జ్యోతిష్యదుర్భిణీ లోనుంచి ఏం జరుగుతున్నదో చూద్దాం.
శుక్ర రాహువుల పాత్ర
జలకారకుడైన శుక్రుడు ప్రస్తుతం రాహువును వేగంగా సమీపిస్తున్నాడు. రాహువుకూడా శుక్రుడినే సూచిస్తూ ఉచ్ఛస్థితిలో ఉన్నాడు. అక్కడే మరొక జలగ్రహమైన చంద్రుడు కూడా ఉచ్ఛస్థితిలో ఉన్నాడు. కనుక జలభూతం అమితమైన బలాన్ని సంతరించుకుంది. వీరి కోణదృష్టి మకరంలో ఉన్న శనిమీదున్నది. మకరరాశి భారతదేశానికి సూచిక. మన దేశపు స్వతంత్రసమయలగ్నం వృషభమే. అదే వృషభంలో ఇప్పుడు జలభూతం విజృంభించడం, టౌటే తుఫాన్ అదే సమయంలో తలెత్తడం కాకతాళీయమనుకుందామా?
శుక్రుడు రాహువుయొక్క 5 డిగ్రీల పరిధి (ఆర్బ్) లోకి రాగానే అరేబియా సముద్రంలో డిప్రెషన్ మొదలైంది. శుక్ర రాహువుల మధ్యన దూరం తగ్గుతున్న కొద్దీ తుఫాన్ బలపడుతున్నది. ఈ క్రింది పట్టికను గమనించండి.
డిప్రెషన్ మొదలైన 14 వ తేదీన, అది తుఫాన్ గా మారిన 15, 16 వ తేదీలలో శుక్రుడు వృషభం 15 డిగ్రీలలోపలే ఉన్నాడు. అంటే, పశ్చిమదిశలో ఉన్నాడు. కనుక భారతదేశంలోని పశ్చిమ సముద్రంలో తుఫాన్ మొదలైంది. 17 వ తేదీనుంచి శుక్రుడు 15 డిగ్రీలను దాటి, ఉత్తరదిక్కులోకి ప్రవేశించాడు. కనుక తుఫాన్ ఉత్తరదిక్కుగా దిశను తీసుకుని, గోవా మీదుగా గుజరాత్ వైపు వెళ్లడం మొదలుపెట్టింది.
వృషభరాశిలో ఉన్న శుక్రుడు సవ్యదిశలో ముందుకు ప్రయాణిస్తున్నాడు. రాహువు దానికి వ్యతిరేకంగా అపసవ్యదిశలో ప్రయాణిస్తూ శుక్రుడిని మ్రింగబోతున్నట్లుగా కదులుతున్నాడు. వీరిద్దరి కంజక్షన్ ఎల్లుండి అంటే 18 వ తేదీన జరుగుతుంది. కనుక ఆ రోజున తుఫాన్ తీరాన్ని తాకుతుంది.ఆ తరువాత బలహీనపడిపోతుంది. 19 నుంచి శుక్రుడు రాహువును దాటి ముందుకు సాగిపోతాడు. కనుక తుఫాన్ బలహీనపడుతుందని ఊహిస్తున్నాను.
చూద్దాం ముందుముందు ఏం జరుగనున్నదో !
