. కనుక నన్ను నమ్మాలంటే నీ మనసునూ నువ్వు నమ్మకూడదు. అంతేకాదు నేను చెప్పేవి కూడా పర్మనెంట్ గా నమ్మకూడదు. నేనో కొత్తది చెప్పేవరకూ పాతది నమ్మాలి. అదికూడా ఇంకో కొత్తది చెప్పనంతవరకే. ఆ తర్వాత దాన్నీ మర్చిపోవాలి. ఇలా పాతవి వదిలేస్తూ కొత్తవి ఒప్పుకుంటూ మళ్ళీ అవీ వదిలేస్తూ ఏదో తెలియని గమ్యం వైపు నాతో ప్రయాణించాలి. నాతో వ్యవహారం ఇలాగే ఉంటుంది.

నేను నీలా మురికిగుంటను కాను, ఒకటే నమ్మకం పెట్టుకుని పట్టుకుని కూచోడానికి. పారే నదిని. పారే నదిలో పాతనీరు పోతూ ఉంటుంది. కొత్త నీరు వస్తూ ఉంటుంది. అలాగే నా మాటలు కూడా మారిపోతూ ఉంటాయి. కానీ నువ్వు అర్ధం చేసుకోగలిగితే వాటిల్లో ఒకే రుచి ఉంటుంది. నీటి రుచి లాగే.' అన్నా సీరియస్ గా.

'నాయనా నీకో దణ్ణం. వస్తా.' అని వెళ్ళిపోయాడు వాడు.

'మోసమందు ఆధ్యాత్మిక మోసం వేరయా' - అన్నట్లుగా ఇదంతా  ఉంటుంది.

మొన్నీ మధ్యన ఇలాగే ఏవో మేగజైన్స్ కొని ఒక బుక్ స్టాల్ నుంచి బయటకు వస్తున్నా. సైకాలజీ బాగా తెలిసిన ఒక కుర్ర అయ్యప్ప వేషధారి ఎక్కడనుంచో సరాసరి నా ముందుకొచ్చి నిలబడి తన భుజం మీదున్న నల్ల కండువాను నా ముందు జోలెలాగా పట్టాడు. నా చేతిలో ఉన్న మేగజైన్స్ చూసి, 'అబ్బో చాలా కొన్నాడు. మనక్కూడా బాగా ఇస్తాడు' అనుకోని ఉంటాడు.

నేను సీరియస్ గా ఆ జోలి వైపు చూసి ' ఏంటి?' అన్నా.

'డబ్బులు' అన్నాడు నిర్లక్ష్యంగా.

వాడి మెడ మీద ఒక్క రౌండ్ హౌస్ కిక్ ఇద్దామని కాలు దానంతట అదే లేవబోయింది. కానీ రోడ్డుమీద ఒక అయ్యప్ప వేషంలో ఉన్నవాడిని తంతే బాగుండదని చాలా కంట్రోల్ చేసుకున్నా.

'ఎందుకు?' అన్నా.

'సేవ చేసుకోండి. పుణ్యం వస్తుంది' అన్నాడు వాడూ అంతే నిర్లక్ష్యంగా.

'నీ దగ్గర పుణ్యం అంత పుచ్చిపోతే రోడ్డుమీద ఎందుకు అడుక్కుంటున్నావ్?' అడిగా.

వాడు హర్ట్ అయ్యాడు.

'పోనీ ఒక రూపాయన్నా వెయ్యి' అన్నాడు ఏక వచనంలోకి దిగుతూ. ఇంతా చేస్తే వాడికి ఇరవై ఏళ్ళు కూడా ఉండవ్. స్టూడెంట్ లాగా ఉన్నాడు.

'పైసా కూడా ఇవ్వను. దొబ్బెయ్.' అన్నా సీరియస్ గా.

వాడు నావైపు చాలా సీరియస్ గా చూచి వెళ్ళిపోయాడు.

'సేవ' అనే పేరుతో మనిషి వీక్నెస్ ని బ్లాక్ మెయిల్ చెయ్యడం ఈ రోజుల్లో బాగా ఎక్కువైపోయింది. అసలు సేవ అనేది ఎవరికి కావాలి? ఈ రోజుల్లో డబ్బు లేనివాడు ఎవడున్నాడు అసలు?

సేవ అనేది ఎవరికి? ఎందుకు? అవసరం లేదు. లోకంలో జరిగే నాటకాలలో ఇదొక నాటకం అంతే. మనం ఎవరినీ నమ్మవలసిన పని లేదు. ఎవరికీ సేవ చెయ్యవలసిన పని లేదు. మన సేవ మనం చేసుకుంటే చాలు.

ఈ లోకంలో ఏదీ 'అన్యాయం' కాదు. ఇక్కడ ఎవరి ఖర్మ ప్రకారం వారికి జరుగుతూ ఉంటుంది. ఇంతకు ముందు నవ్వుతూ అహంకారంతో కళ్ళు పొరలు కమ్మి చేసుకున్నవాడు నేడు ఏడుస్తూ అనుభవిస్తూ ఉంటాడు. అది వాడి ఖర్మ. వాడి ఖర్మలో జోక్యం చేసుకునే పని మనకు లేదు. ఉండకూడదు అంతే.

ఏదో మనసులో పెట్టుకుని 'పిల్లా గడ్డికొస్తావా?' అన్నట్లుగానే, ఏవేవో మనసులో ఉంచుకుని 'మేం సేవ చేస్తున్నాం' అనుకోవడం కూడా ఉంటుంది.

నువ్వే ఒక కోతివి. ఒక కోతి, కోతుల సమూహానికి ఏం సేవ చెయ్యగలదు? దాని చాంచల్యాన్ని వదల్చుకుని ముందు అదొక మనిషిగా మారటమే అది చెయ్యవలసిన అతి ముఖ్యమైన పని.

ఒకడు కోతులకు అన్న సంతర్పణ చేద్దామని మొక్కుకున్నాడట. కోతులకు అన్న సంతర్పణా? అవి సక్రమంగా తింటాయా తిననిస్తాయా? మనుషులే బుద్ధిగా మౌనంగా కూచుని తినడం లేదు. ఇక కోతులు బుద్ధిగా తింటాయా? 

తనను తను ఉన్నతంగా మార్చుకుని ఇవాల్వ్ అయ్యే అసలైన పనిని వాయిదా వెయ్యడానికి ఉన్న అనేకమైన కుంటిసాకులలో 'సేవ' అనేది ఒక కుంటిసాకు. అంతే !!

ఇదే అసలైన ఆధ్యాత్మిక సత్యం.

read more " సమాజ సేవ "

Kabhi Tanhayiyon Me Yu - Mubarak Begum

Kabhi Tanhayiyon Me yun

Hamari Yaad Aayegi

అంటూ ముబారక్ బేగం తనదైన మధుర స్వరంలో ఆలపించిన ఈ గీతం 1961 లో వచ్చిన Hamari Yaad Aayegi అనే చిత్రం లోనిది.

ఎవరూ లేని ఏకాంతం ఎంతో గొప్పది. అందులోనే మన మనసులోకి మనం తొంగి చూచుకునే అవకాశం కలుగుతుంది. మనతో మనం మాట్లాడుకునే అదృష్టం లభిస్తుంది. ఆ ఏకాంతం లోనే మనకు మన గతం గుర్తొస్తుంది. మనం ప్రేమించినవాళ్ళూ, మనల్ని ప్రేమించిన వాళ్ళూ గుర్తొస్తారు. అప్పుడు మన కళ్ళల్లో కన్నీరు ఉబుకుతుంది. మన హృదయం ద్రవిస్తుంది. మన గొంతు మూగబోతుంది. వారిని మనకు దూరం చేసిన కాలం మీద మనకు తెలియని అసహనం కలుగుతుంది. ఏమీ చెయ్యలేని నిస్సహాయతకు మనమీద మనకే జాలేస్తుంది. మన అదుపులో లేని మన జీవితం అంటే విరక్తి పుడుతుంది. ఆ విరక్తి లోనుంచే ఒక కొత్త దారి కనిపిస్తుంది. అందులో నడిచే ధైర్యం మనకుండాలి.

ఇలాంటి పాటలు చాలా మధురమైనవి. వీటిల్లో వాయిద్యాల హోరు ఉండకపోవచ్చు. వెర్రెత్తించే  బీట్ ఉండకపోవచ్చు. కానీ ఒక గొప్పదైన రాగం ఉంటుంది. లోతైన భావం ఉంటుంది. అది మన హృదయాన్ని సుతారంగా తాకుతుంది. గతంలోకి మనల్ని పయనింపజేస్తుంది. మౌనంలో మనల్ని ముంచేస్తుంది.

ఈ పాట 'భీం పలాస్' రాగంలో చెయ్యబడింది. నా స్వరంలో కూడా ఈ మధురగీతాన్ని వినండి మరి.

Movie:-- Hamari Yaad Aayegi (1961)

Lyrics:-- Kidar Sharma

Music:--Snehal Bhatkar

Singer:-- Mubarak Begum

Karaoke Singer:-- Satya Narayana Sarma

Enjoy

---------------------------------------------

Kabhi tanhayiyo me yu – Hamari yaad aayegi

Andhere chaa rahe honge – Ke bijli koundh jayegi

Kabhi tanhayiyo me yu – Hamari yaad aayegi

Kabhi tanhaayiyo me yu

Ye bijli raakh kar – Jayengi tere – Pyar ki duniya - 2

Na phir tu jee sakega aur – Na tujh ko mout aayegi

Kabhi tanhayiyo me yu – Hamari yaad aayegi

Andhere chaa rahe honge – Ke bijli koundh jayegi

Kabhi tanhaayiyo me yu

Meaning

In your times of loneliness
You will certainly be reminded of me
While it is getting darker
the lightening may suddenly strike

That lightening may burn down your world of love
Then you will neither be able to live
nor be able to die
In your times of loneliness
You will certainly be reminded of me

తెలుగు స్వేచ్చానువాదం

నీ ఏకాంత క్షణాలలో
నా జ్ఞాపకాలు నిన్ను తప్పకుండా ముసురుకుంటాయి
చీకటి నిన్ను కమ్ముకున్నప్పుడు
అకస్మాత్తుగా మెరుపు నీకు కనిపిస్తుంది

ఆ మెరుపు నీ ప్రేమలోకాన్ని నీకు దూరం చేస్తుంది
అప్పుడు నువ్వు బ్రతకనూ లేవు
చావనూ లేవు

నీ ఏకాంత క్షణాలలో
నా జ్ఞాపకాలు నిన్ను తప్పకుండా ముసురుకుంటాయి
చీకటి నిన్ను కమ్ముకున్నప్పుడు
అకస్మాత్తుగా మెరుపు నీకు కనిపిస్తుంది...

read more " Kabhi Tanhayiyon Me Yu - Mubarak Begum "

మనసు - మాయ

వాస్తవం కంటే మనసే
నిన్నెక్కువగా బాధిస్తుంది
ఎందుకో తెలుసా?
వాస్తవం చిన్నది
మనసు భూతద్దం

జీవితం కంటే
ఆశే నిన్నెపుడూ అల్లాడిస్తుంది
ఎలాగో చెప్పనా?
జీవితం స్వల్పం
ఆశ అనంతం

భూతం కంటే మనసే
నిన్నెక్కువగా భయపెడుతుంది
ఎలాగంటావా?
భూతం అబద్దం
ఊహ నిజం

వాస్తవం కంటే ఊహే
నిన్నెపుడూ నడిపిస్తుంది
ఎందుకంటావా?
వాస్తవం చేదు
ఊహ మహాతీపి

జరిగిన దానికంటే
నువ్వూహిస్తున్నదే నిన్నెపుడూ
ఏడిపిస్తుంది
జరిగింది నీ చేతిలో లేదు
నీ ఊహ నీలో ఉంది

లోకం ఎలా ఉందనేది ప్రశ్న కాదు
నువ్వు దాన్నెలా చూస్తున్నావనేదే ముఖ్యం
విషయం ఏంటనేది ప్రశ్న కాదు
నువ్వు దాన్నెలా ఊహిస్తున్నావనేదే ముఖ్యం

తిండి ఏమిటన్నది సమస్య కాదు
దాన్ని నువ్వెలా తింటున్నావన్నదే సమస్య
బండ బరువెంతన్నది సమస్య కాదు
దాన్ని నువ్వెత్తగలవా లేదా అన్నదే సమస్య

లోకం నిన్నేమీ చెయ్యలేదు
నీ మనసే నిన్ను తల్లక్రిందులు చేస్తుంది
జీవితం నిన్నేమీ బాధించలేదు
నీ మనసే నిన్ను అల్లకల్లోలం చేస్తుంది

ప్రపంచం నీకు ముఖ్యం కాదు
నీ ఊహే నీకు ముఖ్యం
మనుషులు ఎప్పుడూ శాశ్వతం కాదు
నీ మనసే నీకు శాశ్వతం

మసిబారిన కళ్ళద్దాలతో
అసలైన దృశ్యాన్నెలా చూడగలవు?
మసకేసిన ఆలోచనలతో
సిసలైన సత్యాన్నెలా దర్శించగలవు? 

అద్దం శుభ్రంగా ఉంటే
ప్రతిబింబం చక్కగా కనిపిస్తుంది
మనసు నిర్మలమై నిలిస్తే
ప్రతిక్షణం స్వర్గమే నీకెదురొస్తుంది

అద్దాన్ని శుభ్రం చెయ్యడం నేర్చుకో
అంతా సవ్యంగా ఉంటుంది
మనస్సును మచ్చ లేకుండా ఉంచుకో
జీవితం దివ్యమై భాసిస్తుంది

నీ మనసు నీ చేతిలో ఉంటే
లోకం నిన్నేం చేస్తుంది?
నీ కళ్ళు స్వచ్చంగా ఉంటే
కుళ్ళు నీకెలా కనిపిస్తుంది?

మాయను గెలవడం అంటే
మనస్సును గెలవడమే
మాయ లేదని తెలుసుకోవడమంటే
మనసును లేకుండా చెయ్యడమే

అద్దాన్ని శుభ్రమైనా చెయ్యి
లేదా దాన్ని పూర్తిగా పక్కనైనా పెట్టు
అప్పుడే నీకు తెలుస్తుంది సత్యం
అప్పుడే నీ జీవితం నిజంగా ధన్యం...

read more " మనసు - మాయ "

బాబా రాం రహీం సింగ్ ఉదంతం- కొన్ని కొత్త కోణాలు

రాజకీయం వేరు. గురుత్వం వేరు. ఈ రెండూ ఎప్పుడూ కలవకూడదు. ముఖ్యంగా ఈ కలియుగంలో.

సత్యయుగంలో అయితే మనువు వంటి మహారాజులు అందరూ ధర్మాత్ములుగా ఉండేవారు. అప్పుడు రాజరికమూ గురుత్వమూ ఒక్కరిలోనే ఉండటానికి అభ్యంతరం ఏమీ ఉండేది కాదు. త్రేతాయుగంలో కూడా జనకమహారాజు వంటి కొందరు ఈ రెంటినీ తమలో కలిగి ఉండేవారు. కానీ ద్వాపరం వచ్చేసరికి ఈ స్థితి క్షీణించింది. కలియుగంలో అయితే ఇక చెప్పనక్కర లేదు.

కలియుగంలో ఈ రెంటినీ ఒకే మనిషిలో చూడాలంటే మనం మహమ్మద్ ప్రవక్తలోనే చూడగలం. ఎందుకంటే ఆయనకు ఎదురు తిరిగిన వారినందరినీ కత్తికొక కండగా నరుక్కుంటూ పోయాడు గనుక ఆయన మాట చెల్లింది. అదికూడా రాజరికం ఉన్న అరేబియాలో గనుక ఆయనకు ఎదురు తిరగడానికి ఎవడూ సాహసించలేదు. సాహసించిన కొద్దిమందీ దిక్కులేని చావు చచ్చారు.అదే ఇండియాలో నైతే 'దీన్ ఇ ఇలాహి' అంటూ ఒక కొత్త మతాన్ని స్థాపించి దానికి తానే గురువుగా+రాజుగా ఉందామనుకున్న అక్బర్ పాదుషా కూడా సక్సెస్ కాలేకపోయాడు. సిక్కు గురువులు మాత్రమే మళ్ళీ ఈ ప్రక్రియలో సక్సెస్ కాగలిగారు. వారిలో కూడా అందరూ కాలేకపోయారు. కొందరైతే అప్పటి మొఘల్ రాజుల చేతుల్లో నానాకష్టాలు పడ్డారు. గురు తేజ్ బహదూర్ అయితే ఔరంగజేబ్ ఉత్తర్వుల ప్రకారం శిరచ్చేదానికి గురయ్యాడు కూడా.

కానీ, అడుగడుగునా ఎత్తులు పైఎత్తులు జిత్తులతో కూడిన ఇప్పటి ప్రజాస్వామ్య వ్యవస్థలో గురువులే రాజులుగా ఉండాలంటే ఎలా సంభవం అవుతుంది? ఇక్కడే రాం రహీం  కూడా ప్రస్తుతం దెబ్బ తిన్నాడు.

ప్రస్తుతం ఉన్నట్టుండి రాం రహీం సింగ్ కు వ్యతిరేకంగా దేశమంతా మాట్లాడుతోంది. ప్రతి చానలూ ఆయన మీద దుమ్మెత్తి పోస్తోంది. ప్రతి పత్రికా ఆయన్ను 'బలాత్కారీ బాబా' అని తిడుతోంది. యూ ట్యూబులో ప్రతి ప్రైవేట్ న్యూస్ చానలూ, హనీప్రీత్ తో ఆయనున్న ఫోటోలను మాటి మాటికీ చూపిస్తూ బురద చల్లుతున్నాయి. కానీ ఆయన జాతకం అతను మరీ అంత విలన్ అని చూపించడం లేదు. మనుషులు అబద్దాలు చెప్పవచ్చు. కానీ గ్రహాలు అబద్దాలు చెప్పవు. ఎక్కడో ఏదో తేడా ఉంది. ఏంటా ఈ వింత? అని కొంత పరిశోధన చెయ్యగా కొన్ని క్రొత్త వాస్తవాలు వెలుగు చూస్తున్నాయి. వాటిని ఈ పోస్ట్ లో పరిశీలిద్దాం.

రాం రహీం సింగ్ కు పంజాబ్, రాజస్థాన్, హర్యానా రాష్ట్రాలలో విపరీతమైన ఫాలోయింగ్ ఉంది. అది ఎంతగా ఉందీ అంటే నిన్నా మొన్నటి దాకా ముఖ్యమంత్రులే ఆయన కాళ్ళకు నమస్కారం పెట్టి ఆశీస్సులు తీసుకునేవారు. నరేంద్ర మోడీ, అమిత్ షా, సుష్మా స్వరాజ్ వంటి దిగ్గజాలు ఆయన్ను దర్శించి ఆశీస్సులు పొందిన వారే. దీనికి కారణం ఆయన దగ్గర ఉన్న బలమైన ఓటు బ్యాంకు. "ఫలానా పార్టీకి ఓటెయ్యండి" అని పబ్లిక్ గా ఆయన తన అనుచరులకు వేదిక మీద నుంచి చెబుతూ ఉంటాడు. ఆయన భక్తులు దాదాపు కోటిమంది ఉన్నారట. అంటే కోటి ఓట్లు ఆయన చేతిలో ఉన్నట్లే. అందుకే రాజకీయ నాయకులందరూ ఆయన చుట్టూ ఇన్నాళ్ళూ ప్రదక్షిణలు చేశారు. అంతేగాని ఆయనలోని దివ్యత్వాన్ని చూచి కాదు. ఆ మాటకొస్తే ఒక మనిషిలోని దివ్యత్వాన్ని గ్రహించే శక్తి రాజకీయ నాయకులకు ఎలా ఉంటుంది? అలా చెయ్యాలంటే వీళ్ళలో ముందు అది ఉండాలిగా??

గత ఇరవై ఏళ్లుగా అతను ఏ పార్టీని సపోర్ట్ చేస్తే అదే అధికారంలోకి వస్తూ వచ్చింది. కానీ కొంత కాలంగా ఇతనికీ రాజకీయ పార్టీలకూ చెడుతూ వచ్చింది. కొన్ని నెలలుగా రాం రహీం సొంత పార్టీ పెట్టే ఆలోచనలో ఉన్నాడు. అదే జరిగితే ఇన్నాళ్ళూ అతను సపోర్ట్ చేస్తూ వస్తున్న పార్టీలు చతికిల బడతాయి.వారికి పోటీగా పంజాబ్, హర్యానా, రాజస్థాన్ లలో అతనొక బలమైన రాజకీయశక్తిగా ఎదుగుతాడు. వీరి చెయ్యి దాటిపోవడమే గాక వీరిని శాసించే స్థితికి చేరిపోతాడు. ఇందులో సందేహం లేదు. అందుకేనా పదిహేను ఏళ్ళ నుంచీ నానుతున్న రేప్ కేసులో ఇప్పటికిప్పుడు హటాత్తుగా తీర్పు వెలువడింది? అతన్ని జైల్లో పెట్టింది?

రాజకీయంలో ఏదీ తప్పు కాదు. కానీ ఆధ్యాత్మికంలో ప్రతిదీ తప్పే. ఒక బాబా ఒకమ్మాయితో దగ్గరగా కూచుంటే అది తప్పు. ఆ అమ్మాయి నెత్తిమీద చెయ్యి పెడితే తప్పు. ఆ అమ్మాయితో నవ్వుతూ మాట్లాడితే ఇంకా పెద్ద తప్పు. టీ షర్టు వేసుకుంటే ఇంకా ఘోరమైన తప్పు. స్వామీజీ అనేవాడు శవంలాగా చేవచచ్చి ఉండాలి గాని ఈ వేషాలన్నీ ఏమిటి? అంటారు. అతను నవ్వకూడదు. గబగబా నడవకూడదు.యాక్టివ్ గా బలంగా ఉండకూడదు. శవం లాగా మొహం పెట్టి నీరసంగా ఏడుస్తూ ఉండాలి. ఒకవేళ అతను ఏ అమ్మాయి చెయ్యన్నా పట్టుకుంటే, చానళ్ళు ఆ ఫోటోను పదే పదే చూపిస్తూ గోలగోల చేస్తాయి. కానీ అలాంటి పనులనూ అంతకంటే ఇంకా పెద్ద పనులనూ రాజకీయులు ప్రతి రోజూ చేస్తున్నా అది తప్పు కాదు. అసెంబ్లీలో నాయకీమణులు పబ్లిగ్గా లకారమూ ముకారమూ వాడి తిట్టుకున్నా అవి లెక్కలోకీ రావు.

పవర్ లో ఎవడుంటే వాడికి భయపడటమూ, వంగొంగి దణ్ణాలు పెట్టడమూ, వాడికి బాకా ఊదటమూ, పవర్ లేనివాడిని బ్లాక్ మెయిల్ చెయ్యడమూ, మన పత్రికలకూ చానళ్లకూ తెలిసినట్లు ఇంకెవరికీ తెలియదు. అందుకే నిన్నా మొన్నటి దాకా రాం రహీం గొప్ప సాధువు, గురువు అంటూ పొగిడిన వారే ఈనాడు అతనొక కామాంధుడనీ దుర్మార్గుడనీ తెగడుతున్నారు. రేపేమంటారో చూడాలి మరి !!

యోగా గురు రాందేవ్ బాబాను ఒక కమెడియన్ను చేసి ఇమిటేట్ చేస్తూ ఆయన యోగాను ఒక అసభ్యమైన డాన్సుగా చూపిస్తూ 'ఆనందో బ్రహ్మ' అనే ఒక సినిమాలో ఈ మధ్యన చూపించారు. అదే ఒక పోపునో, లేదా ఒక జాకీర్ నాయక్ నో చూపించగలరా అలా? కనీసం అలాంటి ధైర్యం చెయ్యగలరా??

ఇంగ్లీషులో ఒక సామెతుంది. Name the dog and hang it అని. అంటే - ఒక కుక్కను మనం చంపాలి అనుకుంటే ముందు దానిని పిచ్చికుక్కగా ముద్ర వెయ్యాలి. ఆ తర్వాత దానిని చంపడం సులభం అవుతుంది.ముద్ర వెయ్యకపోతే నువ్వొక్కడివే దాని వెంట పడాలి.  అది ఎదురు తిరిగి నిన్ను కరిస్తే అసలుకే మోసం వస్తుంది. కానీ, ఎప్పుడైతే దానిని పిచ్చికుక్క అని ముద్ర వేసి జనం చేత నమ్మించామో, అప్పుడు నీతో పాటు జనమంతా దాన్ని రాళ్ళతో కొడతారు. అప్పుడు నీ పని సులభం అవుతుంది. అది తేలికగా చస్తుంది. ఇదే రాజనీతి !!

అలాగే, ఒక స్వామీజీనో ఇంకో గురువునో పతనం చెయ్యాలి అనుకుంటే వాడి మీద కొన్ని ఎలిగేషన్స్ తేవాలి. ఈ ఆరోపణలు సాధారణంగా రెండు రకాలుగా ఉంటాయి. ఒకటి బ్లాక్ మనీ వ్యవహారాలు. అది ఎక్కువగా ఫోకస్ చెయ్యరు. ఎందుకంటే అప్పుడా స్వామీజీ తనతో నల్ల సంబంధాలున్న నాయకుల జాతకాలన్నీ బయటపెడతాడు. వీరిలో ఎవరి జాగ్రత్తలో వాళ్ళుంటారు. ఒకరి గుట్టుమట్లు ఒకరి దగ్గర ఉంచుకుంటారు. కనుక ఈ యాంగిల్ ఎక్కువ ఫోకస్ చెయ్యరు. ఇక మిగిలింది అమ్మాయిల వ్యవహారాలు. ఇదైతే స్వామీజీ పరువు తేలికగా పోతుంది. ఇందులో నాయకులను వాడు ఇరికించలేడు. కనుక స్వామీజీ ఎవరైనా అమ్మాయితో కొంచం క్లోజ్ గా మసలుతూ ఉంటే, వాళ్ళిద్దర్నీ ఫ్రేం చేస్తే సరిపోతుంది. దానికి సపోర్టుగా మనుషులను రెడీ చెయ్యడమూ, కేసులు పెట్టించడమూ వగైరా పనులు చెయ్యడానికి మన దేశంలో పది రూపాయలకు పదిమంది దొరుకుతారు.

ఆ స్వామీజీ మన చెప్పు క్రింద తేలులాగా అణిగి మణిగి పడుంటే పరవాలేదు. కానీ వాడు మనల్ని మించి ఎదుగుతూ ఉంటే మాత్రం వాణ్ని తొక్కాల్సిందే. పైగా వాడు ఏదో తన ఉపన్యాసాలూ, తన భక్తులూ, ఇంతవరకూ చూసుకోకుండా, రాజకీయ రంగంలోకి అడుగు పెడుతున్నాడూ అంటే తప్పకుండా వాడినొక విలన్ గా ముద్రవేసి పక్కకు తప్పించాల్సిందే. వాడి పరువుతీసి వాడిని శాశ్వతంగా సమాధి చెయ్యాల్సిందే !

ఒకసారి ఇలాంటి నిర్ణయం తీసుకున్నాక దానికి వత్తాసుగా మాట్లాడే వాళ్ళు ఎందఱో వస్తారు. ఈ దేశంలో డబ్బు చెయ్యలేని పని ఏముంది? కొన్నేళ్ళ క్రితం 'జన కళ్యాణ్ జన జాగరణ్' అంటూ ప్రజల్లోకొస్తున్న కంచి శంకరాచార్య జయేంద్ర సరస్వతి తననొక గదిలోకి పిలిచి తన చెయ్యి పట్టుకున్నాడంటూ ఒక మధ్య వయస్సు మహిళ టీవీ చానల్స్ లో చాలా అసభ్యంగా మాట్లాడింది. పత్రికలన్నీ ఆమె స్టేట్మెంట్ ను ప్రముఖంగా ప్రచురించి, స్వామీజీ మీద బురద చల్లాయి. మరి ఏమైందో ఏమో ఉన్నట్టుండి తెరమీద నుంచి ఆమె హటాత్తుగా మాయమై పోయింది. ఆ తదుపరి ఆమె మళ్ళీ ఎక్కడా కనిపించలేదు. ఆ దెబ్బతో స్వామీజీ పెట్టిన సంస్థా మూగబోయింది.

'రాజకీయంలోకి అడుగు పెడుతున్నా' అంటూ స్టేట్మెంట్ ఇచ్చిన బ్రదర్ పాల్ సడెన్ గా మాయమై పోయాడు. అప్పటి దాకా పెద్ద సౌండుతో వినిపించిన ఆయన వాయిస్ హటాత్తుగా మూగబోయింది. మంచి ఫాలోయింగ్ తో ఎదుగుతున్న స్వామి నిత్యానంద హటాత్తుగా రంజిత ఉదంతంతో కేసుల్లో ఇరుక్కుని బద్నాం అయిపోయాడు. 'నేనూ రాజకీయ పార్టీ పెడతా' అని ఒకటి రెండు స్టేట్మెంట్లు ఇచ్చిన బాబా రాం దేవ్ ఉన్నట్టుండి ఆ తర్వాత మాట్లాడటం మానేశాడు. ఆయన కూడా ఒక మహిళతో అతుక్కుని కూచున్నట్టు, బాగా లోనెక్ జాకెట్ వేసుకున్న ఒక సినీ నటీమణివైపు తదేకంగా చూస్తున్నట్టు కొన్ని ఫోటోలు హటాత్తుగా నెట్లో ప్రత్యక్షమయ్యాయి. పతంజలి బ్యానర్ క్రింద అతని బిజినెస్ కూడా ప్రశ్నార్ధకమే అంటూ కొందరు హటాత్తుగా మాట్లాడటం మొదలు పెట్టారు. ఆ దెబ్బతో ఆయన ప్రస్తుతం సైలెంట్ అయిపోయాడు. నార్త్ లో మంచి ఫాలోయింగ్ ఉన్న ఆశారాం బాపూ చూద్దామంటే చైల్డ్ మోలేష్టేషన్ కేసుల్లో ఇరుక్కుని జైలు పాలయ్యాడు. జగ్గి వాసుదేవ్ ఏమో అడవిని ఆక్రమించాడన్న అభియోగాన్ని ఎదుర్కొంటున్నాడు. ఈ విధంగా ప్రజాదరణ ఉన్న అందరు స్వాములూ కేసుల్లో ఇరుక్కుంటున్నారు.

ఓషో కూడా ఇలాగే రాజకీయులతో పెట్టుకుని పతనం అయ్యాడు. ఆయన అమెరికాకు పారిపోవడానికి కారణం, మన దేశంలో నాయకులను, రాజకీయ వ్యవస్థను నోటి కొచ్చినట్లు తిట్టడమే. అమెరికాలో ఒరెగాన్ రాష్ట్రంలో ఆయన అడుగు పెట్టినప్పుడు అంతా బాగానే ఉంది. కానీ కాలక్రమేణా ఆయన అక్కడ నాయకులనూ, రోనాల్డ్ రీగన్నూ విమర్శించడమూ, క్రైస్తవాన్ని విమర్శించడమూ సాగించాడో, ఆయనకు రాజకీయ కష్టాలు మొదలయ్యాయి. ఒరెగాన్ ఎన్నికలలో మేయర్ గా తన శిష్యులను ఎప్పుడైతే నిలబెట్టాలని ఆయన ప్లాన్ చేశాడో అమెరికా నాయకత్వం ఆయన్ను డైరెక్ట్ గా ఎటాక్ చెయ్యడం మొదలు పెట్టింది. కేసుల్లో ఇరికించింది. దేశం నుంచి వెళ్ళగొట్టింది. చివరకు మళ్ళీ ఇండియాకు చేరి అనారోగ్యంతో ఆయన చనిపోయాడు. అమెరికా ప్రభుత్వం ఆయనకు విషప్రయోగం చేసిందని కూడా పుకారుంది. ఆయనే ఈ విషయాన్ని బాహాటంగా చెప్పాడు.

'ఆటో బయాగ్రఫీ ఆఫే యోగి' వ్రాసిన పరమహంస యోగానంద గారి మీద కూడా అభియోగాలున్నాయి. 'లివింగ్ విత్ హిమాలయన్ మాస్టర్స్' అనే పుస్తకాన్ని వ్రాసిన స్వామి రామా మీద కూడా సెక్స్ అభియోగాలున్నాయి. సిద్ధయోగ పీఠం అధినేత స్వామి ముక్తానంద పరమహంస మీదైతే లెక్కలేనన్ని సెక్సు అభియోగాలున్నాయి. అమెరికాలో ఈయన మీద మిలియన్ల డాలర్ల కేసులు నమోదయ్యాయి. చివరకు వివేకానంద స్వామిని కూడా 'అమెరికాలో శిష్యురాళ్ళతో ఫోటోలు దిగాడని' విమర్శించిన వాళ్ళున్నారు. ఆయన బ్రతికున్న సమయంలో రమణ మహర్షినీ విమర్శించారు. 'ఆ గోచీ ఏమిటి? ఆ అవతారం ఏమిటి? క్యాబరే డాన్సర్ లాగా?' అని చలమే ఆయన్ను విమర్శించాడు.

మామూలుగా విమర్శలనేవాటిని మనం అర్ధం చేసుకోవచ్చు. ప్రజాస్వామ్యంలో విమర్శ అనేది మామూలే. విమర్శలకు గురికాకుండా ఎవడూ లేడు. కానీ కేసులు, కోర్టులు. జైళ్ళు, ఏంటిదంతా? ప్రజాదరణ పొందుతున్న గురువుల పైన హటాత్తుగా కేసులు రావడం, వాళ్ళు బద్నాం కావడం వెనకాల ఉన్న రహస్యం ఏమై ఉండొచ్చు?

ఒక వ్యక్తి మంచి ప్రజాదరణను సంపాదించి ఎదుగుతూ ఉన్నప్పుడు ధనబలాన్ని జనబలాన్ని సమీకరిస్తున్నప్పుడు రాజకీయ నీలినీడలు అతని మీద తప్పకుండా పడతాయి. ఎందుకంటే అతనొక ఓటు బ్యాంకు అవుతాడు గాబట్టి. అతన్ని తమ చెయ్యి దాటి పోకుండా, తమ కంట్రోల్ లో ఉండేట్టు చెయ్యాలంటే మార్గం ఒకటే. ఏదో ఒక కేసులో వాడిని ఇరికించి,ఆ కేసు ఎటూ తేలకుండా చేసి, వాడిని నిత్యభయంలో ఉంచి బ్లాక్ మెయిల్ చేస్తూ చెప్పు కింద తేలుగా వాడిని తొక్కి ఉంచడమే చాణక్య నీతి.

అయితే పైన చెప్పబడిన వివాదాస్పద గురువులందరూ నీతిమంతులా? వాళ్ళేం తప్పులూ చెయ్యలేదా? అని ప్రశ్నిస్తే, నాకు తెలీదనే నేను చెబుతాను. కోర్టు తీర్పు ఇచ్చాక మనం దానిని గౌరవించాలి. దానికి ఎదురు మాట్లాడరాదు.  కానీ కొంత out of the box thinking మనం చేసుకోవచ్చు. అందులోనూ ఏదీ అసాధ్యం కాని మన దేశంలో, ముఖ్యంగా మీడియా నిజాలు ఎప్పుడూ వ్రాయని, టీవీలు నిజాలను ఎప్పుడూ చూపని మన దేశంలో, అసలు నిజం ఏమై ఉండొచ్చా అని ఊహించడం తప్పు కాదు.

ఇవన్నీ చూచాక నాకొకటి అనిపిస్తోంది.

మన దేశంలో మనం దేనినీ నమ్మలేం. ఇక్కడ ఏదైనా సాధ్యమే. అందుకని, గురువులందరూ రాజకీయాలకు సాధ్యమైనంత దూరంగా ఉంటే వారికీ మంచిది దేశానికీ మంచిది. కంచి పరమాచార్యను వీరందరూ ఆదర్శంగా తీసుకోవాలి. ఆ విధంగా సింపుల్ గా వారందరూ బ్రతకాలి. అప్పుడే వాళ్ళు సేఫ్ గా ఉంటారు. ఏమాత్రం దారి తప్పి రాజకీయులతో, ప్రముఖ వ్యాపార టైకూన్ లతో సంబంధాలు పెట్టుకున్నారా, వాళ్ళు త్రాచుపాములతో చెలగాటం ఆడుతున్నట్లే అని గుర్తుంచుకోవాలి. ఎందుకంటే ఆ త్రాచులు ఎప్పుడు కాటు వేస్తాయో ఎవరికీ తెలియదు గనుక.

రాం రహీం సింగ్ ఆశ్రమ స్కూళ్ళు, హాస్టళ్ళ నుంచి అమ్మాయిలను ఖాళీ చేయిస్తున్నప్పుడు ఆ అమ్మాయిలు ఎదురు తిరిగి - 'మమ్మల్ని ఇక్కడ నుంచి ఎందుకు ఖాళీ చేయిస్తున్నారు? మాకిక్కడ ఏమీ కాలేదు. మేము హాయిగా ఉన్నాం. మేము ఖాళీ చెయ్యం' అని ఎదురు తిరగడమే, మీడియాలో చూపిస్తున్నంత దరిద్రంగా ఆ ఆశ్రమం లేదనడానికి నిదర్శనం. కానీ వారిని బలవంతంగా ఖాళీ చేయించి వారి వారి ఊళ్లకు పంపేశారు.

డేరా సచ్చా సౌదా స్కూళ్ళు, కాలేజీలు, హాస్టళ్ళలో చదువూ, సత్ప్రవర్తనా, క్రమశిక్షణా బ్రహ్మాండంగా ఉంటాయని అక్కడ చదువుతున్న వాళ్ళు, వారి తల్లిదండ్రులూ చాలామంది టీవీలలో చెబుతున్నారు. వీరి అభిప్రాయాలను ఎవరూ లెక్కలోకి తీసుకోవడం లేదు. ఎంతసేపూ హనీ ప్రీత్ సింగ్ ఫోటోలు అవే అవే చూపడం తప్ప !!

పదిహేనేళ్ళ క్రితం రేప్ కేసు హటాత్తుగా ఇప్పుడే ఎలా కళ్ళు తెరిచిందో, అంతే హటాత్తుగా తీర్పు ఎలా వచ్చిందో, అది కూడా, రాం రహీం తన రాజకీయ పార్టీని ప్రకటించబోయే ముందుగా - అనేది కొంచం విభిన్నంగా ఆలోచించే ప్రతివారూ ఆలోచించవలసిన విషయం. నిన్నా మొన్నటిదాకా ఆయన్ను భుజాలకు ఎత్తుకుని తిరిగిన వారందరూ ఉన్నట్టుండి తెగ తిట్టడమూ గమనార్హమే. వాళ్ళ లొసుగులు ఎక్కడ బయటకొస్తాయో అని ఎవడి భయం వాడిది కదా మరి. అందుకే గుంపులో గోవిందా అని అందరూ కలసి రాం రహీం ను తిట్టడం సాగిస్తే అందరూ సేఫ్ కదా !!

అయినా - రాజకీయమూ, డబ్బూ, పవరూ - ఆధ్యాత్మిక గురువులకెందుకు? ఆల్టర్నేట్ పవర్ సెంటర్స్ ఎదగడం ఏ నాయకుడు సహిస్తాడు గనుక? అందులోనూ ఏదైనా సాధ్యమయ్యే మన దేశంలో? కానీ ప్రాక్టికల్ గా ఇది సాధ్యం కాదు. ఎప్పుడైతే ప్రజా ఫాలోయింగ్ మొదలైందో అక్కడ పవర్ సెంటర్ ఏర్పడుతుంది. ఆటోమేటిగ్గా రాజకీయులూ, వ్యాపారవేత్తలూ అక్కడ అడుగు పెడతారు. ఇంకేముంది? మాఫియా కార్యకలాపాలూ హవాలా కార్యకలాపాలూ మొదలౌతాయి. ఆ తర్వాత ఏం జరుగుతుందో చూస్తున్నాం కదా?

మన దేశంలో అన్నీ కల్తీనే. ఇక్కడ నల్లనిదంతా తారూ కాదు, తెల్లనిదంతా ఫినాయిలూ కాదు. మనం చూస్తున్న న్యూస్ వెనుక అసలైన నిజానిజాలేంటో ఆ పరమాత్మునికే ఎరుక. తొందరపడి నమ్మామో పప్పులో కాలేసినట్లే.

పీవీ గారు చెప్పినట్లు 'చట్టం తనపని తను చేసుకుపోతుంది' అని నమ్మి బుద్ధిగా ఉండటమే ప్రస్తుతం మనం చెయ్యగలిగిన అతిగొప్ప పని !!

read more " బాబా రాం రహీం సింగ్ ఉదంతం- కొన్ని కొత్త కోణాలు "

నిజం

తను లేకుంటే వెలుగే లేదని
రాత్రిపూట ఎగురుతూ అనుకుంటుంది
మిణుగురు పురుగు
కానీ...అది ఎగరకపోయినా
సూర్యుడు ఉదయిస్తూనే ఉన్నాడు

తను అరవకపోతే వర్షం కురవదని
గుంటలో కూచుని అనుకుంటుంది
సణుగుడు కప్ప
కానీ...అది అరవకపోయినా
కుంభవృష్టి కురుస్తూనే ఉంది

తను కుయ్యకపోతే తెల్లవారదని
బుట్టలో కూచుని అనుకుంటుంది
తెలివిలేని కోడి
కానీ...అది కుయ్యకపోయినా
తెల్లవారి వెలుగొస్తూనే ఉంది

తను లేకపోతే ప్రపంచం నడవదని
అహంతో అనుకుంటాడు
మిడిసిపాటు మనిషి
కానీ...అతను పోయినా
ప్రపంచం నడుస్తూనే ఉంది

అన్నీ తనకు తెలుసని విర్రవీగే మనిషికి
ఏ క్షణం తను పోతాడో తెలియదు
అన్నీ తన చేతిలో ఉన్నాయనుకునే వాడికి
తన చావు తన చేతిలో లేదని తెలియదు

ఇదంతా నాదే అనుకునే అజ్ఞానికి
తనకు ముందూ తనకు తర్వాతా
ఇది వేరెవరిదో అవుతుందన్న నిజం
ఎంతమాత్రమూ గురుతు రాదు

ఈ క్షణమే సత్యమని భ్రమించేవాడికి
మంచీ చెడూ ఎంత మాత్రమూ కనిపించదు
కళ్ళు తెరిచి చూస్తే అంతా తేటతెల్లం
ఒళ్ళు మరిచి ప్రవర్తిస్తే అంతా శూన్యం

అనంత కాలగమనంలో
ఈ ఒక్క జీవితం ఎంత?
అనేక కోట్ల జన్మల్లో
ఈ ఒక్క జన్మ ఎంత?

నిజానికి తానెవరు?
నిజంగా తనవారెవరు?
ఈ రెండూ తెలిస్తే చాలదా మనిషికి?
అలా జీవిస్తే చాలదా నిజానికి?

read more " నిజం "

ఛిన్నమస్తా సాధన - 7 (యజ్ఞస్వరూపం)

ఇప్పటిదాకా బౌద్ధ తంత్రాలలో ఈ దేవత గురించి ఏముందో తెలుసుకున్నాం. హిందూతంత్రాలు ఈ దేవతను గురించి ఏమంటున్నాయో ఇప్పుడు చూద్దాం.

యజ్ఞరూపాం యజ్ఞదాత్రీం యజ్ఞగ్రహణకారిణీం

మోక్షదాం సర్వసత్త్వేభ్యశ్చిన్నమస్తాం నమామ్యహం

(నీవు యజ్ఞరూపిణివి. యజ్ఞాన్ని ఇచ్చేదానివి. యజ్ఞాన్ని స్వీకరించేదానివి. అందరు జీవులకూ మోక్షాన్ని ఇచ్చేది నీవే. అటువంటి ఛిన్నమస్తా మహాదేవికి నమస్కరిస్తున్నాను)

కొన్ని హిందూతంత్రాలు ఈమెను యజ్ఞస్వరూపంగా భావించాయి. తన చెలికత్తెల దాహం తీర్చడానికి తన రక్తాన్ని ధారపోస్తున్న కరుణామూర్తిగా ఈమెను ఇవి కీర్తించాయి. ఈ భావన చాలా లోతైనది. తారాదేవి యొక్క కరుణామయ స్వరూపానికి ఇది సంకేతం.

లోకంలో ప్రతి గురువూ, సిద్ధపురుషుడూ, ప్రవక్తా, అవతారపురుషుడూ చేసిన పని ఇదే. లోకం కోసం తన జీవితాన్ని, శరీరాన్ని, కాలాన్నీ రెండో ఆలోచన లేకుండా త్యాగం చెయ్యడమే వారు చేసిన పని. ఈ 'త్యాగం' అనే కాన్సెప్ట్ ఈ దేవతలో ప్రధానమైన గుణం. దీనికే మరో పేరు 'యజ్ఞం'.

యజ్ఞం అంటే ఏదో అర్ధం కాని గహనమైన విషయం అని చాలామంది అనుకుంటారు. ఇప్పటి భాషలో సింపుల్ గా చెప్పాలంటే  యజ్ఞమంటే - 'రీ సైక్లింగ్'. భగవద్గీతలో కూడా ఇదే భావం ఉంది.

భగవద్గీత మూడో అధ్యాయం 11, 12 శ్లోకాలు చూడండి.

శ్లో|| దేవాన్ భావయతానేన తే దేవా భావయంతు వ:
పరస్పరం భావయన్త: శ్రేయం పరమవాప్స్యధా

అర్ధం:--

ఓ మానవులారా! మీరు యజ్ఞముల ద్వారా దేవతలను తృప్తి పరచండి. అలా తృప్తి చెందిన ఆ దేవతలు మీరు అడిగినవి ఇస్తారు. ఈ విధంగా ఒకరికొకరు పోషకులై ఉండండి. అప్పుడు లోకం సుభిక్షంగా ఉంటుంది.

అంటే ఏమిటి? దేవతలంటే ఎవరు? దేవతలంటే ప్రకృతి శక్తులే. అంటే భూమి, నీరు, అగ్ని, వాయువు, అంతరిక్షం, సూర్యుడు, చంద్రుడు, నక్షత్రాలు ఇవే వేదకాలపు దేవతలు. 

"వీటిని మీరు పాడు చెయ్యకండి. వీటిని జాగ్రత్తగా సంరక్షించుకోండి. అప్పుడు అవి కూడా మిమ్మల్ని చల్లగా చూస్తాయి. అప్పుడు ప్రకృతి బాగుంటుంది. లోకం అంతా బాగుంటుంది" - అన్న ప్రకృతి సూత్రాన్ని భగవద్గీత ఇక్కడ చెబుతున్నది.

మనమేం చేస్తున్నాం?? భూమినీ, జలాన్నీ, గాలినీ మనం ఇష్టానుసారం పాడు చేస్తున్నాం. దాని ఫలితాన్ని భూకంపాల రూపంలో, వరదల రూపంలో, వాయు కాలుష్యం రూపంలో మనం తిరిగి అనుభవిస్తున్నాం. అంటే, భగవద్గీతలో చెప్పబడిన యజ్ఞధర్మాన్ని మనం ఏమాత్రం పాటించడం లేదు. అందుకే ఇన్నిన్ని విపత్తుల రూపంలో ప్రకృతి మనమీద కన్నెర్ర చేస్తున్నది.

భగవద్గీతను గౌరవించడమంటే శ్లోకాలు బట్టీ పట్టడంలో చిన్నపిల్లలకు పోటీ పెట్టి ప్రైజులివ్వడం కాదు. ఆ శ్లోకాలు ఏం చెబుతున్నాయో, ఎలా బ్రతకమని మనకు చెబుతున్నాయో ముందు మనం నేర్చుకుని ఆచరిస్తూ అప్పుడు మన పిల్లలకు చెప్పడం. కానీ ఈ పనిని ఎవ్వరూ చెయ్యరు. ఇదే అసలైన విచిత్రం !! 

యజ్ఞమంటే ఒక్క హోమం మాత్రమే కాదు. కాసేపు చేసే హోమమే యజ్ఞమనేది చాలా క్రూడ్ భావన. నిత్యజీవితమే యజ్ఞమనేది ఉదాత్తమైన భావన. గీతలో చెప్పబడింది ఈ ఉదాత్త భావనే గాని ఉత్త చెత్తభావన కాదు.

మన దేశంలో అక్కడక్కడా యజ్ఞాలు చేస్తూ ఉంటాం. కానీ ప్రకృతిని మాత్రం పట్టించుకోం. ఆ యజ్ఞం జరిగిన తర్వాత చూస్తే వాళ్ళు వాడిన వస్తువులూ చెత్తా చెదారం అంతా అడ్డదిడ్డంగా పారేసి ఉంటాయి. వాటిని రోజుల తరబడి ఎవ్వరూ క్లీన్ చెయ్యరు. ఇక వాళ్ళు చేసేది ఏం రకమైన యజ్ఞమో ఎవరికీ అర్ధం కాదు. అదే అమెరికాలో నేను చూచాను. అక్కడ ప్రకృతిని చాలా చక్కగా సంరక్షిస్తారు. పరిశుభ్రత పాటిస్తారు. కనుక మనతో పోలిస్తే వాళ్ళే సరైన యజ్ఞం చేస్తున్నారని నా భావన. అందుకే అక్కడ ప్రతి మూడురోజులకూ ఒక వర్షం పడుతూ ఉంటుంది. మనకేమో వర్షాకాలం ఎప్పుడొచ్చిందో ఎప్పుడు పోయిందో కూడా తెలీదు. వస్తే వరదలు రావాలి తుఫానులు రావాలి. మామూలు వర్షం మాత్రం మనకు పడదు. ఇదీ మన యజ్ఞాల డాబు !!

ఈ ఒక్క కాన్సెప్ట్ సరిగ్గా అర్ధమైతే మనిషి జీవితం మొత్తం  క్లియర్ గా మనకు అర్ధమైపోతుంది. వేరే వాళ్ళ జీవితం మనకు అర్ధం కానక్కర లేదు. మన జీవితమే మనకు స్పష్టంగా అర్ధమౌతుంది. ఎందుకంటే ఈ సూత్రం ప్రకృతికి ఎంత వర్తిస్తుందో మనిషి జీవితానికి కూడా ఇంకా ఎక్కువగా వర్తిస్తుంది.

నేను వ్రాసేవన్నీ ప్రాక్టికల్ గా నా జీవితంలో చూచి, ఆలోచించి, అన్వయించుకుని తెలుసుకున్న సత్యాలే గాని ఊహలు కావు.

కొన్నేళ్ళ క్రితం ఒక స్నేహితుడు పిలిస్తే ఒక యజ్ఞం చూద్దామని వెళ్లాను. సామాన్యంగా పారాయణాలూ, పూజలూ, యజ్ఞయాగాలు వంటి జీవం లేని ఆధ్యాత్మిక కార్యక్రమాలకు నేనస్సలు వెళ్ళను. కానీ ఆ స్నేహితుడు బాగా తెలిసినవాడూ, వాళ్ళ స్వామీజీ గురించి చాలా ఇదిగా చెప్పాడూ గనుక వెళ్ళాల్సి వచ్చింది. ఆ స్వామీజీ ఎవరో చెప్పను. చెబితే చాలామంది పాఠకులు బాధపడతారు పాపం !!

సరే యజ్ఞం అంతా అట్టహాసంగా బాగానే జరుగుతోంది. కానీ అక్కడ యజ్ఞ నిర్వాహకుల తీరు చాలా అహంకారపూరితంగా 'మేం కాబట్టి దీనిని చేయిస్తున్నాం ! మాకింత డబ్బూ పలుకుబడీ ఉన్నాయి' అన్నట్టు విర్రవీగుడుగా ఉంది. అక్కడే నాకు అసహ్యం వేసి లేచి వచ్చేద్దామని అనుకున్నాను. సరే వీడు బాధపడతాడని అలా భరిస్తో కూచున్నా. కాసేపాగి చుట్టూ చూద్దామని ఆ ప్రాంతమంతా ఒక రౌండ్ వేశా. అప్పుడొక దృశ్యం కనిపించింది.

వాళ్ళు యజ్ఞంలో వాడిన వస్తువులూ, పారేసిన చెత్తా అంతా కూడా కొంచం వెనుకగా ఒక కుప్ప పోస్తున్నారు. దాని దగ్గర కుక్కలూ పందులూ చేరి నానా రచ్చా చేస్తున్నాయి. టిఫిన్లు తింటున్నవాళ్ళూ కాఫీలు త్రాగేవాళ్ళూ అందరూ అక్కడకే వచ్చి నిర్లక్ష్యంగా కప్పులూ గట్రా విసరి పారేస్తున్నారు. మొత్తం మీద అక్కడ ఎవరికీ శుభ్రత గానీ కనీసం సివిక్ సెన్స్ గానీ ఉన్నట్లు కనిపించలేదు. వాళ్ళు ప్రొడ్యూస్ చేస్తున్న చెత్తను ఎలా చక్కగా రీసైక్లింగ్ చెయ్యాలో కనీసం ఎలా డిస్పోస్ చెయ్యాలో కూడా వాళ్లకు తెలిసినట్లు నాకనిపించలేదు.

అవన్నీ చూచిన నేను మావాడి భుజం తట్టి - 'నేను వెళుతున్నా!' అని చెప్పి బయల్దేరా.

'కాసేపుండు. ఈరోజు కార్యక్రమం అయిపోతుంది' అని వాడు బ్రతిమిలాడాడు.

'వద్దు. మీకు యజ్ఞం అంటే ఏమిటో అర్ధం కాలేదని నాకర్ధమైంది. నువ్వు కూచో. నే వెళుతున్నా' అని వాడితో చెప్పి బయటపడ్డా.

సివిక్ సెన్స్ కలిగి ఉండటమే అసలైన యజ్ఞమని నేను భావిస్తాను. అలా నిత్యజీవితంలో ఉన్నవాడు ఏ యజ్ఞాలూ చెయ్యకపోయినా యజ్ఞం చేస్తున్నట్లే. అది లేనివాళ్ళు ఎన్ని చేసినా ఏమీ చేయ్యనట్లే.

ఇంకా క్లారిటీ కోసం తర్వాత శ్లోకం చూద్దాం.

శ్లో|| ఇష్టాన్ భోగాన్ హి వో దేవా దాస్యంతే యజ్ఞభావితా:
తైర్దత్తాన్ అప్రదాయైర్భ్యో యో భుంక్తే స్తేన ఏవ సః

అర్ధం::--

మానవ జీవితానికి కావలసిన అన్నీ ఈ దేవతల (ప్రకృతి శక్తుల) అధీనంలో ఉన్నాయి. మీ యజ్ఞంతో తృప్తి చెందినవారై ఈ దేవతలు మీకు కావలసినవాటిని వరాలుగా మీకు ఇస్తారు. కానీ వాటిని మళ్ళీ ఆ దేవతలకే అర్పించకుండా అనుభవించేవాడు ఒక దొంగలాంటి వాడు.

యజ్ఞమంటే ఏమిటో ఈ రెండు శ్లోకాలలో స్పష్టంగా చెప్పబడింది. యజ్ఞమంటే రీ సైక్లింగ్. ప్రకృతి నుంచి మనం ఏదైతే పొందామో దానిని తిరిగి ప్రకృతికి ఇవ్వాలి. సమాజం నుంచి ఏదైతే మనకు దక్కిందో దానిని కొద్దో గొప్పో తిరిగి సమాజానికి ఇవ్వాలి. అలా చెయ్యకుండా మొత్తం మనమే అనుభవిద్దాం అనుకుంటే ఆ సైకిల్ మధ్యలో బ్రేక్ అవుతుంది. అక్కడ 'అధర్మం' తలెత్తుతుంది. అక్కడే మనిషికి గానీ సొసైటీకి గానీ కష్టాలు మొదలౌతాయి. అలాంటి మనిషి ఒక 'దొంగ' అంటుంది భగవద్గీత. సంస్కృతంలో 'స్తేన' అంటే దొంగ అని అర్ధం. స్తేన ఏవ స: అంటే 'వాడొక దొంగ' అని.

మనం జాగ్రత్తగా గమనించుకుంటే ఒక విషయం అర్ధమౌతుంది.

మనకొచ్చే రోగాలు గానీ, కష్టాలు గానీ, నష్టాలు గానీ - మనం ఈ యూనివర్సల్ సైకిల్ ను బ్రేక్ చేసినప్పుడే వస్తాయిగాని లేకుంటే రావు. కనుక మనం ఎక్కడెక్కడ ఈ తప్పులు చేస్తున్నామో గమనించుకుని వాటిని దిద్దుకుని ఆ రీ సైక్లింగ్ ప్రాసెస్ ను తిరిగి సక్రమమైన స్థాయిలో నిలబెట్టడమే (రెస్టోర్ చెయ్యడమే) 'యజ్ఞం' అనే మాటకు అసలైన అర్ధం.

నీరు పారుతుంటే శుభ్రంగా ఉంటుంది. ఆగిపోతే మురిగిపోతుంది. అలాగే జీవితంలో ఏదైనా సరే ఒక వృత్తాకారంలో సాఫీగా జరుగుతూ ఉంటే అంతా బాగుంటుంది. ఆగిపోతే మాత్రం ఆ ఆగినచోట ఒక వెలితి, ఒక లోపం, ఒక స్థంభన మొదలౌతుంది. అక్కడే కష్టమూ తలెత్తుతుంది. దీనిని గమనించి సరిదిద్దుకోవడమే అసలైన ఆధ్యాత్మిక జీవన రహస్యం.

ఛిన్నమస్తా రూపం కూడా ఈ విషయాన్నే మార్మికంగా ( సింబాలిక్ గా) సూచిస్తుంది. తాంత్రిక యంత్రాలుగానీ, దేవతా స్వరూపాలు గానీ సింబాలిక్ రహస్యాలు. వాటిని యధాతధంగా తీసుకోకూడదు. అవి ఏమేం చెబుతున్నాయో ఆయా అంతరార్దాలను గ్రహించాలి గాని ఆయా మూర్తులే నిజాలని అనుకోకూడదు.

ఛిన్నమస్తా దేవత ప్రకృతికి సింబల్ అనుకుంటే, ఆమె తన తలను తాను ఖండించుకుని తన రక్తాన్ని తన చెలికత్తేలకు ఇవ్వడమంటే ఏంటి అర్ధం? ప్రకృతి తనను తాను తగ్గించుకుని లోకాన్ని పోషిస్తోందని దాని అర్ధం. అంతేగాక తన రక్తాన్ని తానే కొంత త్రాగుతోంది కూడా ! అంటే - తన జీవనం (self-sustenance) కోసం కొంత శక్తిని తాను వాడుకుని మిగతా భాగంతో లోకంలోని అందరినీ పోషిస్తోంది. అంటే live and let live అని మనకు చెబుతోంది.

జిల్లెళ్ళమూడి అమ్మగారు కూడా తరచుగా - 'నీకున్నది తృప్తిగా తిని అందరికీ ఆదరంగా పెట్టుకో నాన్నా. ఇంతకంటే ఇంకేమీ లేదు.' అని అనేవారు. ఇదే అసలైన జీవన నియమం.

ఈ ముగ్గురూ నగ్నంగా ఉండడం వెనుక అర్ధం ఏమిటి?

ప్రకృతి శక్తులు శుద్ధశక్తి స్వరూపాలు (pure energies). అవి నగ్నంగానే ఉంటాయి. అవి మనలా బట్టలు కట్టుకుని మేకప్ చేసుకోవు. లోపలి కుళ్ళును కప్పిపెట్టి మనలా బయటకు చాలా మంచిగా పోజులు కొట్టవు. ఉన్నదున్నట్లుగా కనిపిస్తాయి. ప్రకృతిలో అన్నీ నగ్నంగానే ఉంటాయి. ఒక్క మనిషి మాత్రమే బట్టలు కట్టుకుంటాడు. అమెరికాలో అయితే పెంపుడు జంతువులకు కూడా బట్టలు కుట్టిస్తారు. దానికి టైలర్స్ కూడా ప్రత్యేకంగా ఉంటారు. అదొక పెద్ద బిజినెస్ అక్కడ.అంటే మనం ప్రకృతికి దూరమైంది గాక జంతువులను కూడా దానికి దూరం చేస్తున్నామన్న మాట!

ప్రకృతిలో ఉన్న అమాయకత్వమూ, స్వచ్చతా, శుద్ధమైన శక్తి స్వరూపములే ఈ చిత్రంలోని దేవతల నగ్నత్వాలకు సూచనలు. తాంత్రిక చిత్రాల్నీ సింబాలిక్ లాగ్వేజీ అనే విషయాన్ని మనం మర్చిపోకూడదు.

కనుక కరుణామయి అయిన జగన్మాత (Unviersal Mother) కు ఈ చిత్రం ఒక మార్మిక సంకేతం. అంతేగాని ఇదేదో ఘోరమైన రాక్షసి బొమ్మనీ, తలలు నరుక్కునే ఆటవిక సాంప్రదాయానికి ఇదొక చిహ్నమనీ భావించడం సరి కాదు.

ఈ చిత్రం law of conservation of Energy (శక్తి నిత్యత్వ సూత్రం) కి ఒక సింబల్ అనేది అసలైన నిజం.

(ఇంకా ఉంది)

read more " ఛిన్నమస్తా సాధన - 7 (యజ్ఞస్వరూపం) "