మీ వ్రాతలు వాళ్ళవిగా చెప్పుకుంటున్నారు

నా పోస్టులను ఇష్టపడే ఒకరినుంచి నిన్నొక మెసేజ్ వచ్చింది.

'ఫలానా "టెలిగ్రాం గ్రూపు" లో చేరండి. ఇందులో మంత్ర, తంత్ర, జ్యోతిష, ఆధ్యాత్మిక, భారతీయ సంస్కృతి వగైరా విషయాల మీద చర్చలుంటాయి. మీకు స్వాగతం' అని అందులో ఉంది.

నేను మర్యాదగా, "నాకు చేరాలని లేదు. సారీ !" అని జవాబిచ్చాను.

'ఈ గ్రూపులో ఒకాయన మీ వ్రాతలను తనవిగా పోస్టు చేసుకుంటున్నాడు. గ్రూపులో అతనికి చాలా appreciation వస్తోంది.' అని రిప్లై వచ్చింది.

నాకు జాలేసింది.

'అది అతని ఖర్మ. చేసుకోనివ్వండి. నేను పాడిన పాటల్ని కూడా తనవిగా చెప్పుకోమనండి ఇంకా బాగుంటుంది. ఇంతకీ అతని పేరేంటి?' అడిగాను.

'గ్రూపులో ఉన్నవాళ్ళ పేర్లు మాకు కనిపించవు. అతని పేరు LK అని మాత్రం వస్తుంది' అని మెసేజ్ వచ్చింది.

'ఈ విషయాలు సాధన చేసి అనుభవంలో తెలుసుకోవలసినవిగాని చర్చలలో పొద్దు పుచ్చేవి కావు. కాబట్టి మీ గ్రూపులో చేరే ఉద్దేశ్యం నాకు లేదు. సారీ. నన్ను ఆహ్వానించినందుకు థాంక్స్' అని మెసేజ్ ఇచ్చాను.

సో కాల్డ్ సూడో ఆధ్యాత్మిక లోకంలో ఒక విచిత్రం ఉంది. 'నాకింత తెలుసు' అని ప్రదర్శించుకుని ఎదుటివారి నుంచి "ఆహా ఓహో" అని పొగడ్తలు వస్తే ఉబ్బిపోతూ అదే ఏదో పెద్ద ఘనతగా చాలామంది భావించుకుంటూ ఉంటారు. ఇలాంటివారిని చూస్తె నాకు నవ్వూ జాలీ రెండూ వస్తూ ఉంటాయి.

ఆధ్యాత్మికత అనేది విజ్ఞాన ప్రదర్శనలో లేదు. అది సాధనలోనూ అనుభవంలోనూ ఉంటుంది. అందులోనూ, ఈ విధంగా ఇతరులనుంచి వచ్చే మెప్పులు, పొగడ్తలు, లోలోపల ఇన్ఫీరియారిటీ కాంప్లెక్స్ తో నిండిపోయి ఉన్నవారికి పనిచేస్తాయి గాని ఇంకెందుకూ కొరగావు.

చర్చలతో ఆధ్యాత్మికత రాదు. అది సాధనతో వస్తుంది. వేరేవాళ్ళ బ్యాంక్ ఎకౌంట్ ను తనదిగా చెప్పుకున్నంత మాత్రాన ఆ ఎకౌంట్లో ఉన్న డబ్బు తనదెలా అవుతుంది?

ఇలాంటి వారిని చూచి జాలిపడటం తప్ప ఇంకేం చెయ్యగలం?

"విజ్ఞాన భైరవ తంత్రము" - Telugu E Book నేడు విడుదలైంది

ఈరోజు గురుపూర్ణిమ.

సమస్త జగత్తులకూ పరమగురువగు పరమేశ్వరుని స్మరిస్తూ ఈ రోజున మా "పంచవటి స్పిరిట్యువల్ ఫౌండేషన్" నుంచి ఆరవ E-Book గా "విజ్ఞాన భైరవతంత్రము" ను విడుదల చేస్తున్నాము. తంత్రాచారములలో ఇది కౌలాచారమునకు చెందినది. ఆగమములలో భైరవాగమమునకు చెందినది. దీనియందు, పరమేశ్వరుడు పార్వతీదేవికి ఉపదేశించినట్లుగా చెప్పబడిన నూట పన్నెండు ధారణా విధానములు ఇవ్వబడినవి. తాంత్రిక ధ్యానాభ్యాసులకు ఇదొక భగవద్గీత వంటిది.

దీనిలోని అన్ని సాధనలను శ్రీరామకృష్ణులు తమ సాధనా కాలమున కొద్ది రోజులలో సాధించగలిగినారు. మనబోటి సామాన్యులకు వీటిలోని ఒక సాధనకు ఒక జన్మ పడుతుంది.

దాదాపు తొమ్మిదేళ్ళ క్రితం నేను బ్లాగు వ్రాయడం ప్రారంభించిన కొత్తల్లో 'విజ్ఞాన భైరవతంత్రం' మీద వరుసగా పోస్టులు వ్రాద్దామని అనుకున్నాను. అది నాకు చాలా ఇష్టమైన పుస్తకం, ఎందుకంటే, చిన్నప్పటి నుంచీ నేను చేసిన సాధనలు దానిలో చాలా ఉన్నాయి. కానీ అవసరం ఉన్నా లేకపోయినా ప్రతిదీ అందరికీ చెప్పడం ఎందుకు? అన్న ఉద్దేశ్యంతో ఆ ప్రయత్నాన్ని విరమించాను. అది "పంచవటి స్పిరిట్యువల్ ఫౌండేషన్" నుంచి పుస్తకంగా విడుదలయ్యే ముహూర్తం ఇప్పటికి వచ్చింది.

దీనికి అనేక వ్యాఖ్యానములు ఎప్పటినుంచో ఉత్తర భారతదేశమున ఉన్నవి. నవీన కాలపు వివాదాస్పద గురువులలో ఓషో రజనీష్ దీనిపైన ఉపన్యాసాలిచ్చాడు. బైటకు చెప్పినా చెప్పకున్నా మోడరన్ గురువులందరూ చాలావరకూ దీనినే అనుసరిస్తున్నారు. ఈ గురువులందరూ వారి వారి అనుభవములను బట్టి జ్ఞానమును బట్టి దీనిని వ్యాఖ్యానించారు. నేను కూడా నా అనుభవములను ఆధారము చేసికొని దీనికి వ్యాఖ్యానమును వ్రాశాను.

ఇదొక ప్రాక్టికల్ గైడ్ బుక్. కానీ దీనిలోని ధారణల లోతుపాతులు అనుభవం ఉన్న గురువు దగ్గర వ్యక్తిగతంగా నేర్చుకున్నప్పుడే అర్ధమౌతాయి. నా శిష్యులలో అర్హులైనవారికి, నమ్మకంగా నన్ను అనుసరించేవారికి ఈ ధారణల లోతుపాతులను ప్రాక్టికల్ గా నేర్పించడం, అసలైన తంత్రసాధన అంటే ఏమిటో వారికి రుచి చూపించడం జరుగుతుంది.

అతి తక్కువకాలంలో (మూడు వారాలలో) ఈ పుస్తకాన్ని వ్రాయడంలో ఎంతో సహకరించిన నా అమెరికా శిష్యులకు కృతజ్ఞతలు ఆశీస్సులు తెలియజేస్తున్నాను.

ఈ E-Book కావలసిన వారు google play books నుంచి డౌన్లోడ్ చేసుకొనవచ్చును.

Mujhe Peene Ka Shouk Nahi - Shabbir Kumar, Alka Yagnik

Mujhe Peene Ka Shouk Nahi

Peeta Hu Gham Bhulane Ko

అంటూ షబ్బీర్ కుమార్, ఆల్కా యాజ్ఞిక్ మధురంగా ఆలపించిన ఈ యుగళగీతం 1983 లో వచ్చిన Coolie అనే చిత్రంలోనిది. ఈ పాటను రఫీ పాడాడని చాలామంది అనుకుంటారు గాని రఫీ 1980 లోనే గతించాడు. షబ్బీర్ కుమార్ స్వరం చాలావరకూ రఫీ స్వరంలాగా ఉంటుంది.

రఫీ అంత్యక్రియలలో పాల్గొంటున్నపుడు ఆ గోతిలో షబ్బీర్ చేతి గడియారం పడిపోయిందట. తన తర్వాత తన పరంపరను కొనసాగించమని అదొక దైవసూచనగా షబ్బీర్ స్వీకరించాడు. ఆ తర్వాత అతను దాదాపు 1500 పాటలు పాడాడు. కానీ తర్వాత రోజులలో అతను ప్లే బ్యాక్ సింగింగ్ నుంచి విరమించుకుని స్టేజి షోలకు అంకితమయ్యాడు. బహుశా సినిమా లోకపు కుళ్ళు రాజకీయాలే దీనికి కారణం కావచ్చు.

చిన్నప్పటి స్నేహం చాలా మధురంగా ఉంటుంది. ఎందుకంటే అది చాలా అమాయకమైనది. అందులో స్నేహం తప్ప ఇంకేమీ ఉండదు. అలాంటి చిన్ననాటి స్నేహితులిద్దరూ పెద్దయ్యాక కూడా ఒకర్ని ఒకరు మర్చిపోలేక, ఆ బాధలో త్రాగి, ఒకరిని ఒకరు వెదుక్కుంటూ పాడుకునే పాట ఇది. చాలా మధురమైన భావం !

కొన్ని పాటలు చూస్తే బాగుండవు. వింటేనే బాగుంటాయి. ఈ పాట కూడా అలాంటిదే. మీకు ధైర్యం ఉంటే చూడండి !

ఆ తర్వాత నా స్వరంలో కూడా ఈ మధుర గీతాన్ని వినండి మరి !

Movie:--Coolie (1983)

Lyrics:--Anand Bakshi

Music:--Laxmikant Pyarelal

Singers:--Shabbir Kumar, Alka Yagnik

Karaoke Singer:--Satya Narayana Sarma

Enjoy

------------------------------

Mujhe peene ka shouk nahi – Peeta hu gham bhulane ko – 2

Teri yaade mitane ko -2

Peeta hu gham bhulane ko

Mujhe peene ka shouk nahi – Peeti hu gham bhulane ko – 2

Teri yaade mitane ko -2

Peeti hu gham bhulane ko

Mujhe peene ka shouk nahi – Peeta hu gham bhulane ko

Lakho me hazaaro me – Ek tuna nazar aayi- 2

Tera Koi khat aaya – Na koi khabar aayi

Kya tune bhula dala -2

Ap--ne is diwane ko

Mujhe peene ka shouk nahi – Peeti hu gham bhulane ko

Koi vo kitabe dil – Jis dilka hai ye kissaa-2

Is hisso he paas mere - tere baat hai ek hissa

Mai pura karu kaise - Is dil ke fasane ko

Mujhe peene ka shouk nahi – Peeta hu gham bhulane ko

Mil jate agar ab ham – Aag lag jaati paani me – 2

Bachpan se vahi dosti - hojati javani me

Chahat me badal dete

Chahat me badal dete - Hum is dostani ko

Mujhe peene ka shouk nahi – Peeti hu gham bhulane ko

Mujhe peene ka shouk nahi – Peeta hu gham bhulane ko

Meaning

I am not fond of drinking, I just drink to forget my sadness
I just drink to forget your memories

Among thousand and millions of people
You are not found anywhere
There is no trace or news of you
What? Did you really forget this mad fellow?

My heart was the chapter of a book
and that book was lost
A part of it is with me, another part is with you
How should I complete the story of my heart?

If we meet now, then fire will be created in water

The sweet friendship that we had in our childhood

will become alive again

Then we will convert that friendship

into a passionate love

I am not fond of drinking, I just drink to forget my sadness
I just drink to forget your memories

తెలుగు స్వేచ్చానువాదం

త్రాగడం అంటే నాకేమీ ఇష్టం లేదు

కానీ ఈ బాధను మర్చిపోవడం కోసం త్రాగుతున్నాను

నీ జ్ఞాపకాలను మర్చిపోవడం కోసం త్రాగుతున్నాను

వేలాది లక్షలాది మందిలో నిన్ను వెదుకుతున్నాను

కానీ నీ జాడా లేదు జవాబూ లేదు

ఈ పిచ్చివాడిని నిజంగా మర్చిపోయావా నువ్వు?

నా హృదయమనేది ఒక పుస్తకంలో ఒక అధ్యాయం

ఆ పుస్తకం ఇప్పుడెక్కడో పోయింది

సగం నా దగ్గరుంది సగం నీ దగ్గరుంది

ఈ కధను నేనెలా పూర్తి చేసేది?

ఇప్పుడు మనం కలుసుకుంటే

నీళ్ళలో అగ్ని చెలరేగుతుంది

చిన్నప్పటి మన స్నేహం మళ్ళీ చిగురిస్తుంది

ఆ స్నేహాన్ని ఇప్పుడు మనం

ఒక మధుర ప్రేమగా మార్చుకుందాం

త్రాగడం అంటే నాకేమీ ఇష్టం లేదు

కానీ ఈ బాధను మర్చిపోవడం కోసం త్రాగుతున్నాను

నీ జ్ఞాపకాలను మర్చిపోవడం కోసం త్రాగుతున్నాను

27-7- 2018 పౌర్ణమి + చంద్ర గ్రహణం ప్రభావాలు

27-7-2018 న పౌర్ణమి + చంద్ర గ్రహణం వస్తున్నాయి. దీని ప్రభావం చాలా ఎక్కువగా మనుషుల మీద ఉండబోతున్నది. నిజానికి నిన్నటి నుంచే దీని ప్రభావం మనుషుల మీద మొదలైంది. మీరు గమనించుకుంటే ఈ క్రింది ప్రభావాలు మీలోనూ మీ చుట్టూ ఉన్నవారిలోనూ కన్పిస్తాయి.

1. నిన్నా ఇవాళా, మనుషులు తేలికగా చిరాకు పడుతూ ఉంటారు. ముఖ్యంగా ఫేస్ బుక్, వాట్స్ అప్ లాంటి యాప్స్ ఎప్పుడూ వాడే వాళ్ళు, ప్రెండ్స్ తో చాటింగ్ చేసేవాళ్ళ మీద ఈ ప్రభావం ఎక్కువగా ఉంటుంది. గమనించండి.

2. చెప్పుడు మాటలు వినడం, ఒకళ్ళను ఒకళ్ళు అపార్ధం చేసుకోవడం, అనవసరంగా ఇతరుల మీద చిరాకు పడటం, మనస్సులు చెడిపోవడం, డిప్రెషన్ కు గురికావడం, ఏడవడం జరుగుతుంది. ముఖ్యంగా ఇది ఆడవాళ్ళలో కనిపిస్తుంది. మొగవాళ్ళు కోపతాపాలకు, ఉక్రోషాలకు, పగలకు గురౌతారు.

3. ఈ చంద్ర గ్రహణ ప్రభావం ముఖ్యంగా మకర, కుంభ రాశుల మీద ఉంటుంది. ఈ రాశులలో చంద్రుడు గాని, సూర్యుడు గాని, లగ్నంగాని ఉన్న జాతకుల మీద ఈ ప్రభావాలు ఎక్కువగా ఉంటాయి. టీవీ జ్యోతిష్కులు, పత్రికా జ్యోతిష్కులు చెప్పే మాటలు నమ్మి, ఇది మకర రాశి వారికేగాని, కుంభరాశి మీద ఏమీ ఉండదని అనుకోకండి. వారి మీద కూడా ప్రభావం ఉంటుంది. ఎందుకంటే, సాయన సిద్ధాంత రీత్యా గ్రహణం కుంభ రాశిలో ఏర్పడుతోంది. అనుభవంలో సాయన, నిరయన సిద్ధాంతాలు రెండూ పని చేస్తాయి. తేదీల పరంగా జనవరి 14 నుంచి మార్చి 15 లోపు పుట్టినవారి మీద ఈ ప్రభావం ఎక్కువగా ఉంటుంది. 

4. ఈ ప్రభావం వల్ల, ఉన్నత స్థానాలలో ఉన్న వ్యక్తులకు ప్రాణగండం ఉన్నది. అది రాజకీయ నాయకులు కావచ్చు, అధికారులు కావచ్చు. వారికి పూర్తి మెడికల్ కేర్ అవసరం.

5. ఈ రోజునుంచీ జూలై 31 వరకూ కోపతాపాలను, అనవసర ఆవేశాలను తగ్గించుకుని కంట్రోల్ లో ఉంటె మంచిది. స్పీడ్ డ్రైవింగులు, ఈతలు, ప్రమాదకర స్థలాలకు విహార యాత్రలు, దూరప్రయాణాలు మొదలైన సాహసాలకు దూరంగా ఉండాలి.

6. తేలికగా మనస్సు బేలన్స్ తప్పే వారికీ, హిస్టీరికల్ గా ప్రవర్తించే వారికీ, ముఖ్యంగా ఆడవారి మీద ఈ ప్రభావాలు ఎక్కువగా ఉంటాయి. ఈ సమయంలో వాళ్ళు తేలికగా అన్ బేలన్స్ అయి పిచ్చిపిచ్చిగా ప్రవర్తిస్తూ ఉంటారు. గమనించండి.

సులువైన ఈ జాగ్రత్తలు పాటించి ఈ గ్రహణ ప్రభావాలనుండి బయట పడండి.

Tae Kwon Do Grand Master Jhoon Rhee - Astro analysis

"A picture is worth a 1000 words; an action is worth a 1000 pictures;" -- Grand Master Jhoon Rhee, 10th degree black belt, Tae Kwon Do

Tae Kwon Do సర్కిల్స్ లో ఝూన్ రీ పేరు తెలియని వారుండరు. ఈయనా బ్రూస్లీ మంచి ఫ్రెండ్స్. బ్రూస్లీ అందరికీ తెలుసు. కానీ ఈయన టైక్వాన్ డో సర్కిల్స్ లో మాత్రమే తెలుసు. బ్రూస్లీ వాడే హైకిక్స్ అన్నీ ఝూన్ రీ దగ్గర నేర్చుకున్నవేనని, అవి కుంగ్ ఫూ కిక్స్ కావని, టైక్వాన్ డో కిక్స్ అనీ తెలిస్తే మీకు ఆశ్చర్యం కలుగుతుంది.

ఉదాహరణకు, Return of the Dragon సినిమాలో, చక్ నారిస్ కూ బ్రూస్లీకీ జరిగే కోలోజియం ఫైట్ లో, బ్రూస్లీ వాడినవి అన్నీ టైక్వాన్ డో కిక్సే. అతను చేసినది కుంగ్ ఫూ కాదు. తన పర్సనల్ స్టైల్ అయిన Jeet Kune Do మరియు టైక్వాన్ డో కలిపి ఆ సీన్లో బ్రూస్లీ వాడాడు.

ఝూన్ రీ జనవరి 7 - 1932 న సౌత్ కొరియా లోని Asan అనే ఊళ్ళో పుట్టాడు. 30-4-2018 న అమెరికాలోని వర్జీనియా స్టేట్,  ఆర్లింగ్ టన్ లో తన 86 వ ఏట చనిపోయాడు. ఈయనకు Father of American Tae Kwon Do అనే పేరుంది. ఈయన 1960 లలో అమెరికాకు వలస వచ్చాడు. Washinton DC లో తన మొదటి స్కూల్ పెట్టాడు. తర్వాత అదే రాష్రంలో అనేక స్కూల్స్ స్థాపించాడు. క్రమేణా సెలబ్రిటీ అయ్యాడు.

నేను స్వతహాగా టైక్వోన్ డో అభ్యాసిని కాను. కానీ అందులోని "కార్ట్ వీల్ కిక్" లాంటి కొన్ని కిక్స్ అంటే నాకున్న ఇష్టం వల్ల వాటిని నేర్చుకుని నా పర్సనల్ స్టైల్లోకి తీసుకున్నాను. నాకు ప్రత్యేకంగా ఒక మార్షల్ ఆర్ట్ అంటే ఇష్టమూ ఇంకొకటంటే ద్వేషమూ ఏమీ లేవు. Take everything that is useful అనే బ్రూస్లీ సూక్తిని నేను పాటిస్తాను. అందుకని రకరకాల మార్షల్ ఆర్ట్స్ లోనుంచి నేను అనేక టెక్నిక్స్ నేర్చుకుని వాటిని కలగలిపి వాడుతూ ఉంటాను.

టైక్వోన్ డో అనేది కొరియన్ మార్షల్ ఆర్ట్. దీనిలో 80% కిక్స్, 20 % పంచెస్ ఉంటాయి. ప్రధానంగా ఇది హైకిక్స్ ని ఎక్కువగా వాడే ఆర్ట్.

గ్రాండ్ మాస్టర్ ఝూన్ రీ జాతకాన్ని గమనిద్దాం. ఈయన పుట్టిన సమయం తెలియదు. కనుక మన పద్ధతులు ఉపయోగిద్దాం. ఇతని జాతకంలో కుజుడు ఆత్మకారకుడయ్యాడు. కుజుడు ఆత్మకారకుడైతే లేదా జాతకంలో బలంగా ఉంటే, అతనికి వీరవిద్యలు గాని, వ్యాయామాలు గాని చెయ్యడం వస్తుంది. మార్షల్ ఆర్ట్స్ వీరుల జాతకాలలోనూ, బాక్సింగ్ వీరుల జాతకాలలోనూ, కుజుడు బలంగా ఉండటం గమనించవచ్చు. ఎందుకంటే కుజుడు యుద్ధప్రియుడు. Red planet, Planet of War అని ఇతనికి పేర్లున్నాయి.

కారకాంశ ధనుస్సు అయింది. చంద్రలగ్నం కూడా ధనుస్సే అయింది. సూర్యలగ్నం కూడా ధనుస్సే అయింది. కనుక ఇతని జాతకంలో ధనుస్సుకు ప్రాధాన్యత ఎక్కువగా ఉన్నది. ఇతను అమావాస్య రోజున పుట్టాడు.

లగ్నంలో నవమాధిపతి అయిన సూర్యుడు ఉండటంతో ఈయన అమెరికాలో స్థిరపడ్డాడు. అష్టమస్థానం యుద్ధాన్నీ మరణాన్నీ గాయాలనూ సూచిస్తుంది. అష్టమాదిపతి అయిన చంద్రుడు కూడా లగ్నంలో ఉండటమూ, అదికూడా వీరవిద్యలకు అధిపతి అయిన కుజునితో కలసి ఉండటమూ ఈయనను టైక్వాన్ డో గ్రాండ్ మాస్టర్ని చేశాయి. అష్టమంలో గురువు వక్రించి ఉండటమూ, శరీర శ్రమకూ, కష్టాన్ని ఓర్చుకోవడానికీ కారకుడైన శని అష్టమాన్ని చూస్తూ ఉండటమూ, ఆ శని షష్ఠస్థానాధిపతి అయిన శుక్రునితో కలసి ఉండటమూ గమనిస్తే ఈయనకు వీరవిద్యలు ఎందుకు పట్టుబడ్డాయో అర్ధమౌతుంది.

1964 లో California లో జరిగిన Ed Parker's Long Beach Karate Championship Event లో మొదటి సారిగా బ్రూస్లీ, ఝూన్ రీని కలిశాడు. అక్కడ వాళ్ళిద్దరూ మంచి ఫ్రెండ్స్ అయ్యారు. అప్పటి వరకూ బ్రూస్లీ తన Wing Chun Style లో ఉన్న హ్యాండ్ టెక్నిక్స్ ఎక్కువగా వాడేవాడు. కానీ ఆ తర్వాత అతను ఝూన్ రీ దగ్గర Kicks నేర్చుకున్నాడు. తర్వాత తర్వాత బ్రూస్లీ డెవలప్ చేసిన Jeet Kune Do లో బేసిక్ టెక్నిక్ గా ఝూన్ రీ దగ్గర నేర్చుకున్న Side Kick ను తీసుకున్నాడు. ఈ విధంగా బ్రూస్లీ కిక్స్ వెనుక ఝూన్ రీ శిక్షణ ఎంతో ఉంది. ఈ సంగతి చాలా మందికి తెలియదు. ఇక్కడ ఝూన్ రీ, బ్రూస్లీ ఇద్దరూ చేస్తున్న సైడ్ కిక్ ను గమనిస్తే ఈ సంగతి తేలికగా అర్ధమౌతుంది. ఇది టైక్వాన్ డో కిక్ మాత్రమే, కుంగ్ ఫూ లో ఇలాంటి కిక్స్ ఉండవు. అవి వేరుగా ఉంటాయి.

అంతేకాదు. మహమ్మద్ ఆలీకి Accu Punch అనేదాన్ని నేర్పించింది Jhoon Rhee అనే సంగతీ చాలామందికి తెలియదు. బహుశా దీనిని Jhoon Rhee, బ్రూస్లీ దగ్గర నేర్చుకుని ఉండవచ్చు. ఎందుకంటే Tai Kwon Do లో పంచెస్ కి అంత ప్రాధాన్యత ఉండదు. కానీ బ్రూస్లీ నేర్చుకున్న Wing Chun Kung Fu లో ఎక్కువగా పంచెస్ నే వాడతారు. వింగ్ చున్ సిస్టంలో హైకిక్స్ కి ప్రాధాన్యత ఉండదు. ఉంటేగింటే,  లోకిక్స్ ఉంటాయి లేదా బెల్ట్ లెవల్ కిక్స్ ఉంటాయి. అంతే. ఆ విధంగా Accu Punch అనేది బ్రూస్లీ నుంచి, ఝూన్ రీ ద్వారా, మహమ్మద్ అలీకి చేరింది. 1975 లో ఈ పంచ్ ని ఉపయోగించే, UK Heavy Weight Boxing Champion Richard Dunn ని మట్టి కరిపించానని అలీ చెప్పేవాడు.

మార్షల్ ఆర్ట్ అనేది, అది ఏ రకమైన మార్షల్ ఆర్ట్ అయినా సరే, ఊరకే రాదు. ప్రతిరోజూ బద్దకాన్ని వదల్చుకుని కఠోరంగా శ్రమిస్తేనే దానిలో మాస్టరీ వస్తుంది. 86 ఏళ్ళ వయసులో కూడా ఝూన్ రీ ప్రతిరోజూ క్రమం తప్పకుండా మూడు గంటలు ప్రాక్టీస్ చేసేవాడంటే అర్ధం చేసుకోండి మరి అతనికి 10th Degree Black Belt ఎలా వచ్చిందో? అతను అమెరికాలో అంత సెలబ్రిటీ ఎలా అయ్యాడో?

జాతకంలో కుజుడూ శనీ బలంగా ఉన్నప్పుడు కష్టపడే తత్త్వమూ పట్టుదలా అవే వస్తాయి. అలాంటి వాళ్ళకే మార్షల్ ఆర్ట్స్ పట్టుబడతాయి.

బ్రూస్లీ మరణానికి ఇది కూడా ఒక కారణమా???

బ్రూస్లీ 1940 లో పుట్టి, 1973 లో చనిపోయాడు. ఆ సమయానికి అతనికి 32 ఏళ్ళే. ఆరోగ్య పరంగా అన్ని జాగ్రత్తలు తీసుకుని, అంత చక్కని ఆల్ రౌండ్ ఫిట్నెస్ తో ఉన్న ఒక మార్షల్ ఆర్టిస్ట్ కు ఆ విధమైన అకాల మరణం ఎందుకొచ్చింది?

దీని గురించి ఇంతకు ముందు నేనొక పోస్ట్ వ్రాస్తూ జ్యోతిష్య పరంగా ఈ ప్రశ్నలను విశ్లేషించాను. ఇప్పుడు దీనినే ఇంకొక కోణంలో చూద్దాం.

ఏ మనిషికైనా ఒంట్లో కొవ్వు అనేది కొంత అవసరమే. అది ఎక్కువగానూ ఉండకూడదు. తక్కువగానూ ఉండకూడదు. సైన్సు చెప్పేదాని ప్రకారం ప్రతి మనిషికీ తన బరువులో 9% నుండి 19% మధ్యలో కొవ్వు అతని శరీరంలో ఉండవచ్చు. అది ఆరోగ్యకరమైన రేంజ్ గా చెప్పబడుతుంది.

బ్రూస్లీ బరువు 65 కేజీలు గా ఉండేది. అంటే, అతనిలో దాదాపుగా 6 కేజీల నుంచి 12 కేజీల వరకూ కొవ్వు ఉండవచ్చు. కానీ, మెడికల్ రిపోర్ట్ ల ప్రకారం అతనిలో 1 కేజీ కూడా కొవ్వు లేదు. అర్దకేజీ కంటే తక్కువ ఉంది. అతని ఒంట్లో మొత్తం కండ ఉండేది గాని కొవ్వు ఉండేది కాదు. ఎక్కడ ఏమాత్రం కొవ్వు కన్పించినా దాన్ని కరిగించేవరకూ అతనికి నిద్ర పట్టేది కాదు. అతనొక Fitness freak అని చెప్పవచ్చు. హాలీవుడ్ నటులు కూడా అతని శరీరాన్ని చూచి చాలా ఆశ్చర్యపోతూ ఉండేవారు. అమెరికన్స్ అయిన తమకు కూడా అలాంటి గట్టి శరీరం లేదే అని అసూయపడుతూ ఉండేవారు.

ఇదిలా ఉండగా, Enter the Dragon సినిమా సెట్ల మీద బ్రూస్లీ ఒకరోజున పెద్ద జ్వరంతో కూలబడి పోయాడు. అతనికి ఫిట్స్ కూడా వచ్చాయి. అతన్ని వెంటనే ఆస్పత్రికి తరలించారు. పరీక్ష చేసిన డాక్టర్లు అతని మెదడులో వాపు లాంటిది ఉందని చెప్పి తాత్కాలికంగా ఏవో మందులిచ్చారు. అంతేగాక అతనికి నేపాల్ నుంచి తెప్పించిన ముడి మాదకద్రవ్యం 'హషీష్' తీసుకునే అలవాటుందని కూడా వారికి అప్పుడే తెలిసింది.

అతని శరీరంలో 1% కూడా కొవ్వు లేదని కూడా మెడికల్ రిపోర్ట్స్ లో వచ్చింది. ఒక అథ్లెట్ కు ఇది గర్వకారణమే గాని, ఆరోగ్యరీత్యా ఇది చాలా ప్రమాదకరం. ఎందుకంటే, మత్తుమందులు తీసుకున్నప్పుడు అవి గుండె, లివర్ మొదలైన అవయవాలకు చేరకుండా ఒంట్లో ఉన్న కొవ్వు అడ్డుపడి ఆ మత్తుమందుల్ని తను ఇముడ్చుకుంటుంది. తద్వారా అది శరీరాన్ని రక్షిస్తుంది. ఈ ప్రక్రియ బ్రూస్లీ శరీరంలో జరగడానికి ఆస్కారం లేదు. ఎందుకంటే ఉండవలసిన 9% - 19% మధ్యలో కొవ్వు లేకపోగా, కనీసం 1 % కూడా అతనిలో లేదు. అంతా మజిలే ఉంది. కనుక అతను తీసుకుంటున్న హషీష్ అనేది సరాసరి మెదడుకు చేరుతోంది. ఆ క్రమంలో మెదడు వాపుకు గురౌతోంది.

నీ ఒంట్లో తగినంత కొవ్వు లేదు, కనుక హషీష్ వాడకం మానుకోమని, అది ప్రమాదకరమని వైద్యులు చెప్పినా బ్రూస్లీ వినలేదు. పైగా అతను చేసే వ్యాయామాలు చూస్తే మామూలు మనుషులు భయపడతారు. అలాంటి ఘోరమైన వ్యాయామాలు చేసేవాడు. అలాగే హషీష్ కూడా తీసుకునేవాడు. అతనికి ఆ అలవాటుందని, రిలాక్స్ అవడానికి దానిని తీసుకుంటూ ఉంటాడని అతని భార్య "లిండా లీ" కూడా ఒక ఇంటర్వ్యూ లో చెప్పింది. ఒకవైపు హషీష్, ఒకవైపు మితిమీరిన వ్యాయామాలు, ఒంట్లో కొవ్వు లేకపోవడం వల్ల అతని మెదడులో పొరలు వాచి, ఫిట్స్ కు గురై చనిపోయాడు. గర్ల్ ఫ్రెండ్ బెట్టీ ఇచ్చిన ఆస్ప్రిన్ అతన్ని చంపలేదు. హషీష్ చంపింది. మితిమీరిన వ్యాయామాలు చంపాయి. తగినంత కొవ్వు లేకపోవడం చంపింది. !!

అందుకే అంటారు ! అతి ఎందులోనూ పనికిరాదని ! ఫిట్నెస్ మంచిదే. కానీ అదే ఒక వ్యసనం కాకూడదు. దానికి తోడు డ్రగ్స్ అలవాటైతే ఏమౌతుందో బ్రూస్లీ జీవితమే ఒక ఉదాహరణ !

ఒంట్లో కొంత కొవ్వు కూడా ఉండాలని, అయితే అది తగు మోతాదులో మాత్రమే ఉండాలని వ్యాయామాలు చేసేవారు మర్చిపోకండి !

బ్రతుకులు చెడగొడుతున్న జ్యోతిష్యం

"బ్రతుకు నిలబెట్టిన జ్యోతిష్యం" - అని కొన్నేళ్ళక్రితం ఒక పోస్టు వ్రాశాను. జ్యోతిష్యం అనేది బ్రతుకులు నిలబెట్టడమే కాదు. చెడగొడుతుంది కూడా. ఎలా అని అనుమానం వస్తోందా? ఈ పోస్టు చదవండి.

రామారావు హైదరాబాద్ లో బ్యాంక్ మేనేజర్. భార్య ప్రైవేటు స్కూల్లో టీచరుగా పనిచేస్తోంది. ఒక అమ్మాయి. ఒక అబ్బాయి. చక్కటి సంసారం. కానీ జ్యోతిష్యం వాళ్ళ సంసారంలో నిప్పులు పోసింది.

అమ్మాయి హైద్రాబాదులోనే ఇంజనీరింగ్ చదివింది. ఆ తరువాత అమెరికాలో ఎమ్మెస్ చెయ్యడానికి వెళ్ళింది. పూర్తిచేసింది. ఉద్యోగం తెచ్చుకుంది. ఈ లోపల H1B వచ్చేసింది. ఇంకేముంది? అమెరికాలో ఇలాగే ఎమ్మెస్ చదివి ఉద్యోగం చేస్తున్న ఒక అబ్బాయిని చూచి పెళ్లి చేస్తే ఒకపని అయిపోతుందని అనుకుని మురిసిపోయారు. పెళ్లి సంబంధాలు చూడటం మొదలుపెట్టారు. అప్పుడే అసలు కష్టాలు మొదలయ్యాయి.

ఖర్మ బాలేనప్పుడు ఎవడో ఒకడు మనకు చెడుగ్రహంలాగా తయారౌతాడు. వీరి విషయంలో అయితే వీళ్ళ కుటుంబ జ్యోతిష్కుడే ఆ చెడుగ్రహం అయి కూచున్నాడు.

ఏ సంబంధం తెచ్చినా ఇది బాలేదు, అది బాలేదు, నక్షత్రం కుదరలేదు, ఇంకోటి కుదరలేదని అన్ని సంబంధాలూ చెడగొట్టేవాడు. వీళ్లేమో గుడ్డి నమ్మకంతో అతడు చెప్పినది వేదంలా భావించి మంచి మంచి సంబంధాలన్నీ చెడగొట్టుకున్నారు. అప్పుడప్పుడూ కొన్ని సంబంధాలను ఆ జ్యోతిష్కుడే తెచ్చేవాడు. కానీ అవి వీళ్ళ అమ్మాయికి నచ్చేవి కావు. అబ్బాయికి అది బాలేదు ఇది బాలేదని ఆ అమ్మాయి వాటిని తిరస్కరించేది. ఇలా ఉండగా, చూస్తూ ఉండగానే అమ్మాయికి 30 ఏళ్ళు దాటాయి. సంబంధాలు రావడం తగ్గిపోయాయి.

ఇంతకు ముందు అబ్బాయిలకు వీళ్ళు కండిషన్స్ పెట్టేవాళ్ళు. ఇప్పుడు అవన్నీ మార్చుకుని డైవర్సీ సంబందాలైన పరవాలేదు అనే స్థితికి వచ్చారు. అయితే, అవి కూడా మంచివి రావడం లేదు. ఏం చెయ్యాలో తోచడం లేదు. అమ్మాయికి 33 ఏళ్ళు వచ్చేశాయి. ఈ లోపల ఒక రోజున వాళ్ళమ్మాయి ఈయనకు ఫోను చేసి ' నాన్నా, నాకు సంబంధాలు చూడొద్దు. ఇంక నేను పెళ్లి చేసుకోను' అని చెప్పేసింది.

ఈ పరిస్థితిలో అమ్మాయి జాతకం చూడమని నన్ను ఫోన్లో అడిగాడు తండ్రి.

ఏడేళ్ళక్రితం ఈ అమ్మాయి జాతకంలో వివాహదశలు నడిచాయి. అదే మాట తండ్రితో అన్నాను.

'నిజమే సార్ ! అప్పట్లో మంచి మంచి సంబంధాలు వచ్చాయి. కానీ మేమే వద్దనుకున్నాం. ఇప్పుడు రావడం లేదు.' అన్నాడు.

'ఇంకా ఎన్నేళ్ళపాటు మీకదే పనిగా సంబంధాలు వస్తాయని మీరనుకుంటున్నారు? మీ పెళ్లప్పుడు మీకెంత వయసు?' అడిగాను.

'ఇరవై అయిదు. మా ఆవిడకు ఇరవై రెండు' అన్నాడు.

'మరి ముప్పై మూడున్న అమ్మాయిని మీరెందుకు చేసుకోలేదు?' అడిగాను.

'అంతవరకూ ఎలా ఆగుతాం?' అన్నాడు.

'మరి ఇప్పటి అబ్బాయిలు కూడా అంతే కదా? మహా అయితే 30 వరకూ చూస్తారు. ఆ తర్వాతంటే అమ్మాయిలకు ఏజి బార్ అయినట్లే.' అన్నాను.

'అదే ఇప్పుడు మా సమస్య' అన్నాడు.

'మంచి సంబంధాలు వచ్చినప్పుడు మీరెందుకు వద్దనుకున్నారు?' అడిగాను.

'అంతా మా జ్యోతిష్కుడు చేశాడు. మాకేమో ఆ జ్యోతిష్యం తెలీదు. అతన్ని నమ్మాము. ఇలా చేశాడు. ఆ తర్వాత మాకు తెలిసినది ఏమంటే - మా ఫేమిలీ విషయాలన్నీ అతనికి తెలుసు. మా భావాలు, మా నమ్మకాలు, మా వీక్నెస్సులు అన్నీ తెలుసు. వాటితో ఆడుకున్నాడు. ఒక ఉదాహరణ చెప్తా వినండి.

జాతకపరంగా నక్షత్రాలు కలుస్తాయా లేదా చూచేటప్పుడు అమ్మాయి నక్షత్రానికి అబ్బాయి నక్షత్రం సరిపోతుందా లేదా అనే చూస్తారట. కానీ ఇతను అబ్బాయి నుంచి కూడా అమ్మాయికి చూచేవాడు. అలా చూస్తే, ఎక్కడో తప్ప ఎవరికీ సంబంధాలు కుదరవు. ఈ విధంగా సంబంధాలన్నీ చెడగొట్టాడు.' అన్నాడు.

'అవును. అమ్మాయి నుంచి అబ్బాయి నక్షత్రానికి చూడాలి. అదే సాంప్రదాయ పరంగా నక్షత్రపొంతనం చూచే విధానం. అతనేంటి ఏదో కొత్తగా ఉందే?' అన్నాను.

'మా ఖర్మకొద్దీ దొరికాడు వీడు. ఇంకా వినండి. కొన్నింటికి నక్షత్రం సరిపోలేదని చెప్పేవాడు. ఇంకొన్నింటికి సర్పదోషం అనేవాడు, ఇంకొన్నింటికి కుజదోషం అనేవాడు. ఇంకొన్నిటికి ఇంకేదో చెప్పేవాడు. ఇలా కావాలని చెడగొట్టేవాడు.' అన్నాడు.

'కావాలనా? అదేంటి?' అడిగాను.

'అవును. మాకు తర్వాత తెలిసింది. మా కుటుంబం గురించి అతనికి బాగా తెలుసు కదా ! అందుకని వేరే వాళ్ళ దగ్గర కమీషన్ తీసుకుని, వాళ్ళ అబ్బాయి జాతకం కొద్దిగా మార్చి మా అమ్మాయికి సరిపెట్టి, 'ఇది మంచి జాతకం. చేసుకోండి' అని చెప్పేవాడు. కుదిరితే మా దగ్గర కూడా డబ్బులు తీసుకుంటాడు కదా ! రెండుపక్కలా నొక్కొచ్చని ప్లానేశాడు. అయితే ఆ సంబంధాలు మా అమ్మాయికి నచ్చేవి కావు.

ఇదంతా మాకు వేరే వాళ్ళ ద్వారా తెలిసింది. వాళ్లకు కూడా ఇలాగే చేసి, జాతకాలు మార్చి, అంతా బాగుందని చెప్పి పెళ్లి చేశాడు. ఏడాది తిరక్కుండా వాళ్లకు విడాకులైపోయాయి. అదేంటని అడిగితే - ' నేను దేవుణ్ణి కాను. జాతకాలు మ్యాచింగ్ చెయ్యగలను గాని వాళ్ళ విధిని నేను మార్చలేను కదా !' అని తప్పించుకున్నాడు. అంతే కాదు ! రెండో పెళ్లి చేద్దామని మళ్ళీ డబ్బులు తీసుకుని సంబంధాలు తేవడం మొదలుపెట్టాడు. ఈ విధంగా చాలామంది జీవితాలు పాడు చేశాడు.' అన్నాడు.

'ఎవరతను?' అడిగాను.

'హైదరాబాద్ లో పేరున్న జ్యోతిష్కుడు' అంటూ అతని పేరు చెప్పాడు రామారావ్.

'మరి పరిహారాలు చెప్పలేదా మీకు?' అడిగాను.

'లేకేం? ఎన్నో చేశాం. వాటికి దాదాపు పదిలక్షలు వదిలింది. అమెరికా నుంచి మా అమ్మాయి పంపింది ఆ డబ్బులు' అన్నాడు ఏడుపు గొంతుతో

'పాపం ! అమెరికాలో తను సంపాదించినది ఈ దొంగ జ్యోతిష్కుడికి పోసిందన్నమాట ఈ అమ్మాయి?' అనుకున్నా.

'మరి మీ అబ్బాయి సంగతేంటి?' అడిగాను.

'వాడూ అమెరికాలోనే ఉన్నాడు. అక్కకు కాలేదని తనూ చేసుకోలేదు. వాడికీ 31 వచ్చాయి. చూస్తున్నాం.' అన్నాడు.

'మరి అదే జ్యోతిష్కుడికి చూపిస్తున్నారా ఇంకా?' అడిగాను.

'లేదండి. మాకు జ్యోతిష్యం అంటేనే నమ్మకం పోయింది. మా అమ్మాయి జీవితం ఇలా అవడానికి కారణం జ్యోతిష్యమే. అందుకే మా వాడికి జాతకం చూడటం లేదు. అమ్మాయి నచ్చితే చేసుకుంటాం. అంతే! ' అన్నాడు.

'వెరీ గుడ్. మంచి పని. ప్రొసీడ్ ! ' అన్నాను.

వీళ్ళమ్మాయి కధ వింటే చాలా బాధేసింది.

'ఇప్పుడు నానుంచి మీకేం కావాలి?' అడిగాను.

'అమ్మాయి భవిష్యత్తు చెప్పండి. రెమెడీలు చెప్పండి' అడిగాడు.

'జాతకమంటే నమ్మకం లేదన్నారుగా? మళ్ళీ ఇదేంటి?' అడిగాను.

'ఏ మూలో ఇంకా కొద్దిగా ఉండండి. మీరు కరెక్ట్ గా చెబుతారనీ, డబ్బులు తీసుకోరనీ మా ఫ్రెండ్స్ చెప్పారు. అందుకే మీకు ఫోన్ చేస్తున్నాను.' అన్నాడు.

'సరేగాని, ఒక్కమాట చెప్పండి. మీ అమ్మాయికి ఏజ్ బార్ అయిపోతున్నా కూడా ఎందుకు అతన్నే నమ్ముకుని కూచున్నారు మీరు?' అడిగాను.

'అంతా మా ఖర్మ సార్ ! అప్పుడర్ధం కాలేదు. అర్ధం అయ్యేసరికి టైం అయిపోయింది' అన్నాడు.

'మీ పెళ్ళప్పుడు ఈ జాతకాలు చూచారా? జాతకాలు చూచే మీ పెళ్లి చేసుకున్నారా?' అడిగాను.

'లేదండి. మా ఆవిడకు అసలు జాతకమే లేదు. మా నాన్నకు వాళ్ళ కుటుంబం నచ్చింది. అమ్మాయి నచ్చింది. చేసుకున్నాం.' అన్నాడు.

ఒకపక్క నవ్వొచ్చింది. ఇంకోపక్క బాధేసింది. జాతకం చూచి అతనికి కావలసిన విషయాలు ఫోన్లోనే చెప్పేశాను.

'చాలా ధ్యాంక్స్ సార్ ! మీరు మాకొక ఇరవై ఏళ్ళ క్రితం పరిచయం అయి ఉంటే మా జీవితాలు ఇంకోలా ఉండేవనిపిస్తోంది' అంటూ ఫోన్ పెట్టేశాడాయన.

ఫోన్ పెట్టేశాక చాలాసేపు ఆలోచిస్తూ ఉండిపోయాను.

జ్యోతిష్యాన్ని అతిగా నమ్మకూడదు. దానినొక గైడెన్స్ గా తీసుకోవాలే గాని, పొద్దున్న లేచి "టాయిలెట్ కు వెళదామా వద్దా? ఇప్పుడు ఏ హోర నడుస్తోంది? ఈరోజు నక్షత్రం ఏమిటి?" అని ఆలోచిస్తూ కూచోకూడదు. అలా కూచుంటే అన్నీ అక్కడే అయిపోతాయి.

ఆ జ్యోతిష్కుడు ఇలా జనాన్ని మోసం చేసి డబ్బు బాగా సంపాదించి ఉండవచ్చు, కానీ దానితో బాటు అతను పోగుచేసుకున్న ఖర్మను తలచుకుంటే నాకు భయం వేసింది. ఇలాంటి తెలిసి తెలియని జోస్యాలు చెప్పి జీవితాలను పాడు చెయ్యడం వల్ల, వచ్చే జన్మలో ఏ రోడ్డు కుక్కగానో, ఏ పందిగానో పుట్టవలసి వస్తుంది.

ఈ విధంగా తెలిసీ తెలియని జోస్యాలు చెప్పి చాలామంది జ్యోతిష్కులు ఎన్నో పెళ్లి సంబంధాలు చెడగొడుతున్నారు. ఇంతా చేస్తే వాళ్ళేమీ బ్రహ్మదేవుళ్ళు కారు. అసలు చెప్పాలంటే - మ్యారేజ్ మ్యాచింగ్ ఇలాగే చెయ్యాలి - అంటూ చెప్పే ఖచ్చితమైన పద్ధతులేవీ జ్యోతిష్యశాస్త్రంలో లేవు. మన దేశంలో ఒక్కొక్క రాష్ట్రంలో ఒక్కొక్క విధంగా ఈ మ్యారేజ్ మ్యాచింగ్ చేస్తూ ఉంటారు. దీంట్లో స్టాండర్డ్ పద్ధతులంటూ ఏవీ లేవు. ఎవడికి తోచిన విధంగా వాడు చేస్తూ ఉంటాడు. నమ్మే గొర్రెలు నమ్ముతూ ఉంటాయి.

నిజం చెప్పాలంటే - జాతకం కలవకపోవడం - అంటూ ఏమీ ఉండదు. ఎంత పర్సెంటేజి కలిసింది? అనేదే ప్రశ్న. ఆదర్శ దంపతుల జాతకాలే 100% కలవవు. అక్కడదాకా ఎందుకు? రాముడు సీతాదేవి జాతకాలే 100% కలవలేదు. ఇక మామూలు మనుషుల జాతకాల గురించి చెప్పాలా? మరి వీళ్ళిద్దరి పెళ్లినీ  బ్రహ్మర్షి అయిన వశిష్టుడు దగ్గరుండి ఎలా చేయించాడు? దీనికి సమాధానం లేదు. ఎవ్వరూ చెప్పలేరు కూడా !

మనుషుల జాతకాలు ఎవరివైనా సరే, చాలావరకూ కలుస్తూనే ఉంటాయి. ఏవో కొన్నికొన్ని జాతకాలలో భయంకరమైన దోషాలుంటాయి. అలాంటివాటిని పరిహారాలతో సరిచెయ్యాలిగాని, ప్రతి జాతకానికీ పరిహారాలు అవసరం ఉండవు. కనుక నా దృష్టిలో - 'జాతకం కలవలేదు' అని చెప్పడమే చాలా తప్పు ! అలా చెప్పే జ్యోతిష్కుడికి అసలు శాస్త్రం తెలీదని నేనంటాను.

ఈ విధంగా "జాతకం కుదరలేదు. ఈ సంబంధం చేసుకోవద్దు" అని చెప్పి పెళ్ళిళ్ళు చెడగొడుతున్న కుహనా జ్యోతిష్కులకు నేనొక ఓపన్ చాలెంజ్ చేస్తున్నా !

మీలో ఎవరైనా సరే, మీ దగ్గరకు వచ్చిన జాతకాలలో, "ఇతనికి గానీ ఈమెకు గానీ, పలానా సంవత్సరంలో, ఫలానా నెలలో, ఫలానా తేదీన, ఫలానా ఊళ్ళో పెళ్లి అవుతుందని ఖచ్చితంగా చెప్పగలరా?" చెప్పలేరు. మరి అలా చెప్పలేనప్పుడు - గణాలు కుదరలేదు, గుణాలు కుదరలేదు, సంబంధం కుదరలేదు, చేసుకోవద్దు - అంటూ, తెలిసీ తెలియని జోస్యాలు చెప్పి, జీవితాలతో ఆడుకోవడం తప్పు కదూ?

జ్యోతిష్కుల్లారా ! సిగ్గు తెచ్చుకోండి ! చేతనైతే మంచి చెయ్యండి. అంతేగాని మనుషుల జీవితాలలో ఆడుకోకండి. చెడుకర్మను పోగు చేసుకోకండి. వచ్చే జన్మలలో కుక్కలుగా నక్కలుగా పుట్టకండి. వచ్చే జన్మదాకా అక్కర్లేదు. ప్రముఖ జ్యోతిష్కుల కుటుంబాలలో తీరని పెద్ద పెద్ద సమస్యలుండటం నాకు తెలుసు. ఎంతో మంది కమర్షియల్ జ్యోతిష్కుల కుటుంబాలలో దీనిని నేను గమనించాను. అవన్నీ ఎందుకొస్తున్నాయి? మీరు సక్రమంగా ఉంటే, మీ కుటుంబాలలో ఆ సమస్యలెందుకున్నాయి? లోకుల సమస్యలు తీర్చే మీరు, మీ సమస్యలు ఎందుకు తీర్చుకోలేకపోతున్నారు? ఆలోచించుకోండి !

జ్యోతిష్యం యొక్క నిజమైన ప్రయోజనం జీవితానికి సరియైన దారిని చూపడం. కానీ కుహనా జ్యోతిష్కుల వల్ల నేడది జీవితాలను తప్పు దారి పట్టించి వాటిని చెడగొట్టే వ్యాపారంగా మారిపోయింది. అందుకే చెబుతున్నాను. 'కళ్ళు పోయేంత కాటుక పెట్టుకోకూడ' దని సామెత ఉంది. అలాగే అతిగా జ్యోతిష్యాన్ని నమ్మి జీవితాలు పాడు చేసుకోకండి. ఎందుకంటే జ్యోతిష్కుడు దేవుడు కాదు. వాడూ మనలాంటి మనిషే. వాడి లిమిట్స్ వాడికి ఉంటాయి. వాడు చెప్పేది వేదం ఏమీ కాదు. పోనీ జ్యోతిష్యశాస్త్రం చూద్దామా అంటే ఇదేమీ ఒక Standardized Science కాదు. ఇందులో ఎవడి పద్దతి వాడిది. కనుక, మీకు దేవుడిచ్చిన తెలివిని వాడండి. ఎవడో చెప్పిన మాయమాటలను కాదు !

ఇలాంటి జ్యోతిష్కుల వల్లే నిజమైన శాస్త్రానికి విలువ లేకుండా పోతోంది. ఇది కూడా కలిమాయేగా మరి !

చెడిపోతున్న వివాహజీవితాలు - జ్యోతిష్య శాస్త్రం

వివాహం అనేది పాతకాలంలో అయినా ఈ రోజుల్లో అయినా ఒకటే. సంసారం అనేది కూడా ఒకటే. అప్పటికీ ఇప్పటికీ సౌకర్యాలు మారి ఉండవచ్చు. జీవన విధానాలు మారి ఉండవచ్చు. కానీ వివాహబంధం అనేది ఒకటే.

పాతకాలంలో అయితే, ఆర్ధిక కారణాల వల్ల కావచ్చు, సమాజం హర్షించదన్న కారణం వల్ల కావచ్చు, భద్రత కోసం కావచ్చు, ఇలా రకరకాల కారణాల వల్ల ఇష్టంలేని పెళ్లి చేసుకున్నా అలాగే కలసి కాపురం చేస్తూ ఉండేవాళ్ళు. కానీ ఇప్పుడు పరిస్థితులు మారిపోయాయి. ప్రయారిటీస్ మారిపోయాయి. అందుకే ఇప్పుడు ఎవరికి నచ్చకపోయినా వెంటనే విడిపోతున్నారు.

అదలా ఉంచితే, మోడరన్ లైఫ్ లోని పరిస్థితుల వల్ల, జీవిత భాగస్వామిని ఎంచుకునే ప్రక్రియలోనే లోపాలు తలెత్తుతూ ఉన్నాయి. ఆర్ధికభద్రత ఉంది గనుక, మన జీవితాన్ని మనమెందుకు పాడు చేసుకోవాలి అన్న ఆలోచనతో చాలామంది అమ్మాయిలే నేడు ధైర్యంగా విడిపోతున్నారు.

ఈ పరిణామాలకు తగినట్లే నేడు జాతకాలలో కూడా అలాంటి గ్రహస్థితులు కనిపిస్తున్నాయి. పేదవారి కుటుంబాలలో మాత్రమే ఇలాంటి జాతకాలు ఉంటాయని, ఇలాంటి పరిస్థితులు ఎదురౌతాయని, డబ్బున్నవారి కుటుంబాలలో వివాహజీవితాలు చెడిపోవని అనుకుంటే తప్పే. ధనిక కుటుంబాలలో కూడా ఇవే పరిస్థితులు కనిపిస్తున్నాయి. కర్మకు గొప్పా బీదా తారతమ్యం లేదు. అది ఎవరినైనా ఒకే విధంగా పీడిస్తుంది.

అలాంటి ప్రాక్టికల్ కేసు నొకదాన్ని ఈ పోస్టులో గమనిద్దాం. ఈమె 12-1-1991 న జన్మించింది. ఈమె జాతకాన్ని ఇక్కడ చూడవచ్చు. ఈమె జ్యేష్టా నక్షత్రంలో జన్మించింది. సామాన్యంగా అయితే, మనలో ఒక నమ్మకం ఉన్నది. జ్యేష్ట, ఆశ్లేష, మూల నక్షత్రాలలో పుట్టిన అమ్మాయిలకు వివాహదోషం ఉంటుందని చాలామంది నమ్ముతూ ఉంటారు. అది పూర్తిగా అబద్దమూ కాదు, పూర్తిగా నిజమూ కాదు. దోషం అంటే అసలు వివాహం కాకపోవడం కాదు. అయ్యాక ఒచ్చే సమస్యలు కూడా వివాహదోషాలు గానే పరిగణింపబడతాయి. ఈ మూడు నక్షత్రాలలో పుట్టిన అమ్మాయిలకు వివాహజీవితాలలో ఒడిదుడుకులు సర్వసాధారణంగా ఉంటూ ఉంటాయి. అయితే, మంచి సంబంధాలు చెడిపోతాయి. మంచివాటిని ఒదులుకుని, ఒకప్పుడు తాము వద్దనుకున్న సంబంధాలనే చేసుకోవలసి వస్తుంది. లేదా చేసుకున్న తర్వాత అనేక సమస్యలతో వివాహ జీవితం గందరగోళం అవుతుంది. దీనికి లక్షా తొంభై కారణాలుంటాయి.

ద్వితీయస్థానం కుటుంబాన్ని సూచిస్తుంది. చతుర్ధస్థానం సుఖస్థానాన్ని సూచిస్తుంది. సప్తమస్థానం వివాహభావాన్ని సూచిస్తుంది. ద్వాదశభావం దాంపత్య సౌఖ్యాన్ని సూచిస్తుంది. వీటిల్లో ఏయే భావం ఎక్కువగా చెడిపోయి ఉంటే, ఆయా భావాలు సూచిస్తున్న విషయాలలో సమస్యలు తప్పకుండా ఉంటాయి. ఇది స్థూల పరిశీలన. సూక్ష్మంగా చూచినపుడు ఇంకా అనేక విషయాలు మనకు తెలుస్తూ ఉంటాయి.

ఈ అమ్మాయి జాతకాన్ని గమనిద్దాం.

రాహువుగానీ కేతువుగానీ లగ్నంలో ఉన్న జాతకాలలో సామాన్యంగా వివాహజీవితం బాగుండదు. కానీ కొన్ని కొన్ని ప్రత్యేక పరిస్థితులలో మాత్రం వీరిద్దరే యోగకారకులౌతూ ఉంటారు. ఆ తేడాలు జాతకపరిశీలనలో అనుభవం మీద అర్ధమౌతాయి. సాధారణంగా అయితే, కేతువు లగ్నంలో ఉన్నప్పుడు జీవితభాగస్వామి నుంచి అణచివేతను, హింసను, ఆ జాతకుడు లేదా జాతకురాలు అనుభవించవలసి వస్తూ ఉంటుంది. ఈ అమ్మాయి జాతకంలో సరిగ్గా అదే జరిగింది.

ఈ అమ్మాయికి సప్తమభావంలో మూడు గ్రహాలున్నాయి. వీటిలో శని, రాహువులు బాగా దగ్గరగా ఉన్నాయి. ఇది శపితయోగం. కనుక ఈ అమ్మాయి వివాహ జీవితంలో శాపం ఉన్నదని తెలిసిపోతున్నది. కానీ ఈ అమ్మాయి బాగా డబ్బున్న కుటుంబంలో పుట్టింది. డిల్లీలో చదువుకున్నది. కనుక జ్యోతిష్యాన్ని నమ్మేది కాదు. ఈమె నాన్న డిల్లీలో మంచి వ్యాపారి కావడంతో ఆయన కూడా నమ్మేవాడు కాదు. నమ్మకపోగా జ్యోతిష్యాన్ని గురించి ఎగతాళిగా హేళనగా మాట్లాడుతూ ఉండేవారు. చాలామంది ఇంతే ! అన్నీ బాగా జరుగుతూ ఉన్నప్పుడు అహంకారంతో కన్నూమిన్నూ గానకుండా మాట్లాడుతూ ఉంటారు. కాలం కొద్దిగా ఎదురు తిరిగేసరికి బోర్లా పడిపోయి ఏడుస్తారు.

జీవితం చాలా విచిత్రమైనది. చాలాసార్లు మనం తీసుకునే చిన్నచిన్న నిర్ణయాలు తర్వాత కాలంలో మన జీవితాలలో పెద్దపెద్ద మార్పులకు కారణాలౌతాయి. అయితే, ఆ నిర్ణయాలు తీసుకునే సమయంలో మన తలకాయ పనిచెయ్యదు. భవిష్యత్తు కనిపించదు. అంతా బాగుంటుందిలే అనే అనిపిస్తుంది. కానీ అలా జరగదు. అదే కర్మ రహస్యం !

ఇదిలా ఉండగా ఈ అమ్మాయి ఇండియాలో ఇంజనీరింగ్ పూర్తి చేసి లండన్లో ఎమ్మెస్ చదివింది. ఆ క్రమంలో అక్కడ ఒక బ్రిటిష్ అబ్బాయితో ప్రేమలో పడింది. అతన్నే పెళ్లి చేసుకుంటాననీ లేకుంటే సూయిసైడ్ చేసుకుంటాననీ బెదిరించడంతో తల్లిదండ్రులు ఆ అబ్బాయినిచ్చి 2016 లో పెళ్లి చేశారు. పెళ్ళైన తర్వాత ఈ అమ్మాయికి కొన్ని భయంకరమైన నిజాలు తెలిశాయి. అవేంటంటే, ఆ అబ్బాయి డ్రగ్స్ కు బానిస. ఇంట్లో ఉన్నప్పుడు ఈ అమ్మాయిని తిట్టి కొట్టి నానా హింసా పెట్టేవాడు. కానీ బయట సొసైటీలో మాత్రం చాలా మంచివాడుగా నటించేవాడు. ఒకవిధమైన సైకో అని చెప్పాలి. ఇవి చాలవన్నట్లు ఇతనికి ఇంకొంతమంది ఇంగ్లీషు అమ్మాయిలతో సంబంధాలున్నాయి. ఈ అమ్మాయి జాతకంలో చంద్రుడినుంచి సప్తమంలో శుక్రరాశిలో ఉన్న కుజుడు దీనినే స్పష్టంగా సూచిస్తున్నాడు.

ఇదిలా ఉండగా, మూడే మూడు నెలలు తిరిగేసరికల్లా ఒక రోజున ఈ అమ్మాయిని బాగా కొట్టి ఇంట్లోనించి బయటకు నెట్టేశాడు. తను బయట ఒక ఫ్రెండ్ ఇంట్లో తలదాచుకుని డైవర్స్ కు అప్లై చేసుకుంది. 2018 లో డైవర్స్ అయిపొయింది. ఇంతా చేస్తే ఇప్పుడామెకు 26 ఏళ్ళు మాత్రమే.

2016 లో పెళ్లి జరిగినప్పుడు ఈ అమ్మాయి జాతకంలో శుక్ర - చంద్ర దశ జరిగింది. శుక్రుడు సప్తమంలో సప్తమాధిపతి అయిన శనితో కలసి ఉంటూ వివాహాన్ని సూచిస్తున్నాడు. శని దారాకారకుడు కూడా అయ్యాడు. చంద్రుడు లగ్నాదిపతిగా పంచమంలో ఉంటూ ప్రేమ వివాహాన్ని సూచిస్తున్నాడు. కనుక వీరిద్దరి దశలలో వివాహం అయింది.

కానీ శుక్రుడు శపితయోగ పరిధిలో ఉన్నాడు. కనుక వివాహం మీద శాపం ఉన్నది. లగ్నాధిపతి చంద్రుడు ప్రేమను సూచించే పంచమస్థానంలో నీచస్థితిలో ఉన్నాడు. కనుక ఈ జాతకురాలు ఒక నీచుడిని ప్రేమిస్తుంది అని తెలుస్తోంది. సరిగ్గా అలాగే జరిగింది కూడా !

తెల్లతోలుతో ఉండి, మూడు రెస్టారెంట్లకు తిప్పి, నాలుగు మాయమాటలు చెప్పేసరికి ఆ అబ్బాయి మంచివాడని జాతకురాలు అనుకుంది. పడిపోయింది. కానీ అతని నిజస్వరూపం ఏమిటో పెళ్లి తర్వాత నెలలోపే ఈ అమ్మాయికి అర్ధమైపోయింది. కానీ అప్పుడు చేసేదేమీ లేదు. చేతులు కాలిపోయాయి.

ఖచ్చితంగా చెప్పాలంటే ఈ అమ్మాయి వివాహం శుక్ర - చంద్ర - శని దశలో జరిగింది. శుక్ర - చంద్ర - బుధ దశలో విడాకులకు అప్లై చెయ్యడం జరిగింది. విదశానాధుడైన బుధుడు శత్రుక్షేత్రంలో కుటుంబస్థానాధిపతి అయిన సూర్యునితో కలసి ఉండటం గమనించాలి. కనుక కుటుంబంలో గొడవలు వచ్చాయి. సూర్యుడు పిత్రుకారకుడు గనుక తండ్రితో కూడా మనస్పర్ధలు వచ్చాయి. "మేము చెబితే వినకుండా తెల్లవాడి ప్రేమలో పడి జీవితం పాడు చేసుకున్నావ్. ఇప్పుడేమైందో చూడు" అని తండ్రి అన్నాడని ఈ అమ్మాయి అలిగి తండ్రితో తల్లితో మాట్లాడటం మానేసింది. ఇటు తల్లిదండ్రులకూ దూరమైంది. అటు భర్తకూ దూరమైంది. స్నేహితురాలి ఇంట్లో ఎన్నాళ్ళు ఉంటుంది? కనుక లండన్లో ఒక ఇల్లు తీసుకుని ఉద్యోగం చేసుకుంటూ నివసిస్తోంది.

"కారకో భావనాశక:" అనే సూత్రం ప్రకారం దారాకారకుడూ, సప్తమాదిపతీ అయిన శని సప్తమంలోనే ఉండటం వల్ల ఈ అమ్మాయి జాతకంలో వివాహభావం దెబ్బ తిన్నది.

శని - రాహు దశలో ఈ అమ్మాయికి డైవర్స్ గ్రాంట్ అయింది. వీరిద్దరూ శపితయోగంలో వివాహాన్ని సూచించే సప్తమభావంలో ఉండటం గమనిస్తే వారి దశలోనే ఎందుకు డైవర్స్ గ్రాంట్ అయిందో అర్ధమౌతుంది. వీరి దశ 2021 వరకూ ఇంకా మూడేళ్ళున్నది. ప్రస్తుతం ఈ అమ్మాయికి కసి మొదలైంది. అబ్బాయిలమీద ద్వేషం పెంచుకున్నది. కానీ వయసు ప్రభావం వల్ల మళ్ళీ అబ్బాయిల వేటలో పడింది. ఇలాంటి ద్వంద్వమనస్తత్వం కూడా శపితయోగ ప్రభావమే. ఒకవేళ రెండో పెళ్లి చేసుకున్నప్పటికీ ఈమె వివాహ జీవితం ఏమంత బాగా ఉండదని అదే శనికి అష్టమాధిపత్యం పట్టడం చెబుతున్నది.

ఒకవేళ ఈ అమ్మాయీ, ఈమె తండ్రీ, ఈ పెళ్ళికి ముందే జాతక ప్రకారం దోషపరిహారాలు చేసుకుని ఉంటే ఈమె జాతకం ఇంకో విధంగా ఉండేదా? అనేది ఒకాయన నన్నడిగిన ప్రశ్న.

ఖచ్చితంగా వేరే విధంగా ఉండేది. కానీ ఆ దోషాన్ని నిజంగా తొలగించగలిగే పరిహారాలు చెప్పే మంచి జ్యోతిష్కుడు వాళ్లకు దొరకాలి. సగం అదే జరగదు. ఆ జ్యోతిష్కుడినీ ఆ పరిహారాలనూ వాళ్ళు నమ్మి అవి చెయ్యాలి. ఈ సగం అసలే జరగదు. ఈ రెండూ జరిగినప్పుడుకదా ఆ దోషం పోవడమో లేదో తెలియడం? ఇవన్నీ జరక్కుండా ఎన్నో అడ్డు పడుతూ ఉంటాయి.

మనకు డబ్బుంది, మనకేంటి? అని కొందరు అహంకారంలో ఉంటారు. మనం చదువుకున్నాం, తెలివితేటలున్నాయ్ మనకేంటి? అని ఇంకొందరు అనుకుంటారు. జ్యోతిష్యం ఏంటి?  నాన్సెన్స్ అని ఇద్దరూ అనుకుంటారు. ఎవరు ఏ రకంగా అనుకున్నా, కర్మ అనేది వీటన్నిటినీ అధిగమించి వారికి ఇవ్వాల్సింది ఇస్తూనే ఉంటుంది. అదే సృష్టి రహస్యం అంటే.

జీవితంలో ఎన్ని ఉన్నప్పటికీ, జాతకం ప్రకారం ఉన్న చెడుయోగాలను అనుభవించక తప్పదనడానికి, ధనిక కుటుంబంలో పుట్టి, విదేశాలలో చదువుకుని, ఉద్యోగం చేస్తూ, విలాసాలలో బ్రతుకుతూ, 24 ఏళ్ళకే భర్తతో విడిపోయి, 26 ఏళ్ళకే డైవోర్స్ తీసుకున్న ఈ అమ్మాయి జాతకమే ఒక ఉదాహరణ.

కాదంటారా?

వాగుడమ్మ - వంటమ్మ

ఆధ్యాత్మిక జీవితంలో పుస్తకాలు చదవడానికీ, దానినుండి సంపాదించే మోతబరువు జ్ఞానానికీ ఏమీ విలువ ఉండదు. అనుభవమే అక్కడ ప్రధానం. కానీ సోకాల్డ్ ఆధ్యాత్మికులు చాలామంది ఊరకే పుస్తకాలు చదివి, బుద్ధితో అర్ధం చేసుకుని, తమకు అర్ధమైనదానిని ఇతరులకు చెబుతూ, అదే పెద్ద ఘనకార్యం అని పొంగిపోతూ ఉంటారు. టీవీ ఉపన్యాసకులూ, ధర్మప్రచారకులూ చాలామంది ఇలాంటి వారే. ఇంటర్ నెట్లో అయితే ఇంక చెప్పనక్కరలేదు. దాదాపు అందరూ అలాంటివారే.

కొన్నేళ్ళ ముందు నాతో ఒకమ్మాయి మాట్లాడుతూ ఉండేది. ఆమె నా బ్లాగు ఫాలోయర్. నా బ్లాగుకు బాగా అడిక్ట్ అయిపోయి, రోజుకు మూడు నాలుగు సార్లు ఓపన్ చేసి చదువుతూ ఉండేది. నేను ఒకటి రెండురోజుల పాటు ఏమీ వ్రాయకపోతే నాకు ఫోన్ చేసి 'ఏంటండి? ఏమీ వ్రాయలేదు?' అని అడుగుతూ ఉండేది. ఆ గొంతును బట్టి ఆమె ఎందుకు అలా అడుగుతోందో నాకు తేలికగా అర్ధమైపోతూ ఉండేది. కానీ తనను ఏమీ నిరుత్సాహపరిచేవాడిని కాను. 'రేపు వ్రాస్తాను, చదవండి' అని చెబుతూ ఉండేవాడిని.

తానెప్పుడూ మిగతా విషయాల గురించి అడగదు. శుద్ధ ఆధ్యాత్మిక పోస్టులే అడుగుతుంది. వాటినే చదువుతుంది. మిగతా పోస్టులు చదవదు. వాటిని గురించి మాట్లాడదు. ఆమె బంధువులలో స్నేహితులలో అందరూ ఆమెను ఎంతో గొప్ప ఆధ్యాత్మికవేత్త అని అనుకుంటూ ఉండేవారు. ఆ ఇమేజిని తనుకూడా బాగా ఎంజాయ్ చేస్తూ ఉండేది.

కొన్నేళ్ళు అలా గడిచాక, ఒకరోజున ఫోన్లో నాతో మాట్లాడుతూ అసలు విషయాన్ని ఆమె చెప్పేసింది.

'మీరు ఆధ్యాత్మిక పోస్టులు చాలా బాగా వ్రాస్తారు.'

'అదిసరే. వాటిని చదివి మీరేం చేస్తున్నారు?' అనడిగాను.

'మా క్యాస్ట్ లో ఆధ్యాత్మిక విషయాలు తెలిసినవాళ్ళు తక్కువ. ఎంతసేపూ వ్యాపారాలు, డబ్బు సంపాదనా తప్ప ఇంకోటి తెలీదు వీళ్ళకు. నేను మీ పోస్టులు చదివి తెలుసుకున్న వాటిని మా వాళ్లకు చెబుతూ ఉంటే వాళ్ళు చాలా ఆశ్చర్యపోతూ ఉంటారు' అంది.

'ఓహో అలాగా ! అవి నా పోస్టులని మీరు చెబుతారా? లేక మీ సొంత నాలెడ్జిగా చెబుతారా?' అడిగాను.

'మీ పేరు ఇంతవరకూ వాళ్ళకు చెప్పే అవకాశం రాలేదు. మీ బ్లాగులో తెలుసుకున్న విషయాలను మాటల సందర్భంలో నా మాటలుగా వాళ్లకు చెబుతూ ఉంటాను.' అన్నది.

'అదా సంగతి? అందుకా, మాటమాటకీ ఇంకా క్రొత్తవి వ్రాయలేదేంటి? ఎప్పుడు వ్రాస్తారు? అని అడుగుతూ ఉంటారు' అన్నాను.

'అవును' అన్నది.

'ఈ పనివల్ల మీ అహంకారం పెరగడం తప్ప ఉపయోగం ఏముంది?' అడిగాను.

'అదేంటి?' అంది.

'అవును. ఎవరో వ్రాసినవాటిని మీ నాలెడ్జిగా నలుగురిలో ప్రదర్శించుకుంటూ పొంగిపోతూ ఉంటే జరిగేది అహంకారం పెరగడమే కదా? అది ఆధ్యాత్మికానికి వ్యతిరేకం అవుతుంది. మరి మీవాళ్ళతో మీ ఆధ్యాత్మిక సంభాషణకు అర్ధం ఏముంది? మీరు చెయ్యాల్సింది నా బ్లాగు చదివి వేరేవాళ్ళకి చెప్పడం కాదు. ఆ చదివినదానిలో ఒక్కటైనా ముందుగా ఆచరించి అనుభవంలో దానిని మీ సొంతం చేసుకోవాలి. అప్పుడే దానికి సార్ధకత. లేకుంటే మీది గాడిదబరువే. ఆధ్యాత్మిక గ్రంధాలు మోసే గాడిదకూ మీకూ తేడా ఏముంది? మీరు వాగుడమ్మేగాని వంటమ్మ కాదు.' అన్నాను.

నేనలా అన్నానని నా మీద కోపం తెచ్చుకుని అలిగి అప్పటినుంచీ నాతో మాట్లాడటం మానేసింది. నాకు నవ్వొచ్చింది. ఒకరు నాతో మాట్లాడినా మాట్లాడకపోయినా నాకేమీ నష్టం లేదు. ఉన్న సత్యాన్ని సత్యంగా స్వీకరించలేనివారు నాతో ఉంటే ఎంత? లేకుంటే ఎంత? మనిషి చెరువుమీద అలిగితే ఎవరికీ నష్టం?

ఒకామె వంటలు ఎలా చెయ్యాలని ఎన్నో ఉపన్యాసాలిస్తూ ఉండేది. వినేవారు ఆమె ఉపన్యాసాలు విని డంగై పోతూ ఉండేవారు. వాళ్ళు ఇంకా కొంతమందికి ఆ వంటలను గురించి చెబుతూ ఉండేవారు. కానీ ఆ వంటలను ఆమె చేసిందీ లేదు. తిన్నదీ లేదు. విజ్ఞానప్రదర్శన మాత్రం బాగా సాగుతూ ఉండేది.

ఇంకొకామె ఉండేది. ఆమెకు ఇన్ని వంటలూ తెలీవు. ఉపన్యాసాలూ రావు. ఆమె వంటల పుస్తకాలు చదివి అందరిలో విజ్ఞానప్రదర్శన చేసిందీ లేదు. మౌనంగా తనకొచ్చిన ఒక్క వంటకాన్నీ వేళకు చేసుకుని హాయిగా తిని పడుకునేది. ఆనందంగా జీవితాన్ని గడిపేది. మొదటామె వాగుడమ్మ. రెండవామె వంటమ్మ. వాగుడమ్మకు వాగుడే మిగుల్తుంది. వంటమ్మకు ఆకలి తీరుతుంది.

నాకు కావలసింది వంటమ్మలే గాని వాగుడమ్మలు కాదు. సత్యానికి కావలసింది సత్యాన్ని అనుసరించేవారేగాని తనది కానిదాన్ని తనదిగా చెప్పుకుంటూ పోజు కొట్టే విజ్ఞానప్రదర్శకులు కారు. అలాంటివారు ఆధ్యాత్మిక జీవితంలో ఎన్నటికీ ఎదగలేరు.