అందరికీ స్పీచులివ్వడం
ఆచరణ మాత్రం లేకపోవడం
అంతా మాయేననడం
ఆకు రాలితే అల్లాడిపోవడం
ఇదే ఆధ్యాత్మికం
ఓ బుజ్జిపాపా !
తెలిసినవాడూ తెలియనివాడూ
అన్నీ తమకే తెలుసనుకోవడం
ఎదుటివాడి స్థితి తెలియకుండా
ఏదేదో వాగబోవడం
ఇదే ఆధ్యాత్మికం
ఓ బుజ్జిపాపా !
అరువు తెచ్చుకున్న గేనాన్ని
అందరికీ పంచడం
అన్యుల సొమ్మంతా తనదేనని
అరుస్తూ ఊరేగడం
ఇదే ఆధ్యాత్మికం
ఓ బుజ్జిపాపా !
అందరికీ ప్రవచనాలిస్తూ
ఆరిందాలా మాట్లాడటం
దొంగబ్రతుకు బ్రతుకుతూ
దొరికిపోతామని భయపడటం
ఇదే ఆధ్యాత్మికం
ఓ బుజ్జిపాపా !
అహంకారంతో అలమటిస్తూ
ఆత్మజ్ఞానిననుకోవడం
ఓ బుజ్జిపాపా !
ఆత్మా పరమాత్మా అంటూ
ఆశను దాటలేకపోవడం
అచలం అచలం అంటూ
ఎప్పుడూ చలిస్తూనే ఉండటం
ఓ బుజ్జిపాపా !
అరువు సమాచారంతో
తలంతా ఉబ్బిపోవడం
అడుగేసే శక్తంటూ లేక
ఒళ్ళంతా పుల్ల కావడం
ఓ బుజ్జిపాపా !
ఆధ్యాత్మికపు అంగడి తెరిచి
అరువు బేరాలు సాగించడం
అష్టకష్టాలు చుట్టుముడితే
అయ్యో అంటూ గుక్కపెట్టడం
ఓ బుజ్జిపాపా !